လူၤကၣ် 3
3
အဖဳးစူထံစီၤယိၤဟၣ်
(မး ၃:၁-၁၂, မၢ် ၁:၁-၈, ယိၤ ၁:၁၉-၂၈)
1ဘ့ဆးဖြးဓဳၤတံၤဘ့းရံ အူအံာ်တဲၤပ့ထာ် ၡံးယဲၢ်ဒ့ာ်တဒ့ာ်, ဘ့စီၤပီၣ်တံၤပံးလးမၱာ်ယူဒၤက့ၤ အမၢ်ဓဳၤ, စီၤဟ့ၤရိာ်မၱာ်က့ၤကၤလံၤလဲ အမၢ်ဓဳၤ, ကၱာ်စသဲပူၤဝ့ၤစီၤဖံလံးပူးမၱာ်က့ၤယတူၢ်ကၱာ် က့ၤတြဃိၤ န့ တံၤအမၢ်ဓဳၤ, စီၤလူၤစၤနံမၱာ်က့ၤ အဘ့ၤလ့ၣ်အမၢ်ဓဳၤ, 2စီၤအၣ် နၣ်ကၱာ် စီၤကၤယါဖၤ မၱာ်ပၠၤလှူၣ်တဲၤအဓဳၤအခဳးတစီာ်လီၤ. ဘၱာ်စဲာ်အလ့ၢ်ဓဳၤထၱး စီၤစဃၤရံအဖဳးစီၤယိၤဟၣ် ဘ့စအီၣ်ဝ့ၤဒဳလဳၤသံမံးဇ့ၤခဳးနဳၤ, 3ကၱာ်စလ့ၤဒဳ ယၢ်ဒ့ၣ်ကီၤလီၢ်ဝ့ၢ်တခီဘဲာ်ကၱာ်ဒီၣ်အူဒီဆးကဲၤပၠၤ, “ပၤယၤလၤက့ၤသံန့ၤ ကၱာ်ခးဖဳးစူပီၢ်သံန့ၤထံ, ကၱာ်ကဘၱာ်စဲာ်ကဘါပျဲး ကီသံတဲၤခီၣ်ဝဲၤတစီာ် နဳၤ.” 4အစာ်ဘိအဝှ့းလၤကဲၤ ဒဳဝံယၡါ ယၤအစဲာ် ပူၤအဒီၣ်,
“ပၠၤကဲာ်ဧဳၤထာ်ဒဳလဳၤသံမံးဇ့ၤခဳးနဳၤတပွဲၤဒီၣ်ကဲၤ,
‘ပြးတီၤလီၤပီၢ်ကဘၱာ်စဲာ်အကျဲးသအီ,
မဲၤတနၢ်ပီၢ်စကျဲး,
5ရီၤကိအရီၤနဳၤ ကဘဲာ်ပျဳာ်ထာ်က့ၤအံာ်ဒီဧဲၤလဳၤဟး,
ခီမူၤခီးလီတစီာ်ကဘဲာ်ခူးလၤတ့ၢ်ဖးဒီဧဲၤ.
ကျဲးအတကွ့ၤတစီာ် ကဘဲာ်မဲၤတနၢ်က့ၤဒီဧဲၤ,
ကျဲးအထာ်ဒ့လၤဇဳၢ်တစီာ် ကဘဲာ်မဲၤဒိတယံၢ်က့ၤဒီဧဲၤ.
6ကၱာ်ပၠၤလဳစါစဲးကစာ်ထၱးဘဲာ်ကီ ကဘၱာ်စဲာ်အတဲၤယဳၤ က့ၤစာ်က့ၤ.’”
