လူၤကၣ် 2
2
ယ့ၣ်ရှူးအတဲၤအီၣ်လၤ
(မး ၁:၁၈-၂၅)
1လှ့ဆးဖြးဓဳၤအီၤကူးစတူး အံာ်လၤကဲၤ တဲၤမှဲးလၤထဲၢ် ပၠၤ လၢ်ခဳးဖဳးသဒဲဘဲာ် ကဘဲာ်ဒိးစာ်ဘဲာ်နဳၤ. 2တဲၤဒိးစာ်ပၠၤ အအူ ဆူး တပျာ်ယဳၤ မၱာ်လှ့ စီၤကူရ့နံအူအံာ်စူၤရံက့ၤအခၠၱးနဳၤ. 3ပၠၤလဳစါ စဲးလ့ၤကဲၤဒဳ အအူး, အဒဳ စာ်ဘိထဲၢ်စကလ့ၤဆ့းလၤစမံၤနဳၤ.
4စီၤယိၤသးမၱာ်ကဲၤ စီၤဒၤဝံးအခွံအစဲ, စအီၣ်ဒဳနစၤရ့းအူး, ကၤလံၤလဲက့ၤနဳၤ, စလ့ၤဒဳယူဒၤက့ၤ, စီၤဒၤဝံးအအူး, ထဲၢ်အမၱာ် ဘ့ၤသလ့ဃ့ၣ်အူးနဳၤ, 5စာ်ဘိထဲၢ်စလ့ၤဆ့း လၤစမံၤပျဳာ်ပျဳာ်ကၱာ်စမှဲနီၣ် မၤရံထဲၢ်ဘဲာ်အံာ်ဆးနံၤ စဲာ်တပွဲၤနဳၤ. ဘ့နဳၤအခၠၱးနီၢ်မၤရၱမူၤသဲာ်ဒဳကဲၤ. 6ဘ့စအီၣ်ဘ့နဳၤအခဲနဳၤ, အခၠၱးဘဲာ်ကဲၤစနံၤခံစာ်ဘိထဲၢ် စကဖဳး ရှံးလၤအံာ်ဘဲာ်စဖဳးနဳၤ. 7စဖဳးရှံးလၤအံာ် စဖဳးအဓဳၤပွ့ၤတပွဲၤ, စဘီ ဘံာ်အံာ်ကဲၤလၢ်ဝၤ တကၱ ယၢ်ကၱာ် စဘဲဆီးမံလၤကဲၤလၢ်ဝၤ ဒဳဗဳၤဆဲၣ် ကျီး ပူၤနဳၤ, မၤနဲၢ်ကဒီၣ်ဓဳၤဒဳၣ်, ဒဳတၱတမဲအရှံၣ်ပူၤနဳၤ, စနံၤခံအလ့ၤ တအီၣ်ပ့ၤနီး.
အစာ်အံာ်သဳကၱာ်မီၢ်ခဳးပွဲၤဇဳၤတစီာ်
8ဘ့အလ့ၤအဘိးထၱးဘိးဝၤဘ့နဳၤ, လူၤမူၤနဲၤခဲအစာ်အံာ်အသဳအီၣ်ကဲၤတစီာ်. 9စာ်ပီၢ်, ဘၱာ်စဲာ်အမီၢ်ခဳးပွဲၤဇဳၤလၤဆီထဳးအီၣ် ကဲၤဘ့စဲာ်တစီာ်အလှီမီၢ်, ကၱာ်ဘၱာ်စဲာ်အတီၤအသ့း ဝ့ၤခွဲဘးကဲၤစဲာ်တစီာ် အစဲ, စၡံးဆါသးပဳၤဆိးကဲၤ. 10မၱာ်အမီၢ်ခဳးပွဲၤဇဳၤဒီၣ်ကဲၤစဲာ်တစီာ်, “ၡံးဆါ ပီၢ်မဲး, ယလ့ၤဒီဆးသံတဲၤသးလဳၢ်သးလၤအံာ် အဝၱၤအကဲ ထဲၢ်အမၱာ်လၢ်ခဳးဖဳးလဳစါစဲးအနံၤခံနဳၤ. 11ခိတနံၤယဳၤ, အယဳၤက့ၤ စာ်က့ၤတဲၤတပွဲၤ ခရၱာ်ဘၱာ်စဲာ်အီၣ်လၤထဳသံနံၤခံ ဒဳစီၤဒၤဝံးအအူးပူၤနဳၤ. 12ကၱာ်တဲၤအယဳၤကမၱာ်ကီသံနံၤခံတဲၤမှါအံာ်, သံကစာ်ထၱးကီအပံၤစဖဳး အအီၣ်ဘီဘံာ်အံာ်ကၱာ် တကၱယၢ်ကၱာ်ဆီးမံလါ ဒဳဗဳၤဆဲၣ်ကျီး ပူၤတပွဲၤနဳၤ.”
