မာကု 8
8
ဗွေႏယေသျုဖေႏအံႏလိုꩻလစ်ꩻရေင်ထာꩻအံႏ
(မတဲ ၁၅:၃၂–၃၉)
1ဆုဲင်ꩻတပေါႏညတဝ်း လိုꩻစွိုꩻအာ အလင်တစွိုꩻနဝ်ꩻ လွဉ်စုဗူႏလို့ဝင်ꩻ နဝ်ꩻသွူ။ လိုꩻဖုံႏ အီႏအံႏခရာႏ အဝ်ႏကုဲင်တဝ်းဒွုမ် ချိန်ႏနဝ်ꩻ ဗွေႏယေသျု ဟဲ့ꩻလွဉ် တပဲ့တောႏဖုံႏ ဝွေꩻဗွေႏထျꩻတဲင်ဒေါ့ꩻ၊ 2လိုꩻစားယိုဖုံႏတာႏနဝ်ꩻ ခွေသꩻတဟဝ်တဝ်း၊ ဝွေꩻသီး အဝ်ႏငီꩻလဲဉ်း စွဉ်ႏခွေနဝ်ꩻ လꩻသွံနီꩻလဲဉ်းတဲင် ယိုခါအီႏအံႏခရာႏ တမုဲင်ꩻမုဲင်ꩻ အဲဉ်ထဝ်းဒွုမ်နဝ်ꩻသွူ။ 3တဖေႏအံႏတဝ်း ဝွေꩻသီး ထာꩻအံႏတွော့ꩻ ခွေမဉ်ႏအွဉ်ႏစွꩻသဲင်ꩻချာ အလမ်းနဝ်ꩻ ဝွေꩻသီး ယင်ဟန်ႏနဝ်ꩻ ပွိုးတွော့ꩻ အဝ်ႏတဖူꩻညာꩻလွဉ်အတွက် ဝွေꩻသီး မဉ်ႏလွေꩻထာꩻနဝ်ꩻ ဝွေꩻသီးအီႏမျောင်ꩻ အာႏဆေ့ꩻသဲင်ꩻထိုꩻ” နုဲင်းနဝ်ꩻသွူ။
4ဝွေꩻဗွေႏ တပဲ့တောဖုံႏ ရီဝွေꩻဗွေႏ၊ “ကန္တာရ တခြာတန်ကိုယိုနဝ်ꩻ ကအီႏလွူးနွောင်ꩻ လိုꩻစားယိုဖုံႏ ကားကအဝ်ႏတာႏ ထာꩻအံႏနဝ်ꩻ ပါꩻမုဲင်ꩻတဖြာꩻ အီႏထုမ်ႏ မော့ꩻနွောင်ꩻ မုဲင်ꩻကိုဟောင်း” နုဲင်းနဝ်ꩻသွူ။
5ဗွေႏယေသျုရီ၊ “သီတခိုး အဝ်ႏခွိုင်းမုဲင်ꩻဟောင်း” နုဲင်းနဝ်ꩻသွူ။
ဝွေꩻသီးလဝ်းချာ၊ “အဝ်ႏနွတ်ꩻဖြုံႏ၊” နုဲင်းနဝ်ꩻသွူ။
6ဖေႏကအုံလင်ꩻ ဟံႏလောင်းနဝ်ꩻ ဝွေꩻဗွေႏမိန်းဖေႏ လိုꩻစွိုꩻဖုံႏနဝ်ꩻသွူ။ နဝ်ꩻထွူ ဝွေꩻဗွေႏထူႏ တခိုးနွတ်ꩻဖြုံႏ အုပ်ꩻထင်ႏ ဗွေႏဘုရာꩻ ကေꩻဇူꩻတောႏ၊ အဲ့ꩻတခိုးဖုံႏတွော့ꩻ တခိုးဖုံႏနဝ်ꩻ ဖေႏဝွေꩻဗွေႏ တပဲ့တောႏဖုံႏ ဖန်းဝေႏဖေႏ လိုꩻစွိုꩻဖုံႏသွူ။ တပဲ့တောႏဖုံႏတဲ့ မာꩻစွဉ်ႏ နုဲင်းနဝ်ꩻသွူ။ 7ဝွေꩻသီးနဝ်ꩻ ထပေႏဖုံႏတဲ့ အဝ်ႏပါက တစိꩻသွူ။ ယိုဖုံႏ တာႏနဝ်ꩻ ဗွေႏယေသျုအုပ်ꩻ ကေꩻဇူꩻတောႏတဲင် ဒေါ့ꩻဖေႏ အတပဲ့တောႏဖုံႏ ထပေႏဖုံႏ ယိုနဝ်ꩻတဲ့ အွဉ်ႏဖန်းဝေႏပါ လိုꩻဖုံႏနဝ်ꩻသွူ။ 8-9လိုꩻစွုမ်ႏဖြာꩻ အံႏဗာႏတဲင် ဟို့ꩻကွို့ꩻလို့စွဉ်ႏ ဖုံႏသွူ။ နဝ်ꩻကို လိုꩻအဖြာꩻအဝ်ႏ ၄၀ဝဝရပ် နဝ်ꩻသွူ။ နဝ်ꩻထွူ တပဲ့တောႏဖုံႏနဝ်ꩻ တွမ်ထူႏချာ တခိုးခဝ်လွိုဖုံႏနဝ်ꩻ လꩻစွဉ်ႏ နွတ်ꩻခြောင်း ဗွေဗွေနဝ်ꩻသွူ။ ဗွေႏယေသျု အွဉ်ႏစွꩻသဲင်ꩻထိုꩻ လိုꩻဖုံႏတဲင်၊ 10တလဲင်ႏချင်ꩻ စွဉ်ႏဝွေꩻဗွေႏ တပဲ့တောႏဖုံႏနဝ်ꩻ နွို့သော့ꩻဖြီကိုတဲင် ကျွꩻလွေꩻထိုꩻစွဉ်ႏ ဒါမနုတာနယ်ႏကိုသွူ။
ဖါရိသဲဖုံႏကွီနိမိတ်လက္ခဏာႏတစွိုး
(မတဲ ၁၂:၃၈–၄၂၊ ၁၆:၁–၄)
11 #
မ ၁၂:၃၈၊ လု ၁၁:၁၆။ ဖါရိသဲဖုံႏ ယင်ဟန်ႏနဝ်ꩻ လွဉ်ထေ့ ဗွေႏယေသျုတွော့ꩻ စတဲင် ငဝ်းအာထေင်စွဉ်ႏ ဝွေꩻဗွေႏသွူ။ ဝွေꩻသီးမဉ်ဒေါင် ဝွေꩻဗွေႏ နဝ်ꩻမꩻ၊ ဗွေႏဘုရာꩻ အဝ်ႏနစ်သက် ထောက်ခံႏ ဝွေꩻဗွေႏကျောင်ꩻ အွဉ်ႏနယ် သက်သေႏအနေႏ ဝွေꩻသီးကွီ ဝွေꩻဗွေႏ ဖေႏကမာꩻနယ် နိမိတ် လက္ခဏာႏတစွိုးနဝ်ꩻသွူ။ 12#မ ၁၂:၃၉၊ လု ၁၁:၂၉။ ကွဲႏတွော့ꩻ ဗွေႏယေသျု သာတန်ထာꩻတဲင်ဒေါ့ꩻ၊ “လိုꩻဖုံႏဟန်ႏနီꩻယို ပွိုးတမုဲင်ꩻ ကွီဗာႏတွိုႏ နိမိတ်လက္ခဏာႏ နုဲင်းမုဲင်ꩻဟောင်း၊ အွဉ်ႏနယ်တဝ်း၊ ခွေအွဉ်ႏဒေါ့ꩻနယ်သီ၊ လိုꩻစားယိုဖုံႏနဝ်ꩻ အီႏတအွဉ်ႏနယ် ဖေႏဗာႏတဝ်း သက်သေႏစားယို” နုဲင်းနဝ်ꩻသွူ။
13ဝွေꩻဗွေႏ အဝ်ႏဝွေꩻသီးထျꩻ ထန်ႏထိုꩻတွော့ꩻ နွို့သော့ꩻ ဖြီတဆွိုင်ꩻကိုတဲင် ဖျတ်ကာႏလွေꩻစစွဉ်ႏ ထီနောင်ဖင်ႏ ခတဖဲ့ꩻနဝ်ꩻသွူ။
