Yuhana 18
18
Əy kámbal Yesu aza
1Maa Yesu kázlap aza ana ebe ŋghe ca, əy nda a madarlaŋw anta ege, kəɗa aha bəza zlazlar Kedərawn. Jarne wende a təwse aka, əy dam ŋma. 2Cemey, Yahuda, ɗala ma kanasəkam Yesu aza ca, a kasan la anta, mavəday Yesu ey madarlaŋw anta ege, əy kanda a təwse ŋ gas vəram. 3Yahuda a nda ŋ jarne anta, zlaɓa sawje ege vəram leŋ mahəbar ujek kwakwas ege. Ara madakal dakal mala mala kwakwas ege ey Farəysa ege əy ma laɓzata. Əy ndaha ŋ jarne wese zlaɓa walwal ege, patarla ege leŋ səkan ma ata ɗa gham ege ara tata. 4Yesu ca, a kasan səkan ma kenendewzene tewtew. A təwse ca, a nda kəɗe ara tata, a ɗawzata, a ŋgaya: «Hune mpam ca, vayay?» 5Əy zenene, əy ŋgaya: «Nene mpam Yesu, ɗala Nasaratu.» Yesu, a zlepetene, a ŋgaya: «Ara sa.» Cemey, Yahuda ɗala ma səkam Yesu aza wese, kégereye ŋ taba tata a təwse. 6Maa Yesu a zlepetene «Ara sa» wese ca, əy zen a ma a dəwze a dəwze, əy ndav tata ata hayak. 7Yesu a ɗawzata zeney, a ŋgaya: «Hune mpam ca, vayay?» Əy zenene əy ŋgaya: «Nene mpam Yesu, ɗala Nasaratu.» 8Yesu a zenetene, a ŋgaya: «Sa kázlapahune aza, ara sa. Ca, mada sa ana maa hune kampam ca, hune yakzata hejəye ŋghe ege, əy manda tata.» 9Səkan anta a laha ana ebe ŋghe ca, ndar zlap mala Yesu maa a zlap, a ŋgaya: «Kaw sa kéfətekza ɗala teŋguleŋ ŋ taba hejəye maa hwa veleketa ege, askwaw» wese, a la. 10A təwse ca, ŋgezle masalam ara Səymawn Pəyer aka, aya, a daɗaza, a bal mala zlan mala madakal mala kwakwas, a rezlene zlam kəva zam aza. Zlam mala mala zlan anta ca, Malkus. 11Cemey, Yesu a zlepene ŋ Pəyer, a ŋgaya: «Zenza ŋgezle masalam ŋkwa ka ŋ ujek anta. Hwa ulakza ca, sa kanasa gef maa Vana a velekey ŋ saw, askwaw vaw?»
Əy jeɓza Yesu ara Anas, madakal mala kwakwas
12Aya, sawje ege ey madakal tata leŋ mahəbar madakal dakal mala Yahudu ege, əy mbal Yesu, əy jawaw. 13Əy jeɓza mampar anta ca, ara Anas, sukəlahw Kayafas. Kayafas anta ca, ara mbe madakal mala kwakwas ata va wese. 14Cemey, Kayafas anta, ara mbəy ma zlepetene ŋ Yahudu ege, a ŋgaya: «Zukwan ɗala teŋguleŋ mamac, a uley hejəye tewtew,» wese.
Pəyer a ja ma, a kasan Yesu səkwaw
15Səymawn Pəyer ey madarlaŋw wende, əy səbar Yesu ara. Madarlaŋw wende wese anta ca, madakal mala kwakwas anta a kasanaw, mavəday anta əy dam a Yesu ata varvara ge mala madakal mala kwakwas wese. 16Cemey, Pəyer ca, kégereye a bəza, mbermber a ma ujek. Aya, madarlaŋw wende maa əy kasan kusam a madakal mala kwakwas wese, a damha a bəza, a zlepene ŋ wala ma həbar ma ujek wese, aya, madarlaŋw wese a damza Pəyer ata varvara ge. 17Wala mala zlan wese, a zlepene ŋ Pəyer, a ŋgaya: «Hwa ca, hwa ɗala teŋguleŋ ma ŋ taba madarlaŋw mala heje ŋghe anta yam, askwaw, aza vaw?» Pəyer a zenene, a ŋgaya: «Ŋghey! Sa madarlaŋw anta səkwaw.» 18Mala zlan ege ey mahəbar ujek kwakwas ege, əy kábas kwahwaw aka a mpeseser a təwse, əy kenjewew, mavəday tatəɗam a kamaɗ. Pəyer kégereye a həzlar tata, a kenjew kwahwaw anta yam.
Anas, madakal mala kwakwas a ɗawza Yesu
19Aya, madakal mala kwakwas a ɗawza Yesu ata madarlaŋw anta ege leŋ ata səkan ege maa a kesesərekzetene ŋ hejəye. 20Yesu a zenene, a ŋgaya: «Sa kázlap ata nje hejəye tewtew, sa kásasərakzata hejəye ata pes ata pes ŋ ujek ma ata rak Gazlavay ey ŋ ujek kwakwas, ata la maa Yahudu ege əy keɓec tewtew. Kaw sa kázlap ata deh askwaw. 21Hwa ɗawza ara sa ca, ŋ vay? Ɗawza ara hejəye ma zləme ma naka ege. Tata ca, əy kasan səkan maa sa zlap kadak kadak.» 22Maa Yesu a zlap ana ebe ŋghe wese ca, ɗala teŋguleŋ ŋ taba mahəbar ujek kwakwas ma a təwse, a gazl Yesu ŋ barzlazlam, a zlepene, a ŋgaya: «Hwa nezenzene zlap ŋ madakal mala kwakwas ca, ana ebe ŋghe, vaw?» 23Yesu a zenene, a ŋgaya: «Mada sa kázlap a heɗe a heɗe səkwaw ca, ghwalza. Ca, mada sa zlap a heɗe a heɗe ca, hwa gezlekey ŋ vay?» 24Aya, Anas a zlepetene ŋ hejəye ŋ jeɓza Yesu ara Kayafas, madakal mala kwakwas. Yesu anta ca, kéjeweye war.
