ယိၤဟၣ် 17
17
ယ့ၣ်ရှူးအတဲၤတၤသဘဲ
1ယ့ၣ်ရှူးဒီၣ်တဲၤအယဳၤတစီာ်ဝှါဒဳၣ်, စစာ်ထာ်ဒဳမီၢ်ခဳး ကၱာ်စဒီၣ်, “အဳအပာ်, အခၠၱးဘဲာ်ထဳ. ပဲၢ်တီၤပဲၢ်သ့းပီၢ်နဖဳး, စာ်ဘိထဲၢ်နဖဳးပဲၢ် တီၤပဲၢ်သ့းနဲၤနဳၤ. 2ဒဳနအံာ်လၤနံၤကဲၤစဲာ်အဖျူအသရ့ာ် ဒဳတဲၤ ဖ့းတဲၤဟၱး လဳစါစဲးအခဳး, စာ်ဘိထဲၢ်ပၠၤလဳစါစဲးနအံာ် လၤကဲၤစစူးခီးပူၤ တစီာ် ကနံၤ ဘဲာ်ပီၢ်တဲၤအီၣ် အလၤထူလၤပျဳၤနဳၤ. 3အယဳၤမၱာ် တဲၤအီၣ်အလၤထူလၤပျဳၤစာ်ဘိထဲၢ်ပၠၤတစီာ်ကသၱာ်ဟဲနဲၤ, ကဘၱာ်စဲာ်အတၱၢ်အမှးတပွဲၤနဳၤ, ကၱာ်ယ့ၣ်ရှူးခရၱာ်, နသဓဳလ့ၤကဲၤတပွဲၤနဳၤ. 4ယပဲၢ်တီၤပဲၢ်သ့း ထဲထဳနဲၤဒဳလၢ်ခဳးအခဳးယဳၤ. ယမဲၤပ့ထာ်ထဳ တဲၤမဲၤ နအံာ်လၤနံၤယဲၤနဳၤ. 5မၱာ်ခဳနူၤယဳၤနဳၤ, အပာ်. ပဲၢ်တီၤပဲၢ်သ့းပီၢ်ယဲၤ ပျဳာ်ပျဳာ်ကၱာ်နဲၤ, တဲၤဓီၤတဲၤသ့း ထဲၢ်ယနံၤဘဲာ်ကိာ်နကါ လှ့လၢ်ခဳးတအီၣ်ထာ်နှၱနီးနဳၤ.
6“ယဒီၣ်လှၱထာ်ထဳနမံၤ ဒဳပၠၤထဲၢ်နယဳၤ ထာ်ကဲဝှါဒဳလၢ်ခဳး ယဳၤကၱာ်အံာ်လၤကဲၤ ယဲၤတစီာ်အလှီမီၢ်နဳၤ, ကၱာ်စဲာ်တစီာ်အီၣ်အံာ်ထဳနလ့ၢ်နဝှဲး. 7ခဳနူၤယဳၤစဲာ်တစီာ်သၱာ်ဟဲထဳကယါ နအံာ်လၤယဲၤ တစီာ်မၱာ်လဳနအဲနဳၤလီၤ. 8မၤနဲၢ်ဒဳၣ်, တဲၤယၱၢ်ဘဲာ်နအံာ်လၤယဲၤတစီာ်နဳၤ, ယအံာ် လၤနံၤထဳစဲာ်တစီာ်. စဲာ်တစီာ်ဖၱးနံၤထဳ ကၱာ်သၱာ် ဟဲထဳ တဲၤတၱၢ်တဲၤမှးထဲၢ်ယဟဲးထာ်ဒဳနအီၣ်နဳၤ, ကၱာ်စဘူၣ်ထဳ ထဲၢ်နသဓဳလ့ၤ ယဲၤနဳၤ.
