Luka 7
7
Yesu a rehza mala zlan a madakal sawje ege mala hayak Rawma
1A dəwze maa Yesu kághwalza zlap anta aza kəɗaŋ ŋ hejəye ca, tel a nda anta ŋ uzam Kafarnahum. 2A təwse ca, heje Rawma wende aka, ara madakal ma ata ha sawje ege temere. Heje anta a kaɗaw mala zlan anta wende aka dakala mambaza. Cemey, mala zlan anta anta, mbəy werwer askwaw, slaɓ ŋ mac. 3Maa heje ŋghe wese a zləme Yesu a kerehzata hejəye dawar ege aza ca, a laɓzata ma dakal dakal Yahudu ege vedəye ara mbe ŋ jene mbahw, ŋ ndaha ŋ rehza mala zlan anta wese aza. 4A təwse ca, əy ndaha ara Yesu, əy jene mbahw dakala, əy ŋgaya: «Kadak ca, hwa cekzene ŋ heje anta! 5Mavəday, a kaɗawaheje, heje hejəye Yahudu ege dakala, mbəy ma lamaheje ujek ma ata rak Gazlavay ŋtakwaw.»
6Maa Yesu a zləme zlap ŋghe wese ca, tel əy nda tewtew. Cemey, maa Yesu slaɓ ŋ hwas a wata anta ca, madakal sawje ege wese a laɓzata ŋgama anta ege ŋ zlepene ca: «Bay Madakal, hwa saɓa gef aka ŋ vaŋha a wata naka ŋ vay, mavəday sa ca, sa káhwas hwa damha a wata naka səkwaw. 7Mavəday anta yam, sa sarza ha naka yam ca, sa káhwas ŋ gwar a tama ŋkwa səkwaw. Cemey, mada hwa kázlap ma ŋkwa teŋguleŋ ca, ga ŋ rehza mala zlan naka. 8Sa zlap ana ebe ŋghe ca, mavəday, madakal dakal ege ata ha naka aka, sawje ma asa ra naka ege aka yam. Mada sa zlepene ŋ wende sa ya: “Nda”, a nda. Sa zlepene ŋ wende zeney, “Ndaha”, a ndaha. Mada sa zlepene ŋ mala zlan naka sa ya: “La səkan ŋgha ende ŋghe!” a law.»
9Maa Yesu a zləme ma mala madakal sawje ege wese ca, ma anta kéndəremzene aza. Aya, a bawaha tama kəɗe aha hejəye ma kasəbar ege, a zlepetene, a ŋgaya: «Sa kazlapahune, kaw ŋ hayak Əysərayəyla tewtew ca, sa kéndew ata ɗala ma lemzekey aza a unaf anta tewtew ana heje ŋghe ca, askwaw!» 10Aya, hejəye maa madakal sawje ege a laɓata ara mbe wese, əy zen tata a wata ca, əy ndewzene ŋ mala zlan wese, mbəy werwer.
Yesu a gwarzamaza mba wala maa mawal anta kémecene aza
11A dəwze anta ca, Yesu a nda kəɗa ŋ uzam Nayəyn. Madarlaŋw anta ege ey hejəye vəram, əy kasəbar ara. 12Cemey, maa mbəy slaɓ ŋ vaŋ a uzam wese ca, əy ŋgel ma a hejəye, əy ketewha mce ŋ jeɓ. Ma mac anta ca, ara malay mala wala maa mawal anta kémecene aza. A təwse ca, hejəye vəram ma ŋ uzam Nayəyn anta ege, əy kecene ma a wala anta. 13Maa Bay Madakal Yesu a gəre wala wese ca, kásan hahar dakala a heɗe, aya, a zlepene, a ŋgaya: «Mbal unaf ŋkwa aka, hwa han səkwaw!» 14A dəwze zlap anta wese ca, a nda, a ca ra anta ata lambaŋ mce wese. A təwse ca, hejəye ma ketew mce ege wese, gar əy gar aka. Aya, Yesu a zlepene, a ŋgaya: «Mba darlaŋw, sa ma kazlapahwaw, gwarzam!» 15A təwse ca, mba ma mac anta wese, perce a gwarzam, nja a nja ka, a mar ŋ zlap. Aya, pa a velene mba anta ka ŋ maman.
16Kəɗe ca, hejəye ma a təwse ege tewtew əy kálalak tata dakala, əy həmanza Gazlavay, əy ŋgaya: «Mba ma zlap ma mala Gazlavay ma dakal, kándaha aza ŋ taba ŋtakwaw!» Əy zlap zeney, əy ŋgaya: «Gazlavay kándaha aza ŋ cekzetene ŋ hejəye anta ege!» 17Hejəye əy kaslap ma Yesu anta kaw a katay tewtew ŋ hayak Yahudəya leŋ ŋ uzam ma a mazlam anta ege tewtew ata səkan ege maa a lata.
