ရိမ့ၤ 8
8
ဒဳတဲၤအီၣ်သမိဒဳသးစါထံပူၤ
1မဲၤကနဳၤဒဳၣ်, ပၠၤအအီၣ်သမိဒဳယ့ၣ်ရှူးခရၱာ်ပူၤတဘဲာ် ကဘၱာ်စဲာ်အတဲၤစံးရးနီး. 2မၤနဲၤဒဳၣ်, ကဘၱာ်စဲာ်အသးအတဲၤ မှဲးလၤအတဲၤအီၣ်ဒဳယ့ၣ်ရှူးခရၱာ်နဳၤဘးလှိထာ်ကဲၤသံဒဳတဲၤခီၣ်ဝဲၤ ကၱာ် တဲၤသံအတဲၤမှဲးလၤအပူၤနဳၤ. 3တဲၤဒဳဖ့းဟၱးအတဲၤမှဲးလၤ အတမဲၤကဲာ်ထာ်နီးနဳၤ, ကဘၱာ်စဲာ်မဲၤကဲၤ. ကဘၱာ်စဲာ်သဓဳလ့ၤကဲၤ စဖဳး အကဖၱးနံၤကဲၤတဲၤန့ၤဘၱစဲာ်ထဲၢ်တဲၤခီၣ်ဝဲၤဖၱးကျဳၤအံာ်နဳၤအခဳးအစဲ, စစံးရးသံကဲၤတဲၤခီၣ်ဝဲၤ. 4စမဲၤကနဳၤစာ်ဘိထဲၢ်တဲၤမှဲးလၤ အတဲၤတၤတစီာ်ကအီၣ်နံၢ်ပီၢ်ဝၤဖ့းဟၱးအတဲၤမဲၤတစီာ် ကဖၱထာ်ပီၢ် ဝၤနံၤခံသဳးသးအတဲၤမဲၤနဳၤ. 5ပၠၤအတအီၣ်အံာ်သဳးသးအတဲၤ မဲၤနီးတစီာ်တဘဲာ်လီၢ်တဲၤအဘဲာ်ကၠးသဳးသးနီး, မၱာ်အအီၣ် အံာ်သဳးသး အတဲၤဖၱးတဲၤမဲၤတစီာ်ဘဲာ်လီၢ်တဲၤအဘဲာ်ကၠးသဳးသးနဳၤ. 6ပၠၤတပွဲၤကမဲၤအံာ်မၤဖ့းဟၱးအတဲၤမဲၤ လီၤဒဳၣ်, စမဲၤနံၤစနံၤခံတဲၤသံလီၤ, မၱာ် ပၠၤတပွဲၤပွဲၤကမဲၤမၤသဳးသး အတဲၤမဲၤဒဳၣ်, စမဲၤနံၤတပွဲးစနံၤခံတဲၤအီၣ် သမိကၱာ်တဲၤစဳးတဲၤချံးတခီ. 7မၤနဲၢ်ကဒီၣ်ဓဳၤဒဳၣ်, ပၠၤတပွဲၤပွဲၤ ကမဲၤမၤထ့ဖ့းဟၱးအနံၤခံလီၤဒဳၣ်, မဲၤစာ်ဘိစမဲၤစန့ၤကဘၱာ်စဲာ်အသဲ ဒ့ဒီၣ်အခီနဳၤ, မၱာ်အစာ်ဘိစထာ်ဒ့ဒီၣ်ကဘၱာ်စဲာ်အတဲၤမဲၤအခဳးအစဲနဳၤ. 8ပၠၤထဲၢ်အခၣ်အူအံာ်အန့ၤကၱာ်လၢ်ခဳးအတဲၤအီၣ်တစီာ်နဳၤ, တမဲၤ ဘဲာ်သးဇၤကဘၱာ်စဲာ်နီး.
9သံတဲၤကမဳၤတဘဲာ်တပွဲးဖ့းဟၱးအနံၤခံလီၤနီး, မၱာ်သဳးသး အနံၤခံတခီ. မၤနဲၢ်, ဒဳကဘၱာ်စဲာ်အသးစါထံအီၣ်ကိာ်ကဲၤသံကါ. သံကတအီၣ်အံာ်မၤခရၱာ်အတဲၤသးနီးဒဳၣ်, သံကတဘဲာ်ကၠးတပွဲးစဲာ်နီး. 10ပရၤဆါခရၱာ်အသးစါ ထံကဖၱးနံၤမးသံဒဳၣ်, ကၱာ်တဲၤခီၣ်ဝဲၤအစဲသံ န့ၤ ဘၱစဲာ်မၱာ်သံနီၣ်သီ နှီနဳၤ, ကဘၱာ်စဲာ်အသးစါထံမၱာ်တဲၤသမိသံနံၤခံ, မၤနဲၢ်သံဘဲာ် လဲၢ်တၱၢ်လဲၢ်မှးထဳအခဳးအစဲနဳၤ. 11ကဘၱာ်စဲာ်အသးစါထံ, ထဲၢ်အမဲၤထာ်ပဳၤက့ၤယ့ၣ်ရှူးခရၱာ်ဒဳတဲၤသံနဳၤမၱာ်အီၣ် မၤသံပူၤ ဒဳၣ်, သံသးမၱာ်အအီၣ်သမိဒဳသံဘဲာ်မဲၤစါထံက့ၤအခဳး အစဲနဳၤ.
