Markus 14
14
Madakal dakal ege əy kezen zlap ŋ mbal Yesu, ŋ ja aza
1Aya, a menha wan gbak, ŋ ja gwaygwaya Paska ey gwaygwaya peŋ maa əys ŋma askwaw. Madakal dakal mala kwakwas ege ey maghwal ma maŋkanaŋkan ege əy mpam taf ma ata mbal Yesu a werwer, ŋ jaza. 2Cemey, əy zlap ŋ taba tata, əy ŋgaya: «Heje ɗaw ŋ mbalaw, ŋ gwaygwaya, səkwaw, mavəday, hejəye əy nambaw ma.»
Wala wende a zah mel ma kenjef feŋfeŋ ata ha Yesu
3Yesu mbəy ŋ Baytanəya a wata Səymawn, fagwalakw. Maa a kazam uda ca, wala wende aka, a ndaha zlaɓa gajak ma tuwah malamalam ŋ ŋkəɗaŋ maa əy kayaɓa albatəra, ghef a mel maa əy kayaɓa nardəy, kaw kékəveɗeye askwaw, səkam anta, səlay dakala. A təwse ca, a ŋga ma gajak wese, a zahza mel anta ata ha Yesu. 4Hejəye vedəye ma a təwse ege əy kághwaɗ tata, aya, əy zlap, əy ŋgaya: «Wala anta a gayza mel anta aka ŋ vay? 5Keɗe mbəy kula ŋ səkam mel anta aza day aha səlay temere mahkaɗ#14.5 temere mahkaɗ ata vah wese ca, ara dala laŋtar zlan mala ɗala va pal, a veletene ŋ metetekw ege!» A təwse ca, əy gulakza wala wese. 6Cemey, Yesu a zlepetene, a ŋgaya: «Hune yakza. Hune bewzene ha ata vemey? Səkan maa a lekey ŋghe ca, tuwah. 7Metetekw ege ca, əy ara hune kaw vepey. Hune kula ŋ letene taŋtaŋ aza a vah maa hune kedeŋza. Cemey, sa ca, hune kenelemekey ŋ nja ara hune ata pes ata pes, askwaw. 8Wala ŋgha ca, kála səkan maa mbəy kula ŋ law, aza. Vah anta ule, cemey, kétemzekey mel ma ata mpesekey aza ata kusam. 9Sa kazlapahune njenjəwen, kaw a katay ata la maa əy kanaghwalza Ma Mewe ma Taŋtaŋ ŋ manhayak tewtew ca, əy naslap labara ata səkan maa wala ŋghe anta a law, ndar əy senzene a heɗe.»
Yahuda a valza Yesu ŋ ja aza
10Aya, Yahuda Əyskarəyawt, ɗala teŋguleŋ ŋ taba malaɓ anta ma wam aha gbak ege, a nda ara madakal dakal mala kwakwas ege, ŋ səkam Yesu aza. 11Maa əy zləme ma anta ca, əy sasam. Aya, əy zlepene, əy ŋgaya: «Mada hwa késəkemene Yesu aza ca, nene navalahwaw səlay.» Aya, Yahuda a mpam vah ma tuwah ŋ səkemetene Yesu aza.
Yesu a zam uda gwaygwaya Paska ey malaɓ anta ege
12Ata wan ma mpar mala gwaygwaya peŋ maa əys ŋma askwaw, pes maa əy kafat mba ŋtəmek mala gwaygwaya Paska ca, madarlaŋw anta ege əy zlepene, əy ŋgaya: «Hwa ɗaw nene nda ŋ slahwaw la ma ata zam uda gwaygwaya Paska aka ca, a katay?» 13Aya, a laɓzata madarlaŋw anta ege gbak, a zlepetene a ŋgaya: «Hune nda ŋ uzam, hune neŋgel ma a heje wende aka, a ketew dugwazl yam, hune səbaraw. 14Ŋ ujek maa a kanadam ca, hune zlepene ŋ təwjek anta, huney: “Masasərak, a ŋgaya: Ujek naka maa sa kanazam uda gwaygwaya Paska ŋma zlaɓa madarlaŋw naka ege ca, vekey?” 15A təwse ca, heje anta a naghwalzahune ujek mgba ata ha ujek, belembelem, késleye a səkan ege tewtew ŋma. Hune slaheje səkan ma ata zam mala gwaygwaya aka a təwse.» 16Madarlaŋw ege əy nda ŋ uzam, əy ndew ata səkan ege tewtew ana maa a zlepetene wese. Aya, əy sla səka ma ata zam mala gwaygwaya Paska.
