Lúkas 13
13
Bídúnénénú gunsáns
1Ugúa ginɛŋ giáguɔ́, bandɔ bɔ́mɔsiɔyɔ́n Yésuse haná Pilát úmɔɔ́ná bagalileyɛ́ŋ, uguá ginɛŋ igiɛ́ úmeéŋén Uhaluá bisámb. 2Yésuse uwondinye bɔ́ áneé: «Kásɛ, banuá nuégedenye áneé bagalileyɛ́ŋ abagányɛ bémeguén anagányɛ gá giagiá bámabá belibilɔga abagɔ́n gudɔ́mb bagalileyɛ́ŋ obólbóndeé a? 3Ɛ́ɛɛ́, yɔ́núɔyɔn, bídúnénénú, kandabá nɔ́ nugeguén súsɔ́n hana bámuanyɛ! 4Bandɔ bunyo na bádádɔ ɔbɔɔ́ ɔlɛ́ŋ huá Silowé húmɔ́n agaá húmebugigen, kásɛ banuá nuégedenye áneé bámabianán giguá gudɔ́mb bandɔ bem bá Yelusalɛ́m obólbóndeé a? 5Ɛ́ɛɛ́, yɔ́núɔyɔn, numánúdibídun banuá gidigid nugeguén súsɔ́n hana bámuanyɛ.»
Buságság ubúdiehúme
6Yésuse uwendedúmín bɔ́ nsab iyɛ áneé: «Mɔndɔ omodi umagɔ́n buságság uguég guá mesíge má fínyi, buɔ́sɛ búmodi, uwonoól áneé wasigás bibɔg, ta gugégie. 7Uwɔyidɛn gɔg eŋemi wa fínyi áneé: “Bíyɛ́g: Búganyɛ duɔ́ŋ dúdádɔ uduɔ́ yoóloneé áneé yasigás bibɔg biá buságság ubuɔ, ndiégégenye ta buand. Sɔ́mb buɔ́. Búdiánigimanan áneé búsɔ́sa mimbi gá gilé.” 8Eŋemi wa fínyi uwondinye yɔ́ áneé: “Ɔgúnɔ́gɔ́n, andánihɛn buɔ́ gá nnyɔ́m iyɛ, ŋŋedíme agá ndínyi, yaág magayɔ má gindi. 9Ala búénéhúm nnyɔ́m iyoóloneé, búmábúdibá nɔ́ asɔ́mb buɔ́.” »
Gióndúgie giá ugándɔ buɔ́sɛ buá giíndía
10Yésuse umabá uhuínyihuinye uguá gigúl buɔ́sɛ buá giíndía. 11Ugándɔ umabá hɔ́ uyɔɔ́ gilɔg giá gileénde gímondie yɔ́ gióŋi búganyɛ duɔ́ŋ bunyo na dúdádɔ, umabá súbúbú, umasábá wa bíganɔn búmbúm. 12Yésuse umaámán yɔ́, uwɔdɔ́ŋɛ́ɛn yɔ́ úmuanyɛ gég áneé: «Ugándɔ, buóŋi buáhɔ búmáman.» 13Uwɔdɔ́bígɛn yɔ́ imbɔ́g, hɔ́nɔhɔ́, ugándɔ uwaganɔg uwɛɛ́d gá gúmenye Uhaluá. 14Ɔgɔ́n wa gigúl uweliŋ hana umaán áneé Yésuse úmóndúgie mɔndɔ buɔ́sɛ buá giíndía. Ɔgɔ́n wa gigúl uwɔyidɛn gɔg bandɔ áneé: «Mɔɔ́sɛ má buóli mányɛ mátíndádɔ. Ógúnónónu gɔg nuɔsibíɔndúna uguá mɔɔ́sɛ amagányɛ, búdibá buɔ́sɛ buá giíndía.» 15Ɔgúná uwondinye yɔ́ gɔg áneé: «Ndé mɔndɔ wa mamb, nudiésulune manyam mánɔ buɔ́sɛ buá giíndía nubúnsenye mɔ́ a? 16Ugándɔ uyɔ gɔg unyɛ ŋŋɔndɛ ya Áblahám iyɛɛ́ Sátan úmagúdá búganyɛ duɔŋ bunyo na dúdádɔ hínen. Gúu búdiabá beseé áneé didúgún yɔ́ buɔ́sɛ buá giíndía a?» 17Egélém gá dugálɔ duá Yésuse, babɛlɛ́bɛl bég ɔbɔ́lɔŋimɔnɔn na ɔduá gunɔ́h. Uguá ginɛŋ igiɛ́ gimbi giá bandɔ gímabá hɔ́ gímɔ́bɔn ibal na binɔ́g bía muand ibiɛ́ Yésuse úmalá.
