မာကု 10
10
ဗွေႏယေသျုသွဉ်သင်ဖေႏတမာဝါꩻအွဉ်ႏကုဲင်လို့ဒါႏဝင်ꩻခရာႏ
(မတဲ ၁၉:၁–၁၂။ လုကာ ၁၆:၁၈)
1ဗွေႏယေသျု အဝ်ႏခင်ႏလမ်းနဝ်ꩻကို ထန်ႏလွေꩻထိုꩻ ယုဒဟံႏနယ်ႏတဲင် ဖျတ်ကာႏ ယော်ဒန် ထီခြောင်တန်သွူ။ လိုꩻစွိုꩻဖုံႏ ဖျော်လွဉ် ဖင်ႏထေ့ဖျင် ဝွေꩻဗွေႏထျꩻတဲင် နုဲင်းဝွေꩻဗွေႏ ကအဝ်ႏမာꩻ သေႏသေႏဒါႏအတွိုင်ꩻ ဝွေꩻဗွေႏသွဉ်ဖေႏ ဝွေꩻသီးသွူ။
2ဖါရိသဲဖုံႏ ယင်ဟန်ႏ ဖျော်လွဉ် ဝွေꩻဗွေႏထျꩻတဲင် ကျံႏဒေါင် ဝွေꩻဗွေႏနဝ်ꩻသွူ။ ဝွေꩻသီးရီ၊ “လိုꩻခိုတဖြာꩻ အီႏအွဉ်ႏကုဲင်ထိုꩻ ဝွေꩻမာꩻနဝ်ꩻ နီပညတ်ကိုꩻ ဖေႏနေအခွင်ꩻဟောင်း၊ ဒေါ့ꩻဖေႏသွော့နီ” နုဲင်းနဝ်ꩻသွူ။
3ဗွေႏယေသျု ဖြေႏချာနေးစွဉ်ႏ ငဝ်းရီတစွိုး၊ “မောသျေ ပညတ်ဖေႏလဲဉ်းသီ တမုဲင်ꩻဟောင်း” နုဲင်းနဝ်ꩻသွူ။
4 #
ဟော်ꩻ ၂၄:၁–၄၊ မ ၅:၃၁။ ဝွေꩻသီး လဝ်းချာ၊ “လိုꩻခိုတဖြာꩻတာႏ တဲမ်းလိတ် အွဉ်ႏကုဲင်ဝင်ꩻတဲင် ပသာညာꩻထိုꩻ ဝွေꩻမာနဝ်ꩻ မောသျေဖေႏအခွင်ꩻ” နုဲင်းနဝ်ꩻသွူ။
5ဗွေႏယေသျု ဒေါ့ꩻဖေႏဝွေꩻသီး၊ “ကွပ်ပွိုး သီနဝ်ꩻ သွဉ်သင်ဖေႏယပ်ꩻငါႏ အတွက် သီတာႏ မောသျေ တဲမ်းဗာႏ ပညတ်နုဲင်းယို နဝ်ꩻသွူ။ 6#ကမ္ဘာႏ ၁:၂၇၊ ၅:၂။ ကွဲႏတွော့ꩻ ကဖန်ဆင်ꩻ မာꩻထွာလွဉ် အရီးသွတ်ꩻချိန်ႏနဝ်ꩻ ‘ဗွေႏဘုရာꩻ ဖန်ဆင်ꩻမာꩻထွာ ဝွေꩻသီး အခိုတွမ်ႏအမူႏ’ နုဲင်းလိတ်ကျမ်ꩻ ကရိုꩻနဝ်ꩻသွူ။ 7#ကမ္ဘာႏ ၂:၂၄။ ‘ပွိုးအကျောင်ꩻခရာႏ နုဲင်းယိုအတွက် လိုꩻခိုတဖြာꩻနဝ်ꩻ ဝွေꩻအီႏအွဉ်ႏကုဲင်ထိုꩻဗာႏ အမွိုးတွမ်ႏ အဖါတွော့ꩻ အုံငီꩻတလွောင်ႏ တဗူႏဗာႏ တွမ်ႏဝွေꩻအမာသွူ။ 8ဝင်ꩻနီနဝ်ꩻ အီႏထွာလွဉ်ဗာႏ တဖြာꩻချင်ႏ၊’ နဝ်ꩻမꩻ ဝွေꩻသီးနဝ်ꩻ ထွာဝင်ꩻနီတမွေးတဝ်း၊ ထွာတဖြာꩻချင်ႏဒျာႏသွူ။ 9နဝ်ꩻထွူ နုဲင်းဗွေႏဘုရာꩻ ကအဝ်ႏပေါင်ꩻငီꩻ ဖေႏထွူလဲဉ်းနဝ်ꩻ လိုꩻဖဖေႏ တလꩻတဝ်းသွူ။
