Jenadik 4
4
Kayìn ròb Habèl
1Hòj nòm kerek nak, Adam naselòg ma léh eh, dak Hawa nakayod. Dak Hawa nayos néy kuwòt babeh eh, bok nachal, “TUHAN hòj natulong ma yék bok idapad kuwòt babeh.” Jadik rik nak natèrjal kenëh kuwòt eh nak Kayìn.#4:1 Kayìn Kenëh “Kayìn” nak chëh eh gerèk nèlchal Ibrani rik bemaksod “dapad.” 2Dak nòm kerek nak Hawa nakayod wèl bok nayos pek Kayìn, dak natèrjal kenëh eh Habèl.
Bil wènar nak hòj wèrèꞌyak, Habèl nak kèrjak eh nabèhleh kambikh biri, dak Kayìn kèrjak eh nabesèylay. 3Bil hòj nalòy ma musim nègtòg, mok néy arik Kayìn naꞌèn ènsekh nòm hasil nègtòg eh dak najamuk ma TUHAN. 4Dak Habèl keꞌjèk naꞌèn jenamuk ma TUHAN: rik nak naꞌog maròp-maròp kuwòt kambikh biri eh rik mulak.#4:4 maròp-maròp. Mok terjemahan mòy umchal Habèl had naꞌog néy ikor hék: “rik nak naꞌog kuwòt kambikh biri eh rik mulak.” Rik nak naged kuwòt kambikh nak, dak naꞌog nèngchòkh rik paléng méj ma TUHAN. TUHAN naꞌadés ma Habèl bok naterime jenamuk eh,#Ibr 11:4. 5tapik Rik Nak tok naterime ma Kayìn ròb jenamuk eh nak. Dak Kayìn naꞌõl geb, dak mad eh keséng. 6Dak TUHAN nachal ma Kayìn, “Agok lah õl! Bok agok lah keséng mad hãh! 7Kalòw hãk hateꞌèl rik kènmën, Yék pastik iterime ma hãk. Tapik kalòw hãk hateꞌèl rik jèdhad, dose nadèh-deh untok nammòj ma kelòj hup hãk, gerèk ab rik dèh-deh èn sòy rèngkak untok namkab ma sènꞌòy. Dose nachèn namkuwase ma hãk, tapik hãk mestik hakèrlah eh.”
8Tapik nòm kerek nak, mok néy is Kayìn nachal ma pek eh, Habèl, “Jok ah ma pantil tuy.” Dak bil wènar nak hòj mok èn anak, tok-tok Kayìn nateboh bok nacheleg ma pek eh Habèl.#Mat 23:35; Luk 11:51; 1 Yoh 3:12.
9Nòm kerek nak, TUHAN natanyak ma Kayìn, “Ma lok pek hãh, Habèl?”
Kayìn nasaꞌod, “Yék tok ilèng-lèkh. Kedak yék irik bejagak ma pek inak!”
10Dak TUHAN nachal, “Nahey ihãk hateꞌèl hal rik belahĩd doh? Keyòkh lah! Yék inéh lènlòt pek hãh èn tèk nak, gerèk kuy rik nak naꞌèh-éh ma Yék. #Ibr 12:24. 11Tèk doh hòj nasinjod lènlòt pek hãh nak. Dak sebab hãk hòj hacheleg ma pek rik hãh, puꞌdoh Yék ipantakh ma hãk, bok tok boléh hambesèylay wèl. 12Yab hãk hakèrdakh keras, tapik tèk nak tok naꞌèg-og hasil wèl ma hãk. Hãk akal tok mèk-mok tempad untok hamgel, bok hajèg-jog ma lok-lok èn bumi doh.”
13Dak Kayìn nachal ma TUHAN, “Henukom nak ènjoh geb, yék tok dapad impedug eh! 14Hãk hakiron ma yék nòm tèk doh, bok jerok nòm mad Hãk. Yék akal igos ijèg-jog ma lok-lok èn bumi doh, bok tok mèk-mok tempad imgel. Dak chok rik terèꞌbuk ma yék akal umcheleg yéh!”
