Yuhana 20
20
Yesu kágwarzamha aza ata lamac
1A pes luma buwal, beŋ mala mapat maa la kázlara kwagwa səkwaw ca, Marəyama ma ŋ Magdala a nda a ma jeɓ. A gəre ca, beleler ma a ma jeɓ kétetəŋgweleye aza. 2Aya, Marəyama a hey, a ndewzetene ŋ ata Səymawn Pəyer ey madarlaŋw maa Yesu a kaɗawaw, a zlepetene, a ŋgaya: «Əy káŋta Bay Madakal aza ŋ jeɓ, nene kasan ata la maa əy caw, səkwaw.» 3Aya, ata Pəyer ey madarlaŋw wende wese, əy nda a ma jeɓ. 4Əy hey gbak tata ŋ la anta, cemey, madarlaŋw wende wese pa ŋ hey aha Pəyer, a hwas mpar a ma jeɓ. 5A ɗəget la ŋ jeɓ, a gəre maslaga ege əy kégwepeye ata hayak, cemey, kádam ŋma askwaw. 6Aya, Səymawn Pəyer ma kasəbaraza ara wese a hwasha yam, a dam ŋ jeɓ, a gəreta maslaga ege əy kégwepeye ata hayak. 7Maslaga maa əy təkaɗ ha Yesu a mbe ca, képeɗeye, kéceye parpar ata la matakan. 8Aya, madarlaŋw ma hwas mpar wese, a dam ŋ jeɓ yam, a gəreta səkan anta ege, aya, a lamza. 9Cemey, ha hwas ata vah wese ca, ɗerewel ma keweɗ maa a ŋgaya: Yesu a nagwarzamha aza ŋ taba hejəye mamacamac ege, wese ca, madarlaŋw ege əy kásan kwagwa səkwaw. 10A dəwze anta, madarlaŋw ma gbak ege wese, əy zen tata a wata.
Yesu a ghwelene kusam ŋ Marəyama ma ŋ Magdala
11A təwse ca, Marəyama kégereye mbermber a ma jeɓ, a kahan. Maa a kahan wese ca, kéŋteɓeye, a keɗəget la ara ŋ jeɓ. 12Aya, a gəre malaɓ Gazlavay ege gbak, rəgwac ma ata kusam tata ege pepeɗek. Əy kénjeye ata la maa əy wanza mce Yesu, ma teŋguleŋ mbəy ata laca ha, wende mbəy ata laca ŋgas ege. 13Əy ɗawza, əy ŋgaya: «Wala, hwa han vemey?» A zenetene a ŋgaya: «Əy káŋta Bay Madakal naka aza, sa kasan ata la maa əy caw, səkwaw.» 14Maa kázlap aza ana ebe ŋghe ca, a sar la a dəwze, a gəre ca, Yesu kégereye a təwse. Cemey, kásan ara Yesu səkwaw. 15A təwse ca, Yesu a ɗawza, a ŋgaya: «Wala, hwa han vemey? Hwa mpam vayay?» Cemey, Marəyama a cakza ca, ara heje la, aya, a zlepene a ŋgaya: «Bay naka, mada hwa ma ŋta mce Yesu ca, ghwelzekey ata la maa hwa caw, ndar sa nda ŋ daza.» 16Yesu a yaɓa a zlam anta, a ŋgaya: «Marəyama.» Aya, a sar la kəɗe aha mbe, a zlepene a ma Əybəranəyŋkaw ege, a ŋgaya: «Rabunəy» ana zlap ca, Masasərak. 17Yesu a zlepene, a ŋgaya: «Hwa ŋkəreŋzekey aka səkwaw! Mavəday, sa kétev mgba ara Vana kwagwa səkwaw. Cemey, a ŋkwa ca, nda ŋ ndewzetene ŋ zlana ma lemzekey aza ege, hwa zlepetene ca, sa ketev mgba ara Vana, ara Cehw ŋkune yam, ara Gazlavay naka, ara Gazlavay ŋkune yam.» 18Aya, Marəyama ma ŋ Magdala a nda, a ghwelzetene ŋ madarlaŋw Yesu ege, a ŋgaya: «Sa kégəre Bay Madakal.» Aya, a ŋgeɗetene ma maa Yesu a zlepene.