Pəyer a ja ma, a kasan Yesu səkwaw, zeney
25Ata vah wese ca, Səymawn Pəyer mbəy a təwse, a kenjew kwahwaw. Əy ɗawza əy ŋgaya: «Hwa ca, hwa ɗala teŋguleŋ ma ŋ taba madarlaŋw mala heje ŋghe anta yam askwaw aza vaw?» Cemey, Pəyer a ja ma, a zlap a ŋgaya: «Ŋghey, sa madarlaŋw anta səkwaw.» 26A təwse ca, ɗala teŋguleŋ ma ŋ taba mala zlan ege mala madakal mala kwakwas aka. Heje anta ca, ara van mala heje maa Pəyer a rezlene zlam aza wese. A zlepene ŋ Pəyer, a ŋgaya: «Sa kégərehwaw ara mbe ŋ jarne askwaw aza vaw?» 27Pəyer a ja ma zeney, ŋgaya: «Ŋghey, sa madarlaŋw anta səkwaw.» Aya, a təwse a təwse, gamzakw a ja ula.
Yesu mbəy a tama bay Pəylatu
28A dəwze anta ca, əy ŋta Yesu a wata Kayafas, əy jeɓza a wata Pəylatu, ɗala mambal hayak mala Rawma. Əy jeɓza ca, mala mapat beŋ, mavəday anta, madakal dakal mala Yahudu ege əy kádam a ge anta askwaw, mavəday əy ɗaw ŋ kaɓ kusam tata ege aka səkwaw, ndar əy la kula ŋ zam uda gwaygwaya Paska. 29Mavəday anta, Pəylatu, mambal hayak, a damha a bəza a ndewzetene. A ɗawzata, a ŋgaya: «Hune ŋkəɗaw heje ŋghe anta ca, ata vemey?» 30A təwse ca, əy zenene əy ŋgaya: «Mada kálaha səkan ma dadawar askwaw ca, nene kanadaza ara hwa askwaw» 31Aya, Pəylatu a zlepetene, a ŋgaya: «Hune ŋtaw, hune jene guma anta a ha ŋkune ana maa ma maŋkanaŋkan ŋkune a kaɗawaw.» Yahudu ege wese, əy zenene, əy ŋgaya: «Taf képeleye ŋ nene, ŋ ja ɗala aza mce ca, askwaw.» 32Səkan anta a laha ana ebe ŋghe ca, ndar ma maa Yesu a zlap a namac ca, vaŋgay wese, a la. 33Pəylatu a zen anta a ge, a yaɓa Yesu, a ɗawza, a ŋgaya: «Hwa ca, hwa bay mala Yahudu ege vaw?» 34Yesu a zenene, a ŋgaya: «Hwa zlap ana ebe ŋghe ca, ara ledeŋ ŋkwaɓ ŋkwa vaw? Askwaw ca, ara hejəye ma zlapahwaw ata sa vaw?» 35Pəylatu a zenene, a ŋgaya: «Sa ca, sa ɗala Yahudu vaw? Ara hejəye ma ŋ hayak ŋkwa ege ey madakal dakal mala mala kwakwas ege, əy ma dahwaw ara sa. Hwa laha ca, vemey?» 36Yesu a zenene, a ŋgaya: «Lazam bay naka ca, ara lazam bay ma ŋ manhayak ŋghe səkwaw. Mada keɗe lazam bay naka ara lazam bay ma ŋ manhayak ŋghe ca, mala zlan naka ege əy naɗa gham mavəday sa, ndar əy ɗaw ŋ velzekey aza asa ra madakal dakal mala Yahudu ege səkwaw. Cemey, na ŋgha ca, lazam bay naka mbəy ŋ manhayak ete ŋghe, askwaw.» 37Aya, Pəylatu a zlepene, a ŋgaya: «Enjekeɗe hwa bay vaw?» Yesu a zenene, a ŋgaya: «Ara hwa ma kazlap, hwa ya, sa bay. Sa mbawha, sa ndaha a manhayak ŋgha ca, ndar sa ghwelzetene ma ma njenjəwen ŋ hejəye. Kaw vayay ma ata taf ma njenjəwen ca, ara ɗala ma keteh zlam ata zlap naka.» 38Pəylatu a zlepene, a ŋgaya: «Ma ma njenjəwen ca, ara vemey?»
A dəwze zlap ŋghe ege ca, Pəylatu a nda, a ndewzetene ŋ Yahudu ege a bəza zeney, aya, a zlepetene, a ŋgaya: «A naka ca, kaw sa kéndew ma ma ata ghem heje ŋghe ca, askwaw. 39Cemey, ana ma a mpat a mpat, a gwaygwaya Paska ca, sa kapalahune ɗala teŋguleŋ ŋ taba hejəye ma ŋ daŋgay ege aka. Ca, hune ɗaw sa palahune bay mala Yahudu ege aka, vaw?» 40Aya, əy ja ula, əy ŋgaya: «Mbe səkwaw, cemey Barabas!» Barabas anta ca, ara ɗala masulah.
ទើបបានជ្រើសរើសហើយ៖
Yuhana 18: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
