Markus 12
12
Laslaŋgal ma ata hejəye ma dadawar ma kaɗas la mpe mavaw ege
1A dəwze anta ca, Yesu a zlepetene a laslaŋgal ma, a ŋgaya: «Heje wende aka, káŋgaɓ mpe mavaw aka ŋ la, kálam la anta aka dərezl, kára uley ma ata ɗec mavaw aka ŋ la anta, kélemene ujek aka jem ŋ heje ma kahəbar la anta. A dəwze anta ca, a valza aka asa ra hejəye ma kaɗas ege, tel a nda anta.»
2«Maa vah ma ata jam mba mpe mavaw hwas ca, a laɓza mala zlan anta, ara hejəye ma kaɗas mpe mavaw ege wese, ŋ lemene magəva anta. 3Cemey, hejəye ma kaɗas ege wese, əy mbalaw, əy gazlaw, əy pelzene ma a nda a ra bəse. 4A laɓza mala zlan matakan, mbe yam, əy gazl ŋ ha, əy raɓa. 5A laɓza mala zlan matakan wende zeney, mbe ca, əy kájaza. Ana ebe ŋghe, əy letene ŋ mala zlan ege vəram, əy gazlata vedəye, əy kájata vedəye aza yam. 6A menene ca, mba anta maa a kaɗaw mambaza. A laɓza ara hejəye ma kaɗas ege a dəwze, a zlap, a ŋgaya: “Əy newenzene ha aka ŋ mba naka”. 7Cemey, hejəye ma kaɗas ege wese, əy zlap ŋ taba tata, əy ŋgaya: “Ara mazam ujek. Hune ndaha! Ŋ jakwaw aza, ndar heje zamakwaw ujek.” 8Aya, əy mbalaw, əy jaza, əy nahza mce anta aza a dəwze la mpe mavaw wese. 9Hune deŋza ca, heje la anta a nala na ŋgha ca, vaŋgay? A nandaha, a najata hejəye ma kaɗas ege wese aza, a navalza la mpe mavaw anta aka asa ra hejəye matakan ege. 10Hune kéjəŋge ma ma ŋ ɗerewel mala Gazlavay ŋghe, askwaw vaw?
“Ŋkəɗaŋ maa malam ujek ege əy nahza aza wese ca,
kábaw anta ŋ ŋkəɗaŋ ma pa ma tuwah aha vedəye.
11Zlan maa bay Madakal a law, ca,
ara zaɓəla ata nje ŋtakwaw!”»
12Madakal dakal mala Yahudu ege əy mpam taf ŋ mbal Yesu, mavəday əy kasan ca, a zlap a laslaŋgal ma ŋgha ca, ata tata. Cemey, əy kálalak tata ata hejəye. A təwse ca, əy kégeɓza ka, əy kánda tata.
Lacak budaw ŋ bay Rawma
13Aya, madakal dakal mala Yahudu ege əy laɓzata Farəysa ege vedəye leŋ hejəye mala bay Həyrudus ege vedəye ara Yesu, əy ɗaw ŋ həbar ŋ mbalaw, ŋ zlap anta ege. 14Əy ndaha, əy zlepene, əy ŋgaya: «Masasərak ŋcene, nene kasan ca, ma maa hwa kazlapata ege ca, ara ma ma njenjəwen ege. Hwa kalalak ata hejəye askwaw, a zeney, hwa sarzata hejəye tewtew ca, tata ma teŋguleŋ ege a tama ŋkwa. Cemey, hwa kesesərekzetene taf mala Gazlavay ŋ hejəye a heɗe a heɗe. Zlepeney, kwakwas ŋtakwaw a kapal taf ŋ ŋterene budaw ŋ bay Rawma vaw? Askwaw vaw? Kadak ca, nene ŋterene vaw, nene ŋterene səkwaw vaw?» 15Cemey, Yesu ca, kásan ledeŋ ŋkwaɓ tata ege maa a ganana gbak gbak aza, aya, a zlepetene a ŋgaya: «Hune ɗaw ŋ beɗzekey ca, ŋ vay? Hune dekey səlay anta teŋguleŋ, sa sarza.» 16A təwse ca, əy dene səlay anta teŋguleŋ, aya, Yesu a ɗawzata a ŋgaya: «Tama ma a heɗe ŋghe ca, mala vayay? Zlam ma kéŋtereye a heɗe ŋghe ca, mala vecey? A təwse ca, əy zenene əy ŋgaya: “Mala bay Rawma.”» 17Aya, Yesu a zlepetene, a ŋgaya: «Səkan mala bay Rawma ca, hune velene ŋ bay Rawma, səkan mala Gazlavay ca, hune velene ŋ Gazlavay.» A təwse ca, lezen zlap anta kéŋgetene ŋkwaɓ aza.
