Luka 9
9
Yesu a laɓzata malaɓ anta ege wam aha gbak
1Yesu a javata malaɓ anta ege tata wam aha gbak tata. A veletene ɓarɓar ey ɓardakw ŋ gamata zəwet malula ege ma ŋ hejəye aza tewtew leŋ ŋ rehzata hejəye aza ŋ dawar tata ege. 2A dəwze anta ca, a laɓzata ŋ ghwelzetene Lazam bay mala Gazlavay leŋ ŋ rehzata hejəye ma kadawar ege aza. 3Aya, a zlepetene, a ŋgaya: «Hune nda, hune ɗaw ŋ ŋta səkan kaw vemey ara asa ra ŋkune ege ata taf səkwaw. Kaw zlambay, kaw bakatar, kaw səkan ma ata zam, kaw səlay səkwaw. A zeney, kaw vayay a ɗaw ŋ ŋta rəgwac ara gbak səkwaw! 4Kaw a katay, mada ɗala kálamzahune a wata anta cemey, hune nja ka a təwse ha ata vah maa hune kananda ŋkune. 5Kaw a katay, ata la maa hejəye əy kalamzahune səkwaw ca, hune ŋtaw berdeberde ma ata ŋgas ŋkune ege aza, hune geɓzetene uzam tata aka. Ana ebe ŋghe, a neghwelzetene ca, tata hejəye gay ege.»
6Aya, malaɓ Yesu ege wese, tel əy nda tata. Əy nda ŋ uzam ege parpar parpar. Kaw a katay, əy kaghwal Ma Mewe ma Taŋtaŋ mala Gazlavay ŋ hejəye leŋ əy kerehzata hejəye aza ŋ dawar tata ege.
Ŋkwaɓ kéŋgene aza ŋ Həyrudus Antəypas ata Yesu
7Həyrudus, bay ma mbal hayak Galəyləy a zləme hejəye əy kazlap ata səkan ege tewtew maa ata Yesu ey madarlaŋw anta ege, əy kalata. Ma anta kálalakza aza, mavəday hejəye vedəye əy kazlap ata Yesu, əy ŋgaya: «Heje anta ca, ara Yuhana ma gwarzamha aka ŋ jeɓ.» 8Vedəye, əy ŋgaya: «Ara Eləya ma ndaha.» Vedəye zeney yam, əy ŋgaya «Ara ɗala teŋguleŋ ŋ taba uzəye ma zlap ma a Gazlavay ma zlezle ege ma gwarzamha aka ŋ jeɓ.» 9Cemey, Həyrudus a zlap ŋ ha anta, a ŋgaya «Sa ma zlap ŋ rezlene ha Yuhana maban hejəye a yam a baptəysma anta aza. Heje maa sa kezləme, əy kazlap ma ŋghe ege tewtew a heɗe ŋghe ca, ara vayay?» Aya, a mpam ŋ gəre Yesu.
Yesu a zemetene səkan ŋ hejəye day aha bəlakw jaɓan
10Maa malaɓ Yesu ege, əy zenha aza ara Yesu ca, əy slepene səkan ege tewtew maa əy lata ŋ uzam ege wese. Aya, a ŋtata malaɓ anta ege wese, əy nda tata gagaha, kəɗe ŋ uzam maa əy kayaɓa Baytəysayda. 11Cemey, maa hejəye vəram əy zləme Yesu mbəy ɗak a təwse wese ca, əy səbaraw. A təwse ca, Yesu a lamzata a sasam. A ghwelzetene zlap mala Lazam bay mala Gazlavay leŋ a rehzata hejəye ma ɗawza ege ŋ dawar tata ege aza.