7စဒီၣ်ကဲၤပၠၤအပဳၤအဟီး အလ့ၤခးဖဳးစူအန့ၤထံ ဒဳစအီၣ်နဳၤ တစီာ်, “သံကလၤပူးမဳၤတစီာ်, ပီၢ်ပွဲၤဒီဆးကဲၤသံ အကဆဲးကိနံၤကဘၱာ်စဲာ် အတဲၤသဲးထဲးအလ့ၤစာ်တဲၢ်ပွဲၤ. 8မဲၤပီၢ်တဲၤအယဳၤတစီာ်စာ်ဘိထဲၢ်အကဒဲလၱၢ်ထာ်သံ ပၤယၤက့ၤအန့ၤဒဳတဲၤခီၣ်ဝဲၤအစဲ, ဒီၣ်ပီၢ်မဲးသံ မၱာ်စီၤအၤဘြၤဟၣ်အခွံအသလဲမဲး. ယဒီဆးသံထဲၢ် ကဘၱာ်စဲာ်ဖၱးလဳၤအယဳၤတစီာ်ကၱာ်နှးကဲာ်ထာ်ဇၤ တပွဲး စီၤအၤဘြၤဟၣ်အခွံအသလဲ. 9မၤနဲၢ်, ဘ့ခဳနူၤယဳၤလီၤတၱးမးဘဲာ် ဘဲလါထဳ ဒဳသဳာ်ခၣ်ဝံၤလီၤ နဳၤ. မဲၤကနဳၤဒဳၣ်, သဳာ်ကိအဘီထဲၢ်အတသဲာ် တဖီနီး နဳၤ, ကဘဲာ်ကိၢ်က့ၤကၱာ်ကဘဲာ်ထၱး ထာ်နံၢ်ကီမှၱးအကျဲ.”
10ပၠၤအပဳၤအဟီးတစီာ်ဒဲစဲာ်, “မဲၤကနဳၤဒဳၣ်, ဝၤကမဲၤဘဲာ် တၤနဲၢ်.”
11စဒီၣ်ၡံက့ၤလၢ်ဝၤတစီာ်, “ပၠၤထဲၢ် အၡံာ်ဒဳချဳ ကအီၣ်ကၠံၢ် ဘဲာ်တပွဲၤနဳၤ, အံာ်သီးပီၢ် အအဲတအီၣ်နီးနဳၤတဘဲာ်. ကၱာ်အတဲၤအၣ်တဲၤ အီ အီၣ်တစီာ်နဳၤ, ပ့ၤအၣ်ပီၢ်အဆီတအၣ်ပၤတအီ တစီာ်နဳၤ.”
12အတၤတဲၤမှူတစီာ်မၱာ်မၱာ် လ့ၤခးဖဳးစူအန့ၤထံ, ကၱာ်ဒဲစာ် ကဲၤစဲာ်, “ဆရၣ်, ဝၤကမဲၤဘဲာ်တၤနဲၢ်.”
13စီၤယိၤဟၣ်ဒီၣ်ၡံက့ၤစဲာ်တစီာ်, “တၤ လိၤချဳးလိၤဘးပီၢ်မဲး ပၠၤတဲၤမှူဒဳၣ်လံကၱာ် တဲၤမှဲးလၤ အီၣ်သံခဳးနဳၤမဲး.”
14ကျံဖဳးတစီာ်မၱာ်မၱာ် ဒဲကဲၤစဲာ်, “ဝၤဒီ, ဝၤကမဲၤဘဲာ်ဒီစာ် တဲၢ်.”
စဒီၣ်ၡံက့ၤလၢ်ဝၤတစီာ်, “အါဝူၢ်အါသဖျဲးမဲးပၠၤ တပွဲမဲး. ဆးဝဲၢ်တရာ်ဇါမဲးပၠၤအလီၤ တဲၤကမဲာ်တပွဲမဲး. ဖၱးနံၤမီၤမီၤဝၱၤဝၱၤပီၢ်သံဆိးသံလှဲ.”