Laɗaw ata lagwarzamha hejəye aza ata lamac
18Sadukəy ege əy ndaha ara Yesu. Ara tata hejəye ma kazlap, əy ŋgaya, hejəye ma mac tata ege ca, əy kanagwarzamha aza ata lamac, askwaw. Aya, əy ɗawza Yesu ana ebe ŋghe, əy ŋgaya: 19«Masasərak, Musa kéŋteraheje ma maŋkanaŋkan ŋghe: Mada ɗala maa zlaŋgan aka, kámac anta, kégeɓza wala anta aka kaw kámbawha mba askwaw ca, səy zlaŋgan wese, maŋta wala mce wese, ndar əy mbewene uzəye, ŋ zlaŋgan ma mac anta wese. 20Cemey, zlaŋgan ege ŋsəleɗ aka. Zlaŋgan ma mpar a ŋta wala wese, a mac anta, kaw kégeɓ mba, askwaw. 21A dəwze anta, magbak anta a ŋta wala wese, a mac anta kaw kégeɓ mba askwaw yam, mamahkaɗ anta ana mbe yam. 22Ana ebe ŋghe, tata tewtew ŋsəleɗ tata, əy káŋta wala mce wese aza, əy kámac tata, kaw əy kégeɓ mba, askwaw. A dəwze tata ca, wala wese kámac anta yam. 23Ayaw, a pes maa hejəye ma mac tata ege əy nagwarzamha aza ata lamac ca, wala anta a nala ŋ wala eze a vecey? Mavəday tata ŋsəleɗ tata əy káŋta aza ŋ wala.»
24A təwse ca, Yesu a zenetene a ŋgaya: «Hune kédeder ŋkune, mavəday hune kasan ɗerewel mala Gazlavay, səkwaw leŋ hune kasan ɓarɓar mala Gazlavay, səkwaw. 25Aya, mada hejəye ma mac tata ege əy kágwarzamha aza ata lamac ca, mawal ege ey weləye, əy kanaŋta kusam zeney askwaw, cemey, əy nanja ana malaɓ mala Gazlavay ma mgba ata uzlaf ege. 26Ma ata hejəye ma mac tata ege ey maa əy kanagwarzamha aza ata lamac ca, hune kéjəŋge ŋ ɗerewel mala Musa maa a zlap ata kwahwaw ma kaŋkəɗaw ŋ daba vejeɗ wese, askwaw vaw? Gazlavay a zlepene ŋ Musa a ŋgaya: “Sa Gazlavay mala Əybərahəyma, Gazlavay mala Əysəyaku ey Gazlavay mala Yakubu.” 27Gazlavay ca, ara Gazlavay mala hejəye ma mac tata ege səkwaw, cemey, ara Gazlavay mala hejəye ma a nje ege. Hune kededer ŋkune dəydey.»
