ရိမ့ၤ 6
6
တဲၤအီၣ်ဒဳခရၱာ်အပူၤ
1မဲၤကနဳၤ, ဝၤကအီၣ်ဝ့ၤတဲၤခီၣ်ဝဲၤအပူၤစာ်ဘိထဲၢ် ဝၤကနံၤ ဘဲာ်ဒဳၣ်ဆဲးယ့ၣ်ရှူးနဳၤဧါ. 2နီး, တမၱာ်ကနဳၤနီး. ဝၤသံဘဲာ်ထဳ တဲၤခီၣ်ဝဲၤ, မဲၤကနဳၤဒဳၣ်, ဝၤကအီၣ်ဝ့ၤဒီတဲၤခီၣ်ဝဲၤ အပူၤစာ်တဲၢ်. 3သံသၱာ်ဟဲတပွဲးထဲၢ်ဘ့ဝၤခးတဲၤဖဳးစူထံဒဳယ့ၣ်ရှူးခရၱာ် အပူၤနဳၤ, ဝၤနံၤဘဲာ်ထဳ တဲၤဖဳးစူထံဒဳ စတဲၤသံအပူၤနဳၤ. 4မဲၤကနဳၤဒဳၣ်, ဘ့ဝၤနံၤဘဲာ် တဲၤအူဆးဘါထံနဳၤ, ဝၤဘဲာ်ဘူလါပျဳာ်ကဲၤ ကၱာ်ဝၤသံပျဳာ်ကဲၤစဲာ်. ကနဳၤအခဳးအစဲ, အစာ်ဘိခရၱာ်ထာ်ပဳၤက့ၤဒဳတဲၤသံ အကျဲဒဳစပာ် အတီၤအသ့းအပူၤနဳၤ, ဝၤမၱာ်မၱာ်ဝၤကအီၣ်ဘဲာ်ပီၢ်ဒဳတဲၤ သမိ အသဲအပူၤနဳၤ.
5မဲၤကနဳၤဒဳၣ်, ဝၤကမၱာ်မၤတပွဲၤလီၤပျဳာ်ပျဳာ်ကၱာ် ခရၱာ်ဒဳတဲၤသံအပူၤဒဳၣ်, ဝၤကမၱာ်တပွဲးအထာ်ပဳၤက့ၤပျဳာ်ပျဳာ် ကၱာ်စဲာ်ဒဳတဲၤသမိအပူၤနဳၤနဳၤ. 6ဝၤသၱာ်ဟဲတပွဲးထဲၢ် ဝၤနဲၤဘၱစဲာ် အလံၤလၤနဳၤဘဲာ်ထာ်လၤပျဳာ်ထဳခရၱာ်ဒဳသဳာ်ပျဳၤအလီၤနဳၤ, စာ်ဘိထဲၢ် တဲၤခီၣ်ဝဲၤအန့ၤဘၱစဲာ်အတဲၤခဳးတဲၤအါကဘဲာ်မဲၤကဲမဲၤအိးပီၢ်, ကၱာ်ဝၤ တမၱာ်ပ့ၤပီၢ်တဲၤခီၣ်ဝဲၤအဇိၤအပွဲၤပ့ၤနီးနဳၤ. 7မၤနဲၢ်ဒဳၣ်, ပၠၤတပွဲၤကသံဒဳၣ်, စဲာ်ကၱာ်တဲၤခီး ဝဲၤနဳၤတဘဲာ်ကၠးပ့ၤလၢ်ဝၤနီး. 8ဝၤဘူၣ်ထဲၢ်ဝၤသံပျဳာ် ခရၱာ်ဒဳၣ်, ဝၤကထာ်ပဳၤက့ၤပျဳာ်ကီ စဲာ်ဒဳတဲၤသမိအပူၤနဳၤ. 9အစာ်ဘိဝၤသၱာ်ဟဲအဓ့ခရၱာ်နဳၤဘဲာ်ဘး ဝဲၢ်ထဳးက့ၤထဳတဲၤသံအကျဲကၱာ်စတသံဘဲာ်တပျာ်ပ့ၤနီး. တဲၤသံတနဳၤ တပဲၤစဲာ် နီး. 10လှ့စသံနဳၤ, စသံလဲၢ်ကဲတဲၤခီၣ်ဝဲၤ, ကၱာ်တဲၤခီး ဝဲၤဓဳၤနဳၤတဘဲာ်ပ့ၤစဲာ်နီး, ကၱာ်ခဳနူၤယဳၤစတဲၤအီၣ်မၱာ်ပျဳာ်ပျဳာ် ကၱာ်ဘၱာ်စဲာ်. 11ကနဳၤအခီ, သံကကမဳၤဘဲာ် သံသံလဲၢ်ကဲတဲၤခီၣ်ဝဲၤ, မၱာ်အီၣ် သမိကဲၤဒဳဘၱာ်စဲာ်ပူၤဒဳယ့ၣ်ရှူးခရၱာ်အပူၤနဳၤ.