15ပၠၤဆီးမီတိၤအံာ် အမဲၤလှိထာ်က့ၤ တဲၤတပွဲၤအခၠၱးဒဳၣ်စဲာ် တစီာ်ထဲးနံၤဝံနံၤဝၤနံၤ စီၤယိၤဟၣ်အလ့ၤ. ကၱာ်စကမဳၤတပွဲးလၢ်ဝၤ မၱာ်ခရၱာ်ဒဳၣ်, 16စီၤယိၤဟၣ်ဒီၣ်ရှံက့ၤပၠၤလဳစါစဲး, “ယဖဳးစူသံ ကၱာ်ထံဟဳ. ပရၤဆါအစိ သလဲဓဳၤ ဒဳၣ်လံ ယဲၤတပွဲၤ ကလ့ၤကီ. ယတတးပွ့းအကဘါပျဲးစခၣ်တကီးအပံၤနှီနူၤနီး. စကဖဳး စူအံာ်ကီသံကၱာ်သးစါထံ ကၱာ်မှၱး. 17စဖၱးကျဳၤအံာ်ဘးဘ့စစူးခီးပူၤ ကၱာ်စကသရာ်ကီ ဘူၣ်ဒဳဘူၣ်သရာ်အလ့ၤ နဳၤ, ကၱာ်စကတီးနံၢ်ပျဳာ်က့ၤကီဘူၣ်အဆး ဒဳစကလီၤအပူၤနဳၤ. မၱမၱာ်အသရဳးသခွးနဳၤ, စကရွှံးကဲကီဒဳမှၱးအတလၤပၱၢ်ဇၤနီးအကျဲနဳၤ,” စီၤယိၤ ဟၣ်ဒီၣ် ကဲၤစဲာ်တစီာ်ဒဳၣ်.
18ဒဳတဲၤဒီၣ်ခူထာ်အတဲၤယၱၢ်ဘဲာ် အပူၤနဳၤ စဒီထိးလၤနံၤ တပွဲးပၠၤတစီာ်တဲၤသး လဳၢ်သး လၤအံာ်အဝၱၤအကဲ. 19ပရၤဆါ မၢ်ဓဳၤစီၤဟ့ၤရိာ်နဳၤ, ဒဳစဟီလၢ်ဝၤထဲၢ် စဖၱးကဲၤစပၱးကီအမှဲနီၢ်ဟ့ၤရိၤဒံ, ကၱာ်တဲၤဖၱး တဲၤမဲၤအကၱကဲာ်မဲၤလှီပွ့တမံၤအခဳးအစဲနဳၤ. 20အနဳၤ ဝှါဒဳၣ်စီၤဟ့ၤရိာ်မဲၤကဲၤတဲၤကမဲာ်အဓဳၤကဓူၤ မၱာ်ဘ့စဒဳးဝဲၢ်ကျဳၤစီၤယိၤ ဟၣ်ဒဳတဲၤကၱတၱၢ်အပူၤနဳၤ.
ယ့ၣ်ရှူးခးတဲၤဖဳးစူထံ
(မး ၃:၁၃-၁၇, မၢ် ၁:၉-၁၁)
21ပၠၤအပဳၤအဟီးတစီာ်ခးဝှါတဲၤဖဳးစူထံ, ယ့ၣ်ရှူးမၱာ်မၱာ် စခး ဖဳးစူကဲၤစန့ၤထံ. ကၱာ်ဘ့စသဘဲ ထာ်အခၠၱးနဳၤ, မီၢ်ခဳးဘါထာ်ကဲၤ, 22ကၱာ်သးစါ ထံလ့ၤလၤစခဳး အစာ်ဘိသကဳတြူၤတဘဲာ်နဳၤ, တဲၤ အလ့ၢ်သဲာ်ထာ်ကဲၤဒဳမီၢ်ခဳးတဓဲအဒီၣ်, “နမၱာ်ယဖဳးခဳထဲၢ်ယဘဲာ်လီၢ်, ယဘဲာ်သးတပွဲၤနဳၤ.”
