Lukas 24
24
Yèsus nawòg nòm kènbes
(Mat 28:1-10; Mrk 16:1-8; Yoh 20:1-10)
1Bil arik Ahad, yèhyah tik chup, bèꞌbok nak umwèk ma kubor Yèsus. Dak umꞌèn chenèhruh chèsngẽs rik hòj umtabéh hatòp. 2Bil umlòy ma nak, umtèrbuk batuk cherèntekh rayak èn sòy kubor nak hòj nakèrléh ma chening guwok kubor nak. 3Dak bil umnak ummòj ma kelòj guwok kubor nak, dak tok umbèk-buk ma mayad Tuhan Yèsus. 4Umnak umbèlꞌih, tik umbebèdlod gah nak, dak tok-tok mok nar bèhbeh tèd-ted èn anak! Nèglòg bèhbeh nak beyug gemèrlãb. 5Bèꞌbok nak umtukh geb, dak umtud èn tèk. Dak nar bèhbeh nak wèchal ma umnak, “Nahey nyob kèk ma sènꞌòy gès-gos èn tempad sènꞌòy kèsbes? 6Yèsus tok mèk-mok èn anuh. Hòj nawòg nòm kènbes! Belekh lah ilok rik Nanak nachal ma nyob èn Galiliya hatòp: #Mat 16:21; 17:22,23; 20:18,19; Mrk 8:31; 9:31; 10:33,34; Luk 9:22; 18:31-33. 7‘Gerèk nènchèn Allah, Yék, Sènꞌòy Nòm Sorga, akal umꞌog ma kelòj kuwase sènꞌòy bedose, dak akal umkèrbes èn palok salib. Tapik bil arik tenigak nak iwòg wèl.’”
8Dak bil nak bèꞌbok nak umbelekh ilok rik Yèsus nachal nak.
9-10Pas nak bèꞌbok nak — Maria Magdaléna, Yohana, Maria amèk Yakobus, ròb bèꞌbok gèhnih — ummak nòm kubor nak, dak umwèk umꞌoglèkh kenèmbek gah nak ma sebelas rasul ròb kenèmbek hèhoh Yèsus rik gèhnih.
11Tapik hèhoh-hèhoh Yèsus umbèdlod bèꞌbok nak had umbecharak bèj-bòj hék, jadik umnak tok umpechaye ma cherite umnak. 12Tapik Pètrus nated bok nadabal ma kubor. Nanak nangõb najungẽk dak nanéh ma kelòj guwok kubor nak, tapik had nanéh dèꞌrik abat hék tèk-tik mok. Dak Pètrus nabèlꞌih, dak namak ma dékh nabebèdlod rèk lok gah nak nabelakuk.
Yèsus natèrbuk nar hèhoh Eh èn nòng ma kampong Eméus
(Mrk 16:12-13)
13Bil arik nak keꞌjèk, mok nar hèhoh Yèsus wèchèb-chib ma néy kampong rik bekenëh Eméus. Kampong nak kirak-kirak sebelas kilomiter nòm kote Yèrusalèm. 14Wènar nak wècha-chal kenèmbek gah rik hòj nabelakuk. 15Dak èn nèlchal wèh nak, Yèsus irik nalãj tilok dak nachèb-chib samak wènar nak. 16Tapik wènar nak keleb, tok wèkenal chok iRik Eh nak. 17Yèsus natanyak ma wènar nak, “Ilok kaꞌan cha-chal èn nèbchib kaꞌan nak?”
Dak wèted geb, lèꞌjãk mad wèh. 18Néy sènꞌòy, rik bekenëh Kléopas, nachal ma Yèsus, “Mok ibuk gah rik hòj nabelakuk èn kote Yèrusalèm arik-arik doh. Rèk lok Hãk mok èn Yèrusalèm, tapik had Hãk hék rik tok lèng-lèkh gah nak?”
19Yèsus natanyak, “Gah ilok?”
Dak wèsaꞌod, “Gah rik belakuk ma Yèsus, sènꞌòy Nasarèt nak. Rik Nak nabi nòm Tuhan, tenènglèkh Eh ròb tènꞌèl Eh bekuwase geb èn mad Allah bok èn mad kenèmbek sènꞌòy. 20Tapik mèn ketuwe imam ròb pemimpin èk umꞌog ma sènꞌòy bekuwase Roma untok mukèrlek henukom kènbes, dak umkèrbes Rik Nak èn palok salib. 21Kandék hatòp nak kiꞌas Rik Nak Mèsias, Rajak rik nalãj nambébas ma sènꞌòy Israꞌèl nòm kerajaꞌan Roma! Tapik hòj tigak arik doh Nanak nakebes. 22Dak mok gah mòy keꞌjèk: yèhyah tik chup atèk, mok bèꞌbok nòm golongan kandék umwèk ma kubor, dak kandék kibèlꞌih kikeyòkh cherite umnak. 23Tok umbèk-buk mayad Yèsus, tapik ummak dak umchal hòj umnéh nar melaykat. Dak melaykat nak wèchal Yèsus nagos wèl! 24Pas nak mok sènꞌòy mòy nòm golongan kandék umwèk ma kubor, dak umnak pon tok umbèk-buk Yèsus èn anak, tehad gerèk bèꞌbok nak umchal.”
25Dak Yèsus nachal ma wènar nak, “Bok kaꞌan yayéw nak! Bok kaꞌan pelènhat kaꞌampechaye kenèmbek gah rik mèn nabi Tuhan umchal manah tòp! 26Umnak umchal tèꞌlalah Mèsias mestik naderite gerèk nak nèng-nèng, dak pas nak najadik Rajak rik rayak bok bekuwase.” 27Pas nak Yèsus naꞌoglèkh tèꞌlalah ma wènar nak ilok rik natulis tentang rik Eh èn kenèmbek Kitab — nòm kitab Musa rik mulak sampéy mèn kitab nabi-nabi.