Nsab ya nsám ya budɛ́ ubuɔ́ bɔ́dɔ́ŋɔ́naá áneé mutáld
(Mat 13.31-32; Mál 4.30-32)
18Yésuse uwɔyɛd gɔg áneé: «Niguili nía Uhaluá nínyɛ mpónyé na giagɛ? Nnyɛ wa gedie niɛ́ na giagɛ? 19Nínyɛ mpónyé na nsám ya budɛ́ ubuɔ́ bɔ́dɔ́ŋɔnaá áneé mutáld, iyɛɛ́ mɔndɔ úmɔgɔ́l uwagɔ́n uguég guá mesíge. Nsám iyahám, iyaáyɛ giandá giá budɛ́, munonyi muá gumɔn múhága bigád biɔ́b uguég guá dúgasia.» 20Yésuse uwɔnduguɔyɛd áneé: «Ŋŋéndegedie Niguili niá Uhaluá na giagɛ? 21Nínyɛ mpónyé na buanyɛ buá guóbonye oguŋ ubuɔ́ ugándɔ usɔ́gɔ́l, waág uguá duhígɛn duá oguŋ dúdádɔ búédiginye oguŋ uhugányɛ gidigid.»
Íslayɛ́l wenébíŋín uguá Niguili niá Uhaluá a?
(Mat 7.13-14)
22Yésuse umɛɛ́d uhuínyihuinye ugúa bidɔŋ na uguá bɔtísɔna, wiídan ɔmbɔ́g huá Yelusalɛ́m. 23Mɔndɔ omodi uwoóhún yɔ́ áneé: «Ɔgúná, kásɛ Uhaluá wonósódie pɛ́ŋ nsánsáŋúlía siá bandɔ a?» Yésuse uwondinye bɔ́ gɔg áneé: 24«Ágánánɔ bugaga gá bíŋínin agá niíd niá sɔ́ndɔ́ndɔ́. Gá giagiá, yɔɔ́núɔyɔn buɔ́, giod giá bandɔ gíánámba gubíŋín, gídianán giásɛ. 25Ginɛŋ gíéneg igiɛ́ mɔndɔ wa nihiá wánádiginaá, ubug niíd niá giansɛ, banuá nulɔbɛn uguá nígadá. Nuanábáduguɛ́d gá kɔŋɔn niíd niá giansɛ nuɔya áneé: “Ehuínyihuínyi díbúnín” wonónúondinye gɔg áneé: “Banuá, ndiényi buhɔɔ́m ubuɔ́ nuólonineé.”»
26Agányɛ gɔg núɔnɔ́yɔnaá yɔ́ áneé: «Dimanyánán idiond idiabíhuán agáhɔ gá eŋís, egehuínyihuinye uguásɔ guá biɔ́mb.» 27Wonónúondinye áneé: «Banuá, ndiényi buhɔɔ́m ubuɔ́ nuólonineé. Ŋŋólígínyénu agá eŋís, banuá bem nualanɔ́ bilɔga.»
(Mat 8.11-12)
28Nuanágánán na Áblahám na Isák na Yɔ́kɔba na bebunebúné gidigid uguá Niguili niá Uhaluá, agányɛ gɔg núánábaŋanɔ́, nubíbanda bigeléd, bɔ́núnɔh agá nígadá. 29Bandɔ bánɛɛ́d guonoólónín uguá egéndu ya guísi gidigid, básinyánán agá giandá giá budɔ́mb uguá Niguili niá Uhaluá.
(Mat 19.30; 20.16; Mál 10.31)
30Agányɛ gɔg, bá gélém bómodi bónónd bá busió, bá busió bómodi bónd bá gélém.
Nigué niá Yésuse Yelusalɛ́m
31Ugúa ginɛŋ giáguɔ́ bafalisiɛ́ŋ bómodi abákilɛn Yésuse gá guɔyidɛn yɔ́ áneé: «Dɔ́mb, ólígie agá, gá giagiá Helód waáguamba guguɔ́n.» 32Yésuse uwondinye bɔ́ áneé: «Idánánɔ, nuɔnɔyídɛ́n gibínyi igigányɛ áneé: Yaágúŋa bilɔg bía bileénde, yoóndúgonye bandɔ na hínen na giámɔ, uguá buɔ́sɛ buá gádádɔ, ŋŋabá mmáman. 33Búánigimanan gɔg áneé na hínen na giámɔ na gúbála, yɛɛ́d na busió, gá giagiá, búánigimanan áneé ebunebúné uguín Yelusalɛ́m.»
Mbaŋana gá busió buá Yelusalɛ́m
34Yelusalɛ́m! Yelusalɛ́m! Aŋuá ɔɔ́nɔnɔ́ bebunebúné, adúdan ɔbɔɔ́ Uhaluá úmadúmɛ́n, adányɛ. Yaámbá gugúsígan baán báhɔ iŋand giod hana ginoódíe giá ŋŋɔɔ́ gígúsíganaá baán bég uguég guá bibagumɛn, gúu númásuguádáab. 35Ahá gɔg, Uhaluá ugebembelidie giansɛ giánɔ. Yɔɔ́núɔyɔn áneé nudianándaŋán, gueneg uguá buɔ́sɛ ubuɔ́ núɔ́nɔ́yidaá áneé: «Ánaá Uhaluá úsayɛ uwoóloneé uguá ɔhɛ́n huá Ɔgúná!»
ទើបបានជ្រើសរើសហើយ៖
Lúkas 13: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