Yesu a ghwalza madarlaŋw anta ma teŋguleŋ ma kanasəkamaw
17Maa mackwahw a la anta ca, Yesu a ndaha ey madarlaŋw anta ma wam aha gbak ege. 18Aya, maa əy kazam uda ca, Yesu a zlepetene, a ŋgaya: «Sa kazlapahune njenjəwen, ɗala teŋguleŋ ŋ taba ŋkune maa heje kazamakwaw uda ŋ la anta, ara mbe ma kenesəkemekey aza.» 19A təwse ca, madarlaŋw ege əy kághwaɗ tata, aya, əy ɗawza teŋguleŋ teŋguleŋ, əy ŋgaya: «Ara sa vaw?» 20A zlepetene a ŋgaya: «Ara ɗala teŋguleŋ ŋ taba ŋkune ma wam aha gbak, ma kadam ra a sa ŋ tekeɗ. 21Njenjəwen, Mba Ɗala a namac ana maa kéŋtereye a heɗe. Cemey, gef ata heje anta ma kanasəkam Mba Ɗala aza, zukwan heje anta kámbawha askwaw.»
Kusam ey mbambaz Yesu
22Maa əy kazam uda ca, Yesu a ŋta peŋ, a lene wasay ŋ Gazlavay, a ŋga aka, a veletene ŋ madarlaŋw anta ege, a zlepetene, a ŋgaya: «Hune ŋtaw, ebe ŋghe ca, ara kusam naka.» 23A dəwze anta, a ŋta tekeɗ mavaw, aya, a lene wasay ŋ Gazlavay, a veletene, əy sa tewtew tata. 24Aya, a zlepetene, a ŋgaya: «Ebe ŋghe ca, ara mbambaz naka, mala laŋkan ma mala Gazlavay ma zahaha mavəday hejəye vəram. 25Njenjəwen, sa kazlapahune, kaw sa kanasa mavaw zeney askwaw, ha a pes maa sa kanasa mavaw mewe ŋ Lazam bay mala Gazlavay.»
Yesu a ghwalza Pəyer, a nehey anta a heɗe
26Aya, əy la dəraf ege ma ata həmanza Gazlavay. A dəwze anta, əy nda tata ŋ barla mpe Jaytun. 27A təwse ca, Yesu a zlepetene, a ŋgaya: «Hune tewtew ŋkune, hune neyekzekey ka, mavəday, kéŋtereye ŋ Ɗerewel ma keweɗ, a ŋgaya:
“Sa naja mba njəwen aza,
aya, ŋtəməye, əy neweɗ tata.”
28Cemey, a dəwze maa sa kágwarzamha aza ata lamac ca, sa nanda mpar aha hune ŋ Galəyləy.» 29Pəyer a zlepene, a ŋgaya: «Kaw hejəye tewtew, əy kayakzahwaw ka ca, a naka ca, sa kanayakzahwaw ka askwaw.» 30Aya, Yesu a zlepene, a ŋgaya: «Sa kazlapahwaw, njenjəwen, a zaɗaw ma a tambaca ŋgha, mar gamzakw a naja ula gas gbak ca, hwa ca, hwa nazlap gas mahkaɗ, hwa kesenekey səkwaw.» 31Cemey, Pəyer a zenene zeney, a ŋgaya: «Kaw mada mamaw namac ŋ la anta ca, sa kanazlap, sa kasanahwaw səkwaw ca, askwaw.» Aya, tata tewtew tata, əy zlap ana mbe.
Yesu a rak Gazlavay ŋ Gecemane
32Ata Yesu ey madarlaŋw anta ege, əy hwasha ata la maa əy kayaɓa Gecemane, aya, a zlepetene ŋ madarlaŋw anta ege, a ŋgaya: «Hune nja ka ete ŋghe, sa nda ŋ rak Gazlavay.»
