မာကု 9
9
1နဝ်ꩻထွူ ဝွေꩻဗွေႏရိုꩻသွုပ်၊ “ခွေဒေါ့ꩻဖေႏသီ၊ ဗွေႏဘုရာꩻခမ်းထီ စွဉ်ႏတန်ꩻခိုꩻ အီႏတယ်ႏလွဉ်နဝ်ꩻ ဗꩻတွိုႏစွဉ်ႏ ဝွေꩻသီးကထီႏဗာႏ လိုꩻကအဝ်ႏယိုကိုသား ယင်ဟန်ႏ အီႏတသီဗာႏတဝ်း” နုဲင်းနဝ်ꩻသွူ။
ပွုံႏသဏ္ဌာန်ႏပြောင်ꩻကြုဲင်ꩻ
(မတဲ ၁၇:၁–၃။ လုကာ ၉:၂၈–၃၆)
2 # ၂ပေ ၁:၁၇၊ ၁၈။ သူနီꩻထွိုင်ႏလဲဉ်း ပေတရု၊ ယာကုပ်တွမ်ႏ ယောဟန်နဝ်ꩻ ဗွေႏယေသျုဟဲ့ꩻလွေꩻငီꩻ စွဉ်ႏဝွေꩻဗွေႏတဲင် အွဉ်ထင်ႏဝွေꩻသီး ကောင်ထို တဖြုံႏလောင်းသွူ။ နဝ်ꩻကိုနဝ်ꩻ အဝ်ႏဒျာႏ ဝွေꩻသီးလွုမ်ꩻသွူ။ နုဲင်းဝွေꩻသီး ကအဝ်ႏထွားလွေꩻနဝ်ꩻ ဗွေႏယေသျု ပြောင်ꩻကြုဲင်ꩻလွဉ်တဲင်၊ 3ဝွေꩻဗွေႏခွမ်ꩻလာꩻဖုံႏနဝ်ꩻ ရောင်ႏတောင်ႏဗွာလွဉ် ကအီႏဗွာလွိုကယ်ꩻက နဝ်ꩻနဝ်ꩻ ဟံႏတန်လောင်း ပါꩻမုဲင်ꩻတဖြာꩻတဲ့ တပဆူႏနွောင်ꩻတဝ်းသွူ။။ 4နဝ်ꩻထွူ တပဲ့တောႏဝင်ꩻသွံ ထီႏဗာႏ ဧလိယ၊ တွမ်ႏမောသျေ အဝ်ႏဒေါ့ꩻရီတွမ်ႏ ဗွေႏယေသျုနဝ်ꩻသွူ။ 5ပေတရု ဒေါ့ꩻထန်ႏဖေႏ ဗွေႏယေသျု၊ “ဆရာႏ၊ နီကအဝ်ႏယိုကိုနဝ်ꩻ ဟဝ်ငါႏ ခွိုင်းကားမုဲင်ꩻ၊ နီအီႏမာꩻ သုမ်းသွံဖြုံႏ၊ တဖြုံႏနဝ်ꩻ နီဗွေႏတာႏ၊ တဖြုံႏနဝ်ꩻ မောသျေတာႏစွဉ်ႏ တဖြုံႏနဝ်ꩻ ဧလိယတာႏ” နုဲင်းနဝ်ꩻသွူ။ 6ဝွေꩻတွမ်ႏ လိုꩻလင်ဖုံႏ ပွိုးငမ်းသꩻငါႏ နဝ်ꩻမꩻ ဝွေꩻအီႏဒေါ့ꩻဗာႏ တမုဲင်ꩻတဲ့ တသေတဝ်းသွူ။
7 #