28Bil nak umnak hòj tilok mulèy-lòy ma kampong Eméus, dak Yèsus gerèk namchèb-chib sejèkh. 29Tapik wènar nak wèsered geb, “Gel lah samak yar anuh. Sebab is hòj nayeb, tèꞌlok namrèhngah.” Jadik Yèsus namòj ma dékh namgel samak wènar nak. 30Bil umnak umgel untok muga-géy, Nanak nakod ruti dak nachal terime kaséh ma Allah. Nanak nageyèg ruti nak dak naꞌog ma wènar nak. 31Bil nak, wènar nak bok wèkenal Rik Nak lah Yèsus. Dak bil nak keꞌjèk, tok-tok Yèsus nahèr-hãj dak tok wèbèk-buk wèl! 32Dak wècha-chal kaban rik wèh, “Sabéd lah èn hup ar agahmak gelènyꞌich bil Nanak nachal dak naꞌoglèkh tèꞌlalah ma ar tentang Kitab bil ècha-chib èn nòng naꞌtèk!”
33Jadik wènar sejèkh wèted dak wèlos ma Yèrusalèm. Èn anak wènar nak wètèrbuk ma sebelas rasul umbekumpol samak hèhoh Yèsus rik gèhnih. 34Dak umnak èn Yèrusalèm nak umchal, “Tuhan Yèsus kemën-kemën hòj nalos nawòg wèl! Nanak hòj napèrnéh rik Eh ma Simon Pètrus!”
35Dak wènar atèk wèꞌoglèkh keꞌjèk ilok rik belakuk èn nèbchib wèh atèk, dak rèk lok wèkenal ma Tuhan bil Rik Nak nageyèg ruti.
Yèsus napèrnéh rik Eh ma hèhoh-hèhoh Eh
(Yoh 20:19-23)
36Bil umnak tik umchèl-chal tentang hal nak, tok-tok kelit Yèsus natèd-ted èn gagid umnak dak nachal, “Selamad! Tèngnang lah ma nyob!”
37Umnak umkèdjed dak umtukh, sebab umnéh umsabok Yèsus nak gawõs. 38Tapik Yèsus nachal ma umnak, “Agok tukh! Agok èd-id èn hup nyob! 39-40Udoh lah Yék!” Dak Yèsus napèrnéh tikh ròb jukh Eh ma umnak dak nachal, “Néh lah ma tepeh èn tikh ròb jukh Yék doh. Dak pek lah ma Yék: kalòw gawõs, tok mèk-mok esik ròb jeꞌẽng eh. Jadik Yék doh kedak gawõs!”
41Umnak umꞌadés geb, dak umbèlꞌih, tapik tèk-tik tok umpechaye. Jadik, Yèsus natanyak ma umnak, “Mok nèygéy èn nyob doh?” 42Dak umnak umkod ènsekh nòm kak nèꞌjek dak umꞌog ma Yèsus. 43Yèsus nakod kak nak dak nagéy èn mad umnak.
44Pas nak Yèsus nachal ma umnak, “Bil Yék tèk-tik samak nyob hatòp, hòj iꞌoglèkh ma nyob: kenèmbek hal rik hòj natulis tentang Yék èn kelòj Hukom Tuhan rik Musa natèrlòy, kitab-kitab mèn nabi, ròb kitab Enèhmah haros nabelakuk.”
45Dak anak Yèsus naꞌoglèkh tèꞌlalah ma umnak maksod Kitab nak, supaye umnak mulèkh kenèmbek rik natulis nak. 46Dak Yèsus nachal ma umnak, “Doh lah rik hòj natulis èn kelòj Kitab tentang Yék: Mèsias mestik naderite bok nakebes. Dak bil èn arik ketigak nak, nalos nawòg wèl nòm kènbes Eh. 47Dak mok natulis keꞌjèk, mèn hèhoh Yék akal umwèk nòm kuwase Yék. Umtekèd umwèk ma kote Yèrusalèm, dak pas nak umwèk ma kenèmbek kaum untok muꞌèg-oglèkh Gah Méj nòm Allah: sènꞌòy mestik umperak ma dose bok los ma Allah, dak akal Allah naꞌampon ma dose umnak. 48Nyob hòj nyob néh ma kenèmbek hal doh, dak nyob mestik nyob èg-oglèkh gah doh ma sènꞌòy mòy. 49#Tèn 1:4. Dak Yék akal itèrꞌèn Ruway Kudus ma nyob, gerèk Apak Yék hòj napèrhod. Tapik gel lah èn kote doh sampéy nyob terime kuwase nak nòm Allah.”
Yèsus naꞌòj ma sorga
(Mrk 16:19-20; Tèn 1:9-11)
50Hòj nòm kerek nak, Yèsus naꞌéd umnak umhuwòl nòm kote Yèrusalèm, dak umwèk ma kampong Bètania. Èn anak Yèsus natayod tikh Eh, dak nasemany Allah namteꞌèl méj ma umnak. #Tèn 1:9-11. 51Bil èn tèk-tik Yèsus napèꞌtak, Allah naꞌangkìd ma Rik Nak dak naꞌòj ma sorga. 52Umnak kenèmbek umtud dak umsindol ma Yèsus. Pas nak umnak umlos ma Yèrusalèm nòm hup beꞌadés. 53Dak tiyab-tiyab arik umnak umwèk ma Dékh Tuhan dak umꞌèhmah ma Allah.
ទើបបានជ្រើសរើសហើយ៖
Lukas 24: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