33A ŋta ata Pəyer ey Yakuba leŋ Yuhana. Aya, a mar ŋ lalak leŋ ŋkwaɓ a ŋgene mambaza. 34A zlepetene, a ŋgaya: «Gef ma ŋ unaf naka a kenejekey aza. Hune nja ka ete ŋghe, hune ɗaw ŋ wan ŋkune səkwaw.» 35Aya, a nda anta gədak cekuɗe, a ndav ata hayak, a rak Gazlavay, a ŋgaya: «Mada a lem anta ca, vah anta mekese anta gədak a sa.» 36A zlap, a ŋgaya: «Abba, Vana, səkan tewtew ca, hwa kula ŋ lata aza. Ŋtekey gef maa sa kanasa ŋghe aza! Hwa ɗaw ŋ la ana maa sa kaɗaw səkwaw, cemey, la ana maa hwa kaɗawaw.» 37A dəwze anta, a zenha ara madarlaŋw anta ege ma mahkaɗ wese ca, a ndewzetene əy káwan tata. Aya, a zlepene ŋ Pəyer, a ŋgaya: «Səymawn, hwa kawan vaw! Hwa kélem ɓarɓar ma ata nja ka a nje kaw walaŋ cekuɗe ende ŋghe askwaw vaw? 38Hune ɗaw ŋ wan ŋkune səkwaw, hune rak Gazlavay, ndar səkan ma dadawar a ɗaw ŋ baɗzahune ŋ la gay səkwaw. Zəwet ca, a kaɗaw ŋ la səkan ma tuwah, cemey, kusam ca, mbəy ŋkulaf.» 39A zeney, a nda gədak, a rak Gazlavay, ana maa a la ŋcəne anta. 40A dəwze anta, a zenha ara madarlawŋ anta ege zeney, a ndewzetene əy káwan tata mavəday, əy kula ŋ nja ka a nje səkwaw. Aya, əy kasan ma maa əy kenezlepene səkwaw. 41Mamahkaɗ anta ca, a ndaha, a zlepetene, a ŋgaya: «Hune kawan, hune kazazak war vaw? Ga eze! Vah kála anta. Ŋghe, Mba Ɗala késəkemeye aza asa ra mala gay ege. 42Hune gwarzam, mazakwaw aza! Hune sarza, heje ma səkemekey kándaha aza.»
Lambal Yesu
43A təwse a təwse, maa Yesu a kazlap kwagwa ca, Yahuda, ɗala ma teŋguleŋ ŋ taba malaɓ anta ma wam aha gbak ege wese, a ndaha zlaɓa hejəye vəram. Hejəye anta ege, əy ndaha ca, zlaɓa zlambay ege leŋ ŋgezle masalam ege asa ra. Ara ata madakal dakal mala kwakwas ege, maghwal ma maŋkanaŋkan ege leŋ madakal dakal ma a tama ege, əy ma laɓata. 44Ɗala ma səkam Yesu aza wese, mar a nahwasha ca, kéghwelzetene səkan maa a kanalaw, aza ŋ hejəye wese ege, a zlepetene, a ŋgaya: «Ɗala maa sa kanasəkaw ca, ara mbe. Hune mbalaw, hune jeɓza, hune həbar ka kadak kadak.» 45Maa Yahuda a hwasha ca, a nda kəɗe ara Yesu, aya, a zlepene, a ŋgaya: «Masasərak.» A təwse ca, a səkawaw. 46Aya, hejəye vedəye ma ndaha tewtew ata yahuda ege wese, əy mbal Yesu. 47Cemey, ɗala teŋguleŋ ŋ taba hejəye ma a təwse ege, a daɗ ŋgezle masalam anta, a bal mala zlan mala madakal mala kwakwas, a rezlene zlam aza. 48A təwse ca, Yesu a zlepetene, a ŋgaya: «Hune ndaha ŋ mbelekey zlaɓa ŋgezle masalam ege leŋ zlambay ege ca, sa ŋhel vaw?» 49Ata pes ata pes, sa ŋ taba ŋkune a ujek kwakwas, sa kasasərakzahune, hune kémbelekey askwaw. Cemey, a laha ana ebe ŋghe ca, ndar ma maa kéŋtereye ŋ Ɗerewel ma keweɗ a la anta njenjəwen. 50Aya, madarlaŋw anta wese ege tewtew, əy yakza aka, əy hey tata. 51Mba darlaŋw wende a təwse aka, a kasəbar Yesu ara, ata kusam anta ca, gawdawre yaŋ anta. Aya, hejəye ma mbalaza Yesu wese ege, əy mbalaw, 52cemey, a yekzetene gawdawre anta wese aka, a hey anta a meterseŋw.