မ ၃:၁၇၊ မာ ၁:၁၁၊ လု ၃:၂၂။ နဝ်ꩻထွူ မို့ꩻအေႏတဒူႏ ပေါႏလွဉ်တွော့ꩻ မို့ꩻအေႏယောင်ꩻနဝ်ꩻ အဝ်ႏဒို့ꩻထိုꩻ ဝွေꩻသီးတဲင် အဝ်ႏမို့ꩻအေႏကိုနဝ်ꩻ အငဝ်းထန်ႏလွဉ်၊ “ယိုနဝ်ꩻ ခွေကရက်ငါႏ ပိုခိုရင်ꩻဒျာႏ။ နာႏသွော့ဝွေꩻငဝ်း” နုဲင်းနဝ်ꩻသွူ။ 8ဝွေꩻသီး ထွားခူဝစ်မွိုင် မွေးနေးထာꩻစွဉ်ႏတဲ့ တထီႏတဝ်း လိုꩻလင်တဖြာꩻဖြာꩻသွူ။ အဝ်ႏဒျာႏ ဗွေႏယေသျုစွဉ်ႏ ဝွေꩻသီးလွုမ်ꩻသွူ။
9နုဲင်းဝွေꩻသီး ကအဝ်ႏကောင်လောင်း လင်ꩻလွဉ်နဝ်ꩻ ဗွေႏယေသျု မိန်းဖေႏဝွေꩻသီး၊ “နုဲင်းသီ ကထီႏဗာႏလဲဉ်းဒါႏနဝ်ꩻ ဗꩻတွိုႏစွဉ်ႏ လိုꩻပိုခို အဝ်ႏထာꩻသီ ထွိုင်ႏမွန်လွဉ်ချာနဝ်ꩻ ဒေါ့ꩻနယ်မွိုန်း ပါꩻတဖြာꩻဖြာꩻ” နုဲင်းနဝ်ꩻသွူ။
10ဝွေꩻသီးလွောက်ꩻနာႏ ဝွေꩻဗွေႏအမိန်း၊ ကွဲႏတွော့ꩻ၊ “‘အဝ်ႏထာꩻသီ ထွိုင်ႏမွန်လွဉ်’ ယိုအဓိပ္ပါယ်ႏ တမုဲင်ꩻဟောင်း”နဝ်ꩻ ဝွေꩻသီးအချင်ꩻချင်ꩻ တွိုင်ႏပင်ႏ အုံကွံလို့ဝင်ꩻနဝ်ꩻသွူ။ 11#မိတ် ၄:၅၊ မ ၁၁:၁၄။ နဝ်ꩻထွူ ဝွေꩻသီးရီ ဗွေႏယေသျု၊ “ပွိုးတမုဲင်ꩻ ကျမ်ꩻဒါႏဆရာႏဖုံႏနဝ်ꩻ ရိုꩻဗာႏတွိုႏ ဧလိယနဝ်ꩻ အီႏကျွꩻလွဉ်ရီးဗာႏ နုဲင်းမုဲင်ꩻဟောင်း” နုဲင်းနဝ်ꩻသွူ။
12ဝွေꩻဗွေႏလဝ်းချာ၊ “ဖေႏနေး ကဖျင်ရဲဉ်ꩻ သေꩻမꩻလို့ဗာႏ ထာꩻကားကအဝ်ႏနဝ်ꩻ ဧလိယနဝ်ꩻ ကျွꩻလွဉ်ရီးဗာႏမွေး၊ ကွဲႏတွော့ꩻ ပွိုးတမုဲင်ꩻ လိတ်ကျမ်ꩻရိုꩻဗာႏတွိုႏ လိုꩻပိုခိုနဝ်ꩻ အီႏခံႏဗာႏမွေး ထာꩻဒုက္ခတွမ်ႏ အီႏခံႏဗာႏ ဝင်ꩻပယ်ႏထိုꩻ နုဲင်းမုဲင်ꩻဟောင်း။ 13ခွေဒေါ့ꩻနယ်သီ၊ ကွဲႏတွော့ꩻ ဧလိယနဝ်ꩻ ကျွꩻလွဉ်လဲဉ်းတဲင် နုဲင်းလိတ်ကျမ်ꩻကို ကရိုꩻဒါႏ ဝွေꩻခရာႏနဝ်ꩻ လိုꩻဖုံႏနဝ်ꩻ နုဲင်းဝွေꩻသီး ကကျွိုက်သꩻ မဉ်မာꩻဝွေꩻ နုဲင်းမုဲင်ꩻတဲ့ မာꩻလဲဉ်း” နုဲင်းနဝ်ꩻသွူ။