13ကၱာ်ဒီတပျာ်ခါလီၤ မီၢ်ခဳးအပွဲၤဇဳၤ အပဳၤအဟီးတစီာ် သါ ပိၢ်ထါအံာ်ကဲၤဘၱာ်စဲာ် ကၱာ်ဒီၣ်ကဲၤ,
14“တဲၤဓီၤတဲၤသ့းကဘဲာ်ဒီပီၢ်ဧဲၤ ကဘၱာ်စဲာ်ဒဳအထာ်ယၱၤ ကဓူနဳၤ.
ကၱာ်ဒဳလၢ်ခဳးယဳၤ တဲၤစဳးတဲၤမီၤ ကဘဲာ်ဒီဧဲၤပၠၤအသဳးဝၱၤသး မီၤတစီာ်နဳၤ.”
15ဘ့မီၢ်ခဳးပွဲၤဇဳၤတစီာ်က့ၤထာ်ဝှါ မီၢ်ခဳးလီၤ, အစာ်အံာ်သဳ တစီာ်ဒီၣ်လှဲးလၢ်ဝၤ, “ကလ့ၤ ဝှါဒဳဘ့ၣ်သလ့ဃ့ၣ်အူးကၱာ်စာ်တဲၤဖၱထာ်အယဳၤ အစာ်ဘိ ကဘၱာ်စဲာ်အံာ် သၱာ်ဟဲကဲၤကဲာ်နဳၤ.”
16မဲၤကနဳၤဒဳၣ်, စလ့ၤပျးပျါကဲၤ ကၱာ် စာ်ထၱးဘဲာ်ကဲၤနီၢ်မၤရၱ ကၱာ် စီၤယိၤသး ကၱာ်အပံၤစဖဳးဆီးမံလါအီၣ်ကဲၤ ဒဳဗဳၤဆဲၣ်ကျီးပူၤနဳၤ. 17ဘ့အစာ်အံာ်သဳတစီာ် စာ်ထၱးအပံးစဖဳးဒဳၣ်, စဒီဆးကဲၤလၢ်ဝၤ တစီာ်ထဲၢ်မီၢ်ခဳးပွဲၤ ဇဳၤဒီဆးကဲၤ အပံၤစဖဳးတပွဲၤအဝၱၤအကဲနဳၤ. 18ကယါပၠၤ အသၱာ်ဟဲဘဲာ်တဲၤအဝၱၤအကဲထဲၢ်အစာ်အံာ် သဳ တစီာ်ဒီၣ်ဘၱ ဆးကဲၤနဳၤဒဳၣ်, စထဲးတမိၢ်တမှါ လဳၢ်ကဲၤ. 19မၱာ်နီၢ်မၤရၱနဳၤစတီၤ နံၤကဲၤ တဲၤအဝၱၤအကဲ အယဳၤလဳစါစဲးကၱာ်အီၣ်အံာ်ကဲၤဒဳစသးအဳးပူၤနဳၤ. 20ပၠၤအစာ်အံာ်သဳတစီာ်က့ၤဘးက့ၤကဲၤ အလ့ၤကါ ကၱာ်ထါ အံာ် ကဲၤကဘၱာ်စဲာ် ဒဳတဲၤလဳစါစဲးထဲၢ်စဲာ်တစီာ် သၱာ်ဟဲ ဘဲာ်ကၱာ်စာ်ထၱးဘဲာ် ကဲၤနဳၤ.
တဲၤလၤသိယ့ၣ်ရှူး
21စအီၣ်လၤဘးဝှါအသဲလွံၢ်သိး, တဲၤဟိ ရကၱအပံဓစဖဳးအဖ့းခံအခၠၱးနဳၤ, ထါကဲၤစမံၤယ့ၣ်ရှူး အစာ်ဘိမီၢ်ခဳးပွဲၤဇဳၤအံာ်လၤနံၤစဲာ်လှ့စတအီၣ် စမဳၤအဖူပူၤနှၱနီးနဳၤ.