10ဝွေꩻသီး ထွိုင်ႏသဲင်ꩻနွို့သော့ꩻချာ လမ်းကိုချိန်ႏ ပွိုင်းဝွို့တွမ်ႏ ယိုခရာႏနဝ်ꩻ တပဲ့တောႏဖုံႏရီ ဗွေႏယေသျုသွူ။ 11#မ ၅:၃၂၊ ၂ကော ၇:၁၀၊ ၁၁။ ဝွေꩻဗွေႏဒေါ့ꩻဖေႏ ဝွေꩻသီး၊ “လိုꩻခိုတဖြာꩻ အအွဉ်ႏကုဲင်ထိုꩻ ဝွေꩻမာတဲင် တောႏလမ်းတောယင်း လိုꩻမူႏအလင်တဖြာꩻနဝ်ꩻ ပဲစ်မာႏထိုꩻလဲဉ်း ဝွေꩻမာသွူ။ 12ဗွိုန်နုဲင်းနဝ်ꩻနေနေ လိုꩻမူႏတဖြာꩻ အွဉ်ႏကုဲင်ထိုꩻ ဝွေꩻဝါꩻတဲင် တောႏလမ်းထိုꩻ လိုꩻခိုလင်တဖြာꩻနဝ်ꩻ ပဲစ်မာႏလဲဉ်းအဝါꩻ” နုဲင်းနဝ်ꩻသွူ။
ဗွေႏယေသျုဖေႏလိုꩻပေႏဖုံႏမင်္ဂလာႏ
(မတဲ ၁၉:၁၃–၁၅။ လုကာ ၁၈:၁၅–၁၇)
13လိုꩻယင်ဟန်ႏဖုံႏ အီလွဉ် လိုꩻပေႏဖုံႏ ဗွေႏယေသျုထျꩻတဲင် ဖေႏဝွေꩻဗွေႏ ကအွဉ်ႏဒင်ႏအစူ ဝွေꩻသီးလောင်း၊ ကွဲႏတွော့ꩻ တပဲ့တောႏဖုံႏ ခွန်းနယ်ꩻ လိုꩻဖုံႏနဝ်ꩻသွူ။ 14ဗွေႏယေသျု ထွိုင်ႏသေ နုဲင်းယိုချိန်ႏ ဝွေꩻဗွေႏ သꩻလျား မွေးထာꩻတဲင် ဒေါ့ꩻဖေႏ ဝွေꩻဗွေႏ တပဲ့တောႏဖုံႏ၊ “လိုꩻပေႏဖုံႏနဝ်ꩻ အွဉ်ႏလွဉ်ထေ့ ခွေထျꩻတွော့ꩻ တွမ်ႏရဲဆီꩻခါꩻမွိုန်း ဝွေꩻသီးဟုဲင်း။ ပွိုးတွော့ꩻ ဗွေႏဘုရာꩻခမ်းထီ နဲင်ႏငံႏတောႏနဝ်ꩻ ဆဲင်ႏဒျာႏ လိုꩻပေႏစားယိုဖုံႏ အတွက်သွူ။ 15#မ ၁၈:၃။ ခွေဒေါ့ꩻဖေႏသီ အမွေး၊ ပါꩻမုဲင်ꩻတဖြာꩻ တလက္ခံႏတဝ်း၊ ဗွေႏဘုရာꩻခမ်းထီ နဲင်ႏငံႏတောႏ ဗွိုန်နုဲင်းလိုꩻပေႏ တဖြာꩻနဝ်ꩻ မုဲင်ꩻခါတဲ့ အီႏတနွို့သော့ꩻဗာႏတဝ်း ခမ်းထီကို” နုဲင်းနဝ်ꩻသွူ။ 16နဝ်ꩻထွူ ဝွေꩻဗွေႏယွော့ထူႏ လိုꩻပေႏဖုံႏ ဝွေꩻဗွေႏစူဗောင်ကို ဝွေꩻဗွေႏ အွဉ်ႏဒင်ႏဖေႏစူ ဝွေꩻသီး တဖြာꩻစီႏလောင်းတဲင် ဖေႏဝွေꩻသီး မင်္ဂလာႏနဝ်ꩻသွူ။
လိုꩻခြွေချမ်ꩻသာႏ
(မတဲ ၁၉:၁၆–၃၀။ လုကာ ၁၈:၁၈–၃၀)
17နုဲင်းဗွေႏယေသျု အဝ်ႏစလွေꩻဖျင် ဝွေꩻဗွေႏတဖူꩻနဝ်ꩻ လိုꩻခိုတဖြာꩻ ဖင်းလွဉ်အုံအွပ်ꩻ ဝွေꩻဗွေႏဆꩻငါတဲင် ရီဝွေꩻဗွေႏ၊ “ဟဝ်မျတ်ငါႏဆရာႏ၊ ဖေႏကလꩻ ထာဝရအသက်နဝ်ꩻ ခွေသွဉ်းအီႏမာꩻဗာႏ တမုဲင်ꩻဟောင်း” နုဲင်းနဝ်ꩻသွူ။
18ဗွေႏယေသျုရီဝွေꩻ၊ “ပွိုးတမုဲင်ꩻ နာꩻဟဲ့ꩻဗာႏတွိုႏခွေ ဟဝ်မျတ်ငါႏ နုဲင်းမုဲင်ꩻဟောင်း။ ပေါႏလွိုသွူ ဗွေႏဘုရာꩻ တပါꩻလွုမ်ꩻနဝ်ꩻ ပါꩻမုဲင်ꩻတဖြာꩻတဲ့ တဟဝ်မျတ်တဝ်းသွူ။ 19#ထလ ၂၀:၁၃၊ ဟော်ꩻ ၅:၁၇၊ ထလ ၂၀:၁၄၊ ဟော်ꩻ ၅:၁၈၊ ထလ ၂၀:၁၅၊ ဟော်ꩻ ၅:၁၉၊ ထလ ၂၀:၁၆၊ ဟော်ꩻ ၅:၂၀၊ ထလ ၂၀:၁၂၊ ဟော်ꩻ ၅:၁၆။ ပညတ်တောႏဖုံႏနဝ်ꩻ နာꩻအဝ်ႏသေဒျာႏ၊ ‘တွမ်ႏမာꩻသီမွိုန်း ဝင်ꩻအသက်။ တွမ်ႏပဲစ်မာႏမွိုန်း ဝင်ꩻပိုမာဖုံႏ။ တွမ်ႏတခွန်ꩻမွိုန်း ဝင်ꩻထာꩻခြိုꩻ၊ ထာꩻတမဲဉ်ႏတဝ်းနဝ်ꩻ တွမ်ႏစွဲꩻတရာꩻမွိုန်း ပါꩻတဖြာꩻဖြာꩻ၊ တွမ်ႏလိန်ႏလဲဉ် မွိုန်းဝင်ꩻ၊ ရိုႏသေႏသွော့ သီမွိုးတွမ်ႏသီဖါ” နုဲင်းနဝ်ꩻသွူ။
20ပါꩻခိုနဝ်ꩻဒေါ့ꩻ၊ “ဆရာႏ ပညတ်တောႏ ယိုဖုံႏနဝ်ꩻ တယ်ႏစွဉ်ႏ ခွေသွဉ်းပေႏခါကာႏ ခွေအဝ်ႏလွောက်ꩻနာႏ မာꩻလွဉ်ꩻလို့လဲဉ်း” နုဲင်းနဝ်ꩻသွူ။