ဗွေႏယေသျုလုမ်ꩻလာꩻဟဝ်ဖေႏလူꩻကုဲင်ကနွို့သော့ꩻဒါႏလိုꩻပေႏတဖြာꩻ
(မတဲ ၁၇:၁၄–၂၁။ လုကာ ၉:၃၇–၄၃က)
14ဝွေꩻသီး ထွိုင်ႏမော့ꩻခွဲငီꩻယင်းတွမ်ႏ ကအဝ်ႏကုဲင်ဒါႏ တပဲ့တောႏဖုံႏချိန်ႏနဝ်ꩻ ဝွေꩻသီးထီႏစွဉ်ႏ လိုꩻစွိုꩻအာအဝ်ႏခူ တပဲ့တောႏဖုံႏတဲင် ကျမ်ꩻဒါႏဆရာႏဖုံႏ ယင်ဟန်ႏနဝ်ꩻ အဝ်ႏငဝ်းအာ ထေင်လို့ဝင်ꩻ တွမ်ႏဝွေꩻသီးနဝ်ꩻသွူ။ 15လိုꩻဖုံႏထွိုင်ႏထီႏ ဗွေႏယေသျုနဝ်ꩻ ဝွေꩻသီးအံႏဖြာႏ မွေးနေးစွဉ်ႏတဲင် ဖင်းထေ့ ဝွေꩻဗွေႏတွော့ꩻ နုတ်ဆက် ဝွေꩻဗွေႏသွူ။ 16ဗွေႏယေသျုရီ ဝွေꩻဗွေႏတပဲ့တောႏဖုံႏ၊ “သီငဝ်းအာ ထေင်လို့ဝင်ꩻ တွမ်ႏဝွေꩻသီး တမုဲင်ꩻခရာႏဟောင်း” နုဲင်းနဝ်ꩻသွူ။
17အဝ်ႏလိုꩻစွိုꩻဖုံႏကို လိုꩻခိုတဖြာꩻနဝ်ꩻ လဝ်းချာ၊ “ဆရာႏ၊ ခွေပိုခိုနဝ်ꩻ ခွေအီလွဉ်ထေ့ နီဗွေႏထျꩻ၊ ဝွေꩻနဝ်ꩻ ကွပ်ပွိုး လူꩻကုဲင် အဝ်ႏစောင်ꩻသော့ꩻ ဝွေꩻအကိုနဝ်ꩻမꩻ ဒေါ့ꩻထာꩻ တလꩻတဝ်းသွူ။ 18လူꩻကုဲင် ထွိုင်ႏမာꩻဆာဝွေꩻ စွုမ်ႏလဲင်ႏ ဝွေꩻခြို့ꩻလင်ꩻစွဉ်ႏ ဟံႏလောင်းတဲင် ဝွေꩻဖြောင်းနဝ်ꩻ အဗွို့ꩻထန်ႏလွဉ်၊ စုဲင်ချာ အတငါတဲင် နမ်းတဗာႏလွုမ်း ဆွော့ꩻစွဉ်ႏနဝ်ꩻသွူ။ ခွေသွဉ်းအွဉ်ႏ နီဗွေႏတပဲ့တောႏဖုံႏ ဝါးထန်ႏဖေႏလူꩻကုဲင်၊ ကွဲႏတွော့ꩻ ဝွေꩻသီး တဝါးထန်ႏနွောင်ꩻတဝ်း” နုဲင်းနဝ်ꩻသွူ။
19ဗွေႏယေသျု ဒေါ့ꩻဖေႏဝွေꩻသီး၊ “သီထွာလိုꩻထာꩻယွုမ်း အဲဉ်ထဝ်းဖုံႏ နုဲင်းမုဲင်ꩻ၊ ခွေအီႏအုံငီꩻညဗာႏက စွဉ်ႏသီ ခွိုင်းကားမုဲင်ꩻဟောင်း။ ခွေအီႏသယ်ꩻခံႏ ညဗာႏကသီ ခွိုင်းကားမုဲင်ꩻဟောင်း။ လိုꩻပေႏနဝ်ꩻ အီလွဉ်ခွေထျꩻဟုဲင်း” နုဲင်းနဝ်ꩻသွူ။ 20လိုꩻပေႏနဝ်ꩻ ဝွေꩻသီး အီလွဉ်ထေ့စွဉ်ႏ ဗွေႏယေသျုထျꩻသွူ။