တဲၤလှူၣ်ထာ်ယ့ၣ်ရှူးဒဳတဲၤလှူၣ်ၡံၣ်ပူၤ
22ကၱာ်ဒီဘ့တဲၤမဲၤစါအနံၤဘဲာ်တပျာ်နဳၤ, အစာ်ဘိစီၤမိၤၡ့အတဲၤမှဲးလၤအီၣ်အဓ့နဳၤ, စဲာ်တစီာ်ထာ်အံာ်ကဲၤယ့ၣ်ရှူးဒဳယရူၤၡလ့ၣ်အူး စာ်ဘိထဲၢ်စကလှူၣ်ထာ်အံာ်ပီၢ်လၢ်ဝၤဒဳဘၱာ်စဲာ်အီၣ်နဳၤ. 23အစာ်ဘိ အဝှ့းလၤဒဳဘၱာ်စဲာ်အတဲၤမှဲးလၤ အပူၤ, “အပံၤစဖဳးအမံၤခဳအဓဳၤပွ့ၤ ကိအပွဲၤကဘဲာ်ယဳၤ ကီအစါထံဒဳကဘၱစဲာ်အလှီမီၢ်နဳၤ.” 24ကၱာ်ကအံာ်လၤဘဲာ်တဲၤလှူၣ်အစာ်ဘိ ကဘၱာ်စဲာ်အတဲၤမှဲးလၤ အပူၤအဒီၣ်, “သကဳတြူၤအမံၤတသိးမၱတမၱာ်နီးအဒဳ ကၠံၢ်ဘဲာ်နဳၤ.”
25ကၱာ်စာ်ပီၢ်, ဘ့နဳၤဒဳယရူၤၡလ့ၣ်အူးပူၤ ပၠၤအမံးမၱာ်စီၤစူၤမ့း အိၣ်အီၣ် ကဲၤတပွဲၤ. စမၱာ်ပၠၤ အတၱၢ်အမှးကၱာ်အအီၣ်အံာ်တဲၤသဘူၣ် သဘဲတပွဲၤ, စဆီးမီတိၤအံာ်ကဲၤအံၣ်စရ့လးဖဳးအတဲၤ မဲၤမီၤထာ် က့ၤ ကၱာ်သးစါထံအီၣ်ကဲၤစခဳး. 26ဘ့နဳၤသးစါ ထံမဲၤလှၱထာ်နံၤကဲၤစဲာ် ထဲၢ်တချူးကၱာ်စစာ်ထၱးဝှါ ဘၱာ်စဲာ်အခရၱာ်တပွဲၤနှၱနီးနဳၤ, စတစာ်ထၱးဘဲာ် တဲၤသံ နီးနဳၤ. 27ဒဳသးစါထံအတဲၤသဓဳအပူၤ, စလ့ၤ နံၢ်ကဲၤဒဳ တဲၤလှူၣ်ၡံၣ်အပူၤနဳၤ. ဘ့မဳၤပာ်တစီာ်လ့ၤအံာ် အပံၤစဖဳးယ့ၣ်ရှူးစာ်ဘိ ထဲၢ်စကလိၤကိာ်မဲၤကိာ်ပီၢ်အနူၤ အဒီအတဲၤမှဲးလၤအကါနဳၤ. 28စဇၢ်ကျဳၤအံာ် ဝှါလၢ်ဝၤဒဳစစူးဒီပူၤကၱာ်ထါထာ် အံာ်ဝှါကဘၱာ်စဲာ်, စဒီၣ်,
29“အဳဘၱာ်စဲာ်, ခဳနူၤယဳၤ, နှးဟဲးထာ်ဒီဧဲၤနဇိၤဖဳးဒဳ လၢ်ခဳး ဒဳတဲၤမီၤတဲၤမၤအပူၤ အစာ်ဘိနတဲၤယၱၢ်ဘဲာ်အီၣ်ကဲၤ အဓ့နဳၤ.
30မၤနဲၢ်, ယစာ်ထၱးထဳ နတဲၤယဳၤက့ၤစာ်က့ၤထဳ,
31ထဲၢ်နပြးတီၤလီၤကဲၤဒဳ ပၠၤလၢ်ခဳးဖဳးလဳစါစဲးအမူၢ်ကါ အလှီမီၢ် တဓဲနဳၤ,
32ပွဲၤသူကူာ်ဖဳးတစီာ်အနံၤခံတဲၤဒဲလၱၢ် ထာ်အတဲၤလှၱ,
ကၱာ်နပၠၤအံၣ်စရ့လးဖဳးတစီာ်အတီၤအသ့းနဳၤ.”
