Yuhana 19
19
1Aya, Pəylatu a zlepetene ŋ sawje ege, əy mejeɓza Yesu, əy maŋtawaw a lakwatay. 2Sawje ege, əy ja patak bay mala jəkeɗ, əy cene ŋ ha leŋ əy cene garawal bay ma vəre ata kusam. 3Əy ndaha mbermber ara mbe, əy zlepene, əy ŋgaya: «Nene kazlapzahwaw, bay mala Yahudu ege!» Aya, ɗa ɗa əy ɗene ja. 4Pəylatu a damha a bəza zeney, a zlepetene ŋ Yahudu ege, a ŋgaya: «Ŋghe, sa nadahune a bəza ata la ŋgha, ndar hune san ca, kaw sa kéndew ma ma ata ghemew, askwaw.» 5Aya, Yesu a damha a bəza, kácaza patak bay mala jəkeɗ ara ata ha leŋ garawal bay ma vəre ata kusam. A təwse ca, Pəylatu a zlepetene, a ŋgaya: «Ŋghe heje anta!» 6Cemey, maa madakal dakal mala kwakwas ege ey hejəye tata ege əy gəre ca, əy mar ŋ ja ula, əy ŋgaya: «Dar ka ata mpe! Dar ka ata mpe gafaŋgal!» Pəylatu a zlepetene, a ŋgaya: «Hune ŋtaw a ha ŋkune, hune daraw, mavəday kaw sa kéndew ma ma ata ghem heje anta, askwaw.»
7Madakal dakal mala Yahudu ege, əy zenene, əy ŋgaya: «Ma maŋkanaŋkan ŋcene aka, ana maa maŋkanaŋkan anta a zlap ca, səy mamac mavəday káca ha anta aza, a Mba Gazlavay.» 8Maa Pəylatu a zləme ma ŋghe ca, kálalak anta day zeney. 9A dam anta a ge anta zeney, a ɗawza Yesu, a ŋgaya: «Hwa ndaha aka ca, a katay?» Cemey, kaw Yesu kézene zlap askwaw. 10Aya, Pəylatu a zlepene, a ŋgaya: «Hwa kaɗaw ŋ zenekey zlap səkwaw ŋghe ca, ŋ sa vaw? Hwa kasan ca, sa kula ŋ palzahwaw ka, askwaw ca, ŋ darahwaw ka ata mpe gafaŋgal səkwaw vaw?» 11Cemey, Yesu a zenene, a ŋgaya: «Kaw ɓarɓar ŋkwa ata sa cekuɗe ende ŋghe, askwaw, səy maa Gazlavay a valahwaw. Mavəday anta, ɗala ma velzekey asa ra ŋkwa ca, gay anta pa ma day.» 12Mar aka a təwse ca, Pəylatu a mpam taf ma ata palaza Yesu aka. Cemey, Yahudu ege, əy ja ula, əy ŋgaya: «Mada hwa kapalza heje ŋghe ka ca, hwa ŋgama mala Kaysara, bay hayak Rawma səkwaw. Kaw vayay ma ca ha anta aza ŋ bay ca, ara ɗala ma kaɗaw ŋ gəre Kaysara, bay hayak Rawma ata nje səkwaw.»
13Maa Pəylatu a zləme ma ŋghe ege ca, a daza Yesu a bəza, aya a nja ka ata lanja ma ata ja guma, ata varvara maslasla a ŋkəɗaŋ, maa əy kayaɓa a ma Əybəranəyŋkaw ege, «Gabata». 14Ara pes ma ata sla gwaygwaya Paska, a la anta pes wereywerey. Pəylatu a zlepetene ŋ Yahudu ege, əy ŋgaya: «Ŋghe, bay ŋkune!» 15Cemey, əy mar ŋ ja ula, əy ŋgaya: «Ja aza a mce! Ja aza a mce! Dar ka ata mpe gafaŋgal!» Pəylatu a zlap zeney, a ŋgaya: «Sa dar bay ŋkune ka ata mpe gafaŋgal aza vaw?» Madakal dakal mala kwakwas ege, əy zenene, əy ŋgaya: «Kaw bay ŋcene matakan, askwaw, səy bay Rawma.» 16Aya, Pəylatu a veletene Yesu aka ŋ daraw, ata mpe gafaŋgal.