ပေါႏလူꩻကုဲင် သဲစ်ကထီႏ ဗွေႏယေသျုနဝ်ꩻ တလဲင်ႏချင်ꩻ၊ မာꩻသဲႏထင်ႏ ခြို့ꩻလင်ꩻထိုꩻစွဉ်ႏ လိုꩻပေႏ၊ နဝ်ꩻမꩻ ဝွေꩻနဝ်ꩻ ဝꩻလင်ꩻစွဉ်ႏ ဟံႏလောင်းတဲင် တလိန်ႏတလင်ႏ ဖြောင်းဗွို့ꩻထန်ႏစွဉ်ႏနဝ်ꩻသွူ။ 21ဗွေႏယေသျုရီအဖါ၊ “ဝွေꩻထွာနုဲင်းယိုနဝ်ꩻ ညလဲဉ်း ခွိုင်းကားမုဲင်ꩻဟောင်း” နုဲင်းနဝ်ꩻသွူ။
ဝွေꩻလဝ်းချာ၊ “တယ်ႏစွဉ်ႏဝွေꩻပေႏခါကာႏ” နုဲင်းနဝ်ꩻသွူ။ 22“လူꩻကုဲင်ကျံႏသီဝွေꩻ၊ စွဉ်ႏကမာꩻဝꩻ တငို့ꩻလင်ꩻသော့ꩻဝွေꩻ မေႏကိုတွမ်ႏ ထီကို အလဲင်ႏအာငါႏလဲဉ်း နဝ်ꩻသွူ။ နီဗွေႏ မဉ်ႏတတ်နွိုင်ႏနဝ်ꩻ သညင်ꩻဗဲင်း နီလောင်းတွော့ꩻ စွဲကိုဖေႏဗဲင်းနီမွိုင်” နုဲင်းနဝ်ꩻသွူ။
23ဗွေႏယေသျုဒေါ့ꩻ၊ “မွေးသွူ၊ နာꩻထာꩻယွုမ်း မဉ်ႏအဝ်ႏနဝ်ꩻ၊ လိုꩻထာꩻယွုမ်းအဝ်ႏသား အတာႏ ထာꩻစွုမ်ႏစွိုးနဝ်ꩻ ထွာနွောင်ꩻဒျာႏ” နုဲင်းနဝ်ꩻသွူ။
24အဖါနဝ်ꩻ တလဲင်ႏချင်ꩻ ခြောဝ်ထန်ႏစွဉ်ႏ၊ “ခွေသွဉ်း အဝ်ႏယွုမ်းဒျာႏ၊ ခွေသွဉ်းထာꩻယွုမ်း မဉ်ႏတလွုမ်းတဝ်းနဝ်ꩻ စွဲကိုဖေႏဗဲင်းယင်း ခွေသွဉ်းဟုဲင်း။
25လိုꩻစွိုꩻအာဖုံႏနဝ်ꩻ အဝ်ႏခူတွိုက်ငါႏ ဝွေꩻသီးနဝ်ꩻမꩻ၊ ဗွေႏယေသျု အွဉ်ႏသတိတဲင် ဝွေꩻဗွေႏဖေႏ ဝိညာဉ်ႏကုဲင်အမိန်း။ ဝွေꩻဗွေႏဒေါ့ꩻ၊ “လူꩻတအွိုင်စွဉ်ႏ လူꩻတအာႏ၊ ခွေဖေႏနာꩻအမိန်း အဝ်ႏပါꩻပေႏကို ထန်ႏလွဉ်တွော့ꩻ မုဲင်ꩻခါတဲ့ နွို့သော့ꩻဖျင်မွိုန်းဒွုမ် ဝွေꩻအကို” နုဲင်းနဝ်ꩻသွူ။
