လူၤကၣ် 4
4
ယ့ၣ်ရှူးခးဘဲာ်တဲၤနှးကါ
(မး ၄:၁-၁၁, မၢ် ၁:၁၂-၁၃)
1ယ့ၣ်ရှူးအီၣ်ပ့ထာ်ကၱာ်သးစါထံ, စဟဲးထာ်ကဲၤယၢ်ဒ့ၣ်က့ၤ ကၱာ်သးစါထံလ့ၤအံာ်ဟူကဲၤ စဲာ် 2ဒဳလဳၤသံမံးဇ့ၤခဳးအနံၤလွံၢ်ၡံအသဲလွံၢ်ၡံ အဓၢ်ပူၤ, ခးဘဲာ်ကဲၤမဳၤဒဲးလၱးအတဲၤနှးကါ. ဘ့အနဳၤ အနံၤ အသဲတစီာ်အပူၤစတအၣ်တမံနီးဒဳၣ်အသးဝံာ် ဆိးကဲၤစဲာ်.
3မဲၤကနဳၤဒဳၣ်မဳၤဒဲးလၱးဒီၣ်စဲာ်, “နကမၱာ် ဘ့ာ်မ့ကဘၱာ်စဲာ်အဖဳးဒဳၣ်, ဒီၣ်ပီၢ်စာ်ဘိထဲၢ်လဳၤယဳၤ တဒဳကဖၱထာ်တကဳာ်တမဲနဳၤ.”
4မၱာ်ယ့ၣ်ရှူးဒီၣ်ၡံက့ၤစဲာ်, “တဲၤဝှ့းလၤအီၣ်ကယဳၤ, ပၠၤ တအီၣ်သမိအံာ်ထ့တကဳာ်လီၤနီး, မၱာ်စကအီၣ်သမိအံာ်ကိာ်ကီ ကဘၱာ်စဲာ် အလ့ၢ်အဝှဲးကိအမှိနဳၤတခီ.”
5မဳၤဒဲးလၱးထာ်အံာ်ကဲၤစဲာ် ဒဳအထာ် ယၱၤနဳၤကၱာ် ဒဲလၱၢ်ကဲၤ စဲာ် လၢ်ခဳးထံက့ၤလဳစါစဲး. 6ကၱာ်စဒီၣ်ကဲၤလၢ်ဝၤ, “ယကအံာ် လဳတပွဲးနဲၤ တဲၤဖျူတဲၤသရ့ာ်ကၱာ်တဲၤဓီၤတဲၤသ့း, မၤနဲၢ်တဲၤအယဳၤတစီာ်ဘဲာ်အံာ်လၤ လဳထဳ ယစူးခီးပူၤကၱာ်ယသးအံာ်လၤနံၤပၠၤ အရါနဳၤအဇၤတပွဲး. 7မဲၤကနဳၤဒဳၣ် နကကီၢ်လၤသဘဲထာ်မၤဒဳယလှီမီၢ်နဳၤဒဳၣ်, တဲၤအယဳၤတစီာ်ကမၱာ်လဳတပွဲးနအဲ.”
8ယ့ၣ်ရှူးဒီၣ်က့ၤစဲာ်, “တဲၤဝှ့းလၤအီၣ် ကဲၤကယဳၤ, နကသဘဲထာ်ဘဲာ်ဘၱာ်စဲာ်နဘၱာ်စဲာ်, ကၱာ်နကမဲၤဘဲာ်ထ့စတဲၤမဲၤလီၤ.”
9မဲၤဝှါစလ့ၤအံာ်လၢ်ဝၤဒဳ ယရူၤၡလ့ၣ်အူးကၱာ်ဒီလါကဲၤစဲာ်ဒဳ တဲၤလှူၣ်ၡံၣ်အခဳး တစီအခဳးနဳၤ ကၱာ်စဒီၣ်လၢ်ဝၤ, “နကမၱာ်ဘ့း မ့ကဘၱာ် စဲာ်အဖဳးဒဳၣ် စူလါတ့ၢ်ပီၢ်နန့ၤဘ့ယဳၤ. 10မၤနဲၢ်, တဲၤဝှ့းလၤအီၣ်အဒီၣ်, ‘စကနှးကီစမီၢ်ခဳးပွဲၤဇဳၤ တစီာ်ကအံာ်ကစာ်သအဳသအဲးနဲၤ.’ 11အဒီၣ်ဝ့ၤ, ‘စကဇၢ်ထာ်ကျဳၤအံာ်နဲၤစာ်ဘိထဲၢ် နခၣ်ခီးတတီးဘဲာ်ပီၢ် လဳၤနီးနဳၤ.’”