Yuhana maban hejəye a yam baptəysma a laɓzata madarlaŋw anta ege gbak ŋ ɗawza Yesu
18Maa Yuhana mbəy a ujek daŋgay ca, madarlaŋw anta ege əy ghwelzene səkan maa Yesu a lata ege tewtew. A təwse ca, Yuhana a yata madarlaŋw ege gbak ŋ taba tata. 19Aya, a laɓzata ara Bay Madakal Yesu, ŋ ɗawza: «Hwa ca, hwa Almasəyhu maa nene kaŋkap ŋ ndaha ŋ rehzeney wese vaw? Akwaw ca, nene ŋkap ɗala matakan vaw?» 20A təwse ca, əy nda ara Yesu, əy zlepene, əy ŋgaya: «Yuhana maban hejəye a yam baptəysma, a leɓeney ara hwa ŋ ɗawzahwaw, a ŋgaya: “Hwa ca, hwa Almasəyhu maa nene kaŋkap ŋ ndaha ŋ rehzeney wese vaw? Akwaw ca, nene ŋkap ɗala matakan vaw?”»
21A təwse ca, Yesu a kerehzata hejəye vəram ŋ dawar tata ege parpar parpar. A kagamata zəwet malula ege ma ŋ hejəye, a zeney, a kezlerzetene nje ŋ ulaf ege aza vəram. 22Aya, a zenetene zlap ŋ madarlaŋw Yuhana ege wese, a ŋgaya: «Hune nda, hune ghwelzene səkan maa hune gəreta a nje ŋkune ege ey maa hune zləmeta ŋ zlam ŋkune ege, ŋ Yuhana. Hune zlepene ca: “Ulaf ege əy kegəre la, hejəye maa ŋgas tata ege əy kámac tata, əy kanda kadak kadak, hejəye maa fagwalakw ata tata ege əy kasaɗ tata, madaŋgazlam ege əy kezləme zlam, hejəye ma mac tata ege əy kágwarzamha aza ata lamac, metetekw ege əy kézləme Ma Mewe ma Taŋtaŋ mala Gazlavay aza. 23Zəhay mala Gazlavay mbəy ata ɗala ma kaw kégeɓza lalam unaf anta aka a sa askwaw!”»
Yesu a zlap ata Yuhana
24A dəwze anta, maa madarlaŋw Yuhana ege əy nda tata ca, Yesu a mar ŋ zlap ata Yuhana ŋ hejəye ma ɓecha vəram a həzlar ege wese, a ŋgaya: «Hune nda ŋ saraha a damaw ca, vemey? Ŋkem maa tatəɗam a kahəɓalza vaw? 25Mada mbe səkwaw ca, hune nda ŋ sarha vemey? Ɗala ma caha rəgwac ma tuwah ata kusam vaw? Cemey, hejəye ma caha rəgwac ma tuwah tuwah ege ey ma ŋ zəhay ege ca, ara hejəye ma kanja a wata bay ege. 26Ca, hune nda ŋ saraha ca, vayay? mba ma zlap ma mala Gazlavay vaw, sa ya? Ayaw, njenjəwen, sa kazlapahune, mbəy day aha mba ma zlap ma mala Gazlavay. 27Cemey, Yuhana ca, ara mba ma zlap ma mala Gazlavay, kéŋtereye a heɗe, a ŋgaya:
“Gazlavay a zlepene ŋ mba anta:
Ŋghe, sa kalaɓza malaɓ naka mpar aha hwa
ŋ lamzahwaw taf aka.”»
28Yesu a zlepetene zeney, a ŋgaya: Sa kazlapahune, njenjəwen, Yuhana ca, mbəy pa ma day aha hejəye tewtew ma mbawha ŋ manhayak ete ŋghe ege. Cemey, ɗala ma pa ma pəzekw ŋ Lazam bay mala Gazlavay ca, mbəy pa ma day aha mbe.
29A təwse ca, hejəye tewtew zlaɓa macak budaw ege əy ketehzene zlam ŋ Yuhana, əy kasan taf mala Gazlavay ca, mbəy tuwah, əy kélem laban aza a yam baptəysma ara mbe. 30Cemey, Farəysa ege ey maghwal ma maŋkanaŋkan ege ca, əy kálamza səkan maa Gazlavay a kaɗaw ŋ law, mavəday tata, askwaw. Əy kálamza ŋ lem laban aza a yam baptəysma ara Yuhana askwaw.
31Yesu a zlap zeney, a ŋgaya: «Sa naslaŋgalata hejəye ma ata vah ŋtakwaw ma na ŋgha ca, a vemey? Əy nja ana vayay? 32Əy nja ana uzəye maa əy kénjeye ŋ hubakw, əy kaya kusam, əy ŋgaya: “Nene kámbazahune talgway, cemey, hune kádəmas askwaw. Nene kálahune dəraf mce, cemey, hune káhan askwaw.” 33Sa zlapahune ana ebe ŋghe ca, mavəday, Yuhana maban hejəye a yam baptəysma kándaha ŋ ghwalza zlap mala Gazlavay, a kazam uda ana hejəye vedəye askwaw, a kasa mavaw askwaw. Cemey, hune zlap, hune: “A kawak!” 34Sa, sa Mba Ɗala, sa ndaha, sa kazam uda, sa kasa mavaw. Hune zlap hune: “Heje anta a zam uda dəydey, a sa mavaw dəydey. A zeney, ara ŋgama macak budaw ege ey hejəye mala gay ege!” 35Cemey, sa kazlapahune, kəleŋ mala Gazlavay a ghwalha tuwah ca, ta ŋ hejəye ma lamza kəleŋ anta aza ege.»