33စမဳၤကၱာ်စပာ်ထဲးတမိၢ်တမှါကဲၤ ဒဳတဲၤ ဒီၣ်တီၤလီၤစဝၱၤစကဲတစီာ် နဳၤ. 34စီၤစူၤမ့းအိၣ် ဟိးဝၱၤဟိးမီၤကဲၤစဲာ်တစီာ်, ကၱာ် ဒီၣ်ကဲၤစမဳၤနီၢ်မၤရၱ ကယဳၤ, “စာ်ပီၢ်, အပံၤစဖဳးအယဳၤတပွဲၤမၱာ် ဒဳအံၣ် စရ့လးဖဳးတစီာ်အကျဲ ပၠၤအီၣ်အဲပွဲၤအနံၤခံ တဲၤလၤခူး ကၱာ်တဲၤဝဲၢ်ထဳး, တဲၤထာ်သကါအဟိအကလဲၤ, 35မၱာ်ဒဳနသးနဳၤကဘဲာ်ဖျဳဖျီအံာ်ကီ ဒာ်ဆ့, ကၱာ်ပၠၤ အီၣ်အဲဗွဲအတဲၤကမဳၤကလှၱထာ်ဖျီထာ်ကီ.”
36-37လှ့နဳၤ, ဝံမဳၤနီၢ်အၣ်နၤထဲၢ်အမၱာ် စီၤအၤရှူၢ်အခွံ, စီၤဖနူၤအ့လး အဖဳးမူၣ်အီၣ်ကဲၤ တပွဲၤ. စသဳးပွ့ၤသးပွ့ၤဆိးကဲၤ. စအီၣ်ကိာ်ဝှါ စဝၤ အကါသါသိးတဒ့ာ်, စဝၤသံကဲၤဒဳၣ်စအီၣ်ဓီတပွဲၤလီၤ အစာ်ဘိအမှူးကမဲၤနဳၤထိစဒ့ာ် ဘးကဲၤအဒ့ာ်အၡံလွံၢ် သိးကၱာ်လွံၢ်ဒ့ာ်နဳၤ. စတဟဲး ထာ်ကဲၤတဲၤလှူၣ်ၡံၣ်အချဳ တပျါနီး, မၱာ်ဒူၣ်တဲၤအၣ်တဲၤအီကၱာ်သဘူၣ် သဘဲသဲ မူၤဆဲမူၤနဲၤလီၤ. 38အနဳၤတနံၤ, ဘ့စဟဲးထာ် တဲၤလှူၣ် ၡံၣ်ပူၤ, စစာ်ထၱးဘဲာ်ကဲၤအပံၤစဖဳးယ့ၣ်ရှူး ဒဳၣ်, စထါထာ်အံာ်ကဲၤကဘၱာ် စဲာ်, စဒီဆးကဲၤ အပံၤစဖဳးအဝၱၤအကဲဒဳကယါပၠၤအဆီးမီတိၤအံာ် ယရူၤ ၡလ့ၣ်အူးအတဲၤလှိထာ်က့ၤတစီာ်နဳၤ.
တဲၤက့ၤဘးဒဳနစၤရ့းအူး
39ဘ့စီၤယိၤသးကၱာ်နီၢ်မၤရၱ မဲၤကိာ်ပ့ထာ်ဇီၤထာ်ကဘၱာ် စဲာ် အတဲၤထိးလၤ မှဲးလၤအကါ, စက့ၤလၤကဲၤဒဳကၤလံၤလဲက့ၤ, စအူးနစၤ ရ့းနဳၤ. 40အပံၤစဖဳးဓဳၤထာ်, ခဳးအါအီၣ်ထာ်. စအီၣ်ပ့ထာ်ကၱာ်တဲၤ သၱာ်ဟဲကၱာ် ကဘၱာ်စဲာ်အတဲၤဟိးဝၱၤဟိးမီၤလၤဘဲာ်စခဳး.
