Lukas 23
23
Sènꞌòy Yahudi umꞌéd Yèsus ma Pilatus, Menterik Rayak nòm Rajak Roma
(Mat 27:1-2,11-14; Mrk 15:1-5; Yoh 18:28-38)
1Dak kenèmbek sènꞌòy èn Majlis Agama nak umwòg, dak umꞌèn Yèsus ma Pilatus. 2Èn anak umnak umtekèd umtanas ma Yèsus dak umchal, “Kandék kikeyòkh sènꞌòy doh naꞌèr-or sènꞌòy kaum kandék mulawan ma kerajaꞌan Roma! Nanak pon nahuwok sènꞌòy mubayar duid chukay ma Rajak Rayak èn Roma. Tabeh wèl, Nanak nakòw rik Eh nak Mèsias, Rajak kandék!”
3Pilatus natanyak ma Yèsus, “Kemën ke Hãk rajak sènꞌòy Yahudi?”
Yèsus nasaꞌod, “Hek, gerèk hachal nak lah.”
4Nòm kerek nak Pilatus nachal ma mèn ketuwe imam ròb sènꞌòy jajéh, “Yék tok iterèꞌbuk ilok-ilok salah pon sampéy sènꞌòy doh patod imhukom.”
5Tapik umnak had umsered wèl ma Pilatus, “Nanak hòj nabetènglèkh ma kenèmbek negerik Yudéya supaye mulawan ma kerajaꞌan! Nanak natekèd nòm belah Galiliya hatòp, sampéy puꞌdoh hòj nalòy ma doh.”
Pilatus natèrꞌèn Yèsus ma Rajak Hèrodès
6Bil Pilatus nakeyòkh umnak umdéh “natekèd nòm belah Galiliya,” dak natanyak, “Nak eh! Sènꞌòy doh sènꞌòy nòm Galiliya?” 7Dak bil Pilatus nalèkh Yèsus nabeꞌasal nòm Galiliya, rik nak naꞌor umnak muꞌèn Yèsus ma Hèrodès, rajak rik beperintah èn belah Galiliya nak. Bil nak, Rajak Hèrodès mok èn kote Yèrusalèm keꞌjèk.
8Rajak Hèrodès naꞌadés geb bil natèrbuk ma Yèsus. Hòj lamad rajak nak nachèn namtèrbuk ma Rik Nak. Sebab Rajak Hèrodès hòj nakeyòkh ibuk gah tentang Yèsus, dak naꞌès-as dapad namnéh Yèsus namteꞌèl tande kuwase. 9Rajak Hèrodès natanyak ma Yèsus nòm ibuk tenanyak, tapik Yèsus tok nabesaꞌod eh. 10Tapik mèn ketuwe imam ròb guruk agama umted èn anak, dak umnak umꞌèh-éh dak umtanas jajéh hal ma Yèsus. 11Rajak Hèrodès ròb askah eh umgeleh dak umpègyog ma Yèsus, dak umtèrlòg ma Rik Nak bajuk méj-méj gerèk nèglòg rajak. Pas nak umtèrmak Yèsus ma Pilatus. 12Dak arik nak keꞌjèk Rajak Hèrodès ròb Pilatus wèbeꞌiroh, yab èn gagid tòp selaluk wèbema-mus.
Pilatus nakèrlek henukom kènbes ma Yèsus
(Mat 27:15-26; Mrk 15:6-15; Yoh 18:39—19:16)
13Dak Pilatus nakòw ma mèn ketuwe imam, pemimpin masarakat, ròb sènꞌòy jajéh mulãj wèl ma rik nak. 14Pilatus nachal ma umnak, “Nyob éd sènꞌòy doh ma yék, dak nyob chal Rik Nak naꞌèr-or sènꞌòy mulawan ma kerajaꞌan. Yék hòj isuꞌal Rik Nak èn anuh èn mad nyob, dak tok iterèꞌbuk ilok-ilok salah pon gerèk lok rik nyob tanas ma Rik Nak. 15Rajak Hèrodès pon tok naterèꞌbuk ilok-ilok salah pon nòm Yèsus, sebab hòj natèrlos Eh ma èk. Sènꞌòy doh tok natèlꞌèl ilok-ilok pon sampéy patod imkèrlek ma henukom kènbes. 16Jadik, yék imꞌor askah muhemẽd ma Rik Nak, dak pas nak itèrwòl Eh.” [17Tiyab-tiyab arik Paskah, selaluk eh nak Pilatus natèrwòl néy sènꞌòy nòm kelòj jél, penili sènꞌòy jajéh.]#23:17 Jajéh tèks asli tok mèk-mok ayad doh. 18Tapik kenèmbek sènꞌòy èn anak umꞌèh-éh, “Cheleg lah Rik Nak! Kandék kichèn hamtèrwòl Barabas!” 19(Barabas nak umjél hatòp sebab nanak nabelawan ma kerajaꞌan Roma èn kote Yèrusalèm, dak bil nak nacheleg ma sènꞌòy keꞌjèk.)