9“ယသဘဲထာ်စဲာ်တစီာ်အနံၤခံ, တဘဲာ် လၢ်ခဳးဖဳးအနံၤ ခံ နီး, မၱာ်ပၠၤထဲၢ်နအံာ်လၤကဲၤယဲၤ တစီာ်နဳၤ, မၤနဲၢ်, စမၱာ်ကဲၤနပၠၤတစီာ်အခဳးအစဲနဳၤ. 10ယအဲမၱာ်လဳနအဲလီၤ, ကၱာ်နအဲမၱာ်လဳယအဲလီၤ. ကၱာ်ယဘဲာ်ပဲၢ်တီၤပဲၢ်သ့းကိာ်ဒဳစပူၤနဳၤ. 11ယတအီၣ်ပ့ၤလၢ်ခဳးအခဳးနီး, ပရၤဆါအယဳၤတစီာ်အီၣ်ဝ့ၤဒဳလၢ်ခဳးအခဳးယဳၤ, ကၱာ်ယလ့ၤထၱး ကဲၤနဲၤ. တဲၤစါတဲၤထံအပာ်, အံာ်က့ၤစာ်က့ၤပီၢ်စဲာ်တစီာ်ဒဳနမံၤအပူၤနဳၤ, စဲာ်ထဲၢ်နအံာ်လၤကဲၤယဲၤတစီာ်နဳၤ, စာ်ဘိထဲၢ် စကမၱာ်ပီၢ်တပွဲၤလီၤ အစာ်ဘိ နဲၤကၱာ်ယဲၤ ကအီၣ်တပွဲၤလီၤအခီနဳၤ. 12ယဝဳၤ အံာ်ကဲာ် အံာ်အဲးဇဲၤနဲၤထဳပၠၤထဲၢ်နအံာ်လၤယဲၤတစီာ်နဳၤ. ကၱာ် တၤဆူးတဲၤပး တပွဲၤအချဳ, အတကဲတအိးကဲၤတဗွဲ နီး, အနဳၤတပွဲၤနဳၤမၱာ်စာ်ဘိထဲၢ်စဲာ်စါ ထံ အတဲၤဒီၣ် တီၤလီၤကပ့ထာ်ဇီၤထာ်ပီၢ်နဳၤလီၤ. 13“ပရၤဆါ ခဳနူၤယဳၤယလ့ၤထၱးနဲၤ ကၱာ် ယဒီၣ်ကဲၤ တဲၤတစီာ်ယဳၤဒဳလၢ်ခဳးအခဳးယဳၤနဳၤစာ်ဘိထဲၢ် တဲၤသးကနၢ်အံာ် ကပ့ ထာ်ပီၢ်ဒဳစဲာ်တစီာ်အပူၤနဳၤ. 14ယအံာ် လၤထဳစဲာ်တစီာ်နတဲၤယၱၢ်ဘဲာ်ကၱာ်လၢ်ခဳးတဝဲၢ်တဆဲကဲၤစဲာ်တစီာ်နီး, ဒဳစတဘဲာ်ကၠး လၢ်ခဳးနီး အစာ်ဘိယဲၤမၱာ်မၱာ်ယတဘဲာ် ကၠးလၢ်ခဳးနီး အခီလီၤ. 15ယတသဘဲ ထာ်တပွဲးအစာ်ဘိနကဖၱးထာ်ကဲစဲာ် တစီာ် ဒဳလၢ်ခဳးအခဳးနီး, မၱာ်နမဲၤအီၣ်လှိအီၣ်လၤ စဲာ်တစီာ်ကၱာ် တဲၤကၱကဲာ်မဲၤလှီနဳၤ. 16စတမၱာ်လၢ်ခဳးအဲနီး, အစာ်ဘိယတမၱာ်နီးအခီ နဳၤ. 17မဲၤဝၱၤမဲၤစါပီၢ်စဲာ်တစီာ်နနံၤခံ ဒဳနတဲၤ တၱၢ်တဲၤမှးအပူၤနဳၤ, နလ့ၢ်နဝှဲးမၱာ် တဲၤတၱၢ်တဲၤမှးလီၤ. 18အစာ် ဘိနသဓဳလ့ၤကဲၤယဲၤဒဳလၢ်ခဳးအခဳးယဳၤနဳၤ, ယသဓဳ လ့ၤစဲာ် တစီာ်ဒဳလၢ်ခဳးအခဳးနဳၤနဳၤ. 19ယမဲၤဝၱၤမဲၤစါယန့ၤ စဲာ်တစီာ် အနံၤခံ, စာ်ဘိထဲၢ်စဲာ်တစီာ် ကဘဲာ်မဲၤဝၱၤမဲၤစါဒဳတဲၤ တၱၢ်တဲၤမှး အပူၤနဳၤ.
