ယိၤဟၣ် 16
16
1“ယဒီဆးသံတဲၤအယဳၤစာ်ဘိထဲၢ်သံကတပၢ်ဖျီးမံပီၢ်သံ တဲၤဘူၣ်တဲၤနဲၢ်နီးနဳၤ. 2စဲာ်တစီာ်ကနှးဟဲးထာ်ကဲသံဒဳဘူၣ်ဘျီၣ် အချဳ. အခၠၱးကဘဲာ်ဒဳပၠၤအမၤသံ သံတပွဲၤကကမဳၤအဲမၱာ် စမဲၤကဘၱာ် စဲာ်အတဲၤသးအဲးနံၤနဳၤ. 3စကမဲၤ ကီတဲၤအယဳၤဒဳ စတသၱာ်ဟဲအပာ်ကၱာ်ယဲၤနီးအခဳးအစဲနဳၤ. 4ပရၤဆါယဒီဆးထဳသံတဲၤအယဳၤ တစီာ်နဳၤ, စာ်ဘိထဲၢ်ဘ့တဲၤအယဳၤတစီာ် ကဖၱထာ် တပျာ်နဳၤ, သံကကမဳၤထာ်နံၤကီထဲၢ်ယဒီဆးဝှါထဳသံ တစီာ်နဳၤ.
သးစါထံအတဲၤမဲၤ
“လှ့မဳၤစဲခဳးနဳၤ, ယတဒီဆးနံၤသံနှၱနီး, မၤနဲၢ်, ယအီၣ်ကိာ်ဝ့ၤသံကါ အခဳးအစဲနဳၤ. 5ခဳနူၤယဳၤ, ယကလ့ၤကဲၤဒဳ အသဓဳလ့ၤ ယဲၤတပွဲၤအီၣ်နဳၤ, ကၱာ် သံတဒဲကဲၤယဲၤ, နလ့ၤဒီၣ်လဲၢ်, နဳၤတဗွဲနီး. 6ယဒီဆးဝှါထဳတဲၤအယဳၤတစီာ်အခဳးအစဲ, တဲၤအဳး သဳးအဳးသးအီၣ်ပ့ထာ်ထဳ သံပူၤ. 7ပရၤဆါ, ယဒီဆးသံတဲၤတၱၢ်တဲၤမှး, သံနံၤခံ အကအဲး ဒဳၣ်ချဳမၱာ်ယကဟဲး ပၢ်သံ. ယကတလ့ၤမၤနီးဒဳၣ်, အမဲၤဇဳၤတဲၤတပွဲၤ ကတလ့ၤထၱးတပွဲးသံနီး. မၱာ်ယကလ့ၤမၤဒဳၣ်, ယကသဓဳလ့ၤတပွဲးစဲာ်ဒဳသံ အီၣ်နဳၤ. 8စကလ့ၤ ဝှါတပျာ်နဳၤ, စကမဲၤလှၱထာ်ကီလၢ်ခဳးဖဳးတစီာ်အတဲၤ စာ်ထၱးအဘဲာ်ကၠးတဲၤခီၣ်ဝဲၤအဝၱၤအကဲ, တဲၤတၱၢ်တဲၤ မှးအဝၱၤအကဲ ကၱာ်ကဘၱာ်စဲာ်အတဲၤစံးရးအဝၱၤအကဲ. 9စဲာ်တစီာ်မဲၤ တဲၤခီၣ်ဝဲၤကၱာ်ကမဲးကဲၤဒဳစတဘူၣ်ယဲၤနီးအစဲနဳၤ, 10စဲာ်တစီာ်ကမဲာ်ကဲၤအဘဲာ်ကၠး တဲၤတၱၢ်တဲၤမှး, မၤနဲၢ်, ယကလ့ၤကဲၤဒဳ ယပာ်အီၣ်ကၱာ်သံကတစာ် ထၱးပ့ၤ ယဲၤနီး, 11စဲာ်တစီာ်ကမဲာ်ကဲၤအဘဲာ် ကၠး တဲၤစံးရး, မၤနဲၢ်ဒဳၣ်, လၢ်ခဳးအယဳၤတဘဲာ် အဆးဖြး ဘဲာ်စံးရးထဳနဳၤ.