15Tapik TUHAN nachal ma rik nak, “Hõy. Kalòw chok-chok nacheleg ma hãk, bok Yék akal ihukom ma sènꞌòy nak lebéh terok geb.”#4:15 lebéh terok geb. Tèks asal: “tujoh kalik gande.” Dak TUHAN nateꞌèl tande èn Kayìn nak, supaye chok rik terèꞌbuk ma Kayìn tok umchègleg eh. 16Dak Kayìn nawèk nòm mad TUHAN bok nagel èn tèk rik umkòw Nòd (maksod eh nak “Tèk Nègjog”). Tèk nak mok ma apah sòy is nòm Selay Èden.
Waris Kayìn
17Dak nòm kerek nak, Kayìn naselòg ma léh eh, dak léh eh nak nakayod bok nayos néy kuwòt babeh eh. Dak natèrjal kenëh eh Hènokh. Bil nak Kayìn nateꞌèl néy kote, dak natèrjal kenëh kote nak Hènokh, nahoh ma kenëh kuwòt babeh eh. 18Hènokh nak mok kuwòt babeh eh rik bekenëh Irad. Dak pas nak,
Irad nak apak Mèhuyaꞌèl,
Mèhuyaꞌèl nak apak Mètusaꞌèl,
dak Mètusaꞌèl nak apak Lamèkh.
19Lamèkh nak naselòg nar léh eh, Ada ròb Silah.
20Ada nak nayos kuwòt eh rik bekenëh Yabal. Waris Yabal nak kaum rik gèl-gel èn kémah bok umbejagak ma chok bènleh. 21Pek Yabal nak rik bekenëh Yubal. Waris Yubal nak lah rik jèhwah musikh kerep ròb siꞌòy.
22Silah keꞌjèk nayos kuwòt babeh eh, dak natèrjal kenëh eh nak Tubal-Kayìn. Rik nak nateꞌèl beragik-ragik alad nòm gangsa#4:22 gangsa nak néy jenis besik konéng rik umteꞌèl umchèhruh nòm tembaga ròb timah. Èn jènman Kitab manah tòp ibuk umgunak besik gangsa nak. ròb besik. Tubal-Kayìn mok pek babok eh rik bekenëh Naꞌamah.
23Dak bil néy arik Lamèkh nachal ma wèh léh eh:
“Ada ròb Silah, keyòkh lah yék imchal!
Yék hòj icheleg néy sènꞌòy lenitòw,
sebab nateboh bok napèrjèd ma yék.
24Allah nachal hatòp kalòw sènꞌòy umcheleg ma Kayìn,
bok Allah akal nahukom ma sènꞌòy nak terok geb.
Dak kalòw chok rik tèyréy mòg sèngrang ma yék,
yék akal itèrlos ihukom ma sènꞌòy nak jerok lebéh terok wèl!”#4:24 jerok lebéh terok wèl Tèks asal: “77 kalik gande.”
Sèt ròb Ènòs
25Nòm kerek nak Adam naselòg wèl ma léh eh, dak Hawa nakayod bok nayos wèl kuwòt eh babeh. Hawa nachal, “Allah hòj naꞌog ma yék kuwòt namgantik Habèl, sebab Kayìn hòj nacheleg eh.” Sebab nak rik nak natèrjal kenëh kuwòt eh nak Sèt.#4:25 Sèt. Kenëh “Sèt” nak chëh eh gerèk nèlchal kuy Ibrani rik bemaksod “naꞌog.” 26Sèt nak mok kuwòt babeh eh bok natèrjal kenëh eh Ènòs. Bil jaman nak lah bil sènꞌòy umbesindol ma Allah, umnak umtekèd umkòw kenëh Eh TUHAN.
ទើបបានជ្រើសរើសហើយ៖
Jenadik 4: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.