ဖါရိသဲတွမ်ႏဟေရုဒ်အတမီႏ
(မတဲ ၁၆:၅–၁၂)
14တပဲ့တောႏဖုံႏနဝ်ꩻ အွဉ်ႏဖေင်ꩻအီလွေꩻလုမ်း တခိုးတဲင် ဖြီကိုနဝ်ꩻ ဝွေꩻသီး တခိုးပေါင်မုတ် ပါလွေꩻဒျာႏ တဖြုံႏလွုမ်ꩻနဝ်ꩻသွူ။ 15#လု ၁၂:၁။ ဗွေႏယေသျု ဖေႏသတိ ဝွေꩻသီး၊ “အွဉ်ႏသတိသွော့ ဖါရိသဲဖုံႏတွမ်ႏ ဟေရုဒ် အတမီႏတွော့ꩻ သျောင်ႏတဲင် ရဲဟဝ်ဟဝ်ခါꩻသွော့ သီနမ်းဟုဲင်း” နုဲင်းနဝ်ꩻသွူ။
16ဝွေꩻသီးစတဲင် အုံကွံ တွိုင်ႏပင်ႏချာလို့ဝင်ꩻ၊ “ကွပ်ပွိုး နီတထူႏလွေꩻပါတဝ်း တခိုးတစိꩻစိꩻမꩻ ဝွေꩻဗွေႏ ဒေါ့ꩻနုဲင်းယို” နုဲင်းနဝ်ꩻသွူ။
17နုဲင်းဝွေꩻသီး ကအဝ်ႏဒေါ့ꩻထာꩻနဝ်ꩻ ဗွေႏယေသျုအဝ်ႏသေ၊ နဝ်ꩻမꩻ ဝွေꩻဗွေႏရီ ဝွေꩻသီး။ “ပွိုးတမုဲင်ꩻ သီတွိုင်ႏပင်ႏ အုံကွံဗာႏတွိုႏဝင်ꩻ တခိုးတပါတဝ်းခရာႏ နုဲင်းမုဲင်ꩻဟောင်း။ သီတသေတဝ်း မဉ်ꩻမွေးတဝ်း တသေနာႏ တဝ်းဒွိုန်းကဟောင်း။ သီဉာဏ်ႏမွော့ꩻ လဲင်ꩻထွိုင်ꩻငါႏ နုဲင်းမုဲင်ꩻဟောင်း။ 18#ယေ ၅:၂၁၊ ဧသ ၁၂:၂၊ မာ ၄:၁၂။ သီမဲ့ဖုံႏ အဝ်ႏစွဉ်ႏတဲ့ သီတထီႏနွောင်ꩻ တဝ်းဟောင်း။ သီနားဖုံႏ အဝ်ႏစွဉ်ႏတဲ့ သီတဟွိုန်တဝ်းဟောင်း။ သီတတောင်ꩻတဝ်းဒွိုန်းက၊ 19ခွေကအဲ့ꩻတခိုးငတ်ꩻဖြုံႏ လွူးလိုꩻ၅၀ဝဝနဝ်ꩻ နဲ့ဟောင်း။ တခိုးခဝ်လွိုနဝ်ꩻ သီတွမ်လꩻချာ ခွိုင်းမုဲင်ꩻခြောင်းဟောင်း” နုဲင်းနဝ်ꩻသွူ။
ဝွေꩻသီးလဝ်းချာ၊ “တဆီနီခြောင်း” နုဲင်းနဝ်ꩻသွူ။
20ဗွေႏယေသျုရီ၊ “ခွေကအဲ့ꩻ တခိုးနွတ်ꩻဖြုံႏ လွူးလိုꩻ၄၀ဝဝချိန်ႏနဝ်ꩻ သီတွမ်ထူႏလꩻ တခိုးခဝ်လွို ခွိုင်းမုဲင်ꩻခြောင်းဟောင်း” နုဲင်းနဝ်ꩻသွူ။
