Lukas 22
22
Mèn ketuwe imam ròb guruk agama umꞌampèk mukèrbes ma Yèsus
(Mat 26:1-16; Mrk 14:1-11)
1Bil nak, Raye Ruti Tok Bepèng-pukh, rik umkòw arik Paskah, hòj tilok. #Her 12:1-27. 2Dak mèn ketuwe imam ròb guruk agama tik umkèk nòng untok mukèrbes ma Yèsus, tapik julak-julak sebab umtukh ma sènꞌòy jajéh.
3Bil nak Iblis namòj ma Yudas Iskariot, néy sènꞌòy nòm nar belas hèhoh Yèsus. 4Dak Yudas nawèk natèrbuk ma mèn ketuwe imam ròb ketuwe polis rik umbejagak èn Dékh Tuhan. Dak nabecharak samak umnak rèk lok namtulong ma umnak supaye muròt ma Yèsus. 5Umnak umꞌadés geb, dak umpèrhod muꞌog duid ma rik nak. 6Yudas pon nasetujuk, dak namulak nakèk-kèk ruwang untok namtulong ma umnak supaye muròt ma Yèsus bil sènꞌòy jajéh tok mèk-mok samak Rik Nak.
Yèsus naꞌor ma hèhoh Eh mutabéh jamuwan Paskah
(Mat 26:17-19; Mrk 14:12-16)
7Dak bil mase Raye Ruti Tok Bepèng-pukh, nalòy lah arik sènꞌòy Yahudi umged kambikh biri untok mugéy arik Paskah. 8Yèsus naꞌor ma Pètrus ròb Yohanès, “Wèk lah dak tabéh jamuwan Paskah untok èk èmgéy.”
9Wènar wètanyak, “Ma lok Hãk hachèn yar yamwèk yamtabéh jamuwan nak?”
10Yèsus nasaꞌod, “Keyòkh lah ma doh: bil kaꞌan mòj ma kote, dak èn anak akal kaꞌan tèrbuk néy sènꞌòy babeh natèl-tol tabol òng. Hoh lah ma rik nak. Bil nanak namòj ma kelòj dékh, 11chal lah ma tuwan dékh nak, ‘Guruk natanyak: “Èn lok ruwang tamu untok Yék imgéy jamuwan Paskah samak mèn hèhoh Yék?”’ 12Dak rik nak akal napèrnéh ma kaꞌan néy ruwang rayak èn tingkad balikh, hòj mok kenèmbek rik èperlu. Èn anak lah kaꞌan tabéh nèygéy untok jamuwan Paskah èk.”
13Jadik Pètrus ròb Yohanès wèwèk, dak wètèrbuk kenèmbek gerèk rik Yèsus nachal. Dak wènar wètabéh jamuwan Paskah nak.
Jamuwan Tuhan
(Mat 26:20-29; Mrk 14:17-25; Yoh 13:21-30; 1 Kor 11:23-25)
14Bil hòj mase untok mugéy jamuwan Paskah nak, Yèsus nagel samak mèn rasul — nar belas hèhoh Eh. 15Dak Yèsus nachal ma umnak, “Hòj lamad Yék ichèn geb imgéy jamuwan Paskah doh samak nyob, èn tèk-tik tok iderite. 16Dak kemën lah imchal ma nyob: Yék tok igèy-géy wèl jamuwan doh sampéy arik Yék igéy èn Kerajaꞌan Allah, bil Allah napèrnéh tèꞌlalah maksod kènmën jamuwan Paskah doh.”
17Dak Yèsus nakod kuléh òng anggor, dak nachal terime kaséh ma Allah. Pas nak nachal ma hèhoh Eh, “Kod lah kuléh doh, dak kenèmbek nyob òng lah. 18Kemën Yék ichal ma nyob, Yék tok iꞌèng-òng wèl òng anggor sampéy Kerajaꞌan Allah nalãj.”
19Dak Yèsus nakod ruti dak nachal terime kaséh ma Allah. Pas nak nageyèg ruti nak, dak naꞌog ma umnak, nachèl-chal, “Udoh lah esik Yék, rik iꞌog untok imtèrgos ma nyob. Teꞌèl lah gerèk doh dak belekh ma Yék.” 20Hòj sòj umgéy, Yèsus nakod wèl kuléh òng anggor naꞌtèk. Nanak nabeterime kaséh ma Allah, naꞌog ma umnak wèl dak nachal, “Néh ma kuléh doh: Allah nateꞌèl perènhod pay samak sènꞌòy nòm lènlòt Yék, rik akal naka-koh untok namtèrhõy dose nyob. #Yèr 31:31-34.