12မဲၤကနဳၤအခဳးအစဲ, သံတအံာ်ဘဲာ်တဲၤခီၣ်ဝဲၤအူ အံာ်သံန့ၤဘၱစဲာ်နီး. သံတဆီးခ့န့းဘဲာ်သံတဲၤသးအဲးနံၤအလ့ၢ် နီး. 13သံန့ၤဘၱစဲာ်ကတမၱာ်ဘဲာ်တဲၤရၱၢ်တဲၤစူအဒဳးအဖၠးဇၤတဲၤခီၣ်ဝဲၤနီး. မၱာ်သံကအံာ်ထာ်ဘဲာ် သံန့ၤဘၱစဲာ် ကဘၱာ် စဲာ်, ကၱာ်ကမဳၤပီၢ် သံန့ၤအသံဝှါအနံၤဘဲာ်ကဲၤတဲၤအီၣ်သမိတစီာ်နဳၤ. သံကမဲၤဘဲာ်သံန့ၤ သဒဲကျိအဒဳးအဖၠးတဲၤဒဳကဘၱာ်စဲာ် အီၣ်တခီနဳၤ. 14တဲၤခီၣ်ဝဲၤ တအူအံာ်စာ်အံာ်ဘဲာ်သံတဲၤ အီၣ်သမိနီး, မၤနဲၢ်သံတအီၣ်တဲၤမှဲး လၤ အလဲၢ်နီးမၱာ်ကဘၱာ်စဲာ်အလှူၣ်အတါအလဲၢ်နဳၤ.
တဲၤတၱၢ်တဲၤမှးအဇိၤအပွဲၤတစီာ်
15ဝၤကအီၣ်ကၱာ်အလှူၣ်အတါ, တဘဲာ်တဲၤမှဲးလၤနီးဝၤဒီၣ် ဓဳၤဒဳၣ်, ဝၤအီၣ်လှိအီၣ်လၤအကမဲၤတဲၤခီၣ်ဝဲၤဝၤဒီၣ်ဓဳၤဧါ. 16သံ သၱာ်ဟဲတပွဲးထဲၢ်ဘ့သံအဳလါဖျးလၤကိာ်အကခးဇိၤပၠၤတပွဲၤပွဲၤဒဳၣ်, သံဖၱထာ်ကဲၤစဇိၤစပွဲၤနဳၤ, ကၱာ်တပျာ်ခါလီၤသံကမၱာ်မၤတဲၤခီၣ်ဝဲၤအဇိၤ အပွဲၤဒဳၣ်, အကလ့ၤအံာ်ဟူသံ ဒဳတဲၤသံအကျဲနဳၤ, မၱာ်တပျာ်ခါလီၤ သံတမၱာ်စတဲၤဆီးခ့န့း လ့ၢ်သဲဟဳ ထဲၢ်အလ့ၤအံာ်ဟူဝၤ ဒဳကဘၱာ်စဲာ်တဲၤတၱၢ်တဲၤမှး အဇိၤနဳၤ. 17ဝၤထါထာ်အံာ်ဘၱာ်စဲာ် အလှူၣ်အတါ, မၤနဲၢ်, လှ့အအူဆူးနဳၤ သံမၱာ်ကဲၤတဲၤခီၣ်ဝဲၤအဇိၤအပွဲၤ, ပရၤဆါခဳနူၤယဳၤ သံဖၱးနံၤလဳသဳးလဳသးကဲၤ တဲၤတၱၢ်တဲၤမှး အဘဲာ်ဒီၣ်အူဒီဆးသံအစဲနဳၤ. 18သံလှိထာ်ဖျီးထာ်ထဳတဲၤခီၣ် ဝဲၤအဇိၤအပွဲၤကၱာ်သံမၱာ်ကဲၤတဲၤတၱၢ်တဲၤမှးအဇိၤအပွဲၤ. 19(သံကသၱာ်ဟဲထဳပီၢ်အနံၤခံ, ယဒီၣ်တဲၤယၱၢ် ဘဲာ်အဖျီသံနံၤကူၤနဳၤ.) ယဒီဆးသံလှ့အသဲလဲၢ်ခဳးနဳၤ, သံမဲၤ အံာ်ကဲၤသံန့ၤဘၱစဲာ် တဲၤကၱကဲာ်မဲၤလှီကၱာ်တဲၤခဳးရဳးခးရးအဇိၤ အပွဲၤ, မၱာ်ခဳနူၤယဳၤ, မဲၤအံာ်ပီၢ်စတဲၤတၱၢ်တဲၤမှးအဇိၤအပွဲၤ ပ့ပ့ဇီၤဇီၤဒဳတဲၤဝၱၤတဲၤစါအနံၤခံတခီ.
20လှ့သံမၱာ်တဲၤခီၣ်ဝဲၤအဇိၤအပွဲၤအခၠၱးနဳၤ, သံတမဲၤဘဲာ် တပွဲးတဲၤတၱၢ်တဲၤမှးအတဲၤနီး. 21သံနံၤဘဲာ်ပီၢ် တၤနဲၢ်. တၤတမံ နီး, မၱာ်တဲၤသါဝၢ်လီၤ. မၤနဲၢ်တဲၤဖၱးတဲၤမဲၤ အယဳၤတမဳၤမၱာ်အကူဓူၤဒဳ တဲၤသံအကျဲးအခဳးအစဲနဳၤ. 22နီၣ်သီနှီနူၤ, ခဳနူၤယဳၤသံဘဲာ်ဘါပျဲး ထဳကၱာ်တဲၤခီၣ်ဝဲၤဒဳသံ မၱာ်ကဲၤကဘၱာ်စဲာ်အဇိၤအပွဲၤ, သံနံၤဘဲာ်ထဳတဲၤဝၱၤ တဲၤစါထံ အစိသလဲအလ့ၤအံာ်သံဒဳတဲၤအီၣ်သမိအလၤထူလၤပျဳၤနဳၤ. 23တဲၤခီၣ်ဝဲၤအဆိးအလှဲမၱာ် တဲၤသံ, ကဘၱာ်စဲာ်အတဲၤအံာ်မၱာ် တဲၤအီၣ်အလၤထူလၤပျဳၤဒဳ ဝၤဘၱာ်စဲာ်ယ့ၣ်ရှူးခရၱာ်အပူၤနဳၤ.
ទើបបានជ្រើសរើសហើយ៖
ရိမ့ၤ 6: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