12Cemey, maa pes slaɓ ŋ ndav ca, malaɓ Yesu ma wam aha gbak ege wese, əy zenha mbermber ara Yesu, əy zlepene, əy ŋgaya: «Zlepetene ŋ hejəye əy manda ŋ uzam ege ey ŋ ujek ma a mazlam ege ŋ lem səkan ta zam leŋ la ma ata wan, mavəday ete ŋghe ca, heje a damaw.» 13Cemey, Yesu a zlepetene, a ŋgaya: «Hune a ha ŋkune, hune veletene səkan ŋ zam.» Əy zenene, əy ŋgaya: «Səkan ta zam ara nene ca, səy peŋ#9.13 Peŋ ara səkan ta zam mala Yahudu ege zlezle. Peŋ anta ca, əy da a ŋfa ndərey maa əy kayaɓa alkamarəy (ndərey anta a ɗaw ŋ nja ana merewrey) jaɓan leŋ ŋkəlef ege gbak. Ketegəre, hwa kaɗaw nene nda ŋ səkamha səkan ta zam anta ŋ hejəye ŋghe anta ege tewtew ka vaw?» 14Ŋ taba hejəye anta ege ca, mawal ege əy la aza bəlakw jaɓan. A zlepetene ŋ madarlaŋw anta ege, a ŋgaya: «Hune njazata ka njakw njakw, rajaɓan rajaɓan ege.»
15A təwse ca, əy lemzene ma anta. Əy njazata hejəye anta ege ka ana maa a zlepene wese. 16Aya, Yesu ŋta a ŋta peŋ ma jaɓan ege leŋ ŋkəlef ma gbak ege wese, a sar la kəɗe mgba ata uzlaf. A lene wasay ŋ Gazlavay, ata səkan ta zam ege wese. A dəwze anta, a ŋgata ka, a veletene ŋ madarlaŋw anta ege. Aya, əy ɓezetene ŋ hejəye tewtew. 17A təwse ca, kaw vayay a zam səkan həraɗ ana maa a kaɗawaw. Əy cam ma menha anta, ujam ghef ghef, wam aha gbak.
Pəyer a ghwalza Yesu ca, ara Almasəyhu
18A pes wende aka, Yesu a karak Gazlavay, mbəy teŋguleŋ anta. Madarlaŋw anta ege əy a həzlar. Aya, a ɗawzata, a ŋgaya: «Hejəye əy kazlap ata sa ca, sa vayay?» 19Madarlaŋw anta ege, əy zenene, əy ŋgaya: «Hejəye vedəye əy zlap ca, hwa Yuhana maban hejəye a yam baptəysma. Hejəye vedəye zeney, əy ŋgaya hwa Eləya, mba ma zlap ma mala Gazlavay ma zlezle. Hejəye vedəye zeney yam, əy ŋgaya, hwa mba ma zlap ma mala Gazlavay ma zlezle ma gwarzamha aka ŋ jeɓ.»
20Aya, Yesu a ɗawzata zeney, a ŋgaya: «Ca, hune eze yam ca, hune zlap sa ca, sa vayay?» A təwse ca, Pəyer a ŋta zlap, a zlepene, a ŋgaya: «Hwa Almasəyhu maa Gazlavay a laɓaza ŋ rehzata hejəye.» 21Cemey, Yesu a ŋgazata ka, kaw əy ɗaw ŋ zlap ma anta kaw ŋ vayay səkwaw.
22A zeney, a ŋgaya: «Səy sa, sa Mba Ɗala masa gef dakala. Madakal dakal ma ata ha Yahudu ege, madakal dakal mala kwakwas ege leŋ maghwal ma maŋkanaŋkan ege, əy keneɗewekey səkwaw, əy nejekey aza. Cemey, ata wan mamahkaɗ anta ca, sa nagwarzamha aza ata lamac.»
