Luka 8
8
Hejəye ma kasəbar Yesu ege
1A dəwze anta ca, Yesu a nda ŋ uzam ege ey kəva uzam ege, a kaghwal Ma Mewe ma Taŋtaŋ mala Lazam bay mala Gazlavay. Malaɓ anta ege wam aha gbak tata, əy ara mbe. 2A zeney, əy nda tewtew zlaɓa weləye maa Yesu a gamata zəwet malula ege ma ŋ ha tata ege aza ey maa a rehzata aza ŋ dawar tata ege parpar parpar. Weləye anta ege ca, ara ata Marəyama maa əy kayaɓa Marəyama Magdala, maa Yesu a gamata zəwet malula ege aza ŋsəleɗ ŋ mbe, 3Yawana, wala Huja ɗala ma kasar la ata səkan ma asa ra ma a wata bay Həyrudus, Suzana leŋ weləye vedəye vəram. Weləye ŋghe anta ege, əy cekzetene ŋ ata Yesu ey madarlaŋw anta ege a səkan ma asa ra tata ege.
Laslaŋgal ma ata ɗala ma kazləka
4Hejəye vəram əy ɓecha ara Yesu, əy ndaha aka ta ŋ uzam ege vedəye vedəye tewtew. Aya, a zlepetene a laslaŋgal ma, a ŋgaya: 5«Ɗala maɗas wende aka, a nda ŋ zləkaha ŋ la anta. Aya, maa a kazləka ca, ŋseŋ vedəye əy kwekweɗ a mazlam taf. Hejəye əy dak ŋgas ata tata. Vəgem ege meɗ əy meɗata aza tewtew. 6Vedəye əy kwekweɗ ŋ la ŋkəɗaŋ, əy davaha, kəɗe ca, ŋhwal əy ŋhwal tata, mavəday leleŋ askwaw. 7Ŋseŋ vedəye zeney, əy kwekweɗ ŋ taba jəkeɗ ege, əy davaha, əy gal ata la anta. Cemey, əy kélem ŋ daha ha askwaw, mavəday jəkeɗ ege wese əy kaŋgacata. 8Ŋseŋ vedəye ca, əy kwekweɗ ata la ma taŋtaŋ. Əy davha, əy gal, əy daha ha vahwvahw, mba ndərey ata ha kaw vekey ca, temere temere.» Aya, Yesu a zlap a mazlazlay, a ŋgaya: «Ɗala maa zlam a heɗe aka ca, mezləme ka kadak kadak!»
Yesu a ghwalza laslaŋgal ma ata ɗala ma kazləka wese
9A dəwze anta ca, madarlaŋw Yesu ege əy ɗawza, əy ŋgaya: «Ma anta a ɗaw ŋ zlap ca, vaŋgay?» 10Aya, a zenetene, a ŋgaya: «Gazlavay kávalahune taf aza ŋ san səkan maɓahaɓah ege ŋ Lazam bay mala Gazlavay. Cemey, a hejəye vedəye ca, sa zlepetene ta ŋ laslaŋgal ma. Ana ebe ŋghe,
“Əy kasar la, cemey, əy kegəre la askwaw.
Əy keteh zlam, cemey, əy kezləme askwaw.”»
11Aya, a zenetene zeney, a ŋgaya: «Ŋghe, sa ghwalzahune ma ma ŋ laslaŋgal ma ŋghe anta. Ŋseŋ ca, ara zlap mala Gazlavay. 12Hejəye vedəye əy nja ana ŋseŋ ma kwekweɗ a mazlam taf. Hejəye anta ege əy zləme zlap mala Gazlavay, cemey malula a ndaha, a ŋtetene ma ma ŋ unaf tata wese ege aza, ŋ takata aka ŋ lamza ma anta səkwaw, ndar əy ɗaw ŋ reh tata səkwaw. 13Hejəye vedəye əy nja ana ŋseŋ ma kwekweɗ ŋ la ŋkəɗaŋ. Əy zləme zlap mala Gazlavay ca, əy lamza a sasam. Cemey, əy kéheɓ slaslalay askwaw. Əy lamza ata walaŋ cekuɗe ende. Mada gef káslanzata ca, əy yakza zlap anta ka. 14Ŋseŋ ma kwekweɗ ŋ taba jəkeɗ ca, a nja ana hejəye ma zləme zlap mala Gazlavay ege. Cemey, ledeŋ ŋkwaɓ ata səkan ege vedəye, laŋcaɗ ey lanja ma taŋtaŋ ma ŋ manhayak, əy ŋgac zlap anta ma kagal ŋ tata. Ana ebe ŋghe, əy nja ana ndərey ma kember anta. 15Ŋseŋ ma kwekweɗ ŋ la ma taŋtaŋ ca, a nja ana hejəye ma zləme zlap mala Gazlavay aza ege, ma lamza aza a unaf tata ege kadak kadak, əy la səkan ana maa Gazlavay a kaɗawaw. Əy mbal zlap anta ka, kaw əy kayakza ka askwaw, aya, əy yasl mba ma taŋtaŋ dakala.»