ဝွေꩻသီးလဝ်းချာ၊ “နွတ်ꩻခြောင်း” နုဲင်းနဝ်ꩻသွူ။
21ဝွေꩻဗွေႏရီဝွေꩻသီး၊ “သီတလꩻသေနာႏ တဝ်းဒွိုန်းကဟောင်း” နုဲင်းနဝ်ꩻသွူ။
ဗွေႏယေသျုလုမ်ꩻလာꩻမာꩻဟဝ်ဖေႏလိုꩻမဲ့ခေ့ꩻတဖြာꩻကအဝ်ႏဒုံဗဲက်သဲဒ
22ဝွေꩻသီး ထွိုင်ႏဖျော်လွဉ် ဒုံဗဲက်ဇဲဒ၊ နဝ်ꩻကိုနဝ်ꩻ လိုꩻယင်ဟန်ႏ အီလွဉ်လိုꩻမဲ့ခေ့ꩻ တဖြာꩻ ဗွေႏယေသျုထျꩻတဲင် ဖေႏကခွိုင်း ပါꩻမဲ့ခေ့ꩻနဝ်ꩻ တောင်ꩻပြန်ႏ ဝွေꩻဗွေႏသွူ။ 23စွဉ်ႏစူနဝ်ꩻ ဗွေႏယေသျု စွီႏပါꩻမဲ့ခေ့ꩻတွော့ꩻ အွဉ်ထန်ႏဝွေꩻဒုံနဝ်ꩻသွူ။ နဝ်ꩻထွူ ပထိုလူး လိုꩻမဲ့ခေ့ꩻအမဲ့၊ ဗွေႏယေသျု အစူဖုံႏနဝ်ꩻ အွဥ်ႏဒင်ႏ ဝွေꩻကတူႏလောင်းတဲင် ရီဝွေꩻ၊ “နာꩻထီႏနေထာꩻ တစွိုးစွိုးဟောင်း” နုဲင်းနဝ်ꩻသွူ။
24ပါꩻခိုနဝ်ꩻ ထွားကီထင်ႏ တဲင်ဒေါ့ꩻ၊ “ထီႏ၊ ခွေသွဉ်းထီႏ လိုꩻဖုံႏ၊ ကွဲႏတွော့ꩻ ထွားဝွေꩻသီးနဝ်ꩻ ဗွိုန်နုဲင်းစွဉ်ႏ သေင်ႏမွူးဖုံႏ အဝ်ႏထောင်လွေꩻထာꩻ” နုဲင်းနဝ်ꩻသွူ။
25ဗွေႏယေသျု စူတောႏဖုံႏနဝ်ꩻ ဝွေꩻဗွေႏ အွဉ်ႏဒင်ႏဖျင်ယင်း ပါꩻခိုနဝ်ꩻ မဲ့ဖုံႏလောင်းသွူ။ အလဲင်ႏယို ပါꩻခိုနဝ်ꩻ ကျိုꩻစာꩻထွားတွော့ꩻ ဝွေꩻမဲ့စဲင်း လွဉ်ချာယင်းတဲင် ထီႏစဲင်းလို့ထာꩻ ကားကအဝ်ႏနဝ်ꩻသွူ။ 26နဝ်ꩻထွူ စွဉ်ႏငဝ်းမိန်းနဝ်ꩻ ဗွေႏယေသျု အွဉ်ႏစွꩻသဲင်ꩻဝွေꩻလမ်း ၊ “တွမ်ႏသဲင်ꩻချာမွိုန်း ဒုံဖဲ့ꩻ” နုဲင်းနဝ်ꩻသွူ။
ပေတရုဖေါႏနယ်ဖေႏဗွေႏယေသျုခရာႏ
(မတဲ ၁၆:၁၃–၂၀။ လုကာ ၉:၁၈–၂၁)