20Pilatus naꞌèh-éh wèl ma sènꞌòy jajéh nak nachèn namtèrwòl Yèsus. 21Tapik umnak had umbeꞌèh-éh wèl, “Kèrbes lah Rik Nak èn palok salib! Kèrbes lah Rik Nak èn palok salib!”
22Dak kalik ketigak wèl Pilatus nachal ma umnak, “Tapik ilok kesalahan Eh? Yék tok iterèꞌbuk ilok-ilok salah pon nòm Sènꞌòy doh sampéy patod imkèrlek ma henukom kènbes! Yék imꞌor askah yék muhemẽd ma Rik Nak, dak pas nak itèrwòl Eh!”
23Tapik sènꞌòy jajéh nak had umsered wèl dak umꞌèh-éh nòm kènwad supaye mukèrbes Yèsus èn palok salib. Umnak sejèkh-serajèkh umꞌèh-éh, dak sèj-sòj eh ummenang. 24Pilatus nahoh ma nènchèn sènꞌòy jajéh nak. 25Dak gerèk umsemany atèk, Pilatus natèrwòl Barabas, sènꞌòy rik umjél sebab nabelawan ma kerajaꞌan dak nacheleg sènꞌòy. Hòj nòm kerek nak, Pilatus naꞌog Yèsus ma mèn askah untok muteꞌèl nènchèn sènꞌòy Yahudi nak.
Umkèrbes ma Yèsus èn palok salib
(Mat 27:32-44; Mrk 15:21-32; Yoh 19:17-27)
26Dak mèn askah nak umꞌéd Yèsus ma béng kote untok mukèrbes ma Rik Nak. Èn nèbchib umnak, umtèrbuk ma néy sènꞌòy nòm kote Kirèné rik bekenëh Simon. Rik nak nalãj nòm kampong nammòj ma kote. Tapik mèn askah umròt umpakse ma Simon namgulap palok salib Yèsus, dak nachèb-chib nòm yek Yèsus.
27Jajéh geb sènꞌòy umhoh ma Yèsus. Mok èn umnak jajéh bèꞌbok rik umhõg dak umyèm-yam kerèꞌhik sebab Yèsus naderite. 28Yèsus nawãr ma umnak dak nachal, “Bèꞌbok Yèrusalèm, agok lah yam ma Yék. Yam lah rik ma rik nyob ròb kuwòt nyob. 29Sebab akal nalòy lah mase rik terok geb, sampéy sènꞌòy umchal, ‘Lebéh méj lah ma bèꞌbok bemanãng, rik tok pernah umyos bok terèmèm kuwòt chènglèkh!’ 30Bil nak, sènꞌòy akal umꞌèh-éh ma pok-pok ròb ma tangkòl: ‘Heribëg dak kub lah ma kandék!’ #Hos 10:8; Per 6:16. 31Nyob néh lah ma hal rik puꞌdoh nabelakuk ma Yék, sènꞌòy rik kènmën. Jadik bèdlod lah rèk lok akal nambelakuk ma sènꞌòy bedose rik umjèk ma Yék. Pastik lebéh terok geb!”#23:31 Tèks asli mok kiasan èn anuh: “Sebab kalòw sènꞌòy umteꞌèl gerèk doh ma jehuk tik aloy, ilok akal nambelakuk ma palok karéh?” Maksod Yèsus nachal kiasan nak tok pastik.
32Mèn askah naꞌtèk umꞌéd keꞌjèk nar sènꞌòy jèdhad samak umnak untok mukèrbes wènar nak samak Yèsus. 33Bil umnak umlòy ma tempad rik umkòw “Tempad Chawòng,” mèn askah umpehad pakuk ma Yèsus èn palok salib. Dak umpehad pakuk keꞌjèk ma nar sènꞌòy jèdhad nak èn palok salib wèh, néy sènꞌòy ènlẽng tep Yèsus dak néy sènꞌòy ènlẽng yèl Eh. 34Yèsus nachal, “Apak, ampon lah ma umnak! Umnak tok umlèng-lèkh ilok rik umteꞌèl doh.” #En 22:19.
Mèn askah hòj umkod nèglòg Yèsus atèk, dak bil nak umnak umbeba-bes undi untok muꞌa-og nèglòg Yèsus nak. 35Sènꞌòy jajéh umtèd-ted èn anak dak umnèh-néh. Mèn pemimpin sènꞌòy Yahudi umgeleh ma Yèsus, dak umchal, “Nanak natèrgos ma sènꞌòy mòy. Kalòw Rik Nak kemën-kemën Mèsias, Rajak rik Allah napili, perak lah namtèrgos rik ma rik Eh!” #En 22:8.
36Mèn askah keꞌjèk umgeleh ma Rik Nak. Umnak umlãj dak umpèꞌnyõk òng anggor bènychuny ma Yèsus. #En 69:22. 37Umnak umchal, “Kalòw Hãk Rajak sènꞌòy Yahudi, tèrgos lah rik ma rik Hãh!”
38Mok keꞌjèk papan hòj betènꞌèl èn balikh kuy Eh: “Doh lah Rajak Sènꞌòy Yahudi.”