Laslaŋgal ma ata patarla
16Aya, Yesu a zlepetene zeney, a ŋgaya: «Mada ɗala kénef kwahwaw aza ata patarla ŋ weɗ la ca, a kanajaɓ ka a ɗawar askwaw, akwaw ca, a kanadamza ka asa lawan anta ca, askwaw. Cemey, a naca ka ca, mgba ata laca patarla, ndar hejəye ma kadam ŋ ujek ege, əy gəre la. 17Səkan maɓahaɓah ege tewtew əy naghwalaha aza a bəza. A zeney, səkan ege tewtew maa hejəye əy kasan səkwaw ca, əy naghwalaha aza a bəza, əy nasan tata. 18Ca, hune sla ka kadak kadak ŋ teh zlam. Mada ɗala kálamza zlap mala Gazlavay aza ca, Gazlavay a necekzene ŋ zləme kadak kadak. Cemey, ɗala ma kálamza zlap mala Gazlavay askwaw ca, zlap anta a nakuɗap anta.»
Ata man Yesu ey zlaŋgan ege
19A dəwze anta ca, ata man Yesu ey zlaŋgan ege, əy ndaha ara Yesu, cemey, əy kélem taf ŋ hwas ara mbe askwaw, mavəday hejəye dəydey mambaza. 20Cemey, əy zlepene, əy ŋgaya: «Ata macahw ey zlanahw ege əy a bəza, əy kaɗaw ŋ ŋgel ma a hwa.» 21A təwse ca, a zenetene, a ŋgaya: «Ata mana ey zlana ege ca, ara hejəye ma keteh zlam ata zlap mala Gazlavay ege ey ma əy kala ana maa ma anta a zlap.»
Yesu a garza bargadaŋ aka
22A pes wende aka, ata Yesu ey madarlaŋw anta ege, əy tev ŋ kwambawal, a zlepetene, a ŋgaya: «Kazakwaw ŋ zlaŋ ŋtakwaw kəɗe aha bəza ŋtele yam.» Aya, tel əy nda tata. 23A təwse ca, maa əy kazlaŋ ca, Yesu wan a wan anta. A təwse a təwse, bargadaŋ a jaha aha yam wese a mazlazlay. Yam anta a paslawha ghef ŋ kwambawal wese, hejəye ma ŋma ege əy slaɓ ŋ kuɗap tata. 24Aya, madarlaŋw anta ege wese, əy zenha mbermber ara mbe, əy fəɗahza, əy zlepene, əy ŋgaya: «Madakal, Madakal, heje kakuɗap ŋtakwaw!» A təwse ca, a fəɗaha, a bebeczata ata bargadaŋ ey yam ma kahəɓal wese. A təwse a təwse ca, ata bargadaŋ ey yam wese, əy nja ka ɗekɗek.
25Aya, a zlepetene ŋ madarlaŋw anta ege wese, a ŋgaya: «Hune lemzekey ŋ unaf ŋkune səkwaw ca, ŋ vay?» A təwse, əy kálalak tata dakala mambaza, əy kedeŋ ŋkwaɓ, əy kazlap ŋ taba tata, əy ŋgaya: «Heje ma ene, a zlepetene kaw ŋ ata bargadaŋ ey yam, əy nja ka ɗekɗek, əy tehzene zlam ŋghe ca, ara vayay?»
Yesu a gam zəwet malula ege ma ŋ ha ɗala
26Ata Yesu ey madarlaŋw anta ege əy hwasha ŋ hayak Gerasene ege, a ma ŋtele ma a tama hayak Galəyləy. 27Maa əy hwasha aza ca, Yesu a tadakwha aza ŋ kwambawal. Heje wende ŋ uzam wese aka, a ndaha ara mbe. Heje anta ca, zəwet malula ege əy kámbalza. Va vəram a kaca rəgwac ata kusam anta zeney askwaw, a kanja a wata zeney səkwaw, cemey, a nja ca, ŋ taba jeɓ ege.