Zlap ata taf ma ata səbar Yesu
23Aya, Yesu a zlepetene ŋ hejəye tewtew, a ŋgaya: «Mada ɗala a kaɗaw ŋ səberekey ca, a ɗaw ŋ deŋza ata ha anta səkwaw, mesew gef ma kanadaha ata ha anta, maŋta mpe gafaŋgal#9.23 Mpe gafaŋgal ca, ara mpe maa sawje Rawma ege əy kadarata hejəye dadawar ege ana maja ŋkəɗeh ege, a heɗe. Heje anta a tew ara hwas ata la ma ata jata. Əy darata aka ata mpe anta, ndar əy mac a gef. anta, mesəberekey ata pes ata pes a unaf teŋguleŋ. 24Hune san ka, kaw vayay, ma kaɗaw ŋ rehza ha anta ca, a nakuɗapza aza. Cemey, ma kuɗapza ha anta aza mavəday sa ca, a nerehza aza. 25Mada ɗala a lem səkan ma a manhayak ŋghe tewtew ana maa unaf anta a kaɗawaw, cemey, a kuɗapza ha anta aza, akwaw ca, a gayza ha anta aza ca, səkan maa a lem tewtew ŋghe anta, a necekzene vaw? 26Kaw vayay, ma la hawa ata sa leŋ ata zlap naka ege ca, sa, sa Mba Ɗala, sa nala hawa a heɗe ata vah maa sa kenezenha ŋ ɓardakw naka, ŋ ɓardakw mala Gazlavay leŋ ŋ ɓardakw mala malaɓ Gazlavay ma keweɗ ege yam. 27Ayaw, sa kazlapahune njenjəwen, hejəye vedəye ŋ taba hejəye ma ete ŋghe ege ca, əy kanamac askwaw, səy əy megəre Lazam bay mala Gazlavay aza kwagwa.»
Labaw kusam Yesu
28Kála anta wan jamahkaɗ a dəwze maa Yesu a zlap ma ŋghe ege, ca, a ŋta ata Pəyer, Yuhana leŋ Yakuba, əy tev ŋ barla ŋ rak Gazlavay. 29Maa a karak Gazlavay wese ca, kəɗe ca, nje anta baw a baw anta, rəgwac ma ata kusam anta a baw anta pepeɗek tezlezle, a kayayaŋ. 30A təwse a təwse ca, hejəye gbak, əy kazlap a mbe aka. Ara ata Musa ey Eləya. 31Əy ghwalha kusam tata aka ta ŋ ɓardakw mala Gazlavay ma keweɗ. Əy kazlap a Yesu ata laŋtakw zlan anta ŋ lamac anta ŋ Urusaləyma.
32A təwse ca, ata Pəyer ey malaɓ ma gbak ege wese ca, əy káwan tata kəlaŋkəlaŋ. Cemey, maa əy fəɗaha aza ca, əy gəre ɓardakw ma keweɗ mala Yesu leŋ hejəye ma gbak ma ara mbe ege wese. 33Aya, maa ata Musa ey Eləya wese, əy kanayakza Yesu aka ca, Pəyer a zlepene, a ŋgaya: «Bay ŋcene, kadak ca, heje nja ka ete ŋghe. Ŋ bakwaw guɗakw ege aka mahkaɗ, teŋguleŋ mala ŋkwa, teŋguleŋ mala Musa, teŋguleŋ mala Eləya.» Cemey, a kasan səkan maa a kazlap səkwaw.
34Maa a kazlap ca, kəɗe ca, mahwabakw a ndaha, jaɓ a jaɓata. A təwse ca, maa mahwabakw a jaɓata aza wese ca, əy kálalak tata. 35Əy zləme ula a jaha ŋ mahwabakw anta, a ŋgaya: «Ebe ŋghe ca, ara mba naka maa sa mayaw, hune tehzene zlam!» 36A dəwze maa ula a jaha wese ca, kəɗe ca, madarlaŋw anta ege wese, əy sar la ca, Yesu mbəy teŋguleŋ anta. A təwse ca, nja əy nja ka tete, kaw əy kághwalza səkan maa əy gəre anta ŋ kaw vayay askwaw.