21ဗွေႏယေသျု စွဉ်ႏထာꩻရက် ထွားစဲင်းလွေꩻဝွေꩻ တွော့ꩻဒေါ့ꩻ၊ “နာꩻအဝ်ႏလိုႏ တစွိုးလွုမ်ꩻသွူ။ လွေꩻတဲင် စာထိုꩻနာꩻထာꩻခြိုꩻ ကားကအဝ်ႏတွော့ꩻ ရွဉ်နဝ်ꩻ ဖေႏသွော့ လိုꩻကေန်ꩻခြောဖုံႏ၊ နဝ်ꩻမꩻ နာꩻအီႏခြွေချမ်ꩻသာႏသော့ꩻ ခမ်းထီမို့ꩻလောင်းကိုသွူ။ နဝ်ꩻထွူ လွဉ်တဲင် လွေꩻလွဉ်ꩻသွော့ခွေ” နုဲင်းနဝ်ꩻသွူ။ 22ပါꩻခိုထွိုင်ႏဟွိုန် နုဲင်းယို ဝွေꩻအမဲ့ငါ ဖြိန်းလွဉ်တဲင် တွမ်ႏထာꩻသꩻကုဲင် ဝွေꩻလွေꩻညာꩻထိုꩻစွဉ်ႏသွူ။ ဝွေꩻနဝ်ꩻ ကွပ်ပွိုး ခြွေချမ်ꩻသာႏငါႏ အတွက်သွူ။
23ဗွေႏယေသျု ထွားခူဝစ် ဝွေꩻဗွေႏ တပဲ့တောႏဖုံႏတဲင် ဒေါ့ꩻဖေႏဝွေꩻသီး၊ “လိုꩻခြွေ ချမ်ꩻသာႏဖုံႏတာႏ ကအီႏနွို့သော့ꩻဗာႏ ဗွေႏဘုရာꩻ ခမ်းထီနဝ်ꩻ ယပ်ꩻခုဲင်ႏငါႏ ခွိုင်းကားမုဲင်ꩻ” နုဲင်းနဝ်ꩻသွူ။
24ငဝ်းယိုဖုံႏနဝ်ꩻ မာꩻသꩻဝꩻ မွေးနေးစွဉ်ႏ တပဲ့တောႏဖုံႏသွူ၊ ကွဲႏတွော့ꩻ ဗွေႏယေသျု ဒေါ့ꩻသွုပ်ဖေႏ၊ “ခွေပိုဖုံႏ၊ ကအီႏနွို့သော့ꩻဗာႏ ဗွေႏဘုရာꩻ ခမ်းထီနဝ်ꩻ ယပ်ꩻငါႏ ခွိုင်းကားမုဲင်ꩻ။ 25လိုꩻခြွေတဖြာꩻတာႏ ကအီႏနွို့သော့ꩻဗာႏ ဗွေႏဘုရာꩻ ခမ်းထီနဝ်ꩻ ယပ်ꩻကယ်ꩻလဲဉ်းက ကလာအုတ်တဗာႏ ကအီႏနွို့ဖျတ်ကာႏဒါႏ တထꩻမီးအိုကို” နုဲင်းနဝ်ꩻသွူ။
26ယိုနဝ်ꩻ မာꩻအံႏဖြာႏ မွေးနေးစွဉ်ႏ တပဲ့တောႏဖုံႏတဲင် တဖြာꩻတွမ်ႏတဖြာꩻ ရီလို့ဝင်ꩻ၊ “ပေါ့ꩻနုဲင်းနဝ်ꩻ ပါꩻမုဲင်ꩻအီႏလꩻနွောင်ꩻ ထာꩻကယ်ႏတင်ႏဟောင်း” နုဲင်းနဝ်ꩻသွူ။
27ဗွေႏယေသျု ထွားစဲင်းလွေꩻ ဝွေꩻသီးတဲင် လဝ်းဖြေႏချာ၊ “ယိုနဝ်ꩻ လိုꩻအတာႏ တထွာနွောင်ꩻတဝ်း စွဉ်ႏတဲ့ ဗွေႏဘုရာꩻတာႏနဝ်ꩻ နုဲင်းနဝ်ꩻမွေးတဝ်း။ ဗွေႏဘုရာꩻတာႏ ထာꩻစွုမ်ႏစွိုးနဝ်ꩻ ထွာနွောင်ꩻ” နုဲင်းနဝ်ꩻသွူ။
28နဝ်ꩻထွူ ပေတရု ဒေါ့ꩻထန်ႏ၊ “ထွားမွိုင် နီအွဉ်ႏကုဲင်လဲဉ်း ထာꩻကားကအဝ်ႏတွော့ꩻ လွေꩻလွဉ်ꩻလဲဉ်းနီဗွေႏ” နုဲင်းနဝ်ꩻသွူ။
29ဗွေႏယေသျု ဒေါ့ꩻဖေႏဝွေꩻသီး၊ “မွေး၊ ခွေဒေါ့ꩻဖေႏသီ ခွေတာႏတွမ်ႏ သတင်ꩻဟဝ်အတာႏ ပါꩻကအွဉ်ႏကုဲင်ထိုꩻဗာႏ အလမ်းတဲ့နဝ်ꩻ၊ ဖူးခိုဝေးခို တဲ့နဝ်ꩻ၊ ဖူးမူႏဝေးမူႏ တဲ့နဝ်ꩻ၊ မွိုးတဲ့နဝ်ꩻ၊ ဖါတဲ့နဝ်ꩻ၊ ပိုဖုံႏတဲ့နဝ်ꩻ၊ လုဲင်းခြံဖုံႏတဲ့နဝ်ꩻ၊ 30စိုးယိုနဝ်ꩻ အီႏလꩻလွိုအာလွဉ် ထဲင်းဗာႏသွူ။ ဝွေꩻသီးအီႏလꩻ လွိုအာလွဉ်ထဲင်း လမ်းဖုံႏ၊ ဖူးခိုဝေးခိုဖုံႏ၊ ဖူးမူႏဝေးမူႏဖုံႏ၊ မွိုးဖုံႏ၊ ပိုဖုံႏလုဲင်းခြံဖုံႏ အပွန်းတရျာꩻနဝ်ꩻသွူ။ ထာꩻနစ်စက် ဖုံႏနဝ်ꩻတဲ့ အီႏလꩻဗာႏသွူ။ စိုးငါနဝ်ꩻ ဝွေꩻသီး အီႏလက်ခံႏလꩻ ထာဝရအသက်သွူ။ 31#မ ၂၀:၁၆၊ လု ၁၃:၃၀။ကွဲႏတွော့ꩻ ယိုခါ လိုꩻအာဖုံႏ ကတကတ်ꩻရီးဒါႏ ဝင်ꩻသားဖုံႏနဝ်ꩻ အီႏထဲ့ဆုဲင်ꩻထိုꩻတဲင် ယိုခါ လိုꩻအာဖုံႏ ကထဲ့ဆုဲင်ꩻဒါႏ ဝင်ꩻသားဖုံႏနဝ်ꩻ အီႏတကတ်ꩻရီး” နုဲင်းနဝ်ꩻသွူ။
ဗွေႏယေသျုဒေါ့ꩻပွိုင်းဝွို့တွမ်ႏဝွေꩻဗွေႏအီႏသီခရာႏဗွေသွံလဲင်ႏ
(မတဲ ၂၀:၁၇–၁၉။ လုကာ ၁၈:၃၁–၃၄)
32ယိုခါ ဗွေႏယေသျုတွမ်ႏ ဝွေꩻဗွေႏ တပဲ့တောႏဖုံႏနဝ်ꩻ အဝ်ႏကလွေꩻဒါႏ ဝေင်ꩻယေရုသလမ်ႏ တဖူꩻတန်လောင်းသွူ။ ဗွေႏယေသျု အဝ်ႏကျွꩻလွေꩻငါရီး တပဲ့တောႏဖုံႏ ဆꩻငါတဲင် အဝ်ႏမာꩻသင်ႏစွဉ်ႏ အငဝ်းနဝ်ꩻသွူ။ လိုꩻဖုံႏ ကအဝ်ႏလွေꩻလွဉ်ꩻ ဝွေꩻဗွေႏဆꩻချာ သားဖုံႏနဝ်ꩻ အဝ်ႏငမ်းသꩻထာꩻဖုံႏသွူ။ ဗွေႏယေသျု ဟဲ့ꩻဗော့ꩻဖျင် တပဲ့တောႏ တဆီနီဖြာꩻအထျꩻတဲင် ဒေါ့ꩻနယ်ဖေႏ ဝွေꩻဗွေႏ ကအီႏထွာလွဉ်ဒါႏ ခရာႏနဝ်ꩻသွူ။ 33ဝွေꩻဗွေႏ ဒေါ့ꩻနယ်ဖေႏ ဝွေꩻသီး၊ “နာႏသွော့၊ နီအဝ်ႏထင်ႏလွေꩻ ဝေင်ꩻယေရုသလမ်ႏနဝ်ꩻကို လိုꩻပိုခိုနဝ်ꩻ အီႏခံႏဗာႏ ဝင်ꩻဆွမ်ꩻအပ်ဖေႏ ယဇ်ပရောဟိတ်တန်ဖုံႏ တွမ်ႏကျမ်ꩻဒါႏဆရာႏဖုံႏ စူကိုသွူ။ ဝွေꩻသီး အီႏစီႏရင်ႏ ဖေႏဝွေꩻထာꩻသီတံႏ၊ ထွူတဲင် ဝွေꩻနဝ်ꩻ အပ်ထိုꩻဖေႏ လိုꩻမျိုꩻလင် စူကိုနဝ်ꩻသွူ။ 34အီႏပျက်သွမ်ꩻဝွေꩻ၊ ပထိုလူးဝွေꩻ၊ တွဲႏဝွေꩻတဲင် မာꩻသီထိုꩻဝွေꩻသွူ။ ကွဲႏတွော့ꩻ သွံနီꩻထွိုင်ႏလဲဉ်းထိုꩻ ဝွေꩻအီႏထွိုင်ႏမွန်လွဉ် ချာယင်း” နုဲင်းနဝ်ꩻသွူ။
ယာကုပ်တွမ်ႏယောဟန်ကွီ
(မတဲ ၂၀:၂၀–၂၈)
35နဝ်ꩻထွူ ဇေဗေဒဲပိုခို ယာကုပ်တွမ်ႏ ယောဟန်နဝ်ꩻ လွဉ်ထေ့ ဗွေႏယေသျုထျꩻသွူ။ ဝွေꩻသီးဒေါ့ꩻ၊ “ဆရာႏ၊ နီမဉ်အွဉ်ႏနီဗွေႏ မာꩻဖေႏနီတာႏ တစွိုး” နုဲင်းနဝ်ꩻသွူ။ 36ဗွေႏယေသျုရီ ဝွေꩻသီး၊ “တမုဲင်ꩻဟောင်း” နုဲင်းနဝ်ꩻသွူ။
37ဝွေꩻသီးလဝ်းချာ၊ “နီဗွေႏ မဉ်ႏအုံလင်ꩻလူး နီဗွေႏပလ္လင်ႏလောင်း နီဗွေႏ ဘွုန်ꩻသရေႏတောႏ ခမ်းနဲင်ႏငံႏကိုချိန်ႏနဝ်ꩻ၊ နီမဉ်အွဉ်ႏနီဗွေႏ ဖေႏအုံလင်ꩻနီ စွဉ်ႏနီဗွေႏ တဖြာꩻနဝ်ꩻ အထွေဖဲ့ꩻတွော့ꩻ တဖြာꩻနဝ်ꩻ အစေႏဖဲ့ꩻ” နုဲင်းနဝ်ꩻသွူ။ 38#လု ၁၂:၅၀။ ဗွေႏယေသျု ဒေါ့ꩻဖေႏဝွေꩻသီး၊ “သီအဝ်ႏကွီတမုဲင်ꩻနဝ်ꩻ သီတသေတဝ်းသွူ။ သီအွꩻနွောင်ꩻနေ ခွေကအွꩻဗာႏဒါႏ ထာꩻဒုက္ခတကောက်ꩻ နဝ်ꩻဟောင်း။ သီခံႏနွောင်ꩻနေ ခွေကအီႏ ခံႏဗာႏဒါႏ ဗတ္တိဇံႏ အနယ်ꩻနဝ်ꩻဟောင်း” နုဲင်းနဝ်ꩻသွူ။ 39ဝွေꩻသီးလဝ်းချာ၊ “နီခံႏနွောင်ꩻဒျာႏ” နုဲင်းနဝ်ꩻသွူ။
ဗွေႏယေသျု ဒေါ့ꩻဖေႏဝွေꩻသီး၊ “ခွေကအွꩻဗာႏဒါႏ တကောက်ꩻနဝ်ꩻ သီအီႏအွꩻဗာႏမွေးတဲင် ခွေကအီႏခံႏဗာႏဒါႏ ဗတ္တိဇံႏအနယ်ꩻနဝ်ꩻ သီအီႏခံႏဗာႏနဝ်ꩻသွူ။ 40ကွဲႏတွော့ꩻ၊ ပါꩻကအီႏအုံလင်ꩻဗာႏ ခွေစူထွေဖဲ့ꩻတွမ်ႏ စူစေႏဖဲ့ꩻနဝ်ꩻ ခွေလွိုက်ခွင်ꩻ အဲဉ်ထဝ်းသွူ။ ခင်ႏလမ်းယိုနဝ်ꩻ ထွာဒျာႏ ဗွေႏဘုရာꩻ ကအီႏဖေႏဒျာႏ ပါꩻဖုံႏ ဝွေꩻဗွေႏ ကအဝ်ႏဖျင်ရဲဉ်ꩻ သေꩻခါꩻဒါႏ ဝွေꩻသီးတာႏ” နုဲင်းနဝ်ꩻသွူ။
41တမန်ႏတောႏ အလင်တဆီဖြာꩻ ထွိုင်ႏဟွိုန် နဝ်ꩻခရာႏချိန်ႏ ဝွေꩻသီး သလျားလွဉ်စွဉ်ႏ ယာကုပ်တွမ်ႏ ယောဟန်နဝ်ꩻသွူ။ 42#လု ၂၂:၂၅၊ ၂၆။ နဝ်ꩻမꩻ ဝွေꩻသီး ကားကအဝ်ႏနဝ်ꩻ ဝွေꩻဗွေႏ ဟဲ့ꩻစုဗူႏထေ့ ဝွေꩻဗွေႏထျꩻတဲင်ဒေါ့ꩻ၊ “သီအဝ်ႏသေဒျာႏ ဘုရာꩻတရာꩻအဲဉ်ထဝ်းသားသားနဝ်ꩻ အဝ်ႏစဉ်ꩻစာꩻဒျာႏ အီႏအုပ်စိုꩻ ဝွေꩻသီးလောင်းတဲင် ခေါင်းဆောင်ဖုံႏနဝ်ꩻ အဝ်ႏဗွေတွမ်ႏ တန်ꩻခိုꩻနဝ်ꩻသွူ။ 43#မ ၂၃:၁၁၊ မာ ၉:၃၅၊ လု ၂၂:၂၆။ ကွဲႏတွော့ꩻ သီအချင်ꩻချင်ꩻနဝ်ꩻ အနယ်ꩻဗွိုန်ဗာႏတဝ်း နုဲင်းယိုသွူ။ သီတဖြာꩻ မဉ်ႏမဉ်ထွာ အတန်သွတ်ꩻနဝ်ꩻ သီအီႏထွာဗာႏ လိုꩻကအဝ်ႏကုဲင်သားဖုံႏ အသွဉ်းနဝ်ꩻသွူ။ 44နဝ်ꩻမꩻ သီကိုအဖြာꩻ မဉ်ႏမဉ်ထွာ အရီးသွတ်ꩻနဝ်ꩻ သီအီႏထွာဗာႏဒျာႏ လိုꩻကားကအဝ်ႏ အသွဉ်းသွူ။ 45လိုꩻပိုခိုမဉ်ႏတဲ့ အီႏထွဉ်ႏအံႏဝင်ꩻတွော့ꩻ ကျွꩻလွဉ် တမွေးတဝ်းသွူ၊ အီႏဖေႏဝွေꩻအသက် အီႏဖြေꩻချာ လိုꩻအာဖုံႏတွော့ꩻ ဝွေꩻကျွꩻလွဉ် အီႏခံႏသွဉ်းဖေႏဒျာႏ” နုဲင်းနဝ်ꩻသွူ။
ဗွေႏယေသျုလုမ်ꩻလာꩻဟဝ်ဖေႏလိုꩻမဲ့ခေ့ꩻဗာတိမဲ
(မတဲ ၂၀:၂၉–၃၄။ လုကာ ၁၈:၃၅–၄၃)