Yesu a ghweletene kusam ŋ madarlaŋw anta ege
19Aya, a pes luma buwal anta mala mackwahw ca, madarlaŋw Yesu ege, əy kéɓeceye ŋ ujek. Əy káɓərazl ma ujek ege aka, mavəday əy kalalak ata madakal dakal mala Yahudu ege. A təwse ca, Yesu a ndaha, a gar ŋ taba tata, a zlepetene, a ŋgaya: «Zəhay manja ata hune.» 20Maa kázlap aza ana ebe ŋghe ca, a ghwelzetene ra anta ege leŋ kəva ŋgala anta. Maa madarlaŋw ege əy gəre Bay Madakal ca, əy sasam dakala. 21Yesu a zlepetene zeney, a ŋgaya: «Zəhay manja ata hune. Ana maa Vana a leɓekey, sa yam, sa laɓzahune.» 22Aya maa kézlepetene aza ana ebe ŋghe ca, a fet tatəɗam ata tata, a zlepetene a ŋgaya: «Hune lamza Zəwet ma keweɗ. 23Mada hune képelzene gay mala ɗala aza ca, Gazlavay a nepelzene ka yam, mada hune képelzene gay mala ɗala, askwaw ca, Gazlavay a kenepelzene ka, askwaw yam.»
Ata Yesu ey Tawmas
24Maa Yesu a ghweletene kusam ŋ madarlaŋw anta ege wese ca, Tawmas, maa əy kayaɓa a musa, ɗala teŋguleŋ ma ŋ taba malaɓ ege ma wam aha gbak, mbəy a təwse, askwaw. 25Aya, madarlaŋw ege vedəye əy zlepene, əy ŋgaya: «Nene kégəre Bay Madakal.» Cemey, Tawmas a zenetene, a ŋgaya: «Mada sa kégəre vevərek mbəlah mala pente ŋ dəmas ra anta ege, askwaw, mada sa káca mba ra naka a heɗe, askwaw leŋ sa dam mba ra naka ŋ mbəlah ma ata ŋgala anta, askwaw ca, sa kanalamza, askwaw.» 26Wan jamahkaɗ a dəwze anta ca, madarlaŋw Yesu ege, əy kéɓeceye ŋ ujek zeney. Tawmas mbəy ara tata, ma ujek ege əy kéɓərezleye. A təwse ca, Yesu a ndaha, a gar ŋ taba tata, a zlepetene, a ŋgaya: «Zəhay manja ata hune.» 27Aya, a zlepene ŋ Tawmas, a ŋgaya: «Daza mba ra ŋkwa ete ŋghe, sarzata ra naka ege, daza ra ŋkwa, damza ŋ mbəlah maa ata ŋgala naka. Hwa ja səbakw səkwaw, lamza.» 28Tawmas a zenene, a ŋgaya: «Hwa Bay Madakal naka, hwa Gazlavay naka.» 29Yesu a zlepene, a ŋgaya: «Hwa lemzekey ca, mavəday maa hwa kégərekey. Zəhay manja ata hejəye ma kégərekey ege askwaw, cemey, əy kélemzekey aza.»
Ɗerewel ŋghe anta a ɗaw ŋ zlap ca, vaŋgay?
30Yesu kála zaɓəla ege vəram ata nje madarlaŋw anta ege. Cemey, zaɓəla anta ege vedəye, əy kéŋtereye ŋ ɗerewel ŋghe, askwaw. 31Cemey, zaɓəla ege maa əy kéŋtereye ete ŋghe ca, ŋ ghwalzahune Yesu ca, ara Almasəyhu, Mba Gazlavay. Ana ebe ŋghe, mada hune kálamza aza ca, hune nelem lanja a zlam anta.
ទើបបានជ្រើសរើសហើយ៖
Yuhana 20: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