Yesu a gam zəwet malula ma ŋ ha mba aza
37A mapat anta, ata Yesu ey madarlaŋw anta ma mahkaɗ ege wese, əy tadakwha aka ŋ barla. Hejəye vəram əy ndaha ŋ ŋgelene ma. 38A təwse ca, heje wende aka ŋ taba hejəye ma ɓecha ege ara mbe wese, a ja ula, a ŋgaya: «Madakal, sa kajahwaw mbahw, sarza mba naka ŋgha! Ara malay a tama naka, san hahar a heɗe. 39A pes vedəye ca, zəwet malula anta kambalaw, a təwse a təwse, a ja ula, a ɓərazlza, a gwegwecza a mazlazlay, a lene hubaf ŋ pakam anta. A sene gef dakala, aya, a negeɓza ca, səpek a dəwze maa káŋgwavza. 40Sa kárak madarlaŋw ŋkwa ege ŋ gamaza zəwet anta aza, cemey əy kála kula səkwaw.»
41Aya, a zenene, a ŋgaya: «Hey! Hune hejəye dadawar ege ma kaɗaw ŋ lemzekey səkwaw ege ŋghe, sa nanja ka ara hune zeney ca, walaŋ hada vaŋgay? Sa nesewahune zeney ca, walaŋ vanay?» Aya, Yesu a zlepene ŋ cen mba wese, a ŋgaya: «Daza mba ŋkwa anta ete ŋghe!»
42Maa mba wese a kandaha ara mbe ca, zəwet malula wese a nahza ata hayak, a ɓərazlza, a gwegwecza a mazlazlay. Ca, Yesu a bebecza zəwet wese, ŋ damha aza ŋ mba wese, a rehza aza. Aya, a zlepene ŋ cen mba wese, a ŋgaya: «Ŋghe mba ŋkwa.» 43Hejəye tewtew əy ŋga ŋkwaɓ, əy ŋgaya: «Njenjəwen ca, Gazlavay ca, ara mbəy madakal.»
Yesu a ghwalza lamac anta ey lagwarzamha aza anta ata lamac, magbak anta
Aya, maa kaw vayay a kaŋga ŋkwaɓ ata səkan maa Yesu a la tewtew ŋghe wese ca, a zlepetene ŋ madarlaŋw anta ege, a ŋgaya: 44«Hune teh zlam kadak kadak ata ma maa sa kanazlapahune na ŋgha, hune ca ka ŋ ha ŋkune ege. Əy nembelekey, sa, sa Mba Ɗala, əy nevelzekey asa ra hejəye.» 45Cemey, madarlaŋw anta ege ca, əy kasan səkan maa ma anta a ɗaw ŋ zlap səkwaw, mavəday ma anta kéghweleye a bəza tewtew askwaw, əy kula ŋ zləme səkwaw. Əy kalalak ŋ ɗawza Yesu ata ma anta.
Ma pa ma dakal ŋ taba madarlaŋw ege ca, vayay?
46Madarlaŋw Yesu ege, əy ja səbakw ŋ taba tata, əy ɗaw ŋ san ɗala ma pa ma dakal ŋ taba tata ca, vayay? 47Cemey, Yesu a kasan ledeŋ ŋkwaɓ tata. Aya, a ŋta mbaw, a deŋza aka ara mbe, 48a zlepetene a ŋgaya: «Kaw vayay ma lamza mba ŋgha aza, mavəday maa a keɗewekey ca, a lam ca, sa anta. Kaw vayay ma lemzekey aza yam ca, a lam ca, Gazlavay ma leɓekey. Ayaw, ɗala ma pa ma pəzekw ŋ taba ŋkune tewtew ca, mbe ara ɗala ma pa ma dakal.»
