Lúkas 15
15
Yésuse na bɔlɔga
1Beduísilampɔ́ na belibilɔga abákilɛn Yésuse gá bídɔ́lígɔnɔn yɔ́. 2Guond bafalisiɛ́ŋ na boóŋi abɛ́d gá guoŋuinyoŋuinyi, bɔ́ya áneé: «Mɔndɔ uyɔ waágíndigán belibilɔga wond unyánan nɔɔ́nɔb!»
Gidúmbuá igímením gímánɛ́ɛg
3Yésuse uwɔyidɛn bɔ́ gɔg nsab iyɛ áneé: 4«Uguánɔ guá ɔlɔŋ gɔg, mɔndɔ umábianan edín átánɔ ya bidúmbúa, gímomi gíméním, mbuen waánihinan ibiólbíondeé edín éníhi na bunyo na bíníhi agá uhambɛ agányɛ gá guɛ́d guamba igíséním, gueneg haná ugáaguánánɔ́ giɛ́? 5Umánaán giɛ́ ugáabálaga, usamb giɛ́ uguég guá bibéndu, 6ugúug egég gá nihiá, udɔ́ŋɔn begúl bég na bandɔ bég bá ifág wɔyɔn bɔ́ áneé: “ Ógúnónón, difunde, gá giagía mmán gidúmbúa giámɛ igímením.” 7Yɔɔ́núɔyɔn buɔ́, nɔ́ buánábánɔ́ bilɔŋ bímomi gá eŋelibilɔga omóomi usébídun, Uhaluá unyɛ uguá ibal. Ibal hiég hínyɛ giandá gá busió buá mɔndɔ omoómi ugányɛ gudɔ́mb gá bandɔ edín éníhi na bunyo na bíníhi, abánya gindényé abádiándúguamba gubídun.
Ŋŋúme imeéním imánɛ́ɛg
8Ugúnya ana, ugándɔ ulúm unyaá waábianan mbámbá siég siá ŋŋúme síad, unímie imoómi udigeédímbíg ilamba yoógi gá guamba, uhúla egéndu ya giansɛ gidigid wamba beseé na beseé, gueneg haná úgaáguanánɔ yɛ́ a? 9Úmán yɛ́, udɔ́ŋɔn begúl bég na bagándɔ bég bá ifág, wɔyɔn bɔ́ áneé: “Ógúnónón difunde, gá giagiá mmaán ŋŋúme yamɛ imeéním!” 10Yɔɔ́núɔyɔn buɔ́ ibal hínyɛ giandá na bilúna biá Uhaluá uguá ginɛŋ igiɛ́ eŋélibilɔga omóomi usébídun.»
Muɔ́n uméním umánɛ́ɛg
11Yésuse uwɔnduguɔyɛd áneé: «Mɔndɔ umabianán baán bég báandɛ, 12ginsúgie nnúhe igíɔ́yidɛn síe weg áneé: “Baba mpuá buámɛ budáŋ buá bunɛ́m ubúɔ́bɔninaá naánamɛ.” Síe ta guág nisugusugu, uwabɛn baán bég bunɛ́m buég. 13Baán bá medúg bámadɔ́mb, ginsúgie nnúhe igíábígisa, igíɛ́d na bunɛ́m buég uguá gidɔŋ giá hádɛ. Uwɔnɔsɔ́dɔ́n gilɔg giá nusɔ́da uguɔ́g uwɔlɔg bunɛ́m buég wɔ́s. 14Umɔɔ́mɔ́lɔg bunɛ́m wɔ́s, giandá giá ɔndɔm igíágua uguá gidɔŋ igigányɛ. Uwosiól gusɔ́g. 15Uwɛɛ́d gá buóli agá mɔndɔ omodi wa gidɔŋ igigányɛ. Mɔndɔ uwadɔ́m yɔ́ uguá mesíge gá gíga ŋŋunéb. 16Umambá áneé unyánan gunyá guá ŋŋunéb, ta mɔndɔ gɔg wa guéŋin yɔ́ umasábá. 