Yesu kédereye ata mpe gafaŋgal
A təwse ca, əy jeɓza Yesu. 17Yesu a gwarzam anta ŋ uzam, a tew mpe gafaŋgal anta, a ha anta, a nda kəɗe ata la maa əy kayaɓa a «Kerŋgesl ha», a ma Əybəranəyŋkaw ege «Gwalgwata». 18A təwse ca, sawje ege, əy dar Yesu aka ata mpe gafaŋgal. Əy kadarata hejəye vedəye aka gbak ata mpe gafaŋgal ege a həzlar yam. Wende mbəy ata kəva ra zam anta, wende mbəy ata kəva ra gula anta. 19Pəylatu a zlepetene, əy meŋter ma ŋghe ege aka ata səkan, əy ma dar ka ata mpe gafaŋgal Yesu. Kéŋtereye a heɗe a ŋgaya: «Yesu ɗala Nasaratu, bay mala Yahudu ege.» 20Yahudu ege vəram, əy kéjəŋge ma ma kéŋtereye anta, mavəday la maa əy dar Yesu aka ata mpe gafaŋgal anta ca, mbəy mbermber a uzam tata. Ma anta ca, kéŋtereye a ma Əybəranəyŋkaw ege, a ma Yunanəyŋkaw ege leŋ a ma Rawmaŋkaw ege 21Cemey, madakal dakal mala kwakwas Yahudu ege, əy zlepene ŋ Pəylatu, əy ŋgaya: «Hwa ɗaw ŋ ŋter, “Ara bay mala Yahudu ege” səkwaw, karba ca, “Mbəy ma zlap, a ŋgaya: Sa ca, sa bay mala Yahudu ege.”» 22Pəylatu a zenetene, a ŋgaya: «Ma maa sa ŋter ca, manja ana mbe.»
23Maa sawje ege əy kádar Yesu aza ata mpe gafaŋgal ca, əy ŋtata rəgwac anta ege, əy ŋtez ka ŋ ŋfaɗ, sawje kaw vekey kélem kəva ma ŋtezeŋtez ma teŋguleŋ. A zeney, əy ŋta garawal anta ma kaw laŋtav a heɗe, askwaw, kéjeye ŋ la anta mar aka mgba hwas uza. 24Sawje ege, əy zlap ŋ taba tata, əy ŋgaya: «Heje slah garawal anta ka səkwaw, cemey, azakwaw ŋ jakwaw caca ŋ san ɗala ma kanaŋta garawal anta,» ndar ma meŋtereŋter ma a ŋgaya:
«Əy kéŋtez rəgwac naka ege aza,
əy ja caca ŋ ŋta garawal naka,» wese a la anta.
Ebe ŋghe, ana səkan maa sawje ege əy law.
25Ata man Yesu ey zlaŋgan wala, Marəyama wala Kawlawpas leŋ Marəyama ma ŋ uzam Magdala, əy kédeŋeye ara mpe gafaŋgal maa əy dar Yesu aka a heɗe wese. 26Maa Yesu a gəre maman ey madarlaŋw maa a kaɗawaw, əy kédeŋeye a təwse ca, a zlepene a maman a ŋgaya: «Mana, ŋghe mba ŋkwa.» 27A dəwze anta, a zlepene ŋ madarlaŋw wese, a ŋgaya: «Ŋghe, macahw.» Mar aka a təwse, madarlaŋw wese a káŋta Marəyama, maman Yesu wese aza a wata anta.