12“ယမီၤဒီဆးသံတဲၤအီၣ်ဝ့ၤပွ့တမံၤပ့ၤ, ပရၤဆါ ခဳနူၤယဳၤ သံတဆီးခ့န့းကၱာ်ထာ်နှၱနီး. 13ပရၤဆါ စဲာ်ထဲၢ်တဲၤတၱၢ်တၤမှးအသးစါထံကလ့ၤကဲၤ တပျာ်နဳၤ, စကဒီဆးလဳကီသံကဘၱာ်စဲာ်အတဲၤတၱၢ် တၤမှး. မၤနဲၢ်ဒဳၣ်, တဘဲာ်စကယၱၢ်ဘဲာ်ဒဳစဖျူစသရ့ာ် အပူၤနီး, မၱာ်ဒဳ တဲၤထဲၢ်စသၱာ်ဟဲဘဲာ်ကၱာ်ထဲၢ်အကဖၱ ထာ်ဘဲာ်တစီာ်နဳၤ. 14စကပဲၢ်တီၤပဲၢ်သ့းကီ ယဲၤ, မၤနဲၢ်ဒဳၣ်, တဲၤယၱၢ်ဘဲာ်ဒဳစဖၱးနံၤယအီၣ်တစီာ် နဳၤ စကဒီဆးကီသံ. 15တဲၤအအီၣ်ဒဳယပာ် အအီၣ်တစီာ်နဳၤ, မၱာ်လဳ ယအဲလီၤ. မဲၤကနဳၤအခဳးအစဲ, ယဒီၣ်ကီကယါစနံၤဘဲာ်တစီာ်မၱာ်ယအဲ, ကၱာ်စကဒဲ လၱၢ်ထာ်ကီနဳၤ.
တဲၤသးကနၢ်အံာ်ကၱာ်တဲၤအဳးသဳးအဳးသး
16“အကအီၣ်တဒဳးဖဳးပ့ၤသံကတစာ်ထၱး ပ့ၤယဲၤနီး, ကၱာ်တဒဳးဖဳးပ့ၤသံကစာ်ထၱးကီယဲၤ,” စဒီၣ် လၢ်ဝၤတစီာ်ဓဳၤ.
17မဲၤကနဳၤဒဳၣ်, အပျဲၢ်အဘီၣ်တစီာ်ဒီၣ် လှဲးလၢ်ဝၤ, “စဒီဆး ဝၤတဲၤအယဳၤတဓဲ မၱာ်ကဲၤ တၤနဲၢ်. တဒဳးဖဳးပ့ၤသံကတစာ်ထၱးပ့ၤယဲၤနီး, ကၱာ်တဒဳးဖဳးပ့ၤ သံကစာ်ထၱးကီယဲၤ, ကၱာ်ယကလ့ၤဒဳယပာ် အအီၣ်တဓဲ နဳၤ.” 18ကၱာ် စဲာ်တစီာ် ဒီၣ်ဝ့ၤ, “အကအီၣ်တဒဳးဖဳး, မၱာ်ကဲၤတၤ နဲၢ်. စဒီၣ်တၤနဲၢ်နဳၤ ဝၤတသၱာ်ဟဲမဲၤနီး,” စဒီၣ်လှဲးလၢ်ဝၤဓဳၤ.
19ယ့ၣ်ရှူးသၱာ်ဟဲထဲၢ်စဲာ်တစီာ်သးအဲး ဒဲစဲာ်ဒဳၣ်, စဒီၣ်လၢ်ဝၤ တစီာ်, “ဒဳယဒီၣ်, အကအီၣ် တဒဳးဖဳးပ့ၤသံကတစာ်ထၱးပ့ၤယဲၤနီး, ကၱာ် တဒဳးဖဳးပ့ၤ သံကစာ်ထၱးကီယဲၤ, ဒဳၣ်သံထိးသံဒဲစာ်လှဲးလၢ်ဝၤဧါ. 20ယဒီဆးသံအတၱၢ်အမှး, သံကယဳၤကဟး ဘဲာ်ကီ, မၱာ်လၢ်ခဳးဖဳးကသး လဳၢ်သးလၤအံာ်ကီ, ကၱာ် သံကအဳးသဳးအဳးသးဘဲာ်, မၱာ်သံတဲၤအဳးသဳးအဳး သးနဳၤ ကဘါချဲးထာ်ကီတဲၤသးလဳၢ်သးလၤအံာ်. 21အမံၤမှူးအဖဳး ကအီၣ်ဘိးထၱးတပွဲၤနဳၤ အဳးသဳးအဳးသး ဘဲာ်, မၤနဲၢ်, စအဲအခၠၱးဘဲာ်ကဲၤစကခးဘဲာ်တဲၤဆဲးညဲ ပီၤတီၤအစဲနဳၤ. ပရၤဆါစဖဳးအီၣ်လၤဝှါတပျာ်ဒဳၣ်, စတကမဳၤထာ်နံၤပ့ၤတဲၤဆဲးညဲနီး. မၤနဲၢ်, စသးကနၢ်အံာ်ဒဳပၠၤအီၣ်လၤ ကဲၤလၢ်ခဳးအသဲ တပွဲၤအခဳး အစဲနဳၤ. 22သံနဳၤ, သံအဳးသဳးအဳး သးဘဲာ် ခဳနူၤယဳၤ, ပရၤဆါယကစာ်ထၱးသံတပျာ်ပ့ၤ, ကၱာ် သံသးတမဲ ကသးလဳၢ်သးလၤအံာ်ကီကၱာ် ပၠၤကတဖၱးကဲသံဝံၢ်ကီသံတဗွဲနီး.