ယ့ၣ်ရှူးအခွံသလဲ
(မး ၁:၁-၁၇)
23ဘ့ယ့ၣ်ရှူးကဳၤထာ်စတဲၤဖၱးတဲၤမဲၤနဳၤ စဒ့ာ်ဘးကဲၤဆဳရှံ ကၱာ်ပၠၤတစီာ်ကမဳၤစဲာ် မၱာ် စီၤယိၤသးအဖဳး, ထဲၢ်စီၤဟ့ၤလံအဖဳးတပွဲၤနဳၤ လီၤ. 24စီၤဟ့ၤလံအပာ်မၱာ် စီၤမးသး, စီၤမးသးအပာ်မၱာ်စီၤလ့ၤဝံ, စီၤလ့ၤဝံအပာ်မၱာ်စီၤမ့းလဃံ, စီၤမ့းလဃံအပာ်မၱာ်စီၤယၣ်နါ စီၤယၣ်နါ အပာ်မၱာ်စီၤယိၤသး, 25စီၤယိၤသးအပာ်မၱာ်စီၤမးတၤသံ, စီၤမး တၤသံအပာ်မၱာ်စီၤစီၤဧၤမိၣ်, စီၤဧၤမိၣ်အပာ်မၱာ်စီၤနၤဃူၣ်, စီၤနၤဃူၣ်အပာ်မၱာ်စီၤအ့းစလံ, စီၤအ့းစလံအပာ်မၱာ်စီၤနၤကဲ, 26စီၤနၤကဲအပာ် မၱာ်စီၤမအါသး, စီၤမအါသးအပာ်မၱာ်စီၤမးတၤသံ, စီၤမးတၤသံအပာ်မၱာ် စီၤစ့းမ့းအံ, စီၤစ့းမ့းအံအပာ်မၱာ်စီၤယိၤသး, စီၤယိၤသးအပာ်မၱာ်စီၤယူဒၤ, 27စီၤယူဒၤအပာ်မၱာ်စီၤယိၤအၣ်နၣ်, စီၤယိၤအၣ်နၣ်အပာ်မၱာ်စီၤရ့ၤ စါ, စီၤရ့ၤစါအပာ်မၱာ်စီၤစရူဘၤဘ့းလး, စီၤစရူၤ ဘၤဘ့းလးအပာ် မၱာ်စီၤ ၡၤလတံၤအ့လး, စီၤၡတံၤအ့လးအပာ်မၱာ်စီၤန့ၤရံ, 28စီၤန့ၤရံ အပာ်မၱာ်စီၤမ့းလဃံ, စီၤမ့းလဃံအပာ်မၱာ် စီၤအးဒံး, စီၤအးဒံးအပာ်မၱာ်စီၤ ကိၣ်စၣ်, စီၤကိၣ်စၣ်အပာ်မၱာ်စီၤအ့းလမိၤဒၣ်, စီၤအ့းလမိၤဒၣ်အပာ်မၱာ် စီၤအ့ၢ်, 29စီၤအ့ၣ်အပာ်မၱာ်စီၤယိၤရှူ, စီၤယိၤရှူအပာ်မၱာ် စီၤအလံၤဧ့စ့ၢ်, စီၤအလံၤဧ့စ့ၢ်အပာ်မၱာ်စီၤယိၤရံၣ်, စီၤယိၤရံၣ်အပာ်မၱာ်စီၤမး သး, စီၤမးသးအပာ်မၱာ်စီၤလ့ၤဝံ, 30စီၤလ့ၤဝံအပာ်မၱာ် စီၤစူၤမ့း အိၣ်, စီၤစူၤမ့းအိၣ်အပာ်မၱာ်စီၤယူဒၤ, စီၤယူဒၤအပာ်မၱာ်စီၤယိၤသး, စီၤ ယိၤသးအပာ်မၱာ်စီၤအ့းလယါကံၣ်, စီၤအ့လယါကံၣ်အပာ်မၱာ်စီၤမ့းလ့း, 