39Dak néy sènꞌòy èn wènar sènꞌòy jèdhad rik umsalib samak Yèsus napègyog keꞌjèk ma Yèsus. Dak nachal, “Ches! Hãk lah Mèsias rik Allah napèrhod? Tèrgos lah rik ma rik Hãh bok ma yar keꞌjèk!”
40Tapik jèdhad rik naꞌnéy wèl natèdchod ma rik nak, “Agok chal gerèk nak! Tok hatèng-tukh ke ma Allah? Èk kenèmbek hòj umhukom ma kènbes. 41Tapik had ar banar rik ngam amterime ma henukom nak, sebab ar ateꞌèl jehad. Sènꞌòy doh tok natèlꞌèl ilok-ilok pon rik salah!” 42Pas nak rik nak nachal ma Yèsus, “Yèsus, tulong belekh lah che yék, bil Hãk hajadik Rajak!”
43Dak Yèsus nachal ma rik nak, “Kemën Yék ichal ma hãk, arik doh hãk akal samak Yék èn Tempad Sengõd Tuhan.”
Kènbes Yèsus
(Mat 27:45-56; Mrk 15:33-41; Yoh 19:28-30)
44Bil ès-is, mad is tok-tok nayeb, dak tok chènglakh. Kenèmbek negerik nak najadik rengah sampéy pukol tigak lèngꞌakh. #Her 26:31-33. 45Bil nak langséh rayak rik nakèrlakh Ruwang Paléng Kudus èn kelòj Dékh Tuhan nacha-chèg najadik nar heléy. 46Dak Yèsus naꞌèh-éh nòm kuy kènwad Eh, “Apak! Yék iꞌog ruway Yék ma kelòj tikh Hãk!” Dak pas nak Yèsus natèrsèk henèmhum rik sèj-sòj. #En 31:6.
47Ketuwe askah Roma rik tèd-ted èn anak nanéh ilok rik nabelakuk. Dak nanak naꞌèhmah ma Allah dak nachal, “Kemën lah sènꞌòy doh tok besalah!”
48Jajéh sènꞌòy hòj umherimung èn anak untok munéh. Dak bil umnéh ilok rik hòj nabelakuk, umnak kenèmbek umsisal geb dak ummak nòm hup sèndéh. 49#Luk 8:2,3.Kenèmbek kéy Yèsus mok èn anak, dak bèꞌbok rik hèh-hoh ma Rik Nak nòm Galiliya mok èn anak keꞌjèk. Umnak umted nòm jerok dak umnèh-néh ma kenèmbek hal nak.
Yusop nadol mayad Yèsus èn guwok kubor
(Mat 27:57-61; Mrk 15:42-47; Yoh 19:38-42)
50-51Mok néy sènꞌòy rik bekenëh Yusop, rik nabeꞌasal nòm kote Arimatéa èn negerik Yudéya. Yusop nak sènꞌòy rik méj-méj bok kènmën, dak nanak napèny-pòj ma mase Kerajaꞌan Allah namlãj. Nanak néy sènꞌòy nòm Majlis Agama, tapik tok nasetujuk ma sènꞌòy Majlis Agama gèhnih nak, dak tok nasetujuk ma ilok rik umteꞌèl ma Yèsus. 52Yusop nawèk natèrbuk ma Pilatus namsemany mayad Yèsus namꞌog ma rik nak. 53Pas nak Yusop nawèk nabèrtaw mayad Yèsus nòm palok salib nak, dak nasèrmuk ma mayad Eh nòm abat rik méj-méj. Kerek nak umdol mayad Yèsus nak èn kelòj guwok kubor rik hòj umchelòkh èn tangkòl batuk. Kubor nak tik seꞌèd, tok pernah umdèl-dol mayad.#23:53 Ènsekh sènꞌòy Yahudi umteꞌèl kubor rik rayak nak supaye boléh kep maròp-maròp mayad (chòntoh eh, kenèmbek sènꞌòy nòm néy kewarge). 54Is nak arik Jumaꞌat, Arik Senèbyab#23:54 Arik Senèbyab mok tiyab-tiyab arik Jumaꞌat. Bil arik nak, sènꞌòy Yahudi umsèbyab umtèrsòj kenèmbek kèrjak, sebab tok boléh umteꞌèl ilok-ilok kèrjak èn Is Tenarak. Jadik umnak haros géj mukep mayad Yèsus, èn mad is tèk-tik tok najèdlũd. bil sènꞌòy Yahudi umsèbyab kenèmbek kèrjak um. Mad is tèꞌlok namjèdlũd, dak hòj tilok namlèy-lòy Is Tenarak.
55Bèꞌbok rik umlèj-lãj samak Yèsus nòm Galiliya umhoh ma Yusop. Umnéh ma guwok kubor nak dak chare umdol mayad Yèsus nak. 56Pas nak umnak ummak umtabéh chenèhruh ròb binyak rik chèsngẽs untok mulãm ma mayad Yèsus. Dak bil nalòy Is Tenarak, umnak hòj umbetarak umhoh ma Hukom Tuhan. #Her 20:10; Ter 5:14.
ទើបបានជ្រើសរើសហើយ៖
Lukas 23: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