12ယ့ၣ်ရှူးဒီၣ်ၡံက့ၤစဲာ်ကၱာ်စဒီၣ်, “‘နတနှးကါဘဲာ်ဘၱာ်စဲာ် နဘၱာ်စဲာ်နီး,’ တဲၤ ဝှ့းလၤအီၣ်ဓဳၤ.”
13မဳၤဒဲးလၱးနှးကါဝှါယ့ၣ်ရှူးအမဳအမဳၤ ဒဳၣ်, စဟဲးတပီၤကဲၤ လၢ်ဝၤတဒဳးတဆး.
ယ့ၣ်ရှူးဒဳကၤလံၤလဲက့ၤ
(မး ၄:၁၂-၁၇, မၢ် ၁:၁၄-၁၅)
14ယ့ၣ်ရှူးအီၣ်ပ့ထာ်ကၱာ်သးစါထံဒဳၣ်, စက့ၤဘးကဲၤဒဳကၤ လံၤလဲက့ၤနဳၤ, ကၱာ်စမံၤဟဳ ထာ်သဲာ်လၤကဲၤသဒဲထံသဒဲက့ၤ. 15စသိၣ်အံာ်သီအံာ်တဲၤဒဳဘူၣ်ဘျီၣ်အပူၤကၱာ် ပၠၤ ကီၢ်အံာ်ထါအံာ်တပွဲးစဲာ် ကိၢ်ခၠံကိၢ်ပွဲၤ.
နစၤရ့ာ်ဖဳးတလဲၤခးယ့ၣ်ရှူးနီး
(မး ၁၃:၅၃-၅၈, မၢ် ၆:၁-၆)
16ယ့ၣ်ရှူးလ့ၤကဲၤဒဳနစၤရ့ာ်အူးထဲၢ် စဓဳၤထာ်ကဲၤအပူၤတအူးနဳၤ, အစာ်ဘိအနူၤ အဒီအီၣ်ကဲၤအဓ့နဳၤ, စလ့ၤနံၢ်ကဲၤဘူၣ်ဘျီၣ် အပူၤဘ့မူၤနံၤဆီးဒဲအနံၤနဳၤကၱာ်ဝဲၢ်ထဳးဖးကဲၤ စဲာ်စါထံ. 17ပၠၤအံာ် ကဲၤစဲာ်ဝံယၡါယၤအစဲာ်ထူတထူ. ဘ့စဝးလၤစဲာ်တထူနဳၤ စပးထၱးကဲၤ တဲၤဝှ့းလၤတကျၤထဲၢ်အဒီၣ်,
18“ကဘၱာ်စဲာ်အသးစါထံလ့ၤလၤ ယခဳး,
မၤနဲၢ်, စထရိးကဲၤယဲၤကၱာ်တဲၤသဳးစါထံ, စသဓဳလ့ၤကဲၤယဲၤဒဳ အဆဲးညဲဖဳးတစီာ်အီၣ်,
စာ်ဘိထဲၢ်ယကဒီဆးပီၢ်ပၠၤအဘဲာ်ဖီးဘဲာ်စဳ တစီာ်တဲၤဘါပျဲးကဲ,
အကမဲၤလှၱထာ်က့ၤအကၢ်ဓူခံးတစီာ်,
ကၱာ်အကမဲၤလှိမဲၤလၤပီၢ်အဘဲာ် တဲၤတီၤပယံၢ်လၤတစီာ်
19ကၱာ်ဒီဆးပၠၤအခၠၱးဘဲာ်ထဳ
ထဲၢ်ကဘၱာ်စဲာ်ကယဳၤက့ၤစာ်က့ၤအပၠၤခွံဖဳး တစီာ်နဳၤ.”