20“ပရၤဆါ, ယတသဘဲထာ်ထ့အယဳၤ တလၢ်အနံၤခံလီၤ နီး, ပၠၤထဲၢ်ဒဳစဲာ်တစီာ်အခဳးအစဲ အဘူၣ်ကဲၤယဲၤအနံၤခံပးပး. 21ယသဘဲထာ် အစာ်ဘိ စဲာ်တစီာ်လဳစါစဲးကမၱာ်ပီၢ်တဓဲလီၤနဳၤ. အဳအပာ်, စာ်ဘိနအီၣ်ယပူၤကၱာ် ယအီၣ်နပူၤအခီနဳၤ, စဲာ်တစီာ်ကအီၣ်ပီၢ်ဒဳဝၤပူၤနဳၤ. ကၱာ်စဲာ်တစီာ်ကမၱာ်ပီၢ် တဓဲလီၤ, ဒဳၣ်လၢ်ခဳးကဘူၣ်ပီၢ်ထဲၢ်နသဓဳလ့ၤယဲၤနဳၤ. 22တဲၤဓီၤတဲၤသ့းနအံာ်လၤယဲၤတစီာ်နဳၤယအံာ် ထဳစဲာ်တစီာ်, စာ်ဘိ ထဲၢ်စကမၱာ်ပီၢ်တဓဲလီၤ အစာ်ဘိဝၤမၱာ်တပွဲၤလီၤအခီနဳၤ. 23ယအီၣ်ဒဳ စပူၤနဳၤကၱာ်နအီၣ်ဒဳယပူၤနဳၤ, စာ်ဘိထဲၢ် စဲာ်တစီာ် ကပ့ထာ်ဇီၤထာ်ပီၢ်ဒဳ တဲၤယံၢ်တဲၤဒွါအပူၤနဳၤကၱာ် လၢ်ခဳးဖဳးကသၱာ်ဟဲပီၢ်ထဲၢ်နသဓဳလ့ၤယဲၤနဳၤ ကၱာ် နဘဲာ်လီၢ်ကဲၤစဲာ်တစီာ် အစာ်ဘိနဘဲာ်လီၢ်ကဲၤယဲၤနဳၤ.
24“အဳအပာ်, ယသးအဲးနံၤတပွဲး ပၠၤနအံာ်လၤယဲၤတစီာ်ကအီၣ်ကိာ်ဘဲာ်ယကါဒဳ ယအီၣ်အလ့ၤအရါနဳၤ, စာ်ဘိထဲၢ် စကစာ်ထၱး ဘဲာ်ပီၢ်ယတီၤယသ့းထဲၢ်နအံာ်လၤနံၤကဲၤယဲၤနဳၤ, မၤနဲၢ်, နဘဲာ်လီၢ်ကဲၤယဲၤလှ့လၢ်ခဳးတဘဲာ်ဘီာ်လၤနှၱနီးနဳၤ. 25အဳအပာ်, အတၱၢ်အမှးတပွဲၤ, လၢ်ခဳး တသၱာ်ဟဲနဲၤနှၱနီး, ပရၤဆါယသၱာ်ဟဲနဲၤ, ကၱာ်ပၠၤ နအံာ်လၤယဲၤတစီာ် သၱာ်ဟဲထဲၢ်နသဓဳလ့ၤကဲၤ ယဲၤနဳၤ. 26ကၱာ်ယမဲၤသၱာ်ဟဲထဳစဲာ်တစီာ်နမံၤ, ကၱာ်စကမဲၤသၱာ်ဟဲကီပၠၤ, စာ်ဘိထဲၢ် တဲၤဘဲာ်လီၢ်, နဘဲာ်လီၢ်အံာ်ယဲၤနဳၤကအီၣ်ပီၢ်ဒဳစဲာ်တစီာ် အပူၤကၱာ် ယကအီၣ်ကိာ်ကိာ်ပီၢ်ဒဳစပူၤနဳၤ,” စသဘဲကဲၤဓဳၤ.
ទើបបានជ្រើសរើសហើយ៖
ယိၤဟၣ် 17: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