Lamac Yesu
28A dəwze anta ca, Yesu a kasan ca, kaw səkan kémenha zeney, askwaw, ndar ma meŋtereŋter a la anta tuwaɗ. Aya, Yesu a zlap, a ŋgaya: «Yam a kejekey.» 29Dugwazl wende a təwse aka, ghef a mavaw ma kwəycacaŋ. Sawje ege, əy nda, əy caɓ səkan maa a nja ana sawsaw ŋ mavaw ma kwəycacaŋ wese, əy təkaɗ ata zlambay mpe maa əy kayaɓa Əysawp, əy kefzene kəɗa a tama Yesu. 30Maa Yesu a zlanza mavaw wese ca, a zlap, a ŋgaya: «Səkan tewtew kála anta ŋtakw!» Aya, a ŋteɓ ha, a mac anta.
Sawje a ɓaw Yesu ŋ ŋgala
31A pes wese ca, ara pes ma ata sla pes ma ata zazak. Madakal dakal mala Yahudu ege əy kaɗaw ŋ yakzata mce hejəye ma mac a mac ege ka ata mpe gafaŋgal a pes wese səkwaw, mavəday, pes ma ata zazak anta ca, ara pes ma dakal. A təwse ca, əy ɗawza Pəylatu əy meŋgetene ŋgas ege aza, əy matadakw ata aza. 32Aya, sawje ege, əy nda, əy ŋgetene ŋgas mala hejəye maa əy darata aka ata mpe gafaŋgal ege ey ata Yesu wese aza. Əy ŋgene mala heje mampar aza, a dəwze anta mala heje magbak. 33Maa əy hwasha ata Yesu ca, əy gəre ca, kámac anta tew, mavəday anta, əy kéŋgene ŋgas anta ege askwaw. 34Cemey, ɗala teŋguleŋ ŋ taba sawje ege, a ɓawaw a bərəweŋ a ŋgala, aya, a təwse a təwse, mbambaz ey yam əy zahaha. 35Ɗala ma kaghwalza ma ŋghe anta ca, kégəreza səkan ma la anta, ma maa a kaghwalza anta ca, ara ma ma njenjəwen. Heje anta, a kasan ca, a ghwal ma njenjəwen, hune yam, hune kula ŋ lamza ma anta. 36Cemey, səkan anta tewtew a la ana ebe ca, ndar ma ma ŋ ɗerewel Gazlavay maa a zlap a heɗe a ŋgaya: «Kaw kerŋgesl anta teŋguleŋ a kanaŋga askwaw,» wese, a la njenjəwen. 37Leŋter wende a kazlap zeney, a ŋgaya: «Əy nasarza heje maa əy káɓaw ka.»
Lampas Yesu
38A dəwze səkan ma laha ŋgha anta ege ca, Yusufu ɗala ma ŋ uzam Arəymatəya, a nda ara Pəylatu, a ɗaw taf ŋ ŋta mce Yesu. Yusufu anta ca, ara madarlaŋw Yesu. Cemey, a la ŋ madarlaŋw Yesu anta ca, maɓahaɓah, mavəday a kalalak ata madakal dakal mala Yahudu ege. A təwse ca, Pəylatu a pelzene taf, aya, Yusufu a nda, a ŋta mce Yesu. 39Nəykawdemus, ɗala ma nda ŋ ndewzene ŋ Yesu a zaɗaw wende aka wese, kándaha a təwse yam. A daha mel mala məyr kékəveɗeye a alawes, a la anta kəylaw ramahkaɗ. 40Aya, ata Yusufu ey Nəykawdemus, əy ŋta mce Yesu, əy tukweɗene mel makəvaɗakəvaɗ wese a heɗe, əy mbahwaw a maslaga, ana maa Yahudu ege, əy kalaw, ŋ mpas mce tata ege. 41Ata la maa əy dar Yesu aka ata mpe gafaŋgal wese ca, jarne wende a təwse aka, ŋ jarne anta ca, jeɓ marara mewe maa kaw əy kámpas ɗala ŋma kwagwa askwaw aka. 42A təwse ca, əy mpas mce Yesu ka ŋma, mavəday vah anta ca, ara vah ma ata sla pes ma ata zazak mala Yahudu ege, jeɓ yam mbəy mbermber.
ទើបបានជ្រើសរើសហើយ៖
Yuhana 19: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