21Tapik néh lah! Mok èn anuh sènꞌòy rik akal natulong mèsmus Yék muròt ma Yék. Rik nak nagèy-géy anuh samak Yék! #En 41:10. 22Mémang Yék, Sènꞌòy Nòm Sorga, akal ikebes gerèk rik Allah hòj naꞌampèk. Tapik terok geb lah akal Allah nahukom ma sènꞌòy nak rik naꞌog Yék ma mèsmus Yék!”
23Pas nak mèn hèhoh Yèsus mulak umbetanyak kaban rik um, “Chok rik èn èk doh nasanggob namteꞌèl gerèk nak?!”
Chok rik rayak èn mad Tuhan
24Dak mèn hèhoh Yèsus mulak umbera-rok tentang chok rik paléng rayak èn umnak. #Mat 18:1; Mrk 9:34; Luk 9:46. 25Jadik Yèsus nachal ma umnak, “Rajak ròb sènꞌòy rik rèꞌyak èn kaum mòy umperintah keras ma sènꞌòy. Umpakse ma sènꞌòy supaye muhoh ma nèrꞌor rik umnak, tapik umchèn sènꞌòy muchal hal méj tentang umnak, gerèk ‘Nanak natulong ma rakyad.’ 26Tapik èn nyob agok gerèk nak. Chok rik paléng rayak èn nyob mestik naꞌanggap ma rik eh gerèk sènꞌòy rik paléng tok bepenting. Dak ketuwe nyob mestik nakèrdakh namtulong ma sènꞌòy gèhnih. #Mat 23:11; Mrk 9:35.#Mat 20:25-27; Mrk 10:42-44. 27#Yoh 13:12-15.Bèdlod lah: chok rik lebéh rayak, sènꞌòy rik nagèl-gel nagèy-géy atòw sènꞌòy rik bejamuk ma rik nak? Pastik sènꞌòy rik gèl-gel gèy-géy nak. Tapik Yék mok samak nyob gerèk sènꞌòy kedua nak: ikèrdakh imtulong ma nyob.
28Nyob tok pernah nyob perak ma Yék èn kenèmbek senusah Yék. 29Jadik, gerèk Apak Yék naꞌog kuwase ma Yék untok imperintah, Yék imꞌog kuwase ma nyob keꞌjèk.
30 #
Mat 19:28. Dak bil Yék ijadik Rajak, nyob akal nyob géy dak òng samak Yék. Dak nyob akal nyob gel èn kerusi rajak, bok nyob beperintah ma nar belas suku Israꞌèl.”
Yèsus naberèngleng ma mèn hèhoh Eh akal mok tenarèk
(Mat 26:31-35; Mrk 14:27-31; Yoh 13:36-38)
31Dak Yèsus nachal ma Pètrus, “Simon, Simon, keyòkh lah! Iblis hòj nasemany ma Allah untok namtarèk ma nyob kenèmbek. Gerèk sènꞌòy nayèh-yoh gadang supaye sèngkok nakelek nòm menéh rik méj, akal Iblis nayèh-yoh ma nyob — maksod eh, Iblis natarèk ma nyob supaye nyob kelek bok nyob perak ma Yék.
32Tapik Yék hòj ipetak supaye hãk tok hayèh-yoh, supaye hãk tetab pechaye ma Yék. Bil hãk halos hapechaye ma Yék, kèrwad lah ma pechaye kéy-kéy hãh doh keꞌjèk.”
33Dak Pètrus nachal, “Yãng, yék ihoh immòj ma jél samak Hãk. Bok kalòw imkebes samak Hãk pon isanggob!”
34Tapik Yèsus nachal, “Pètrus, Yék kemën ichal ma hãk: èn tèk-tik ayam tok nabekukok yèhyah is jakal, hòj tigak kalik hãk hachal hãk tok hakèlnal ma Yék.”
Yèsus naꞌor hèhoh Eh mubèh-bèh untok senusah
35Nòm kerek nak Yèsus nachal ma mèn hèhoh Eh, “Belekh lah bil Yék itèrꞌèn ma nyob hatòp untok èg-oglèkh Gah Méj ma lok-lok tempad. Bil nak, nyob tok èn-èn puchòs, apek, atòw sepèh kasod. Tapik mok ke ilok-ilok rik tik nyob perlu?” Umnak umsaꞌod, “Hõy!” #Mat 10:9,10; Mrk 6:8,9; Luk 9:3; 10:4.