26ဝိညာဉ်ႏကုဲင်နဝ်ꩻ ခြောဝ်အငဝ်း မာꩻသဲႏထင်ႏထဲင်း မာꩻဝꩻလင်ꩻစွဉ်ႏ ပါꩻပေႏနဝ်ꩻတဲင် ထန်ႏထိုꩻစွဉ်ႏနဝ်ꩻသွူ။ ထွားပါꩻပေႏနဝ်ꩻ ဗွိုန်နုဲင်း လိုꩻသီတဖြာꩻတဲင် လိုꩻစွုမ်ႏဖြာꩻဒေါ့ꩻ၊ “ဝွေꩻသီထိုꩻလဲဉ်း” နုဲင်းနဝ်ꩻသွူ။။ 27ကွဲႏတွော့ꩻ ဗွေႏယေသျု ခွုမ်ပါꩻခိုပေႏ အစူတဲင် စွီႏထွိုင်ႏစွဉ်ႏ ဝွေꩻနဝ်ꩻတွော့ꩻ ဝွေꩻအုံထွိုင်ႏစွဉ်ႏသွူ။
28ဗွေႏယေသျု နွို့သော့ꩻ အခန်ꩻကိုထွူ ဝွေꩻဗွေႏ တပဲ့တောႏဖုံႏ ရီတေ့ꩻဝွေꩻဗွေႏ၊ “ပွိုးတမုဲင်ꩻ နီတဝါးထန်ႏ နွောင်ꩻတဝ်းတွိုႏ လူꩻကုဲင်ဟောင်း” နုဲင်းနဝ်ꩻသွူ။
29ဗွေႏယေသျု လဝ်းချာ၊ “ကဝါးထန်ႏနွောင်ꩻ ထာꩻစားယိုနဝ်ꩻ အဝ်ႏဒျာႏ ထာꩻဆုတောင်ꩻ တစွိုးလွုမ်ꩻ၊ အလင်နဝ်ꩻ တဝါးထန်ႏနွောင်ꩻတဝ်း” နုဲင်းနဝ်ꩻသွူ။
ဗွေႏယေသျုဒေါ့ꩻဖျင်ယင်းဝွေꩻဗွေႏအီႏသီခရာႏ
(မတဲ ၁၇:၂၂–၂၃။ လုကာ ၉:၄၃ခ-၄၅)
30ဗွေႏယေသျုတွမ်ႏ ဝွေꩻဗွေႏ တပဲ့တောႏဖုံႏ အဝ်ႏခင်ႏလမ်းနဝ်ꩻကို ထန်ႏတဲင် ကာႏလွေꩻထိုꩻစွဉ်ႏ ကာလိလဲခမ်းသွူ။ ဝွေꩻဗွေႏ အဝ်ႏခင်ႏလမ်း မုဲင်ꩻကိုတဲ့ တမဉ်ဖေႏသေတဝ်း ပါꩻတဖြာꩻဖြာꩻ၊ 31ပွိုးတွော့ꩻ “လိုꩻပိုခိုနဝ်ꩻ အီႏခံႏဗာႏ ဝင်ꩻဆွမ်ꩻအပ်သော့ꩻထိုꩻ လိုꩻကအီႏမာꩻသီဒါႏ ဝွေꩻဗွေႏ အစူကိုသွူ။ ကွဲႏတွော့ꩻ သွံနီꩻထွိုင်ႏလဲဉ်းထိုꩻ ဝွေꩻဗွေႏ အီႏထွိုင်ႏမွန်လွဉ်ချာ ယင်းဒျာႏ” ခရာႏနဝ်ꩻ ဝွေꩻဗွေႏ အဝ်ႏသွဉ်သင်ဖေႏ ဝွေꩻဗွေႏ တပဲ့တောႏဖုံႏ နုဲင်းနဝ်ꩻသွူ။
32ကွဲႏတွော့ꩻ နုဲင်းထာꩻသွဉ်သင်ယို အဓိပ္ပါယ်ႏနဝ်ꩻ ဝွေꩻသီး တသေနာႏတဝ်းတဲင် ကအီႏရီ ဝွေꩻဗွေႏနဝ်ꩻ ဝွေꩻသီး အဝ်ႏငမ်းသꩻဒျာႏဖုံႏသွူ။