အပံၤစဖဳးယ့ၣ်ရှူးဒဳတဲၤလှူၣ်ၡံၣ်ပူၤ
41ယ့ၣ်ရှူးအမဳၤကၱာ်အပာ်တစီာ် ထာ်ဒဳယရူၤၡလ့ၣ်အူး ပွဲး လ့ၤတလိးအနံၤခံ ကိအဒ့ာ်လီၤ. 42ကၱာ်ဒီဘ့စဘးၡံးကၠံၢ်ဒ့ာ်နဳၤ, စဲာ်တစီာ်ထာ်ကဲၤယရူၤၡလ့ၣ်အူးအနူၤအဒီပွဲအနံၤခံ. 43စမဲၤပ့ ထာ်ဝှါတဲၤသဘူၣ်သဘဲဒဳၣ်စက့ၤကဲၤအခၠၱးနဳၤအပံၤ စဖဳးယ့ၣ်ရှူးအီၣ်တၤ ကဲၤဒဳ ယရူၤၡလ့ၣ်အူးပူၤနဳၤ. ကၱာ်စမဳၤစပာ်တစီာ်တသၱာ်ဟဲ တပွဲးနီး. 44စကမဳၤမၱာ်စက့ၤကိာ်တပွဲးပၠၤအပဳၤ အဟီးအကါ. ထိဓဳၤတနံၤ လူၤမူၤလၤခၣ်လဲး စဝၢ်လှဲး ကီလၢ်ဝၤဒဳအခွံအခီကၱာ်အခီအခဲးတစီာ်အကျဲ နဳၤ. 45စတပာ်ထၱးလၢ်ဝၤနီၤအခဳးအစဲ စက့ၤ ဘးဝၢ်လှဲးကီ လၢ်ဝၤဒဳယရူၤၡလ့ၣ်အူးပူၤနဳၤ. 46သဳနံၤဖျီးတလိးဝှါ စပာ်ထၱးကဲၤ လၢ်ဝၤဒဳ တဲၤလှူၣ်ၡံၣ် အပူၤနဳၤ, စဆးနါလါအီၣ်ဒဳဆရၣ်ဓဳၤတစီာ်အသကျါမဲ ပူၤ, စဆီးခ့န့းလၢ်ဝၤကၱာ်ထိးစာ်ဒဲစာ်လၢ်ဝၤတစီာ်. 47ကယါပၠၤအဆီးခ့န့း စတဲၤယၱၢ်ဘဲာ်တတီၤ တစီာ်ထဲးတမိၢ်တမှါအဇၱၢ် အဇိၢ်ဒဳ စတဲၤသၱာ်ဟဲ ကၱာ် စတဲၤဒီၣ်ၡံက့ၤတစီာ်အခဳးအစဲနဳၤ. 48ဘ့ စမဳၤ စပာ်စာ်ထၱးစဲာ်နဳၤစထဲးတမိၢ်တမှါဇၱၢ်ကဲၤ. စမဳၤဒီၣ် ကဲၤစဲာ်, “အဖဳး ခဳ, နမဲၤနံၤမၤဝၤကယဳၤနဲၢ်. စာ်ပီၢ်, ဒဳ တဲၤအဳးသဳးအဳးသးအပူၤနပာ်ကၱာ် ယဲၤဝၢ်လှဲးကဲၤနဲၤ.”
49ကၱာ်စဒီၣ်ကဲၤလၢ်ဝၤတစီာ်, “သံဝၢ်လှဲးယဲၤမၱာ်ဒီစာ်တဲၢ်. ယကမဲၤဘဲာ်ယပာ်အတဲၤမဲၤနဳၤ သံတသၱာ်ဟဲကဲၤနီးဧါ.” 50တဲၤ ယၱၢ် ဘဲာ်စဒီၣ်ၡံလၢ်ဝၤအယဳၤတစီာ်နဳၤ စဲာ်တစီာ်တသၱာ်ဟဲ တပွဲးနီး.
51စက့ၤလၤကိာ်ကဲၤလၢ်ဝၤတစီာ်အကါ ဒဳနစၤရ့းအူးနဳၤကၱာ် ဆီးခ့န့း လ့ၢ်သဲာ်ဟိတပွဲးလၢ်ဝၤ တစီာ် ကၱာ်စမဳၤနဳၤအီၣ်အံာ်ဟူၣ်ဇီၤကဲၤ အသး ပူၤတဲၤ အယဳၤတစီာ်နဳၤ. 52ယ့ၣ်ရှူးဓဳၤထာ်ကၱာ်ကဲၤ ဒဳတဲၤ ဇၤတဲၤပျၤ, အဒ့ာ်အလှဲ, ကၱာ်နံၤဘဲာ်ကဲၤအမူၢ်ကါ ဒဳကဘၱာ်စဲာ်ကၱာ်ပၠၤ အလှီမီၢ်နဳၤ.
ទើបបានជ្រើសរើសហើយ៖
လူၤကၣ် 2: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