46ဝွေꩻသီးဖျော်လွဉ် ဝေင်ꩻယေရိခေါတဲင် နုဲင်းဗွေႏယေသျု တွမ်ႏတပဲ့တောႏဖုံႏ အဝ်ႏထန်ႏလွေꩻ တွမ်ႏလိုꩻစွိုꩻတဖုံႏနဝ်ꩻ တိမဲပိုခို ထာꩻကွီအံႏသား လိုꩻမဲ့ခေ့ꩻတဖြာꩻ အမဉ်ꩻကဟဲ့ꩻဒါႏ ဗာတိမဲ အဝ်ႏအုံလင်ꩻထာꩻ တဖူꩻတန်ထျꩻနဝ်ꩻသွူ။ 47ဝွေꩻထွိုင်ႏဟွိုန် ထွာဒျာႏ နာဇရဲစ်ဝေင်ꩻသား ဗွေႏယေသျုနဝ်ꩻ ဝွေꩻခြောဝ်စစွဉ်ႏ၊ “ဒါဝိဒ်ပိုခို ဗွေႏယေသျု၊ သညင်ꩻဗဲင်း ခွေသွဉ်းမွိုင်” နုဲင်းနဝ်ꩻသွူ။
48လိုꩻအာဖုံႏ ခွန်းနယ်ꩻဝွေꩻတဲင် ဒေါ့ꩻနယ်ဝွေꩻ ဖေႏကအုံတေ့ꩻတေ့ꩻ ထာꩻနဝ်ꩻသွူ။ ကွဲႏတွော့ꩻ ဝွေꩻကယိန်းခြောင် သင်ႏသန်ထဲင်း၊ “ဒါဝိဒ်ပိုခို၊ သညင်ꩻဗဲင်း ခွေသွဉ်း” နုဲင်းနဝ်ꩻသွူ။
49ဗွေႏယေသျု အုံထွိုင်ႏတဲင်ဒေါ့ꩻ၊ “ဟဲ့ꩻသွော့ဝွေꩻဟုဲင်း။
နဝ်ꩻမꩻ ဝွေꩻသီးဟဲ့ꩻ လိုꩻမဲ့ခေ့ꩻနဝ်ꩻသွူ။ ဝွေꩻသီးဒေါ့ꩻ၊ “အွဉ်ႏခွꩻခွꩻသꩻဟုဲင်း။ ထွိုင်ႏဟုဲင်း၊ ဝွေꩻဗွေႏ အဝ်ႏဟဲ့ꩻနာꩻ” နုဲင်းနဝ်ꩻသွူ။
50နဝ်ꩻမꩻ ဝွေꩻနုဲင်ႏလင်ꩻ ဝွေꩻဆဲင်ꩻတန် ပကျောက်ꩻထွိုင်ႏတွော့ꩻ လွဉ်ထေ့ ဗွေႏယေသျုထျꩻ နဝ်ꩻသွူ။
51ဗွေႏယေသျုရီဝွေꩻ၊ “နာꩻတာႏ နာꩻမဉ်အွဉ်ႏခွေ မာꩻဖေႏ တမုဲင်ꩻဟောင်း” နုဲင်းနဝ်ꩻသွူ။
လိုꩻမဲ့ခေ့ꩻ လဝ်းချာ၊ “ဆရာႏ ခွေမဉ်ထီႏဖျင်ယင်းထာꩻ တလဲင်ႏ” နုဲင်းနဝ်ꩻသွူ။
52ဗွေႏယေသျု ဒေါ့ꩻဖေႏဝွေꩻ၊ “လွေꩻဟုဲင်း။ နာꩻထာꩻယွုမ်းနဝ်ꩻ မာꩻဟဝ်လဲဉ်းနာꩻ” နုဲင်းနဝ်ꩻသွူ။
တလဲင်ႏချင်ꩻ ဝွေꩻထီႏနွောင်ꩻချာယင်းတဲင် လွေꩻလွဉ်ꩻစွဉ်ႏ ဗွေႏယေသျု တဖူꩻလောင်းနဝ်ꩻသွူ။
ទើបបានជ្រើសរើសហើយ៖
မာကု 10: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.