Yesu mbəy a tama lajav ma dakal ma ata ja guma
53Aya, hejəye ma mbalaza Yesu wese ege, əy jeɓza ara madakal mala kwakwas. A təwse ca, madakal dakal mala kwakwas ege ey madakal dakal ma a tama ege leŋ maghwal ma maŋkanaŋkan ege əy ɓecha tewtew. 54Pəyer a kasəbar Yesu ara ata gədak ha hwas ata varvara ge mala madakal mala kwakwas wese. Kénjeye ara mala zlan ege, a kenjew kwahwaw. 55Cemey, madakal dakal mala kwakwas ege ey Lajav ma dakal ma ata ja guma tewtew, əy mpam ma ma ata ŋkəɗaw Yesu, ŋ jaza, cemey, əy kélem askwaw. 56Mavəday, hejəye vəram əy kazla metəwle ege ma ata ŋkəɗawaw, cemey, ma tata ege əy kajav səkwaw. 57Hejəye vedəye əy gwarzam, əy zla metəwle ata mbe, əy ŋgaya: 58«Nene kézləme, a zlap a ŋgaya: “Sa naghwaramza ujek kwakwas maa hejəye əy lamaw, a ra tata ege aza, aya, ata wan mahkaɗ anta ca, sa nalam matakan maa hejəye əy kanalamaw, a ra tata ege səkwaw aka.”» 59Cemey, kaw ana ebe ŋghe ca, əy kájav ma tata aka, askwaw. 60A təwse ca, madakal mala kwakwas a gwarzam ŋ taba hejəye tewtew, a ɗawza Yesu, a ŋgaya: «Kaw hwa kezenetene zlap ata ma maa hejəye əy kaŋkəɗawaw ŋghe ege, askwaw vaw?» 61Cemey, Yesu kánja ka tete, kaw a kezenene ŋma askwaw. Madakal mala kwakwas wese a ɗawza zeney, a ŋgaya: «Hwa ca, hwa Almasəyhu, Mba Gazlavay maa nene kahəmanza vaw?» 62Yesu a zenene, a ŋgaya: «Ayaw, ara sa, cemey, hune negəre Mba Ɗala kénjeye ata ra zam mala Gazlavay ma ɓarɓar. A zeney, hune negəre maa a kandaha ŋ mahwabakw mgba ata uzlaf.» 63Madakal mala kwakwas wese, a slah rəgwac ma ata kusam anta aza, a ŋgaya: «Heje kaɗaw ɗala a zlap ma wende a heɗe zeney səkwaw! 64Hune kézləme, a karaɓa Gazlavay. Hune deŋza ca, vaŋgay?» Aya, hejəye tewtew əy ghemew, ghem ma ata ja aza. 65Hejəye vedəye, əy ŋtef mejəkəne a heɗe, əy depene nje aka, əy mgbakwaw, aya, əy zlepene, əy ŋgaya: «San heje ma mgbakwahwaw ŋgha aza!» A təwse ca, mala zlan ege yam, əy ŋtawaw, əy gazlaw ŋ barzlazlam.
Pəyer a zlap a ŋgaya, a kasan Yesu səkwaw
66Aya, maa Pəyer mbəy ata varvara ge madakal mala kwakwas wese ca, haldəma wende mala zlan a wata anta aka, a ndaha. 67A təwse ca, a gəre Pəyer a kenjew kwahwaw, a sarza, aya, a zlepene a ŋgaya: «Hwa yam ca, hwa ɗala ma kasəbar Yesu, heje Nasaratu wese.» 68Cemey, Pəyer a ja ma, a ŋgaya: «Sa kasan səkwaw, sa kezləme səkan maa hwa kaɗaw ŋ zlap səkwaw». Aya, tel Pəyer a nda anta a guɗakw. [A təwse ca, gamzakw a ja ula.] 69Haldəma wese, a gəre Pəyer zeney, aya, a zlepetene ŋ hejəye ma kégereye a təwse ege wese, a ŋgaya: «Heje ŋghe ca, ara ɗala ma teŋguleŋ ma ŋ taba tata.» 70A təwse ca, Pəyer a ja ma zeney. Aya, a dəwze anta cekuɗe ca, hejəye ma kégereye a təwse ege wese, əy zlepene, əy ŋgaya: «Njenjəwen ca, hwa ɗala ma ŋ taba tata, mavəday hwa ca, hwa ɗala ma ŋ hayak Galəyləy yam.» 71Aya, Pəyer a zlepetene, a ŋgaya: «Mada sa la metəwle ca, Gazlavay megeyzekey aza! Sa meɗahune ma, sa kasan heje maa hune kazlap a heɗe ŋghe, səkwaw.» 72A təwse a təwse, gamzakw a ja ula magbak anta. Aya, Pəyer a senzene ata ma maa Yesu a zlepene, a ŋgaya: «Mar gamzakw a naja ula ŋ gas gbak ca, hwa ca, hwa nazlap gas mahkaɗ, hwa kesenekey səkwaw, wese.» Aya, Pəyer dam, a damaha aza a bəza, a kahana ara.
ទើបបានជ្រើសរើសហើយ៖
Markus 14: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL