ရိမ့ၤ 7
7
တဲၤဖၱးစူးအဟိကလဲၤ
1သဲပူၤဝ့ၤတစီာ်, သံထဲၢ်အမဲၤလှိဘဲာ်တဲၤမှဲးလၤတစီာ်သၱာ် ဟဲ တပွဲးတဲၤမှဲးလၤအစိသလဲ အီၣ်ပၠၤအခဳးဘ့စအီၣ် ဝ့ၤပၠၤအခဲလီၤ. 2ကဒီၣ်မီၢ်ကိာ်, အမံၤမှူးအဝၤအီၣ်တပွဲၤနဳၤ, စဝၤကအီၣ်ဝ့ၤပၠၤ အသူသရ့နဳၤ, စတဲၤဖၱးတဲၤမဲၤအီၣ် မၱာ်ဘ့စဝၤသံကဲၤတပျာ်နဳၤ, စတဲၤ ဖၱးတဲၤမဲၤလၢ်ဝၤအနံၤခံတအီၣ်ပ့ၤတပွဲးနီး. 3စဝၤအီၣ်သမိဝ့ၤ အခဲ, စကအီၣ်ကိာ် မၤအမံၤခဳအလဝ့ၤတပွဲၤပွဲၤအကါဒဳၣ်, စမၱာ်အဒီ သဗွံ. ပရၤဆါ စဝၤကသံမၤဒဳၣ်, စတဲၤမဲၤကူဓူၤထဳတပွဲးကၱာ်စဖၱးစူးဇၤ တပွဲး ဒဳၣ်စတမၱာ်ပ့ၤအဒီသဗွံနီး. 4မဲၤကနဳၤအခဳးအစဲ, သဲပူၤ သဲဝ့ၤတစီာ်, ပၠၤထဲၢ်အသံနံၤကဲၤတဲၤမှဲးလၤဒဳ ခရၱာ်အန့ၤဘၱာ် စဲာ်အပူၤတပွဲၤနဳၤ, အံာ်လၤနံၤဇၤထဳအန့ၤဒဳအဝၤအလဝ့ၤတပွဲၤ အစူးခီးပူၤနဳၤ, စဲာ်ထဲၢ်အထာ်ပဳၤက့ၤဒဳတဲၤသံအကျဲကၱာ်အမဲၤ လၤကွါလၤယၢ်ထဳဝၤဘၱာ်စဲာ်အနံၤခံတပွဲၤအီၣ်နဳၤ. 5လှ့ ဝၤတနံၤ ဘဲာ်တဲၤဘါချဲးထာ်သးနှၱနီးနဳၤ, ဝၤတဲၤသးအဲးနံၤအကရၢ်အီၣ်ဘဲာ်ကဲၤဒဳ တဲၤမှဲးလၤအကါလဲၢ်နဳၤကၱာ်အမဲၤနံၤဝၤနဲၤ ဘၱစဲာ်သဲာ်ထာ်ဖီထာ်အံာ် တဲၤသံလီၤ. 6ပရၤဆါခဳနူၤယဳၤ, ဝၤအီၣ်လှိအီၣ်လၤကၱာ်ထဳ တဲၤမှဲးလၤ, ဝၤအီၣ်လှိအီၣ်လၤထဳတဲၤသံကၱာ်တဲၤဘဲာ်စဳဘဲာ်ကၠၱၢ်, ဝၤခး ဇိၤဇၤထဳကဘၱာ်စဲာ်ဒဳ သဳးသးအတဲၤအီၣ်အသဲပူၤနဳၤ, တမၱာ်ဒဳကျဲးသအီ အလံၤလၤ, တဲၤမှဲးလၤအဝှ့းလၤအပူၤပ့ၤနီး.
တဲၤမှဲးလၤကၱာ်တဲၤခီၣ်ဝဲၤ
7မဲၤကနဳၤဒဳၣ်, ဝၤဒီၣ်ဒီစာ်တဲၢ်. တဲၤမှဲးလၤမၱာ်တဲၤခီၣ်ဝဲၤဧါ. တမၱာ်ဓဳၤနီး. တဘဲာ်ယသးအဲးဒဳထဲၢ်အကမၱာ်မၤတဲၤ မှဲးလၤအစဲဒဳၣ်, ယတသၱာ်ဟဲတဲၤခီၣ်ဝဲၤနီးနဳၤနီး. “သးအဲးနံၤမဲး ပၠၤအတဲၤထီတဲၤလၤမဲး,” တဲၤမှဲးလၤကတအီၣ်မၤဓဳၤနီးဒဳၣ်, ယတဗီသၱာ်ဟဲမဲၤတဲၤသးအဲးနံၤပၠၤအတဲၤထီတဲၤလၤနှီနူၤနီးနီး. 8တဲၤမှဲးလၤအခဳးအစဲ, တဲၤခီၣ်ဝဲၤ နဳၤပဲၤကဲၤယဲၤ, မၤနဲၢ်ဒဳၣ်တဲၤမှဲးလၤကတအီၣ်မၤနီးဒဳၣ်, တဲၤခီၣ်ဝဲၤသံ လှဲမဲၢ်ထဳတပွဲး. 9လှ့အကါထၱးတဲၤမှဲးလၤတအီၣ်နှၱနီးနဳၤ, ယမၱာ်အအီၣ်သမိ, ပရၤဆါ, တဲၤမှဲးလၤဓဳၤလ့ၤတပျာ်, တဲၤခီၣ်ဝဲၤအီၣ်ထာ်ကၱာ် ယသံကဲၤ. 10တဲၤမှဲးလၤမၱာ်အကမီလ့ၤအံာ်ယဲၤတဲၤသမိ, ပရၤဆါအဖၱထာ်ကဲၤယနံၤခံတဲၤသံ, 11မၤနဲၢ်တဲၤခီၣ်ဝဲၤဖၱးနံၤ တဲၤမှဲးလၤကၱာ်အဟဲးဖြီးဆီးမံအံာ်ကဲၤယဲၤကျဲးကၱာ်တဲၤခီၣ်ဝဲၤနဳၤဒဳ တဲၤမှဲးလၤအပူၤမဲၤသံကဲၤယဲၤ.
12တဲၤမှဲးလၤမၱာ်အစါထံ. တဲၤမှဲးလၤနဳၤအစါထံ, အတၱၢ် အမှးကၱာ်အအဲး. 13မဲၤကနဳၤဒဳၣ်, တဲၤအအဲးတမံၤ မံၤမဲၤသံကဲၤ ယဲၤဧါ. တဘဲာ်နီး, ပရၤဆါတဲၤခီၣ်ဝဲၤနဳၤ, အကဒဲ လၱၢ်ထာ်ဘဲာ်အဟိ အယီၤ အနံၤခံ မဲၤအံာ်တဲၤအအဲး အကမဲၤ သံယဲၤ, ကၱာ်တဲၤခီၣ်ဝဲၤနဳၤ, ဒဳတဲၤမှဲးလၤအပူၤမဲၤအံာ်ပ့ထာ်ဇီၤ ထာ်ကဲၤအတဲၤစိတဲၤသလဲ.