27နဝ်ꩻထွူ ဗွေႏယေသျုတွမ်ႏ ဝွေꩻဗွေႏ တပဲ့တောႏဖုံႏနဝ်ꩻ ထန်ႏလွေꩻညာꩻထိုꩻ ဒုံဖုံႏ ကအဝ်ႏဗော့ꩻဒါႏ ကဲသရိ ဖိလိပ္ပိနဝ်ꩻသွူ။ တဖူꩻလောင်းနဝ်ꩻ ဝွေꩻဗွေႏရီ ဝွေꩻသီး၊ “လိုꩻဖုံႏရိုꩻ ခွေထွာပါꩻမုဲင်ꩻနဝ်ꩻ ဒေါ့ꩻနယ်ခွေမွိုင်” နုဲင်းနဝ်ꩻသွူ။
28 #
မာ ၆:၁၄၊ ၁၅၊ လု ၉:၇၊ ၈။ ဝွေꩻသီးလဝ်းချာ၊ “လိုꩻယင်ဟန်ႏနဝ်ꩻရိုꩻ နီဗွေႏနဝ်ꩻထွာ ဗတ္တိဇံႏဆရာႏ ယောဟန်။ အလင်နဝ်ꩻရိုꩻ နီဗွေႏနဝ်ꩻထွာ ဧလိယ။ အလင်ဖုံႏနဝ်ꩻရိုꩻ နီဗွေႏနဝ်ꩻထွာ ပရောဖဲစ်ဖုံႏကို တပါꩻပါꩻ” နုဲင်းနဝ်ꩻသွူ။
29 #
ယော ၆:၆၈၊ ၆၉။ ဝွေꩻဗွေႏရီဝွေꩻသီး၊ “ထွိုင်ႏတွိုႏသီဟာ၊ ခွေနဝ်ꩻထွာ ပါꩻမုဲင်ꩻဟောင်း” နုဲင်းနဝ်ꩻသွူ။
ပေတရုလဝ်းချာ၊ “နီဗွေႏနဝ်ꩻထွာ မေသျိယ” နုဲင်းနဝ်ꩻသွူ။
30နဝ်ꩻထွူ ဗွေႏယေသျုဖေႏ ဝွေꩻသီးအမိန်း၊ “ခွေခရာႏနဝ်ꩻ ဒေါ့ꩻနယ်မွိုန်း ပါꩻတဖြာꩻဖြာꩻဟုဲင်း” နုဲင်းနဝ်ꩻသွူ။
ဗွေႏယေသျုဒေါ့ꩻဝွေꩻဗွေႏအီႏခံႏဗာႏထာꩻဒုက္ခစွဉ်ႏထာꩻသီခရာႏ
(မတဲ ၁၆:၂၁–၂၈။ လုကာ ၉:၂၂–၂၇)
31နဝ်ꩻထွူ ဗွေႏယေသျု သွဉ်သင်စဖေႏ ဝွေꩻဗွေႏ တပဲ့တောႏဖုံႏ၊ “လိုꩻပိုခိုနဝ်ꩻ အီႏခံႏဗာႏ မွေးနေးစွဉ်ႏ ထာꩻဒုက္ခတဲင် လိုꩻတန်ဖုံႏ၊ ယဇ်ပရောဟိတ်တန်ဖုံႏတွမ်ႏ ကျမ်ꩻဒါႏဆရာႏဖုံႏ အီႏပယ်ႏထိုꩻ ဝွေꩻနဝ်ꩻသွူ။ ဝွေꩻအီႏခံႏဗာႏ ထာꩻသီ၊ ကွဲႏတွော့ꩻ ညသွံနီꩻနဝ်ꩻ ဝွေꩻအီႏထွိုင်ႏမွန် လွဉ်ချာယင်း” နုဲင်းနဝ်ꩻသွူ။ 32ယိုနဝ်ꩻ ဝွေꩻဗွေႏဒေါ့ꩻ သေႏချာႏဖေႏ မွေးနေးစွဉ်ႏ ဝွေꩻသီးနဝ်ꩻသွူ။ နဝ်ꩻမꩻ ပေတရု ဟဲ့ꩻလွဉ် ဝွေꩻဗွေႏ အထျꩻတွော့ꩻ ရဲဆီꩻနယ်ꩻစစွဉ်ႏ ဝွေꩻဗွေႏနဝ်ꩻသွူ။ 33ကွဲႏတွော့ꩻ ဗွေႏယေသျု လဲ့ခွယ်ႏချာ ထွားဝွေꩻဗွေႏ တပဲ့တောႏဖုံႏတဲင် ခွန်းနယ်ꩻစွဉ်ႏ ပေတရုနဝ်ꩻသွူ။ ဝွေꩻဗွေႏဒေါ့ꩻ၊ “စာႏတန်ႏ၊ အဝ်ႏခွေထျꩻနဝ်ꩻ လွေꩻညာꩻထိုꩻခန်းဟုဲင်း၊ နာꩻထာꩻစဉ်ꩻစာꩻနဝ်ꩻ အဝ်ႏဗွေႏဘုရာꩻထျꩻလွဉ် တမွေးတဝ်း၊ အဝ်ႏလိုꩻဇာႏတိထျꩻ လွဉ်ဒျာႏ” နုဲင်းနဝ်ꩻသွူ။