28Aya, maa a gəre Yesu ca, a ndav asa ŋgas anta, a ja ula a mazlazlay, a zlepene, a ŋgaya: «Hwa ɗaw ara sa vemey, Yesu, Mba Gazlavay ma mgba ata uzlaf? Sa kajahwaw mbahw, hwa ɗaw ŋ sekey gef səkwaw!» 29A zlap ana ebe ŋghe ca, mavəday Yesu kézlepene ŋ zəwet malula ma ŋ ha anta wese, ŋ damha aza ŋ mbe. Zəwet malula anta ca, a mbal gas vəram. Hejəye anta ege əy jewene ŋgas anta ege ey ra anta ege ka a sesele, ndar ŋ nja ka a wata. Cemey, a razlata calalaw anta ege aza, aya, zəwet malula anta a jeɓza a damaw.
30A təwse ca, Yesu a ɗawza heje wese, a ŋgaya: «Zlam ŋkwa ca, vemey?» A zenene, a ŋgaya: «Zlam naka ca, Vəram.» A zlap ana ebe ŋghe ca, mavəday zəwet malula ege vəram əy kájam tata ŋ ha anta. 31Zəwet malula ege wese əy jene mbahw, ndar a ɗaw ŋ gamata kəɗe a uley ma ata setene gef səkwaw.
32A təwse ca, galdam ege vəram əy kazam ŋ barla. Aya, zəwet malula ege ma ŋ heje wese, əy jene mbahw ŋ Yesu ŋ pelzetene taf ŋ dam ŋ galdam wese ege. A təwse ca, a pelzetene taf. 33Aya, zəwet malula ege wese, əy damha aza ŋ heje wese, əy dam tata ŋ galdam ege wese. A təwse a təwse, galdam anta ege, əy hehey aka a mazlazlay mgba ata barla wese, səɓet əy kway tata ŋ ŋtele yam. Əy kuɗap tewtew ŋ yam anta.
34Aya, maa uzəye njəwen galdam ege wese, əy gəre səkan ma laha ŋghe anta ca, əy hey, əy ghwalza ma anta ŋ uzam leŋ ŋ kəva ma a mazlam ege. 35Hejəye ma ŋ hayak Gerasene ege, əy ndaha ŋ sarza səkan ma laha anta. Əy hwasha ara Yesu, kəɗe ca, əy ndewzene ŋ heje maa zəwet malula ege əy damha aza ŋ mbe wese, kénjeye asa ŋgas anta. Rəgwac ata kusam anta kadak kadak, mbəy werwer, mbəy kadak kadak, kaw a kawak zeney akwaw. Cemey, hejəye wese ege maa əy gəre heje wese ca, ŋgəzleŋ kájata aza. 36Hejəye ma a təwse ege, ma gəre maa Yesu a rehza heje maa zəwet malula ege kámbalza aza wese ca, əy ghwelzetene ŋ hejəye ma ndaha ege ŋ sarza səkan ma laha anta wese.
37Aya, hejəye ma ŋ hayak Gerasene ege tewtew, əy zlepene ŋ Yesu, əy ŋgaya: «Nda ŋkwa gədak, yekzeney aka.» Əy zlap ana ebe ŋghe ca, mavəday əy kálalak tata mambaza. Aya, a tev ŋ kwambawal ma ata zlaŋ yam, a nda anta.
38A təwse ca, heje maa zəwet malula ege əy damha aza ŋ mbe wese, a ɗawza Yesu, a zlepene, a ŋgaya: «Mbahw, mada hwa kalamza ca, ŋtekey ara, mama nda a hwa!» Cemey, Yesu kálamza ma anta səkwaw, a zenene, a ŋgaya: 39«Zen a wata ŋkwa, slepetene səkan maa Gazlavay a lahwaw tewtew ŋghe ŋ hejəye.» Aya, heje wese tel a nda anta, a slepetene səkan maa Yesu a lene tewtew ŋ hejəye ma ŋ uzam anta ege tewtew.
