Jenadik 3
3
Adam ròb Hawa tok wèhèh-hoh ma nèrꞌor Allah
1Nòm kenèmbek lawok kèjlaj rik TUHAN Allah napèrhéj, tajuk nak lawok rik paléng chèrdìk. Bil néy is tajuk nak natanyak ma babok nak, “Kemën ke Allah nahuwok ma kaꞌan kaꞌamgéy kebek nòm kenèmbek jehuk rik èn selay doh?”#Per 12:9; 20:2.
2Babok nak nasaꞌod, “Yar boléh yagéy kebek nòm mèn jehuk èn selay doh. 3Had Allah nahuwok ma yar yamgéy kebek nòm jehuk èn gagid selay doh, atòw pon yampek. Kalòw yar tok yahèh-hoh ma nèrꞌor Eh nak, akal yakebes.”
4Dak tajuk nachal ma babok nak, “Hõy! Kaꞌan pastik tok kaꞌan kèsbes! 5Allah had nachal rèk nak sebab Rik Nak nalèkh kalòw kaꞌamgéy kebek nak, mad ròb benèdlod kaꞌan akal napa-pòh bok kaꞌan lèkh ilok rik méj bok rik jèdhad, gerèk Rik Allah.”
6Babok nak nanéh ma jehuk nak lawah, dak kebek eh nak méj bok selèp namgéy. Dak rik nak nabèdlod méj lah kalòw namjadik chèrdìk gerèk Allah. Sebab nak, rik nak natelèh kebek nòm jehuk nak dak nagéy. Dak tòw eh mok samak rik nak, jadik babok nak naꞌog kebek nak ma tòw eh keꞌjèk, dak tòw eh pon nagéy. 7Bil nak keꞌjèk, mad ròb benèdlod wènar nak tok-tok napa-pòh, bok wèbelekh wènar nak sèglèg. Wènar nak wèsengẽny, dak wèchòr mèn selak nòm jehuk kèlpong untok wèmkub ma esik wèh nak.
8Hòj lèngꞌakh, bil is eh nak nareduk bok natènghõng, wènar nak wèkeyòkh TUHAN Allah nachèb-chib èn selay nak, dak wèkedëk nòm TUHAN Allah èn gagid mèn jehuk nak. 9Tapik TUHAN Allah nakòw ma babeh nak dak nachal, “Èn lok hãh?”
10Babeh nak nasaꞌod, “Yék ikeyòkh chëh Hãk hachèb-chib èn selay doh, dak yék itukh sebab yék sèglèg. Sebab nak yék ikedëk.”
11Dak TUHAN nachal, “Rèk lok hãk boléh halèkh hãk sèglèg? Ke hãk hòj hagéy kebek nòm jehuk rik Yék ihuwok nak?”
12Babeh nak nasaꞌod, “Babok rik Hãk haꞌog ma yék — rik nak lah irik èg-og kebek nak ma yék, dak yék igéy.”
13TUHAN Allah natanyak ma babok nak, “Nahey bok hãk hateꞌèl rèk doh?” #2 Kor 11:3; 1 Tim 2:14.
Babok nak nasaꞌod, “Tajuk nak nasèꞌlok ma yék sampéy yék igéy kebek nak!”
Allah nakèrlek henukom
14Dak TUHAN Allah nachal ma tajuk nak,
“Sebab tènꞌèl hãh nak, Yék ipantakh ma hãk.
Nòm kenèmbek chok bènleh ròb lawok kèjlaj,
had hãk hék rik ipantakh bok ihukom gerèk doh:
Mulak is doh, hãk akal hador habegelongꞌãng,
dak nèygéy hãh habog nòm tèk, kenèmbek nèsgos hãh.
15Yék akal iꞌuy ma hãk ròb babok doh kaꞌan bema-mus.
Waris hãk ròb waris rik nak akal lèjgéj umbema-mus.
Hãk akal hachòh ma dèldël waris eh,
dak waris eh akal najelog ma kuy hãh sampéy berèjꞌũj.”#Per 12:17.
16Dak TUHAN Allah nahukom ma babok nak bok nachal:
“Yék akal itabeh senusah ma hãk bil hakayod,
dak itabeh wèl pènjèd hãh bil hãk hamyès-yos.
Yab rèk nak pon, hãk tik hachèn geb ma tòw hãh,
tapik rik nak akal nakuwase ma hãk.”
17Dak TUHAN Allah nahukom ma babeh nak bok nachal:
“Hãk hahoh ma nèlchal léh hãh,
bok hagéy ma kebek rik Yék ihuwok hãk hamgéy.
Sebab tènꞌèl hãk rèk nak, Yék akal ipantakh ma tèk nak bok iꞌuy susah namtèrlut nèygéy wèl.
Kenèmbek nèsgos hãh haros lah hakèrjak keras
supaye tèk doh namtèrlut mènhik rik tèdhad,#Ibr 6:8.
18tapik tèk nak akal natèrlut bèrher ròb jalak untok hãk.
Hãk akal hagéy nòm lènlut nak,
19tapik akal hakèrjak keras sampéy berakèd untok hamkèk nèygéy hãh,
sampéy hãk halos ma tèk.
Yék ipèrhéj ma hãk nòm tèk,
bok hãk akal halos wèl ma tèk.”
20Babeh nak kenëh eh Adam (maksod eh nak “sènꞌòy”).#3:20 Kuy Ibrani “adam” nak mirip ma “adamah,” nèlchal sènꞌòy Ibrani rik bemaksod “nòm tèk.” Dak Adam natèrjal kenëh léh eh nak Hawa (maksod eh nak “gès-gos”), sebab rik nak najadik amèk ma kenèmbek sènꞌòy rik gès-gos. 21Pas nak TUHAN Allah nateꞌèl nèglòg nòm sèmpok lawok dak natèrlòg ma Adam ròb léh eh.
Tuhan nakiron Adam ròb Hawa nòm Selay Èden
22Nòm kerek nak TUHAN Allah nachal, “Puꞌdoh sènꞌòy nak hòj wèjadik gerèk Èk bok mok nènglèkh tentang ilok rik méj bok rik jèdhad. Agok lah èmꞌor wènar nak wèmtelèh kebek bok wèmgéy nòm jehuk rik èg-og nèsgos, supaye sènꞌòy agok mugos sampéy bilok-bilok.”#Per 22:14. 23Dak TUHAN Allah nakiron Adam ròb Hawa wèhuwòl nòm Selay Èden. Hatòp nak TUHAN Allah napèrhéj ma Adam nak nòm tèk, tapik puꞌdoh naꞌor namkerèꞌjak ma tèk nak.
24Hòj nòm kerek nak, TUHAN Allah naꞌor ma ruway rayak rik bekènyèng (rik èn kuy Ibrani nak umdéh “kerub”) untok mujagak èn belah sòy is Selay Èden nak. Dak TUHAN keꞌjèk nadol juwòj rik chèk-chak barꞌos nabechingwẽl èn anak untok namkèrlakh nòng ma jehuk rik èg-og nèsgos.
ទើបបានជ្រើសរើសហើយ៖
Jenadik 3: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.