17Uwasɛɛ́d gɔg gá bígálgalɛn aga ɔdɛ́m áneé: “Belibuóli bányɛ beníg aga baba egéné, obógódionu giod giá gunyá, bógódi muɛ́d giod gundɔ́mb! Yaŋuá agá yesiguén nsan! 18Muɔ́n wa gimónd udiédíne síe, yaŋuá ŋŋeégúg agá baba, ŋŋɛɛ́d yɔyidɛn yɔ́ áneé: Baba, yaál gilɔg agá eŋís ya Uhaluá naá agáhɔ gá eŋís. 19Gúu ndiándanigimanan áneé ɔndɔ́ŋɛ́ɛn áneé muɔ́n wahɔ. Ŋŋɔ́l hana eŋelibuóli wahɔ omodi.” 20Uwabímadɛn gɔg gá guond agá síe. Síe umaámánabílíŋídɛ́n yɔ́, uwán yɔ́ bulɔ́b. Uwɔgɔ́l ɔdɛ́d gá guɛ́d guonogólié yɔ́, uwɔgɔ́l yɔ́ ŋŋuind. 21Agányɛ gɔg, muɔ́n umɔyidɛn síe áneé: “Baba yaál gilɔg agá eŋís ya Uhaluá naá agáhɔ gá eŋís, gúu ndiándanigimanan áneé ɔndɔ́ŋɛ́ɛn áneé muɔ́n wahɔ.” 22Gɔgaá síe uwɔyidɛn belibuóli bég áneé: “Ídánánɔ gunsáns nuɔnɔgɔ́l binɔ́g biá bisɔn nulaŋa muɔ́n wamɛ. Ágánánɔ yɔ́ mmánd uguá inaána, núág yɔ́ bibɔ́gɔ́d. 23Nuɔnɔgɔ́l giandá giá búlúke giá megúd uguá nubág, nuɔ́n. Dinyánan digusie budɔ́mb.” 24Ɛɛ́ɛ, muɔ́n wamɛ uyɔɔ́ núbíyiganaá ugányɛ, umegué gúu woósiónd uguá nusɔ́da. Umením gúu yaán yɔ́. Ebébul budɔ́mb. 25Uguá ginɛŋ igigányɛ muɔ́n wa busió unyɛ gá buóli uguá mesíge. Umoógósíondón, umaágányɛ mɔdɔg na nihiá, ugányɛ gá guɔ́bɔn modóŋídíe na gibín. 26Uwɔdɔ́ŋɛ́ɛn eŋelibuoli omodi gá guóhún yɔ́ buand ubudúmbanaá. 27Eŋelíbuoli uwondinye yɔ́ áneé: “Búnyɛ ndiméen wahɔ umésieg, gúu síe wahɔ umásɔ́mb giandá giá giɔ́nɔ́na giá búlúke giá megúd, gá giagiá umaán muɔ́n weg huényihuényi.” 28Muɔ́n wa busió uweliŋ, uwen gɔg gubíŋín uguá giansɛ. Síe uwahám gá guɔyidɛn yɔ́ áneé ubíŋín, 29muɔ́n wa busió uwondinye síe áneé: “Bídɔ́lígɛ́n! Búgányɛ giod giá nnyɔ́m igiɛ́ ŋŋualanaá buóli, gúu mmanyaá ndigual idú ta buɔ́sɛ. Gúu gɔg ámanyaá adimpuá ta maná nulofódog wa mbuínyi áneé yaal gibín na begúl bámɛ. 30Muɔ́n wahɔ ugányɛ gɔg, waánanyá bunɛ́m buáhɔ wɔ́s na ŋŋɔndɛ, úmeémésieg gɔg ɔmɔ́nɛ́n yɔ́ biandá biá biɔ́nɔ́na biá melúke biá megúd!” 31Síe uwondinye yɔ́ áneé: “Manámɛ, aŋuá anyɛ naánamɛ agá mɔɔ́sɛ gidigid, gúu ubúnya buámɛ búnyɛ buáhɔ. 32Gúu búságuamba áneé dial gibín dibalaga. Ɛɛ́ɛ! Ndimeén wahɔ uyɔɔ́ ábíyiganaá ugányɛ, umegué gúu woósiond uguá nusɔ́da, umením gúu waánɛ́g.”»
ទើបបានជ្រើសរើសហើយ៖
Lúkas 15: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
