Lúkas 14
14
Yésuse umóndúgie anúmanuma buɔ́sɛ buá giíndía giá bayúdɛn
1Buɔ́sɛ búmodi buá giíndía, Yésuse uwebíŋín uguá giansɛ giá ofuŋ huá bayúdɛn gá nyánan. Bandɔ abámabá hɔ́ abɛ́d gá bídíbenye yɔ́. 2Ubúal beseé áneé mɔndɔ omodi umabá egég gá busió nuɔ́l nuég nuóbe na manúma. 3Yésuse uwoóhún gɔg belinsibigodi na bafalisiɛ́ŋ áneé: «Kásɛ bányɛ bá guóndúgie mɔndɔ buɔ́sɛ buá giíndía giá bayúdɛn a?» 4Ɔbɔ́lɔb gɔg konduguondinye. Yésuse uwebíségélidinye mɔndɔ wa manúma, uwoóndúgie yɔ́, uwegúgie yɔ́. 5Egélém agányɛ, Yésuse uwɔyidɛn belinsibigodi na bafalisiɛ́ŋ áneé: «Ányá uguánɔ guá ɔlɔŋ unyaá wa gueleé áneé muɔ́n weg ugúnya ana gidúg giég gímáguɛn uguá ɔmbɛ́l buɔ́sɛ buá giíndía, udiyɔn yɔ́ hɔ́nɔhɔ́ buɔ́sɛ buáguɔ́?» 6Ɔbɔ́lɔb ta guondinye gá ŋŋóhúnín igányɛ.
Eyíd ondig huá nsúgie
7Yésuse uwaán haná bandɔ bémeyé indig siá busió agá nubáŋ, uwedúmín bɔ́ nsab áneé: 8«Mɔndɔ úmɔ́dɔ́ŋɛ́ɛn gá budɔ́mb buá nuɔ́ndɔ́n, edieyid ondig huá busió. Gá giagiá alaála bɔ́sɔdɔ́ŋɛ́ɛn mɔndɔ omodi ugudúmbanaá. 9Mɔndɔ usɔ́núdɔ́ŋɛ́ɛn gá budɔ́mb ubugányɛ banuá bem, wɔsiguɔyidɛ́n áneé: “ Éŋín sɔ́gá ugányɛ ondig huáhɔ.” Agaáguadigɛn na ɔduá gunɔ́h gidigid gá guídenedugúmín uguá ondig huá gélém. 10Búnyɛ gɔg áneé mɔndɔ úmɔ́dɔ́ŋɛ́ɛn gá budɔ́mb, idá genedugúmín uguá ondig huá gélém. Agányɛ mɔndɔ usɔ́dɔ́ŋɛ́ɛn umónoól, uguɔyidɛn áneé “Ogúleé, ógún agá ginɔ́g giá ondig igiɛ.” Agányɛ bandɔ bem abánya naánahɔ agá nubáŋ bágaáguán haná béhínenyeé. 11Gá giagiá mɔndɔ gidigid ubíbúlúgenyeé bénésusie yɔ́ súsɔ́n, ubísusenyeé bénébúlígie yɔ́.»
Dɔ́ŋɔ́nɔ́n súsɔ́n basúgasuga gá budɔ́mb
12Yésuse uwɔyidɛn súsɔ́n mɔndɔ umɔɔ́dɔ́ŋɛ́ɛn yɔ́ áneé: «Ámála budɔ́mb, ɔdidɔ́ŋɔ́n bégúl báhɔ, ta beliméen báhɔ, ta bandɔ báhɔ bá niguíli, ta nnuɛ́m siá bandɔ siáhɔ siá ifág. Gá giagiá bámuanyɛ súsɔ́n bágal buɔ́b budɔ́mb bɔ́dɔ́ŋɛ́ɛn gá guondinye. 13Ámála gɔg budɔ́mb, dɔ́ŋɔ́n na basúgasuga na bióŋi na biŋándúnyá na beheguhégu. 14Agányɛ, ɔɔ́guɔ́bɔn beseé gá giagiá, bódigódi buand buá guondinye. Gɔgaá, Uhaluá wonóguondinye buɔ́sɛ ubuɔ́ wenéhemenyenú bandɔ bá gindényé uguá bibɛ́l.»