သဳးသးအတဲၤဒဳးတဲၤဖၠး
14အစာ်ဘိဝၤသၱာ်ဟဲအဓ့နဳၤ, တဲၤမှဲးလၤမၱာ်အဘဲာ် ကၠးသဳးသးအတဲၤမဲၤ, မၱာ်ယဲၤနဳၤ, ယတမၱာ်သဳးသးအပၠၤနီး, ယမၱာ်ဖ့းဟၱးဘဲာ်ဆဲလၤနံၤကဲၤ အစာ်ဘိတဲၤခီၣ်ဝဲၤအဇိၤအပွဲၤ နဳၤ. 15ယတသၱာ်ဟဲလၤက့ၤဒဳယတဲၤဖၱးတဲၤမဲၤနဳၤ. တဲၤထဲၢ်ယသးအဲးမဲၤတစီာ်နဳၤ ယတမဲၤနှၱနီး, ကၱာ်တဲၤထဲၢ်ယတဝဲၢ်တဆဲနီးတစီာ်နဳၤယမဲၤကဲၤ. 16ကၱာ်ယမဲၤနံၤကဲၤ တဲၤထဲၢ်ယတသးအဲးမဲၤနီးတစီာ်နဳၤဒဳၣ်, မၱာ်အဒဲလၱၢ်တဲၤမှဲးလၤ မၱာ်တဲၤအအဲးလီၤ. 17ကၱာ်ဒီအဒဲလၱၢ်အမဲၤတဲၤအယဳၤ မၱာ်တဘဲာ်ယဲၤနီး, မၱာ်တဲၤခီၣ်ဝဲၤထဲၢ်အအီၣ်ယပူၤမဲၤတဲၤလီၤ. 18အစာ်ဘိယအီၣ်ကၱာ်တဲၤဖ့းတဲၤဟၱးအခီ, ယသၱာ်ဟဲ တပွဲးတဲၤအအဲး အအီတအီၣ်ဒဳယပူၤနဳၤတမံနီး, မၤနဲၢ်ဒဳၣ်, ယကမဳၤအသးအဲးမဲၤတဲၤ အအဲးအီၣ်နီၣ်သီဒဳယပူၤနှီနဳၤ, ယတမဲၤကဲာ်ထာ်ကဲၤနီး. 19သရိ ယကမဲၤနံၤတဲၤမဲၤအဝၱၤအဘဲာ်တစီာ်နဳၤ, ယမဲၤနံၤကီတဲၤခီၣ်ဝဲၤ, ထဲၢ်ယတသးအဲးမဲၤနီးတစီာ်နဳၤ. 20ကၱာ်ယမဲၤနံၤကဲၤတဲၤထဲၢ် ယတသးအဲးမဲၤနီး တစီာ်နဳၤဒဳၣ်, အတမၱာ်ယန့ၤဘၱစဲာ်အသ့ပွ့ၤနီး, မၱာ်တဲၤခီၣ်ဝဲၤအအီၣ်ဒဳယပူၤတဓဲနဳၤ.
21မဲၤကနဳၤဒဳၣ်, အလါမၱာ်တဲၤအနဲၤနီၤတဓဲထဲၢ်ဘ့ယသးအဲး မဲၤ တဲၤအအဲးကိအပျာ်နဳၤ, တဲၤအတအဲးနီးအီၣ်တလီၤကဲၤ. 22ဒဳယသးအိးပူၤနဳၤယဘဲာ်လီၢ်သ့ပွ့ၤသၱာ်လၱ ကဘၱာ်စဲာ်အတဲၤမှဲးလၤ, 23မၱာ်ယန့ၤဘၱစဲာ်ထာ်ခဳးကါ ကဲၤစဲာ်, ကၱာ်အဒဳးအဖၠးတပွဲးတဲၤမှဲးလၤ ထဲၢ်ယသးတမဲဒီဆးယဲၤတစီာ်နဳၤ. တဲၤအယဳၤမဲၤဖၱထာ်ကဲၤတဲၤခီၣ်ဝဲၤ အတဲၤကၱတၱၢ်ဖဳးထဲၢ် အအီၣ်ဒဳယန့ၤဘၱစဲာ်အပူၤတဓဲနဳၤ. 24ယမၱာ်ပၠၤအမီၤခီးဝဲၤခီးသံမံးတပွဲၤဟဳ, ပီၢ်ပွဲၤကထ့းက့ၤယဲၤဒဳ ယန့ၤဘၱာ်စဲာ်အသဲ ယဲၤဒဳတဲၤသံအကျဲပွဲၤ. 25တဲၤမှီးဘဲာ်ဘၱာ်စဲာ် ဒဳဝၤဘၱာ်စဲာ်ယ့ၣ်ရှူးခရၱာ်အပူၤလီၤ.
အကဓူၤလါ, ပွ့ယတဲၤကမဳၤအီၣ်အသရ့, ယကအီၣ်အံာ် ကဘၱာ်စဲာ် အတဲၤမှဲးလၤ, ကၱာ်ယန့ၤဘၱစဲာ်, သဳးသးဒဳတဲၤခီၣ်ဝဲၤအတဲၤအံာ်လၤနံၤ ကဲၤယဲၤနဳၤ.
ទើបបានជ្រើសរើសហើយ៖
ရိမ့ၤ 7: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