20စထူတကျူထာ်က့ၤဝှါစဲာ်ထူ, စအံာ် ကဲၤအစာ်အံာ်ဘူၣ် ဘျီၣ်ကၱာ်ဆးနါလါအီၣ်ကဲၤ. ပၠၤအအီၣ်ဘူၣ်ဘျီၣ်ပူၤတစီာ် စာ်တကြၱၢ် နၱၢ်စဲာ်လီၤ. 21စဒီၣ်ကဲၤလၢ်ဝၤတစီာ်, “ခဳတနံၤ စဲာ်စါထံဘဲာ်ပ့ ထာ်ဇီၤထာ်ထဳ ဘ့သံဆီးခ့န့း တဲၤဖးလှၱထာ်အပူၤယဳၤ.”
22ပၠၤလဳစါစဲး ဘဲာ်သဳးဘဲာ်သးကၱာ် ထဲးတမိၢ်တမှါအံာ်တပွဲး တဲၤယၱၢ်ဘဲာ်အဟဲး ထာ်ဒဳစလီၤမီၤပူၤတစီာ်အလ့ၤ. စဲာ်တစီာ်ဒီၣ်ကဲၤ, “အယဳၤမၱာ်စီၤယိၤသးအဖဳးတဘဲာ်နီးဧါ.”
23ကၱာ်စဒီၣ်ကဲၤလၢ်ဝၤတစီာ်, “သံကဒီၣ်အံာ်လၤဓူဧဲၤတဲၤ ဒီၣ်, တဝှံးဆရၣ်, ပြးပီၢ် နန့ၤတခီ. ကယါဝၤသၱာ်ဟဲဘဲာ်တဲၤမဲၤအန့ၤဒဳ ကပ့းရနီၣ်အူးနဳၤ, မဲၤပီၢ်စဲာ်ဒဳနဒဳနဖါနဳၤ.” 24ယ့ၣ်ရှူးဒီၣ်ဝ့ၤ, “ယဒီဆးသံအတၱၢ်အမှး, ဝံတနံၤဘဲာ်အမူၢ်ကါဒဳအဒဳအဖါပူၤတဗွဲနီး. 25ယဒီဆးသံအတၱၢ်အမှး, လှ့ဝံအ့ၤလံယၤအလဲၤသၱာ်ခဲ နဳၤ, ဒဳအံၣ်စရ့လးက့ၤနဳၤအမှူးကမဲၤအီၣ်တကၤဒဳး, ဘ့မီၢ်ခဳးလဲၢ်အီၣ်ဘီ ဘံာ်သဳ ဒ့ာ် ကၱာ်အလှဲသါသိးဒဳၣ်, တဲၤဝံၢ်သိလၤဘဲာ်ကဲၤပၠၤ. 26နီၣ်သီနှီနူၤ ဝံ အ့ၤလံယၤတဘဲာ်သဓဳလ့ၤဒဳစအီၣ်တဗွဲနီး, မၱာ်စဘဲာ် သဓဳလ့ၤကဲၤဒဳစံဒိၣ် က့ၤ, အူးစၤရဖၤသးအမှူးကမဲၤ တပွဲၤအီၣ်လီၤ. 27ကၱာ်လှ့ဝံအလံၤၡါအလဲၤ သၱာ်ခဲနဳၤ, ဒဳအံၣ်စရ့လးက့ၤနဳၤ ပွဲၤကလးကၠံး အီၣ် တကၤဒဳး. ပရၤဆါတဘဲာ်မဲၤပျၱမဲၤစါထာ်က့ၤတဗွဲနီး, မၱာ်စီၤနဧၤမၣ်, စူၤရံဖဳး တပွဲၤလီၤ.”