Yesu a rehza wala ma ca ra ata rəgwac anta leŋ a gwarzamaza həla Jayrus aza ata lamac
40Hejəye vəram əy kahəbar Yesu a ma ŋtele. Maa a zenha aza ca, hejəye əy lamza a sasam. 41A təwse ca, heje wende aka, zlam anta Jayrus. Ara ɗala ma dakal mala ujek ma ata rak Gazlavay. A ndaha ara Yesu, a ndav asa ŋgas anta. A rakaw, ŋ nda a wata anta, 42mavəday, həla anta aka, va anta wam aha gbak. Mbəy malay a tama anta, werwer askwaw, mbəy slaɓ ŋ mac.
Maa Yesu a kanda kəɗe a wata Jayrus wese ca, hejəye əy kaŋgacaw. 43Wala wende ŋ taba hejəye a təwse aka, va wam aha gbak, mbəy werwer akwaw, a kabatha mbambaz. Wala anta káŋtakwza səkan ma asa ra anta aza tewtew ara hejəye ma val menjevek ma ata rehza heje. Cemey, kaw ɗala ma la kula ŋ rehza aza ŋ dawar anta wese, akwaw.
44Wala wese, a zenha mbermber a dəwze Yesu, a ca ra ata mazlam rəgwac anta. A təwse a təwse ca, mbambaz ma kabatha wese zla a zla anta. 45Aya, Yesu a ɗawzata hejəye a ŋgaya: «Ma ca ra ata sa vayay?» A təwse ca, kaw vayay ca, a zlap, a ŋgaya: «Ara sa səkwaw!» Aya, Pəyer a zlepene a ŋgaya: «Bay ŋcene, hejəye ma vəram ma kaŋgacahwaw ŋghe ege ca, hwa san ŋ zlap ende ŋghe ca, vaŋgay?» 46A təwse ca, Yesu zlap a ŋgaya: «Ɗala káca ra ata sa aka, mavəday sa kézləme ɓarɓar kádamha ŋ kusam naka.»
47Maa wala wese, a gəre Yesu kásan aza mbəy ma ca ra a heɗe wese ca, a gəre ca, mbəy kula ŋ ɓahza ha anta zeney səkwaw. Aya, tel a ndaha ara Yesu, a kanana, a ndav asa ŋgas anta. A ghwelzene a tama hejəye tewtew, ma anta ma daza ŋ ca ra a heɗe ey maa a reh anta ŋ dawar wese anta, a təwse a təwse. 48Aya, Yesu a zlepene, a ŋgaya: «Həla naka, hwa kéreh ŋkwa mavəday maa hwa kélemzekey aza a unaf ŋkwa, nda a zəhay.»
49Maa káŋtakwza zlap anta a wala wese səkwaw ca, heje wende a ndaha aka a wata Jayrus, madakal mala ujek ma ata rak Gazlavay, a zlepene ŋ Jayrus wese, a ŋgaya: «Həla ŋkwa anta kámac anta tew. Hwa ŋtəɓalza madakal aka ŋ nda a wata ŋkwa zeney səkwaw!» 50Cemey, maa Yesu a zləme zlap heje ŋghe wese ca, a zlepene ŋ Jayrus a ŋgaya: «Hwa lalak səkwaw, lemzekey aka ŋ unaf ŋkwa, həla ŋkwa a nereh!»
51Maa Yesu a vaŋha a wata Jayrus wese ca, képelzetene taf ŋ hejəye tewtew ŋ dam ŋ ujek zlaɓa mbe askwaw, səy ŋ ata Pəyer ey Yuhana, Yakuba leŋ ata cen ey man haldəma. 52Hejəye tewtew əy kahan, əy kaja ula mavəday həla ma mac anta wese. Aya, a zlepetene, a ŋgaya: «Hune han səkwaw, haldəma ca, kámac askwaw, a kawan.» 53Cemey, hejəye əy sarza ana ɗala ma kawak, əy kaɓas a heɗe, mavəday əy kasan ca, haldəma anta kámac anta tew. 54Yesu a mbal ra haldəma ma mac anta wese, a zlepene a mazlazlay a ŋgaya: «Həla naka, fəɗaha aza!» 55Aya, səfan haldəma wese, zen a zenha aza, a təwse a təwse, perce a gwarzam. Aya, Yesu a zlepetene, a ŋgaya: «Hune velene səkan ŋ zam.» 56Ata cen haldəma ey maman ca, əy kédeŋ ŋkwaɓ dakala mambaza. Cemey, a ŋgazata aka, a zlepetene, a ŋgaya: «Hune ɗaw ŋ ghwalza səkan ma laha ŋghe anta ŋ kaw vayay səkwaw!»
ទើបបានជ្រើសរើសហើយ៖
Luka 8: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