34 #
မ ၁၀:၃၈၊ လု ၁၄:၂၇။ နဝ်ꩻထွူ ဗွေႏယေသျုဟဲ့ꩻလွဉ် လိုꩻစွိုꩻဖုံႏတွမ်ႏ ဝွေꩻဗွေႏ တပဲ့တောႏဖုံႏ ဝွေꩻဗွေႏထျꩻတွော့ꩻ ဝွေꩻဗွေႏဒေါ့ꩻဖေႏ ဝွေꩻသီး၊ “သီအကို ပါꩻတဖြာꩻဖြာꩻ မဉ်ႏမဉ်လွဉ်ငီꩻ တွမ်ႏခွေနဝ်ꩻ သီအွဉ်ႏဖေင်ꩻထိုꩻဗာႏ သီနမ်းတာႏ၊ ထမ်ႏချာဗာႏ သီကင်းထွန်ႏတွော့ꩻ လွေꩻလွဉ်ꩻဗာႏခွေသွူ။ 35#မ ၁၀:၃၉၊ လု ၁၇:၃၃၊ ယော ၁၂:၂၅။ သီမဉ်ႏမဉ်ကယ်ႏချာ သီနမ်းအသက် တာႏနဝ်ꩻ သီအသက် အီႏသွုမ်ꩻထိုꩻသွူ။ ကွဲႏတွော့ꩻ ခွေအတာႏတွမ်ႏ သတင်ꩻဟဝ်တွက်တာႏ သီသက် မဉ်ႏသွုမ်ꩻထိုꩻနဝ်ꩻ သီကယ်ႏချာဒျာႏ သီအသက်နဝ်ꩻသွူ။ 36သီလꩻလို့ ထာꩻစွုမ်ႏစွိုး၊ သီမဉ်ႏအောင်ႏနွောင်ꩻစွဉ်ႏ တဟံႏတန်လွုမ်း စွဉ်ႏတဲ့ သီအသက် ဝိညာဉ်ႏ သွုမ်ꩻထိုꩻနဝ်ꩻ အကျိုꩻတမုဲင်ꩻ အဝ်ႏဟောင်း။ 37ဖေႏကလꩻချာ သီအသက်တာႏနဝ်ꩻ သီတဖေႏနွောင်ꩻတဝ်း စွဉ်ႏတမုဲင်ꩻမုဲင်ꩻသွူ။ 38လိုꩻဘုရာꩻတရာꩻ တအဲဉ်ထဝ်းတွမ်ႏ ထာꩻမွိုက်ကုဲင်မွူးနီꩻ ခေတ်ကာႏလယိုခါ ပွိုးခွေတွမ်ႏ ခွေထာꩻသွဉ်သင်ဖုံႏ အတွက် သီမဉ်ႏဝင်ꩻသꩻဝင်ꩻနဝ်ꩻ၊ လိုꩻပိုခို ထွိုင်ႏကျွꩻလွဉ် စွဉ်ႏဝွေꩻဖါ ဘွုန်ꩻသရေႏတွမ်ႏ တမန်ႏကြောင်းစင်ဖုံႏချိန်ႏနဝ်ꩻ သီအီႏခံႏဗာႏ ထာꩻဝင်ꩻသꩻ” နုဲင်းနဝ်ꩻသွူ။
ទើបបានជ្រើសរើសហើយ៖
မာကု 8: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.