Nsab ya giandá giá ɔnyá
15Bandɔ abámabá hɔ́ bɔ́mɔɔ́mɔ́ɔb nugálɔ unugányɛ, omodi uwɔyidɛn Yésuse áneé: «Beseé ubá naá uwanábánɔ́ uguá ɔlɔŋ huá ɔnyá uhúánábánɔ́ uguá Niguili niá Uhaluá.» 16Yésuse uwɔyidɛn yɔ́ áneé: «Mɔndɔ omodi umala giandá giá budɔ́mb uwɔdɔ́ŋɔ́n giod giá bandɔ. 17Gisigɛl giá nyánan gímeémeg, uwadɔm edúmébi weg gá guɔyidɛn bɔdɔ́ŋína áneé: “Ógúnónónu dabdab, gunyá gúganyɛ agá nubáŋ.” 18Bɔdɔ́ŋína bem abɛ́d gá bíségsegie bilɔŋ bímomi. Wa busió uwɔyidɛn edúmébi áneé: “Yɔɔ́nd mesíge ɔmɔɔ́ yámbanɔ́ guánaán, sígoli nnyíbinɛ́n.” 19Omodi uwɔyɛd áneé: “ Yɔɔ́nd mélúke máad guɛ́d guámɛ uguɔ yanamag gudínde na mɔ́, sígoli nnyíbinɛ́n.” 20Odódi uwɔyɛd áneé: “Mmanyɛ ɔŋɔ́lɔŋɔ́ná, buand buáguɔ́ ndiabá wa guól.” 21Edúmébi uwosiond uwɔyɔn ɔgúnɔ́gɔ́n weg ŋŋondínyi isigányɛ. Mɔndɔ wa nihiá uwɔɔ́b ilúnd, uwɔyidɛn edúmébi weg áneé: “ídá gunsáns uguá ŋŋil uguɔ́g naá ugúa biɔ́mbɛ, oŋólín aga na bióŋi na biŋándúnyá na beheguhégu.” 22Maná ginɛŋ umadɔ́mb, edúmébi uwɔsiɔyɛd áneé: “Ɔgúnɔ́gɔ́n, mmáal buand ubuɔ́ ɔ́sɔ́guɔyɛd, gúu indig símodi símanyaá gudɔɔ́.” 23Ɔgúnɔ́gɔ́n Uwɔyídɛn gɔg edúmébi áneé: Ídá uguá ŋŋil naá uguá mesíge gidigid, uyɔɔ́ agaáguádana neéneg ebíŋínye yɔ́ uguá bugaga, gá gueleé giansɛ giámɛ gíhón. 24Gá giagiá, mmɔ́núɔyidɛn áneé ta omoómi uguá bandɔ ɔbɔɔ́ mmébue gudɔ́ŋɛ́ɛn, ta omoómi udianányá gunyá guámɛ.»
Níhínánánɔ buá gidigid gá binidin Yésuse
25Giandá giá giíŋ gímandá ɔlɔŋ na Yésuse, uwabígagalɛd giɛ́, úmuanyɛ áneé: 26«Mɔndɔ úmeleé wémbinen, ugódi áneé uŋɔya gudɔ́mb hana wɔ́yɔnɔ́ síe, noódíe, ugányɛ weg, baán bég, beliméen muɛ́d uŋɔya gudɔ́mb nusɔ́da nuég, udibá wa bá ebinene wamɛ. 27Mɔndɔ udiábá wa bídúgɛn nuag nuég umbinidin, udibá wa bá ebinene wamɛ. 28Mɔndɔ uguánɔ guá ɔlɔŋ úmeleé ugaáhág ɔlɛ́ŋ, ugódi áneé wagagudugumin, wanuna gá lɛns buŋúme ubuɔ́ ɔlɛ́ŋ uhugányɛ húgɔɔ́gɔ́lɔ́nɔ́. Waán mmába ugódi gidám giá ŋŋúme igiégeneé gá yib buóli buég.» 29Úmédúnúmin gɔg gá hága ɔlɛ́ŋ huég, húmágáŋ yɔ́, bandɔ gidigid abánánanaá yɔ́, bɔ́nɔ́hɔna yɔ́ 30bɔ́ya áneé: «Ndénu mɔndɔ umebul guhága ɔlɛ́ŋ, uhúɔ́lɔb ta guyib. 31Súsɔ́n, ofuŋ húmodi húmɔyá guɛ́d gá bidí na sɔ́gá ofuŋ, húgódi áneé húdugumin gá guán mmába na bediídi duɔns dúad húnyɛ huá guɔ́d uhúgódionu bediídi duɔns nitín.» 32Búmabúdibá nɔ́, uguá ginɛŋ igiɛ́ sɔ́gá úmanyaá hádɛ, udúmɛn yɔ́ bandɔ gá gual nsémbie. 33Yésuse uwɔɔ́hígɛn áneé: «Anagányɛ gɔg, uguánɔ guá ɔlɔŋ, mɔndɔ úmádinihɛ́n muand gidigid gá mbinidin, ugányɛ udibá wa bá ebinene wamɛ.»
Gisulie giá nigɔ́b
34«Ɛɛ́ɛ, nigɔ́b nínyɛ ginɔ́g giá buand. Nímámanasɔl, giagɛ igínya andá giá guondoguondie niɛ́ gusam? 35Nídibánd buand ta gá guísi ta gá gindi, bɔ́nɔhɔn niɛ́ agá nígadá. Mɔndɔ unyaá na idú siá guɔ́b wɔɔ́b.»
ទើបបានជ្រើសរើសហើយ៖
Lúkas 14: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