Ɗala ma kaɗa gham a hune askwaw ca, ara heje ŋkune
49Aya, Yuhana a ŋta zlap, a zlepene ŋ Yesu, a ŋgaya: «Bay ŋcene, nene kégəre heje wende aka, a kagamata zəwet malula ege, a zlam ŋkwa. Cemey, nene káɗaw ŋ tak ka, mavəday mbe ca, mbəy ŋ taba lajav ŋtakwaw askwaw.» 50Cemey, Yesu a zenene, a ŋgaya: «Hune ɗaw ŋ tak ka səkwaw, mavəday ɗala ma kaɗa gham a hune askwaw ca, ara ɗala ŋkune.»
Hejəye uzam Samarəya ege əy kalamza Yesu səkwaw
51Ata vah maa Yesu slaɓ ŋ yakza manhayak aka ŋ nda anta mgba ara Gazlavay ca, a mbal unaf, ŋ nda ŋ Urusaləyma. 52A təwse ca, a laɓzata uzəye malaɓ anta ege a tama a tama. Aya, tel əy nda ŋ uzam ma ŋ hayak Samarəya ŋ slene la ma ata wan aka. 53Cemey, hejəye ma a təwse ege ca, əy kaɗaw ŋ lamza səkwaw, mavəday a nda kəɗe ŋ#9.53 Samarəya ege ca, tata hejəye maa əy kaŋgəlay nje a Yahudu ege səkwaw. Ana ebe ŋghe, əy kaɗaw Yahudu ege ma ŋ Galəyləy, əy ɗaw ŋ nda ŋ Urusaləyma ta ŋ hayak tata səkwaw Urusaləyma. 54Maa madarlaŋw anta ege, ata Yuhana ey Yakuba, əy gəre maa hejəye ŋghe anta ege əy kaɗaw ŋ lamza səkwaw ca, əy ɗawza, əy ŋgaya: «Bay Madakal, hwa kaɗaw nene ɗawha kwahwaw ma mgba ata uzlaf matadakwha ata tata, maŋkəɗawata aza vaw?» 55Aya, a bawha tama kəɗe aha tata, a ghemata. [A ŋgaya: «Ma ŋcakwzahune ŋ zlap ana ebe ŋghe ca, ara zəwet vekey? Mba Ɗala a ndaha ca, ŋ kuɗapzata hejəye aza səkwaw, cemey, a ndaha ca, ŋ rehzata aza.»] 56Aya, tel əy nah ma ŋ uzam matakan.
Hejəye ma kaɗaw ŋ səbar Yesu ege
57Maa əy kanda ata taf ca, heje wende aka, a ndaha a zlepene ŋ Yesu, a ŋgaya: «Sa nasəbarahwaw kaw a katay ata la maa hwa kananda.» 58A təwse ca, Yesu a zenene, a ŋgaya: «A mbəyga ege ca, uley tata ma ata wan aka, vəgem ege yam ujek tata aka. Cemey, sa, sa Mba Ɗala ca, kaw la naka cekuɗe ende ŋghe ma ata zazak ca, askwaw.»
59A zlepene ŋ heje wende zeney, a ŋgaya: «Səberekey!» A təwse ca, heje anta a zenene, a ŋgaya «Bay Madakal, pelzekey taf, sa nda ŋ mpas aza vana aza kwagwa.» 60Aya, a zenene, a ŋgaya: «Yakzata hejəye mamacamac ege aka, əy mampas hejəye tata ege mamacamac. Cemey, hwa ca, nda ŋ ghwalza Lazam bay mala Gazlavay.»
61A təwse ca, heje wende aka zeney, a zlepene, a ŋgaya: «Sa ca, sa nasəbarahwaw Bay Madakal, cemey, pelzekey taf, sa nda ŋ zlepezetene aza ŋ hejəye ma a wata naka ege kwagwa.» 62Yesu a zlepene, a ŋgaya: «Kaw vayay ma kaɗas a dəvar zləye, ma sar la a dəwze ca, heje anta mbəy kadak ŋ lene zlan ŋ Lazam bay Gazlavay, səkwaw.»
ទើបបានជ្រើសរើសហើយ៖
Luka 9: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