12မဲၤကနဳၤအခဳးအစဲသဲပူၤသဲဝ့ၤတစီာ်, တဲၤလၤ ဘဲာ်ကဲၤဒဳကတမီၤဆီးခ့န့းဝၤဖ့းဝၤဟၱးအလ့ၤနီး, ကၱာ်ဝၤတမီၤ အီၣ်ကၱာ်ဖ့းဟၱးအတဲၤအီၣ်လီၤနီး. 13သံကအီၣ်မၤကနဳၤဒဳၣ်, သံကသံဘဲာ်တပွဲး, မၱာ်သးစါထံကမဲၤကဲမဲၤလှဲမဲၢ်မၤ သံဖ့းဟၱးအတဲၤ မဲၤဒဳၣ်, သံကအီၣ်သမိဘဲာ်တပွဲး. 14ကယါပၠၤအဘဲာ်ထဳးကမ့ၤဒဳ ကဘၱာ်စဲာ်အသးစါထံတပွဲၤပွဲၤနဳၤ, စမၱာ်ကဘၱာ်စဲာ်အဖဳး. 15သးစါထံထဲၢ်သံနံၤဘဲာ်ကဲၤနဳၤ, တမၱာ်ဇိၤပွဲၤအသးစါထံထဲၢ်အကလ့ၢ် အံာ်သံတဲၤရှံးဆါပ့ၤနီး, မၱာ်ကဘၱာ်စဲာ်အသးစါထံမဲၤနံၤကဲၤဝၤအကမၱာ် ကဘၱာ်စဲာ်အဖဳးအလံၤကၱာ်ဒဳသးစါထံအစိသလဲအပူၤဝၤယဳၤထာ်ဘဲာ်, “အပၤ, အပာ်,” နဳၤ. 16သးစါထံသဲန့ၤကၱာ်ဝၤသးစါထံခးပျဳာ် လၢ်ဝၤသဲသၱးထဲၢ်ဝၤမၱာ်ကဘၱာ်စဲာ်အဖဳးအလံၤနဳၤ. 17ကၱာ်ဝၤကမၱာ် မၤကဘၱာ်စဲာ်အဖဳးအလံၤဒဳၣ်, ဝၤကနံၤဘဲာ် တပွဲးတဲၤအံာ်လၤက့ၤ, ကဘၱာ်စဲာ်ကၱာ်ခရၱာ်အတဲၤအံာ်လၤက့ၤ အဖဳးတစီာ်နဳၤ. မၤနဲၢ်, ဝၤခးပျဳာ် ဘဲာ်ခရၱာ်စတဲၤဆဲးညဲပီၤတီၤကၱာ်ဝၤနံၤဘဲာ်ပျဳာ်စဓီၤစသ့း.
တဲၤဓီၤတဲၤသ့းမၱာ် ဝၤတဲၤအီၣ်အကဓူၤလါ
18ယကမဳၤမၱာ်တဲၤပၤဝၤခးဘဲာ်ခဳနူၤယဳၤတစီာ်နဳၤ, ဝၤတဒိး သီတြီၤဇၤကၱာ်တဲၤဓီၤတဲၤသ့းအအီၣ်ဆီဧိၢ်အံာ်ဝၤထဲၢ်ဝၤတဘဲာ်ဒဲလၱၢ် နှၱနီးတဓဲနဳၤ. 19တဲၤအီၣ်ဘီာ်လၤလဳစါစဲး ဆီးမီတိၤအံာ်ကဘၱာ်စဲာ် အခဲဒဲလၱၢ်စဖဳးတစီာ်နဳၤ. 20တဲၤအီၣ်ဘီာ်လၤလဳစါစဲးတနံၤဘဲာ်တဲၤ ထဲၢ်ကဘၱာ်စဲာ်မဲၤနံၤဝၤ နှၱနီးနဳၤ, တဘဲာ်ပၤခဳးမဲၤစတဲၤကမဲာ်နီး, မၱာ်အဆး ရှံ အံာ်ဝ့ၤတပွဲးအစာ်ဘိဝၤနဳၤ. 21အကအီၣ်လှိအီၣ်လၤကၱာ်ဇိၤပွဲၤ အတဲၤအီၣ်နဳၤကၱာ်အကနံၤဘဲာ်ကီ တဲၤအီၣ်လှိအီၣ်လၤကၱာ် ကဘၱာ်စဲာ် အဖဳးအလံၤတစီာ်အဓီၤအသ့းနဳၤ. 22လှ့အကါထၱးထိဓဳၤလၤ ခဳနူၤယဳၤတဲၤအီၣ်ဘီာ်လၤလဳစါစဲးနဳၤ, အစာ်ဘိဝၤသၱာ်ဟဲအသရ့, ကအီၣ်ကယၤကဲၤဒဳတဲၤဖဳးဇ့ၤလၤအံာ်အတဲၤဆဲးညဲအပူၤနဳၤ, 23ကၱာ်တဘဲာ်ထဲၢ်တဲၤအီၣ်ဘီာ်လၤလီၤနီး, ဝၤကိအပွဲၤထဲၢ်သးစါထံအဖီ အသဲာ်အလၤပူၢ်နဳၤ. ဝၤကအဳကယၢ်ကဲၤဘ့ဝၤဆီးမီတိၤအံာ်ဝ့ၤ ဝၤနဲၤဘၱ စဲာ်အတဲၤအီၣ်လှိအီၣ်လၤအခၠၱးနဳၤ. 24မၤနဲၢ်, ဝၤမီၤဘဲာ်သးအံာ် ထဳဒဳတဲၤဆးရှံအံာ်အခဲဘဲာ်မဲၤလှိမဲၤလၤအံာ်နဳၤလီၤ. ဝၤတစာ်ထၱး ဘဲာ်ဝၤ တဲၤလှိထာ်က့ၤနှၱနီး, ဝၤတမီၤဆးရှံအံာ်ဒဳၣ်နှၱနီးဟဳ. 25ပရၤဆါဝၤ ကဆးရှံအံာ်မၤတဲၤထဲၢ်ဝၤတစာ်ထၱးနီးဒဳၣ်, အမၱာ်တဲၤအမီၤဆီးမီတိၤအံာ် ဒဳတဲၤသးဇိၤပူၤလီၤ.
26သးစါထံလၤထၱးဝၤအကမဲၤဇဳၤဝၤဒဳဝၤတဲၤခဳး တဲၤအါ တအီၣ်နီးအကျဲနဳၤ. ဘ့ဝၤဝၢ်လှဲးတဲၤယၱၢ်ဘဲာ်အကသဘဲသအိသအဲးနဳၤ, သးစါထံဒဲလၱၢ်ထးဝၤတဲၤတၤဒဳဝၤတဒီၣ်ဇၤနီးအပူၤနဳၤ. 27ကဘၱာ် စဲာ်ထဲၢ်အဝၢ်လှဲးသၱာ်ဟဲဝၤသးတပွဲၤနဳၤသၱာ်ဟဲတပွဲးသးစါထံသးအဲးဒီၣ် ကဲၤတစီာ်နဳၤ, ကၱာ်ဒဳသးစါထံအတဲၤတၤဒဳပၠၤစါထံတစီာ်အတဲၤသးအဲး နံၤထဲၢ်အဘဲာ်ကဘၱာ်စဲာ်အသးတစီာ်နဳၤ.
28ပၠၤထဲၢ်အဘဲာ်လီၢ်ကဘၱာ်စဲာ်တစီာ်နဳၤဒဳစယဳၤ လၢ်ဝၤစတဲၤ သးအဲးနံၤအီၣ်အဓ့နဳၤလီၤ. 29စဲာ်တစီာ် နဳၤမၱာ်ပၠၤထဲၢ်ကဘၱာ်စဲာ်ရိၤ လှဲးကဲၤလှ့လှ့းမဳၤအကဖၱထာ်ဘဲာ်စဖဳး အဟိအကလဲၤ, စာ်ဘိထဲၢ်စဖဳး ကမၱာ် ပီၢ်သဲပူၤဝ့ၤအီၣ်အဲးအီၣ် အီၣ်အကျဲအဓဳၤပွ့ၤတပွဲၤနဳၤ. 30စယဳၤကဲၤစသးအီၣ်တစီာ်, ထဲၢ်စမဲၤဝၱၤမဲၤစါကဲၤလၢ်ဝၤအကနံၤကိာ်ဘဲာ် စကါစဓီၤစသ့းတစီာ်နဳၤ.
ကဘၱာ်စဲာ်အတဲၤဘဲာ်လီၢ်ဒဳယ့ၣ်ရှူးခရၱာ်အပူၤ
31တဲၤအယဳၤတစီာ်ဝှါအမီၤဒဳၣ်ချဳမၱာ်တၤနဲၢ်. ကဘၱာ်စဲာ်ကအီၣ်မၤဒဳဝၤအီၣ်တခီဘဲာ်ဒဳၣ်, ပီၢ်ပွဲၤကထာ်ခဳးကါ ဇၤဝၤပွဲၤ. 32ကဘၱာ်စဲာ်တလဲၢ်ကဲစဖဳးနီး, မၱာ်စအံာ်လၤ ဖျီးမၱာ်လၢ်ဝၤဝၤနံၤခံ ဒဳၣ်, ကယါစအံာ်ဇၤဝၤတစီာ်နဳၤစတကံဝံၢ် အံာ်နီး, မၱာ်အံာ်လဳသဳးလဳသး ဝၤနဳၤဝၤဒီၣ်ဇၤထဳတပွဲး 33ပၠၤကဆးဝဲၢ်ဇၤပီၢ်ကဘၱာ်စဲာ်ရိၤလှဲးဝှါ ထဳတစီာ် အလီၤတဲၤကမဲာ်တပွဲၤပွဲၤဧါ. မၱာ်ကဘၱာ်စဲာ်ထဲၢ်အဘါလှိးကဲၤဝၤ တပွဲၤနဳၤလီၤ. 34ပၠၤစံးရးဇၤဝၤတပွဲၤပွဲၤဧါ. နီး, တဘဲာ်ယ့ၣ်ရှူး ခရၱာ်ထဲၢ်အသံဝှါအဘဲာ်မဲၤသမိထာ်က့ၤစသံနံၤခံဝၤ, တဝှါနှၱနီး, စထာ်ပဳၢ်က့ၤတဲၤသံအကျဲ, ဝှါဒဳၣ်စအီၣ်ဒဳကဘၱာ်စဲာ်အစူးတထွဲး နဳၤကၱာ်စဒီၣ်နံၤခံဆးနံၤခံဝ့ၤဝၤတခီ. 35တၤတမံတမဲၤ ပၢ်ကဲာ် ထာ်ဝၤကၱာ်ခရၱာ်အတဲၤဘဲာ်လီၢ်အဇဳၤနီး. ဝၤခးဘဲာ်နီၣ်သီတဲၤဆဲးညဲကၱာ် တဲၤဘဲာ်ရှဳဘဲာ်မၤနှီနဳၤ, ဝၤဘဲာ်နီၣ်သီတဲၤလဳၤမဲၤဆဲးညဲနှီနဳၤ, ဝၤဆီတအၣ်ပၤတအီ, တကိတသီးဘဲာ်နီၣ်သီနှီနူၤ, ဝၤဘဲာ်မဲၤယဳၤမဲၤနှါ, ဘဲာ်မူၢ်ဘဲာ်ထာ်နီၣ်သီနှီနူၤ, တၤတမံတထၱးပၢ်ကဲာ်ထာ်ဝၤနီး. 36အစာ်ဘိစဲာ်စါထံအမှါခးအံာ်ကဲၤနဳၤ,
“နခဳးနစဲ, ဝၤဘဲာ်မဲၤသံကိအနံၤလီၤ.
ပၠၤထ့းကဲၤဝၤစာ်ဘိထဲၢ်သဳအကဘဲာ်မဲၤသံတစီာ်နဳၤ.”
37အယဳၤမၱာ်တဲၤဘဲာ်သးထဲၢ်ဝၤနဳၤဝၤပဲၤကိာ်အခဳးလဲၢ်ကါ လဲၢ်, ဒဳအဘဲာ်လီၢ်ဝၤတပွဲၤအပူၤနဳၤ. 38ယနံၤခံမၱာ်အလၤတံၤ လၤဆ့းထဲၢ်တဲၤသံမၱာ်ဝၱၤ, တဲၤအီၣ်မၱာ်ဝၱၤ, မီၢ်ခဳးပွဲၤဇဳၤမၱာ်ဝၱၤ, ဆးဖြးဖဳး မၱာ်ဝၱၤ, တဲၤအအီၣ်ခဳနူၤယဳၤတစီာ်မၱာ်ဝၱၤ, အကအီၣ်ကီဒဳအလ့ၤကါတစီာ် မၱာ်ဝၱၤ, တဲၤစိတဲၤသလဲမၱာ်ဝၱၤ, 39ဒဳတဲၤထာ်ယၱၤမၱာ်ဝၱၤ, တဲၤလၤယီၢ်စဳးတပံၤမၱာ်ဝၱၤ, တဲၤအီၣ်ဘီာ်လၤမၱာ်ဝၱၤတလ့ၤနံၢ်ဇၤဝၤကၱာ် ကဘၱာ်စဲာ်အတဲၤဘဲာ်လီၢ်ထဲၢ်ကစာ်ထၱးဇၤဒဳယ့ၣ်ရှူးခရၱာ်အဇိၤတမံနီး.
ទើបបានជ្រើសរើសហើយ៖
ရိမ့ၤ 8: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