23“ဒဳမူၤနံၤတနံၤနဳၤ, သံကတဒဲကီယဲၤ တဲၤတမံနီး. ယဒီဆး သံအတၱၢ်အမှး, သံကတၤ မၤ အပာ်တဲၤတမံၤမံၤ ဒဳယမံၤအပူၤနဳၤဒဳၣ်, စကအံာ်တပွဲး သံ. 24ထိခဳနူၤယဳၤ, သံတတၤ ကဲၤတဲၤဒဳယမံၤ အပူၤတမံနှၱနီး. တၤပီၢ်, သံကနံၤဘဲာ်ကီ ကၱာ် သံ တဲၤသးကနၢ်အံာ်ကပ့ထာ်ကီ.
တဲၤနဳၤတဲၤပဲၤလၢ်ခဳး
25“ယဒီဆးထဳသံတဲၤအယဳၤဒဳတဲၤကလဲၤ အပူၤနဳၤ. အခၠၱး ဘိးထၱးထဳထဲၢ်ယကတယၱၢ်ဘဲာ် ထၱးသံတဲၤကလဲၤအပူၤနီး, ယကဒီဆး သံယပာ် အဝၱၤအကဲဒဳတဲၤလှၱတဲၤပျးအကျဲနဳၤ. 26ဘ့နဳၤ တနံၤ, သံကတၤကီတဲၤဒဳယမံၤအပူၤ, ကၱာ်ယတဒီၣ် အကတၤနံၤခံသံဒဳအပာ် အီၣ်နဳၤနီး. 27မၤနဲၢ်, အပာ်ဘဲာ်လီၢ်သံအခဳးအစဲနဳၤ. အပာ်ဘဲာ် လီၢ်သံ မၱာ်သံဘဲာ်လီၢ်ကဲၤယဲၤကၱာ်သံဘူၣ်ထဲၢ် ယအီၣ်ဒဳ အပာ်အအီၣ်, ကၱာ်လၤကဲၤဒဳလၢ်ခဳးအခဳးအစဲနဳၤ. 28ယအီၣ်ဒဳအပာ်အအီၣ်, ကၱာ် လၤကဲၤဒဳလၢ်ခဳး အယဳၤတဘဲာ်အပူၤ, ကၱာ်တပျာ်ပ့ၤ ယကဟဲးထာ်ဝှါ လၢ်ခဳးကၱာ်လ့ၤကဲၤဒဳအပာ်အအီၣ်နဳၤ.”
29စပျဲၢ်စဘီၣ်တစီာ်ဒီၣ်စဲာ်, “စာ်ပီၢ်, နယၱၢ်ဘဲာ်လှၱထာ်ဖျီ ထာ်ထဳ. မၱာ်နတဒီၣ်အံာ်တဲၤကလဲၤ နီး. 30ဝၤသၱာ်ဟဲထဳတပွဲးထဲၢ် နသၱာ်ဟဲ တဲၤ ကိမံၤထံတၤ, ကၱာ် အတလဳၤပၤမဲၤပၠၤကထိးကဒဲ နဲၤနီး. တဲၤအယဳၤအခဳးအစဲ, ဝၤသၱာ်ဟဲထဲၢ်နဟဲးထာ် ဒဳကဘၱာ်စဲာ်အီၣ်နဳၤ,” စဲာ် တစီာ်ဒီၣ်လၢ်ဝၤဓဳၤ.
31ယ့ၣ်ရှူးဒီၣ်က့ၤစဲာ်တစီာ်, “သံဘူၣ်ထဳ ဧါ. 32စာ် ပီၢ်, အခၠၱးကဘဲာ်ကီကၱာ်အဘဲာ်ထဳ တခီ, ထဲၢ်သံကဆဲးဖြူးလၤဖြၱထာ်, တပွဲၤတပွဲၤ က့ၤအရှံၣ်အဖါ ကၱာ်လဲၢ်လၤဓ့ၢ်တၤကီယဲၤ. ပရၤ ဆါ ယတအီၣ်လၤဓ့ၢ်တၤတပွဲးနီး. မၤနဲၢ်, အပာ် အီၣ်ကိာ်ယကါအခဳးအစဲနဳၤ. 33ယဒီဆးသံ တဲၤအယဳၤတစီာ်စာ်ဘိထဲၢ်သံကနံၤဘဲာ်ပီၢ် တဲၤ စဳးတဲၤချံး ဒဳသံအီၣ်ယပူၤအစဲနဳၤ. သံ ကခးဘဲာ်ကီတဲၤပၤတဲၤဆဲ ဒဳ လၢ် ခဳးအခဳးယဳၤ. ပရၤဆါ, ခူဟဲပီၢ်. ယနဳၤယပဲၤ ထဳလၢ်ခဳး,” စဒီၣ်လၢ်ဝၤတစီာ်ဓဳၤ.
ទើបបានជ្រើសរើសហើយ៖
ယိၤဟၣ် 16: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