31စီၤမ့းလ့းအပာ်မၱာ်စီၤမအံနၣ်, စီၤမအံနၣ်အပာ်မၱာ်စီၤမးတၤသါ, စီၤမးတၤသါအပာ်မၱာ်စီၤနၤသၣ်, စီၤနၤသၣ်အပာ်မၱာ်စီၤစီၤဒၤဝံး, 32စီၤဒၤဝံးအပာ်မၱာ်စီၤယံးၡဲ, စီၤယံးၡဲအပာ်မၱာ်စီၤဧိၤဘ့း, စီၤဧိၤဘ့းအပာ် မၱာ်စီၤဘိၤဧး, စီၤဘိးဧးအပာ်မၱာ်စီၤစၤလမိၣ်, စီၤစၤလမိၣ်အပာ်မၱာ်စီၤနး ၡိၣ်, 33စီၤနးၡိၣ်အပာ်မၱာ်စီၤဧးမံၤနဒး စီၤဧးမံၤနဒးအပာ်မၱာ်စီၤ ရၣ်, စီၤရၣ်အပာ်မၱာ်စီၤဃ့းစရိၣ်, စီၤဃ့းစရိၣ်အပာ်မၱာ်စီၤပ့းရ့း, စီၤပ့းရ့း အပာ်မၱာ်စီၤယူဒၤ, 34စီၤယူဒၤအပာ်မၱာ်စီၤယၤကိာ်, စီၤယၤကိာ်အပာ်မၱာ်စီၤအံၤစဲး, စီၤအံၤစဲးအပာ်မၱာ်စီၤအၤဘြၤဟၣ်, စီၤအၤဘြၤဟၣ်အပာ်မၱာ်စီၤတ့ရၤ, စီၤတ့ရၤအပာ်မၱာ်စီၤနၤဃိၢ်, 35စီၤနၤဃိၢ်အပာ် မၱာ်စီၤစၤရူာ်, စီၤစၤရူာ်အပာ်မၱာ်စီၤရူၤ, စီၤရူၤအပာ်မၱာ်စီၤပ့ၤလ့း, စီၤပ့ၤ လ့းအပာ်မၱာ်စီၤဧၤဘ့ၢ်, စီၤဧၤဘ့းအပာ်မၱာ် စီၤစ့ၤလါ, 36စီၤစ့ၤလါ အပာ်မၱာ်စီၤက့ၤနၣ်, စီၤက့ၤနၣ်အပာ်မၱာ်စီၤအၢ်ဖးၡး, စီၤအၢ်ဖးၡးအပာ် မၱာ်စီၤရှ့ၣ်, စီၤၡ့ၣ်အပာ်မၱာ် စီၤနိအၤ, စီၤနိအၤအပာ်မၱာ်စီၤလ့ၤမ့း, 37စီၤလ့ၤမ့းအပာ်မၱာ်စီၤမသူၤၡလၤ, စီၤမသူၤၡလၤအပာ်မၱာ်စီၤဃနိာ်, စီၤ ဃနိာ်အပာ်မၱာ်စီၤယၤရ့း, စီၤယၤရ့းအပာ်မၱာ်စီၤမဟၤလ့လး, စီၤမဟၤလ့ လးအပာ်မၱာ်စီၤက့ၤနၣ်, 38စီၤက့ၤနၣ်အပာ်မၱာ်စီၤအနိၣ်, စီၤအနိၣ် အပာ်မၱာ်စီၤၡ့သး, စီၤၡ့သးအပာ်မၱာ် စီၤအၤဒၣ်ထဲၢ်ကဘၱာ်စဲာ်သဲန့ၤဘီာ် လၤကဲၤတပွဲၤနဳၤ.
ទើបបានជ្រើសរើសហើយ៖
လူၤကၣ် 3: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