Ma maŋkanaŋkan ma pa ma day aha vedəye
28Ɗala maghwal ma maŋkanaŋkan wende aka, a ndaha, a zləme səbakw maa Sadukəy ege əy kajaw, əy ata Yesu. A təwse ca, a gəre ca, Yesu kézenetene zlap aza a heɗe a heɗe. Aya, a ɗawza, a ŋgaya: «Ŋ taba ma maŋkanaŋkan ege tewtew ca, ma pa ŋ day ca, vekey?» 29Yesu a zenene, a ŋgaya: «Ŋghe, ma maŋkanaŋkan ma pa ŋ day ca, cakwa: “Hune teh zlam, hune hejəye Əysərayəyla ege, Bay Madakal Gazlavay ŋtakwaw ca, mbəy teŋguleŋ anta, ara bay madakal. 30Ɗaw Bay Madakal Gazlavay ŋkwa, a unaf ŋkwa tewtew, a zəwet ŋkwa tewtew, a ŋkwaɓ ŋkwa tewtew leŋ a ɓarɓar ŋkwa tewtew.” 31Ŋghe, magbak anta: “Ɗaw mesleje ŋkwa ana ha ŋkwa.” Ma maŋkanaŋkan ma pa ŋ day aha ma gbak ŋghe ege zeney ca, askwaw.» 32Maghwal ma maŋkanaŋkan wese, a zlepene ŋ Yesu a ŋgaya: «Zlap ŋkwa kadak, Masasərak naka! Ma maa hwa zlap ŋghe ca, njenjəwen. Bay Madakal ca, ara Gazlavay teŋguleŋ anta, kaw Gazlavay matakan askwaw. 33Səy kaw vayay a ɗawaw, a unaf anta tewtew, a ledeŋ ŋkwaɓ anta tewtew, a ɓarɓar anta tewtew. A zeney, səy a ɗaw mesleje anta ana ha anta. Ma ŋgha anta ca, mbəy day aha lafat səkan ey laval səkan tewtew ŋ Gazlavay.» 34A təwse ca, Yesu a gəre ca, heje wese a zenene zlap a kəleŋ, aya, a zlepene, a ŋgaya: «Lazam bay mala Gazlavay ca, mbəy gədak a hwa, askwaw.» A dəwze anta ca, kaw vayay kálalak anta ŋ ɗawza Yesu ata ma ege zeney.
Ata Almasəyhu ey Dawuda
35Aya, Yesu a ŋta zlap, a kasasərakzata hejəye ŋ ujek kwakwas, a ɗawzata, a ŋgaya: «Hejəye maghwal ma maŋkanaŋkan ege əy nasan ŋ zlap, Almasəyhu, ara mba Dawuda ca, vaŋgay? 36Dawuda a ha anta kázlap a ɓarɓar Zəwet ma keweɗ, a ŋgaya:
“Gazlavay Bay Madakal a zlepene ŋ Bay Madakal naka:
Ndaha, nja ka ata kəva ra zam naka,
ha sa macata hejəye ma kaɗaw ŋ gərehwaw ata nje ege səkwaw aza, asa ŋgas ŋkwa ege.”
37Dawuda a ha anta a yaɓa a Bay Madakal. Ca, Almasəyhu a nasan ŋ la a mba Dawuda ca, vaŋgay?» Hejəye vəram, əy tehzene zlam ata lasasərak anta a sasam.
Yesu a ghemata hejəye maghwal ma maŋkanaŋkan ege
38Yesu a sasərakzata hejəye, a ŋgaya: «Hune sla aka ata maghwal ma maŋkanaŋkan ege, ma kaɗaw ŋ ca rəgwac ma cap ege, ma kaɗaw hejəye əy zlepzetene a lawan ha ŋ hubakw ege. 39Əy may lanja ma tuwah a tama ŋ ujek ma ata rak Gazlavay. Mada əy kayata ata lazam uda ca, əy may ca, lanja ma taŋtaŋ. 40A zeney, əy kepəresletene səkan mala weləye mce ege aza, mada əy karak Gazlavay ca, əy nja ka səpek, ndar hejəye əy deŋza ca, tata hejəye ma taŋtaŋ ege. Mavəday anta, əy nelem guma pa ma day mambaza.»
Laval səkan maa wala mce metetekw a valza
41Yesu kénjeye a tama səkan ma ata cak səlay ŋ ujek kwakwas, a kasarzata hejəye maa əy kakway səlay ŋma ege. Hejəye maŋcaɗaŋcaɗ ege vəram, əy kakway səlay tata ege dakala. 42Wala mce metetekw wende aka, a ndaha, a kway səlay sesey sesey gbak ŋ səkan wese yam. Səlay anta cekuɗe ende ŋghe. 43A təwse ca, Yesu a yata madarlaŋw anta ege, a zlepetene, a ŋgaya: «Sa kazlapahune njenjəwen, wala mce metetekw ŋghe wese, kákway səlay day aha hejəye vedəye tewtew ŋ səkan ma ata cak səlay. 44Sa zlapahune ana ebe ŋghe ca, mavəday hejəye vedəye ca, əy kway səlay cekuɗe ende ŋghe ŋ səlay tata medefedef ege. Cemey, a wala ŋgha ca, kákwayza səlay anta maa a kanazam səkan a mbe aza tewtew.»
ទើបបានជ្រើសរើសហើយ៖
Markus 12: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL