ရိမ့ၤ 5
5
တဲၤမဲၤဘဲာ်လီၢ်အန့ၤကၱာ်ကဘၱာ်စဲာ်
1ကနဳၤအခဳးအစဲ, ခဳနူၤယဳၤ ဝၤဘဲာ်လဲၢ်က့ၤအတၱၢ် အမှးဝၤ တဲၤဘူၣ်အခဳးအစဲဒဳဘၱာ်စဲာ်ယ့ၣ်ရှူးခရၱာ်အပူၤ, ဝၤအီၣ် မီၤအီၣ်မၤ ဘဲာ်ကဲၤ ဒဳကဘၱာ်စဲာ်အလီမီၢ်နဳၤ. 2ဒဳဝၤတဲၤ ဘူၣ်အခဳးအစဲ, ဝၤနံၤဘဲာ်ကဘၱာ်စဲာ်အလှူၣ်အတါလီၤ. ဝၤပဲၢ်ထာ်ထိဇၤထဳဝၤနဲၤဒဳ တဲၤဆးရှံအံာ်အကနံၤဘဲာ်ကဘၱာ်စဲာ်အတီၤအသ့းနဳၤ. 3ဝၤမီၤ ဖၱးဓဳၤဖၱးမူၤဝၤနဲၤ ဝၤတဲၤပၤတဲၤဆဲ အခဳးအစဲ, မၤနဲၢ်, တဲၤပၤတဲၤဆဲ မဲၤနံၤဝၤတဲၤဆဲးညဲပီၤတီၤ, 4တဲၤဆဲးညဲပီၤတီၤမဲၤနံၤဝၤ တဲၤခီး သးဒီ, တဲၤခီးသးဒီမဲၤနံၤဝၤ တဲၤသးကလဳၢ်, တဲၤသးကလဳၢ်မဲၤနံၤဝၤ တဲၤဆးရှံအံာ်. 5တဲၤဆးရှံအံာ်တမဲၤရှံးလၤဇ့ၤလၤဇၤ ဝၤသးနီး, မၤနဲၢ်, ကဘၱာ်စဲာ်လှီးလၤစတဲၤဘဲာ်လီၢ်ဒဳဝၤသးပူၤ, ဒဳစအံာ်လၤနံၤဝၤစသးစါထံအပူၤနဳၤ.
6ဝၤအီၣ်ထံအီၣ်တၤဝ့ၤနဳၤ, ခရၱာ်သံကဲၤတဲၤခီၣ်ဝဲၤဖဳး တစီာ်အနံၤခံ ဘ့ကဘၱာ်စဲာ်ပဲၢ်လၤအခၠၱးအကျၤဘဲာ်နဳၤ. 7ပၠၤတပွဲၤ ကသံဘဲာ်အတၱၢ်အမှးတပွဲၤအနံၤခံနှီနဳၤမၢ်အတရှဳနှၱနီး, မၱာ်တပျာ်ပျာ် ပၠၤအဝၱၤအအဲးသ့ပွ့ၤသၱာ်လၱတပွဲၤအနံၤခံနဳၤ ပၠၤအကခးသံအန့ၤ အီၣ် ဇၤတပွဲးဟဳ. 8မၱာ်ဒဳကဘၱာ်စဲာ်နဳၤ စဲာ်ဒဲလၱၢ်ထာ်စတဲၤဘဲာ်လီၢ်ဝၤ ခဳးဒဳခရၱာ်သံကဲၤဝၤနံၤခံဘ့ဝၤမၱာ်ဝ့ၤတဲၤခီၣ်ဝဲၤဖဳးတစီာ်အနံၤခံနဳၤ. 9ခရၱာ်သံဒဳစမဲၤဝၱၤမဲၤစါကဲၤဝၤ, မဲၤကနဳၤဒဳၣ်စတမဲၤလှိထာ်က့ၤ ဇၤကဲၤ ဝၤဒဳကဘၱာ်စဲာ် တဲၤသဲးထဲးအကျဲနီးဧါ. 10ဝၤမၱာ်တပွဲးကဘၱာ်စဲာ်အသဲဒ့ဒီ, နီၣ်သီနှီနူၤစမဲၤသီၣ်က့ၤဝှါကဲၤ ဝၤဒဳစဖဳးအတဲၤသံလီၤ. ခဳနူၤယဳၤဝၤမၱာ်ကဲၤစသီၣ်တစီာ်အခဳး အစဲဒဳၣ်, ခရၱာ်အတဲၤအီၣ်အခဳးအစဲ ဝၤလှိထာ်ထဳဝၤတဒီၣ်ဇၤဒဳၣ်ချဳနီးဧါ. 11တဘဲာ်ထဲၢ်ဝၤလၤကျၤကဲၤကဘၱာ်စဲာ်လီၤနီး, မၱာ်ဝၤအီၣ်ဖၱထာ်ကၱာ်ကဲၤ တဲၤသးကနၢ်အံာ်ဒဳကဘၱာ်စဲာ်အပူၤဒဳဘၱာ်စဲာ်ယ့ၣ်ရှူခရၱာ်, ထဲၢ်ဝၤနံၤ ဘဲာ် ထဳတဲၤမဲၤသီၣ်က့ၤတပွဲၤအီၣ်အခဳးအစဲနဳၤ.
စီၤအၤဒၣ်ကၱာ်ယ့ၣ်ရှူးခရၱာ်
12တဲၤခီၣ်ဝဲၤလ့ၤနံၢ်ကိာ်ကဲၤပၠၤတပွဲၤဒဳလၢ်ခဳးအခဳးယဳၤ, ကၱာ် တဲၤသံလ့ၤနံၢ်ကိာ်ကဲၤတဲၤခီၣ်ဝဲၤ ကၱာ်တဲၤသံဟဲးပြဲၤ ကဲၤပၠၤလၢ်ခဳးဖဳး သဒဲခွံအကျဲ, မၤနဲၢ်, ပၠၤကိအပွဲၤမဲၤကဲၤတဲၤခီၣ်ဝဲၤ. 13တဲၤခီၣ်ဝဲၤ အီၣ်ဒဳလၢ်ခဳးယဳၤအအူဆူးကၱာ်တဲၤ မှဲးလၤအဒ့ာ်အလှဲပွ့တမံၤ. တဲၤမှဲးလၤ တအီၣ်ကဲၤနီးအခဳးအစဲပၠၤတပွဲတဘဲာ်စံးရးကဲၤဒဳစတဲၤခဲဘး တဲၤမှဲးလၤ အစဲနီး. 14နီၣ်သီနှီနူၤတဲၤခီၣ်ဝဲၤအူအံာ်စာ်အံာ်ကဲၤပၠၤကဳၤထာ် စီၤအၤဒၣ်ထဳဓဳၤလၤစီၤမဳၤရှ့နဳၤ, ကၱာ်စတဲၤခီၣ်ဝဲၤတမၱာ်ကဲၤအစာ်ဘိ စီၤအၤဒၣ်ထဲၢ်အခဲဘးတဲၤမှဲးလၤနဳၤနီး.
စီၤအၤဒၣ်မၱာ်အကလ့ၤလၤတပွဲၤအကလဲၤ. 15မၱာ် အတယၢ်သိးလှဲးလၢ်ဝၤနီး. ကဘၱာ်စဲာ်အတဲၤအံာ်လၤအနှးနှါမၱာ် အတယၢ် သိးကၱာ်စီၤအၤဒၣ်အတဲၤခီၣ်ဝဲၤနီးအစဲလီၤ. ပၠၤတပွဲၤအတဲၤလၤခူး အခဳးအစဲပၠၤအီၣ်အဲပွဲကသံဘဲာ်မၤဒဳၣ်, ကဘၱာ်စဲာ်အလှူၣ်အတါ အလၤကိာ် ဒဳပၠၤတပွဲၤ, ယ့ၣ်ရှူးခရၱာ်အီၣ်နဳၤဒဳၣ်, တဲၤအံာ်လၤအနှးနှါ ဒဳတဲၤလှူၣ်တဲၤတါအပူၤမၱာ်အကအီၣ်အဲးအီၣ်ဆရးဘဲာ်လီၢ်. 16တဲၤအံာ်လၤအဖီအသဲာ်ကဓဳၤလံဘဲာ်ပၠၤ တပွဲၤအတဲၤကမဲာ်အဖီအသဲာ်, မၤနဲၢ်ပျိာ်ပျိာ်ကၱာ်တဲၤလၤခူးနဳၤ တဲၤစံးရးအီၣ်ကိာ်ကဲၤ, ခဳနူၤယဳၤတဲၤလၤ ခူးအပျါကၱာ်အပျာ်ဝှါတဲၤဘါပျဲးအလှူၣ်အတါလ့ၤကဲၤအစဲနဳၤ. 17အကဘဲာ်ဘ့ာ်မ့မၤပၠၤတပွဲၤအတဲၤလၤခူးအခဳးအစဲတဲၤခီၣ်ဝဲၤအူအံာ် ပၠၤကိအပွဲၤဒဳၣ်, ပၠၤတပွဲၤထဲၢ်ယ့ၣ်ရှူးခရၱာ်နဳၤကအံာ်ခီပၠၤ ကိအပွဲၤ အကအူအံာ်တဲၤအီၣ်ထဲၢ် စတတးနံၤနီၣ်သီနီၣ်နှီနဳၤ, နံၤဘဲာ်နှးနှါကဲၤ ဒဳတဲၤမဲၤဝၱၤမဲၤစါအခဳးအစဲနဳၤ.
18မဲၤကနဳၤဒဳၣ်, ပၠၤတပွဲၤအတဲၤလၤခူးကမဲၤနံၤမၤ ပၠၤလဳ စါစဲးအနံၤခံတဲၤစံးရးဒဳၣ်, ပၠၤတပွဲၤအတဲၤဖၱးတဲၤမဲၤအအဲးကမဲၤနံၤဒဳၣ်ချဳ ဝ့ၤ ပၠၤလဳစါစဲာ်အနံၤခံတဲၤအီၣ်ကၱာ်တဲၤမဲၤဝၱၤ မဲၤစါတခီ. 19ပၠၤလၢ်ခဳးဖဳးလဳစါစဲးဘဲာ်မဲၤဖၱထာ်တဲၤခီး ဝဲၤဖဳးဒဳပၠၤတပွဲၤအတဲၤ တဆီး ခ့န့းကဘၱာ်စဲာ်အလ့ၢ်နီးအစဲအခီနဳၤ, ပၠၤကိအပွဲၤကဘဲာ်တဲၤလဲၢ်တၱၢ် လဲၢ်မှးကီဒဳပၠၤတပွဲၤအတဲၤဆီးခ့န့းအစဲနဳၤ.
20တဲၤသိၣ်တဲၤသီဘဲာ်မဲၤထာ်အစာ်ဘိတဲၤမဲၤတဲၤ ကမဲာ်ကအီၣ်အဲးထာ်အနံၤခံလီၤ. နီၣ်သီနှီနူၤ, ဘ့တဲၤခီၣ်ဝဲၤအီၣ်အဲးထာ်နဳၤ, ကဘၱာ်စဲာ်အလှူၣ်အတါအီၣ်အဲးထာ်ချဳလံကၱာ်အလ့ၤလီၤ. 21ကနဳၤအခဳးအစဲ, အစာ်ဘိတဲၤသံအူအံာ်တဲၤခီၣ်ဝဲၤအခီနဳၤ, ကဘၱာ်စဲာ် အလှူၣ်အတါအူအံာ်တဲၤတၱၢ်တဲၤ မှးစာ်ဘိထဲၢ်ကနံၤဘဲာ်တဲၤအီၣ်လၤ ထူလၤပျဳၤဒဳဘၱာ်စဲာ်ယ့ၣ်ရှူးခရၱာ်အပူၤလီၤ.
ទើបបានជ្រើសរើសហើយ៖
ရိမ့ၤ 5: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