Yesu mbəy a wata Səymawn, ɗala Farəysa
36Ɗala Farəysa wende aka, a yaɓa Yesu a wata anta ŋ zam uda ŋ la anta. Aya, Yesu a dam a wata anta anta, a nja ŋ zam uda anta. 37Wala wende ŋ uzam anta aka, a kala gay dakala. Maa a zləme Yesu a kazam uda a wata Farəysa wese ca, a ndaha, a daha gajak ŋkəɗaŋ maghwarakwaghwarakw maa əy kayaɓa albatəra, mel ma kenjef feŋfeŋ ghef ŋma. 38A ndaha, a gəleɓ aka a dəwze Yesu, mbermber ara ŋgas anta. A han ha lahan anta ma kwayha, a benene ŋgas mala Yesu aza. Aya, tukwaɗ a tukwaɗ lahan anta wese aza a jukwaɗ ha anta, səkaw a səkawaw, ŋ ŋgas anta, a temzene mel ma kenjef feŋfeŋ wese a heɗe. 39Ɗala Farəysa ma yaɓa Yesu a wata anta wese, maa a gəre səkan ma wala ŋghe wese a la cemey, a zlap ŋ ha anta a ŋgaya: «Njenjəwen ca, mada heje ŋghe, ara mba ma zlap ma mala Gazlavay ca, a nasan wala ma kaca ra a heɗe ŋghe ca, ara wala ma kala gay dakala.» 40Cemey, Yesu a zlepene ŋ Farəysa wese a ŋgaya: «Səymawn, sa kaɗaw ŋ zlapahwaw ma wende aka.» Səymawn wese a zenene, a ŋgaya: «Zlapaza, Bay Madakal.»
41Aya, Yesu a zlepene, a ŋgaya: «Hejəye vedəye gbak aka, əy ja duwa ara ɗala wende aka. Heje anta a kasəbar ɗala wende a səlay#7.41 Səlay bakatar temere jaɓan, a ma gərek ca, ana zlap ca, denəye temere jaɓan. Denəye teŋguleŋ ca, ara laŋtar zlan a ɗala a vah pal. bakatar temere jaɓan, ɗala wende zeney a səlay bakatar rajaɓan. 42Cemey, hejəye anta ege gbak tata, əy kula ŋ ŋterene duwa anta səkwaw, mavəday anta, heje ma jetene duwa wese, képelzetene aka. Ŋ taba hejəye ŋghe anta ege ca, ma kanaɗaw heje anta day ca, vayay?» 43A təwse ca, Səymawn a zenene, a ŋgaya: «Sa deŋza ŋ ha naka ca, ɗala ma kanaɗaw pa ma day ca, ara ɗala maa a pelzene duwa ma pa ma day a heɗe aka wese.» Yesu a zlepene, a ŋgaya: «Hwa zlapaha a heɗe a heɗe.»
44A dəwze anta ca, Yesu a bawha tama anta kəɗe aha wala wese, a zlepene ŋ Səymawn, a ŋgaya: «Hwa kegəre wala ŋgha vaw, sa ya? Sa ndaha ca, a wata ŋkwa, hwa kétemzekey yam ata ŋgas naka askwaw. Cemey, mbe ca, kébenekey ŋgas naka aza a lahan anta, kátukwaɗza a jukwaɗ ha anta. 45Sa ndaha a wata ŋkwa, hwa késəkewekey askwaw, cemey, a wala ŋghe anta ca, mar aka ma sa damaha aka ete ŋghe ha ma na ŋgha, kéyekzekey ŋ səkewekey a ŋgas askwaw. 46Hwa kétemzekey mel ata ha naka askwaw, cemey, mbe ca, kétemzekey mel ma kenjef feŋfeŋ ata ŋgas naka.»
47«Sa kazlapahwaw: A ɗewekey dakala ana ebe ŋghe ca, a ghwalza ca, kaw kála gay dəydey ca, gay anta ege tewtew əy képeleye aza. Cemey, a ɗala maa əy pelzene gay anta ege aza cekuɗe ende ŋghe ca, laɗaw anta cekuɗe ende ŋghe yam.» 48Aya, a zlepene ŋ wala wese, a ŋgaya: «Gay ŋkwa ege əy képeleye aza.» 49Cemey, hejəye maa əy kazam uda ege tewtew ŋ la anta ata Yesu wese, əy ɗawza ha tata ege, əy ŋgaya: «Heje ŋghe anta ca, ara heje vayay? Ma kula ŋ pal kaw gay a ɗala ŋgha!» 50A təwse ca, Yesu a zlepene ŋ wala wese, a ŋgaya: «Hwa kéreh ŋkwa mavəday maa hwa kélemzekey aza a unaf ŋkwa, nda a zəhay!»
ទើបបានជ្រើសរើសហើយ៖
Luka 7: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