28ဘ့ပၠၤသၱာ်ဟဲဘဲာ်တဲၤအယဳၤတစီာ်ဒဳၣ်, အအီၣ်ဘူၣ်ဘျီၣ် ပူၤလဳစါစဲးတစီာ်သဲးထဲးဆိးကဲၤ. 29စဲာ်တစီာ်ဝဲၢ်ထဳးကၱာ်စွံး ထာ် ဖျီးကဲၤယ့ၣ်ရှူး ဒဳအူးအချဳ နဳၤကၱာ်လ့ၤအံာ်ကဲၤလၢ်ဝၤဒဳပျၤ အခဲးတၱၢ် ခဳး နဳၤထဲၢ်ပၠၤဘီာ်ထာ်အူးအသရးအလ့ၤ, စာ်ဘိထဲၢ် စကဝှ့လါ တ့ၢ်ပီၢ်လၢ် ဝၤဒဳပျၤပူၤနဳၤ. 30ပရၤဆါယ့ၣ်ရှူးဟဲး သၱပၱၢ်သိပိၢ်ဝှါစဲာ်တစီာ်ဒဳၣ် စလ့ၤကဲၤစကျဲး.
ပၠၤအနှဲးအီၣ်တပွဲၤ
(မၢ် ၁:၂၁-၂၈)
31မဲၤဝှါစလ့ၤကဲၤဒဳ ကပ့းရနီၣ်အူးထဲၢ် အမၱာ်ကၤလံၤလဲက့ၤ အူးတအူးနဳၤ. ဘ့နဳၤစသိၣ် အံာ်သီအံာ်ပၠၤဘ့မူၤနံၤဆီးဒဲအနံၤနဳၤ. 32ကၱာ်ပၠၤ တစီာ်ထဲးတမိၢ်တမှါတပွဲး, စသိၣ်အံာ်သီအံာ်ပၠၤ ဒဳတဲၤဖျူတဲၤ သရ့ာ်အပူၤအခဳးအစဲနဳၤ. 33ဒဳဘူၣ်ဘျီၣ်အပူၤနဳၤပၠၤထဲၢ်တဲၤနှဲးအကၱ ကဲာ်အီၣ်ဝဲၢ်အလီၤတပွဲၤကဲာ်ဧဳၤထာ်ဆိးတကျဲး, 34စဒီၣ်, “ဝၤအီၣ်ဒီဧဲၤဝၤ, ဝၤဘဲာ်ကၠးကၱာ်နဲၤတၤနဲၢ်, အဳ ယ့ၣ်ရှူးနစၤရ့းဖဳး. နလ့ၤမဲၤ ကဲမဲၤလှဲမဲၢ်ကဲၤဝၤဧါ. ယသၱာ်ဟဲတပွဲးနဲၤ. နမၱာ်ကဘၱာ်စဲာ်အပၠၤစါထံတပွဲၤနဳၤ.”
35ယ့ၣ်ရှူးဟီစဲာ်ကၱာ်စဒီၣ်, “အီၣ် ဇီၤလီၤ, ဟဲထာ်ကဲဒဳစအီၣ် နဳၤ.” တဲၤၡံးတဲၤနှဲးထၱးလၤ တ့ၢ်ဝှါ စဲာ်ဒဳပၠၤအပဳၤကျဲ, အဟဲးထာ်ကဲတပွဲး, မၱာ်အတမဲၤတပွဲးစဲာ်တၤတမံနီး.
36ပၠၤလဳစါစဲးထဲးတမိၢ်တမှါ, တီၤတီၢ် တသီကၱာ်ဒီၣ်, “တဲၤ ယၱၢ်ဘဲာ်အယဳၤမၱာ်ကဲၤတၤနဲၢ်. ပၠၤအယဳၤတပွဲၤယဳၤဒဳတဲၤဖျူတဲၤသရ့ာ်ကၱာ်တဲၤစိ တဲၤသလဲအပူၤ စအံာ် လၤစလ့ၢ်, ဒဳၣ်တဲၤနှဲးအကၱကဲာ် ဟဲးထာ်ကဲတပွဲး.” 37တဲၤဝၱၤတဲၤ ကဲအဘဲာ်ကၠးယ့ၣ်ရှူးနဳၤဒဲးလီၢ်ဒဲးခီတပွဲးဒဳ ဒဳဝ့ၢ်ဒဳဝါ အဘိး ထၱးဘိးဇီၤ တစီာ်နဳၤ.