36Yèsus nachal, “Tapik puꞌdoh hòj tok samak gerèk hatòp. Puꞌdoh nyob rik mok bepuchòs atòw beꞌapek, èn lah. Dak nyob rik tok mèk-mok juwòj, juwal lah bajuk untok nyombelik juwòj. 37Sebab Yék kemën imchal ma nyob, ilok rik natulis èn kelòj Kitab tentang Yék mestik nabelakuk. Dak nabi natulis tentang Yék manah tòp: ‘Nanak umꞌanggap gerèk sènꞌòy jèdhad.’ Hek, dak puꞌdoh gah nak hòj nambelakuk.” #Yès 53:12.
38Pas nak hèhoh Eh umchal, “Yãng, néh lah, èn kandék doh mok nar juwòj.” Yèsus nasaꞌod, “Adik lah!”
Yèsus napèꞌtak èn selay Gètsèmani
(Mat 26:36-46; Mrk 14:32-42)
39Yèsus nahuwòl nòm kote Yèrusalèm, dak gerèk chachod nawèk ma Pok Sayton. Dak hèhoh-hèhoh Eh umhoh ma Rik Nak. 40Bil Yèsus nalòy èn anak, Rik Nak nachal ma umnak, “Pèꞌtak lah supaye nyob tok nyombedose bil Iblis natarèk ma nyob.”
41Nòm kerek nak, Rik Nak nawèk jerok gèk nòm tempad umnak, gerèk jènrok sènꞌòy nabedal batuk. Dak Yèsus natud dak napèꞌtak, 42“Apak! Yék isemany, kalòw hachèn Apak, kod lah derite#22:42 derite Tèks asli mok kiasan anuh: “kod lah kuléh doh nòm Yék.” Kuléh nak bemaksod derite rik akal nabelakuk bil umkèrbes ma Yèsus. doh nòm Yék. Tapik agok lah hahoh ma nènchèn Yék, hoh lah ma nènchèn rik Hãk.”
43Dak melaykat nòm sorga nalãj ma Yèsus dak naꞌog kènwad ma Rik Nak. 44Sebab derite Eh ènjoh geb, Yèsus natabeh napèꞌtak lèdbëd wèl, sampéy bèdkèd Eh gerèk lènlòt naketeg ma tèk.
45Hòj sòj napèꞌtak, Yèsus namak ma hèhoh-hèhoh Eh. Rik Nak natèrbuk umnak hòj umsèglòg. Umnak umgahèl sebab umgahmak umsedéh geb. 46Yèsus nachal ma umnak, “Nahey nyob sèglòg? Wòg lah! Pèꞌtak lah supaye nyob agok nyombedose bil Iblis natarèk ma nyob.”
Yudas natulong ma pemimpin sènꞌòy Yahudi muròt ma Yèsus
(Mat 26:47-56; Mrk 14:43-50; Yoh 18:3-11)
47Bil Yèsus tik nachèl-chal, mok jajéh sènꞌòy umlãj ma nak. Dak Yudas, néy sènꞌòy nòm nar belas hèhoh Yèsus, nachib èn sòy sènꞌòy jajéh nak. Yudas nawèk tilok ma Yèsus dak nachëy ma Rik Nak gerèk tande senalam. 48Tapik Yèsus nachal ma rik nak, “Yudas, gerèk doh ke chare hamꞌog Yék, Sènꞌòy Nòm Sorga, ma mèsmus Yék? Hãk hamchey ma Yék gerèk hãk tik kéy Yék?”
49Bil hèhoh Yèsus umnéh ilok rik nambelakuk, umnak umchal, “Yãng, perak lah kandék kimserang nòm juwòj!” 50Dak néy sènꞌòy nòm umnak naròj ma juwòj eh dak nachòkh ma gèntòkh tep kuli Imam Rayak sampéy getòj. 51Tapik Yèsus nachal, “Adik lah!” Dak Rik Nak napek ma gèntòkh sènꞌòy nak dak natèrhakh.