ပါꩻမုဲင်ꩻနဝ်ꩻထွာအတန်သွတ်ꩻဟောင်း
(မတဲ ၁၈:၁–၅။ လုကာ ၉:၄၆–၄၈)
33ဝွေꩻသီးဖျော်လွဉ် ဝေင်ꩻကပေရနောင်တဲင် နွို့သော့ꩻအခန်ꩻကိုထွူ ဗွေႏယေသျုရီ ဝွေꩻဗွေႏ တပဲ့တောႏဖုံႏ၊ “တဖူꩻလောင်းနဝ်ꩻ သီငဝ်းအာ ထေင်လို့ဝင်ꩻ တမုဲင်ꩻခရာႏဟောင်း” နုဲင်းနဝ်ꩻသွူ။
34 #
လု ၂၂:၂၄။ ကွဲႏတွော့ꩻ ဝွေꩻသီး တလဝ်းချာတဝ်း ဝွေꩻဗွေႏသွူ။ တဖူꩻလောင်းနဝ်ꩻ ကွပ်ပွိုး ဝွေꩻသီး အချင်ꩻချင်ꩻ ငဝ်းအာထေင်လို့ဝင်ꩻ ပွိုင်းဝွို့တွမ်ႏ ဝွေꩻသီးအကို ပါꩻမုဲင်ꩻထွာ အတန်သွတ်ꩻ ခရာႏနဝ်ꩻသွူ။ 35#မ ၂၀:၂၆၊ ၂၇၊ ၂၃:၁၁၊ မာ ၁၀:၄၃၊ ၄၄၊ လု ၂၂:၂၆။ ဗွေႏယေသျု အုံလင်ꩻတွော့ꩻ ဟဲ့ꩻတပဲ့တောႏ တဆီနီဖြာꩻတဲင် ဒေါ့ꩻဖေႏဝွေꩻသီး၊ “ပါꩻမုဲင်ꩻမဉ်ထွာ အရီးသွတ်ꩻ ခင်ႏလမ်းနဝ်ꩻ ဝွေꩻနမ်းနဝ်ꩻ အွဉ်ႏဗာႏ အဆုဲင်ꩻသွတ်ꩻ ခင်ႏလမ်းတဲင် အီႏခံႏဗာႏ လိုꩻကားကအဝ်ႏအသွဉ်း” နုဲင်းနဝ်ꩻသွူ။ 36နဝ်ꩻထွူ ဝွေꩻဗွေႏဟဲ့ꩻ လိုꩻပေႏတဖြာꩻတဲင် အွဉ်ႏအုံထွိုင်ႏ ဝွေꩻသီးဆꩻငါတွော့ꩻ စွဉ်ႏဝွေꩻဗွေႏ စူဖုံႏနဝ်ꩻ တဖော့ခူ လိုꩻပေႏတဲင် ဒေါ့ꩻဖေႏဝွေꩻသီး၊ 37#မ ၁၀:၄၀၊ လု ၁၀:၁၆၊ ယော ၁၃:၂၀။ “စွဉ်ႏခွေအမဉ်ꩻ နာႏမတွော့ꩻ ပါꩻမုဲင်ꩻ မဉ်ႏရပ်ကျိုႏဆွုမ်ႏ လိုꩻပေႏဖုံႏ နုဲင်းယိုတဖြာꩻနဝ်ꩻ ရပ်ကျိုႏဆွုမ်ႏလဲဉ်း ခွေသွူ။ ရပ်ကျိုႏဆွုမ်ႏ ခွေလွုမ်ꩻ တကာႏတဝ်း ရပ်ကျိုႏဆွုမ်ႏပါက ဗွေႏအပါꩻ ကအွဉ်ႏစွꩻလွဉ် ခွေနဝ်ꩻသွူ။
ပါꩻမုဲင်ꩻတဆန်ချာတဝ်းနီနဝ်ꩻထွာဒျာႏနီလိုꩻ
(လုကာ ၉:၄၉–၅၀)