ယ့ၣ်ရှူးမဲၤမှးက့ၤပၠၤ
(မး ၈:၁၄-၁၇, မၢ် ၁:၂၉-၃၄)
38ယ့ၣ်ရှူးဟဲးထာ်ဝှါဘူၣ်ဘျီၣ်ပူၤ စလ့ၤကဲၤဒဳ စီၤၡှံမိၣ်အရှံၣ်နဳၤ. ဘ့နဳၤစီၤၡံမိၣ် အမူၤပွ့ၢ်ရွှံး ထာ်ဆိးကဲၤကၱာ်ပၠၤတစီာ်ဒီၣ်နံၤခံ ဆးနံၤခံကဲၤစဲာ်. 39ယ့ၣ်ရှူးဆီထဳးအီၣ် ဝှါဒဳစလှီမီၢ်စဟီကဲၤတဲၤ ဆဲဒဳၣ်အပၢ်လၤတ့ၢ်တနၢ် တပွဲးစဲာ်, ကၱာ်စဝဲၢ်ထဳးမဲၤအၣ်မဲၤအီနံၤတပွဲး ပၠၤတစီာ် နဳၤ.
40ဘ့လူၤမူၤလၤတ့ၢ်နံၢ်နဳၤ, ပၠၤလ့ၤအံာ် ကယါအရွှံးအဆဲတစီာ် ဒဳယ့ၣ်ရှူးအီၣ်နဳၤ. စထဲးလၤ စစူးခီးလၢ်ဝၤတစီာ်အခဳး ကၱာ်မဲၤမှးက့ၤ တပွဲးစဲာ် တစီာ်နဳၤ. 41တဲၤၡံးတဲၤနှးဟဲးထာ်ကဲဒဳ ပၠၤအလီၤအီၣ် အဲပွဲၤ ကၱာ်ကဲာ်ဧဳၤထာ်, “နမၱာ်ခရၱာ်, ကဘၱာ်စဲာ်အဖဳး.”
မၱာ်ယ့ၣ်ရှူးဟီစဲာ်တစီာ် ကၱာ်စတအံာ်တပွဲး လၢ်ဝၤတစီာ် အခွဲးအကယၱၢ်ဘဲာ်ထာ်နီး. မၤနဲၢ်, စဲာ်တစီာ်သၱာ်ဟဲထဲၢ်စဲာ်မၱာ်ခရၱာ်အခဳးအစဲနဳၤ.
ယ့ၣ်ရှူးဒီထိးလၤဒဳဘူၣ်ဘျီၣ်တစီာ်အပူၤ
(မၢ် ၁:၃၅-၃၉)
42ဘ့တဲၤလှၱထာ်နဳၤ ယ့ၣ်ရှူးလ့ၤကဲၤ ဒဳပၠၤတအီၣ်နီးအလ့ၤ နဳၤ. မၱာ်ပၠၤအပဳၤအဟီး တစီာ်ဝၢ်လှဲးစဲာ်, လ့ၤထၱးစဲာ်ကၱာ်ယဳၤလၤကျဳၤ တပွဲးစဲာ် စာ်ဘိထဲၢ်စကတဟဲးပၢ်ပီၢ်လၢ်ဝၤတစီာ်နီးနဳၤ. 43ပရၤ ဆါစဒီၣ်လၢ်ဝၤတစီာ်, “ယကပီၢ်အံာ် ဘဲာ် ကဘၱာ်စဲာ်အထံအက့ၤအတဲၤသးလဳၢ်သလၤအံာ်အဝၱၤ အကဲဒဳအူးကၱာ်ဒဳအလဝ့ၤတစီာ်နဳၤနဳၤ. မၤ နဲၢ်, ယဘဲာ် သဓဳလ့ၤကဲၤတဲၤအယဳၤတစီာ်အနံၤခံအစဲနဳၤ.”
44ကၱာ်စဒီၣ်အူဒီဆးတပွဲးတဲၤဒဳ ထံက့ၤတစီာ်အဘူၣ်ဘျီၣ်အပူၤနဳၤ.
ទើបបានជ្រើសរើសហើយ៖
လူၤကၣ် 4: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