52Pas nak Yèsus nachal ma kenèmbek ketuwe imam, polis Dékh Tuhan, ròb tèꞌtak Yahudi rik umlãj untok muròt ma Rik Nak, “Nyob lãj nyomròt ma Yék bok nyob èn juwòj ròb ad, gerèk Yék doh sènꞌòy sèjyèj? 53#Luk 19:47; 21:37.Yék mok samak nyob tiyab-tiyab arik bil ibetènglèkh èn Dékh Tuhan, tapik tok nyob rèn-ròt ma Yék. Tapik ngam lah nyob lãj bil gagid layèg rèhngah doh — sebab nyob nyomteꞌèl nènchèn jèdhad kuwase rèhngah.”
Pètrus nasèꞌlok nachal tok nakèlnal ma Yèsus
(Mat 26:57-58,69-75; Mrk 14:53-54,66-72; Yoh 18:12-18,25-27)
54Umnak umròt ma Yèsus dak umꞌèn Rik Nak ma dékh Imam Rayak. Pètrus nahoh nòm jerok. 55Sènꞌòy umyèh-yõh os èn gagid halaman èn sòy dékh nak, dak Pètrus nagel samak umnak. 56Mok néy babok rik kerèꞌjak èn dékh nak, dak nanak nanéh ma Pètrus sebab os nachelakh ma rik nak. Babok nak natemèl natelen ma Pètrus dak nachal, “Sènꞌòy doh hèhoh Yèsus!”
57Tapik Pètrus nachal, “Hõy! Yék tok ikèlnal ma Rik Nak!”
58Tok belamad èn anak, mok néy babeh nanéh ma Pètrus, dak nachal, “Hek, hãk pastik nòm umnak rik hèh-hoh ma Yèsus!” Tapik Pètrus nasaꞌod, “Hõy, kedak yék!”
59Kirak-kirak néy jam nòm kerek nak, néy sènꞌòy rik mòy nachal nòm kènwad, “Mémang kemën sènꞌòy doh hèhoh Yèsus, sebab nanak sènꞌòy Galiliya keꞌjèk!”
60Tapik Pètrus nachal, “Yék tok ilèng-lèkh ilok rik hãk hachal!” Bil nak keꞌjèk, bil Pètrus tik nachèl-chal, ayam nabekukok.
61Tuhan Yèsus pon nawãr dak nanéh ma Pètrus. Dak Pètrus nabelekh ilok rik Yèsus nachal ma rik nak naꞌtèk: “Èn tèk-tik ayam tok nabekukok yèhyah is jakal, hòj tigak kalik hãk hachal hãk tok hakèlnal ma Yék.” 62Dak Pètrus nahuwòl nòm nak dak nayam kerèꞌhik.
Sènꞌòy umgeleh dak umteboh ma Yèsus
(Mat 26:67-68; Mrk 14:65)
63Dak anak sènꞌòy rik bejagak ma Yèsus umgeleh dak umteboh ma Rik Nak. 64Umnak umkub mad Eh nòm abat, dak mayek-mayek umteboh ma Rik Nak dak umchal, “Kalòw Hãk kemën-kemën nabi, chal lah chok rik tèhboh ma Hãk!” 65Dak umnak umchal jajéh penègyog mòy wèl ma Yèsus keꞌjèk.
Majlis Agama umsak ma Yèsus
(Mat 26:59-66; Mrk 14:55-64; Yoh 18:19-24)
66Bil yèhyah, kenèmbek sènꞌòy Majlis Agama — pemimpin Yahudi, mèn ketuwe imam, ròb mèn guruk agama — umbeterabuk. Dak sènꞌòy umꞌéd Yèsus namtèrbuk ma Majlis Agama nak. 67Umnak umchal, “Chal lah ma kandék: Kemën ke Hãk doh Mèsias?” Dak Yèsus nasaꞌod, “Kalòw Yék ichal Yék Mèsias pon, nyob akal tok nyob pechaye. 68Gerèk nak keꞌjèk kalòw Yék imtanyak senuꞌal ma nyob, nyob pon akal nyob jèk tok nyob besaꞌod ma Yék. 69Tapik tok lamad wèl, Yék, Sènꞌòy Nòm Sorga, akal igel ènlẽng tep Allah Rik Paléng Bekuwase.”
70Umnak kenèmbek umtanyak, “Mok ke Hãk doh Kuwòt Allah?”
Yèsus nasaꞌod, “Hek, gerèk nyob chal nak lah.”
71Dak umnak umchal, “Tok perlu èmkèk saksi wèl! Sebab èk hòj èkeyòkh nòm nyag rik Eh — Rik Nak pastik besalah!”
ទើបបានជ្រើសរើសហើយ៖
Lukas 22: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