38ယောဟန် ဒေါ့ꩻဖေႏဝွေꩻဗွေႏ၊ “ဆရာႏ၊ နီထီႏ လိုꩻတဖြာꩻနဝ်ꩻ စွဉ်ႏနီဗွေႏ အမဉ်ꩻနာႏမ အဝ်ႏဝါးထန်ႏ လူꩻကုဲင်နဝ်ꩻမꩻ ဖေႏကအွဉ်ႏဆွိုးနဝ်ꩻ နီဒေါ့ꩻဖေႏဝွေꩻ။ ပွိုးတွော့ꩻ ဝွေꩻနဝ်ꩻ တဆဲင်ႏတဝ်း စွဉ်ႏနီစွိုꩻ” နုဲင်းနဝ်ꩻသွူ။
39ဗွေႏယေသျု ဒေါ့ꩻဖေႏဝွေꩻသီး၊ “တွမ်ႏကျိုꩻစာꩻ အွဉ်ႏဆွိုးထိုꩻမွိုန်း ဝွေꩻဟုဲင်း။ ကွပ်ပွိုး စွဉ်ႏခွေအမဉ်ꩻနာႏမ ပါꩻကမာꩻနယ်ဒါႏ ဟဝ်အံႏဖြာႏခရာႏ တစွိုးနဝ်ꩻ တညတဝ်း ဆုဲင်ꩻနဝ်ꩻ ပါꩻမုဲင်ꩻတဖြာꩻတဲ့ အီႏတဒေါ့ꩻကုဲင်တဝ်း ခွေခရာႏနဝ်ꩻသွူ။ 40#မ ၁၂:၃၀၊ လု ၁၁:၂၃။ ပွိုးပါꩻမုဲင်ꩻ တဆန်ချာတဝ်း နီနဝ်ꩻ ထွာဒျာႏနီဖဲ့ꩻ။ 41#မ ၁၀:၄၂။ ခွေဒေါ့ꩻဖေႏသီ အမွေး၊ ပါꩻမုဲင်ꩻတဖြာꩻ ကဖေႏဒါႏ သီထီအွꩻ တတကောက်ꩻနဝ်ꩻ ကွပ်ပွိုး သီနဝ်ꩻ ဆဲင်ႏဒျာႏ တွမ်ႏခွေအတွက် အီႏလက်ခံႏလꩻမွေး ဆုအကျိုꩻသွူ။
သွေꩻကုဲင်သော့ꩻအပဲစ်ကို
(မတဲ ၁၈:၆–၉။ လုကာ ၁၇:၁–၂)
42ပါꩻမုဲင်ꩻတယဝ်း အမဉ်ႏယားကုဲင်ထိုꩻ လိုꩻပေႏ စားယိုတဖြာꩻ ကအဝ်ႏယွုမ်းခွေနဝ်ꩻ ပါꩻနဝ်ꩻတွက်တာႏ စွဉ်ႏလွေလုံး စွိုင်ခူအငွဉ်ꩻတွော့ꩻ အွဉ်ႏလွဉ်းလင်ꩻ ပင်ႏလယ်ႏ ထီယော့ကိုနဝ်ꩻ ကယိန်းဟဝ်ထဲင်းသွူ။ 43#မ ၅:၃၀။ နဝ်ꩻမꩻ နာꩻစူ မဉ်ႏမာꩻကုဲင်ထိုꩻ နာꩻထာꩻယွုမ်းနဝ်ꩻ ဓွေါ့ꩻတပွတ်ꩻထိုꩻခန်း။ စူတပင် ပါတဝ်းတွော့ꩻ နွို့သော့ꩻဗာႏ အသက်မွန်ခင်ႏလမ်း နာꩻတာႏနဝ်ꩻ ကယိန်းဟဝ်ကယ်ꩻက စူအဝ်ႏနီပင်တွော့ꩻ ကလွေꩻသော့ꩻငါးရုဲင်ꩻ မေႏတဖေ့တဝ်း ခင်ႏလမ်းနဝ်ꩻသွူ။။ 44လုံးဖုံႏ ကအဝ်ႏအံႏဒါႏ ဝွေꩻသီးနဝ်ꩻ မုဲင်ꩻခါတသီတဝ်း တဲင် မေႏကအဝ်ႏခိုးဒါႏ ဝွေꩻသီးနဝ်ꩻတဲ့ မုဲင်ꩻခါတဲ့ တဖေ့တဝ်း။ 45သီခင်ႏမဉ်ႏမာꩻကုဲင်ထိုꩻ သီထာꩻယွုမ်းနဝ်ꩻ ဓွေါ့ꩻတပွတ်ꩻထိုꩻခန်း၊ နာꩻခင်ႏတပင် ပါတဝ်းတွော့ꩻ နွို့သော့ꩻ အသက်မွန်ခင်ႏလမ်းနဝ်ꩻ နာꩻတာႏ ကယိန်းဟဝ်ကယ်ꩻက ခင်ႏနီပင်ပါတွော့ꩻ အီႏထဲ့သော့ꩻထိုꩻ ငါးရုဲင်ꩻကိုနဝ်ꩻသွူ။ 46လုံႏဖုံႏကအဝ်ႏအံႏဒါႏဝွေꩻသီးနဝ်ꩻ မုဲင်ꩻခါတသီတဝ်း တဲင် မေႏကအဝ်ႏခိုးဒါႏ ဝွေꩻသီးနဝ်ꩻတဲ့ မုဲင်ꩻခါတဲ့ တဖေ့တဝ်း။ 47#မ ၅:၂၉။ သီမဲ့မဉ်ႏမာꩻကုဲင်ထိုꩻ သီထာꩻယွုမ်းနဝ်ꩻ အောင်ထန်ႏထိုꩻခန်း၊ သီကအီႏ နွို့သော့ꩻ ဗွေႏဘုရာꩻ ခမ်းထီကို စွဉ်ႏမဲ့တပင် တပါတဝ်းနဝ်ꩻ ဟဝ်ကယ်ꩻလဲဉ်းက မဲ့နီဖြုံႏပါတွော့ꩻ ကအီႏလွဉ်းထဲ့သော့ꩻ ငါႏရုဲင်ꩻကိုနဝ်ꩻသွူ။ 48#ဟေသျာ ၆၆:၂၄။ နဝ်ꩻကိုနဝ်ꩻ လုံႏအသား ကအံႏဒါႏ ဝွေꩻသီးနဝ်ꩻ မုဲင်ꩻခါတဲ့ တသီဒါႏတဝ်းထာꩻတဲင် မေႏကအဝ်ႏခိုးဒါႏ ဝွေꩻသီးနဝ်ꩻ မုဲင်ꩻခါတဲ့ တဖေ့ဒါႏတဝ်းသွူ။
49“နုဲင်းယဇ်ထာꩻသားယာႏ ကမာꩻစင်အီစွဉ်ႏ တသာႏအတွိုင်ꩻ လိုꩻစွုမ်ႏဖြာꩻနဝ်ꩻ အီႏမာꩻစင်ဗွာအီ စွဉ်ႏမေႏနဝ်ꩻသွူ။
50 #
မ ၅:၁၃၊ လု ၁၄:၃၄၊၃၅။ တသာႏနဝ်ꩻယံ၊ ကွဲႏတွော့ꩻ မဉ်ႏတဆုမ်တဝ်းနဝ်ꩻ မာꩻဆုမ်ဖျင်နွောင်ꩻယင်း နုဲင်းမုဲင်ꩻဟောင်း။
“သီနဝ်ꩻ ဆုမ်သွော့ နုဲင်းတသာႏ၊ သီနမ်း မာꩻသွꩻချာလို့ဝင်ꩻ အချင်ꩻချင်ꩻတွော့ꩻ တဖြာꩻတွမ်ႏတဖြာꩻ အုံအဝ်ႏငိမ်ꩻခွꩻသွော့ လို့ဝင်ꩻဟုဲင်း” နုဲင်းနဝ်ꩻသွူ။
ទើបបានជ្រើសរើសហើយ៖
မာကု 9: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.