လုကာ 7
7
ဗွေႏယေသျုလုမ်ꩻလာꩻမာꩻဟဝ်ဖေႏရောမစဲ့ꩻပိုႏတန်တဖြာꩻအသွဉ်း
(မတဲ ၈:၅–၁၃)
1ဗွေႏယေသျု ဒေါ့ꩻဖေႏ လိုꩻဖုံႏနုဲင်းယို ကားကအဝ်ႏ ထွိုင်ႏထွူ ဝွေꩻဗွေႏလွေꩻ ဝေင်ꩻကပေရနောင်နဝ်ꩻသွူ။ 2နဝ်ꩻကိုနဝ်ꩻ ရောမစဲ့ꩻပိုႏတန်တဖြာꩻ ဝွေꩻကရက်ငါႏ အသွဉ်း အဝ်ႏတဖြာꩻသွူ။ ပါꩻခိုနဝ်ꩻ အဝ်ႏဆာတဝ်ထာꩻ အီႏဗော့ꩻသီသွူနဝ်ꩻသွူ။ 3စဲ့ꩻပိုႏထွိုင်ႏဟွိုန် ဗွေႏယေသျု ခရာႏနဝ်ꩻ ဝွေꩻအွဉ်ႏစွꩻလွေꩻ ဂျုးလိုꩻတန်ဖုံႏ ဖေႏကတောင်ꩻပြန်ႏ ဝွေꩻဗွေႏ ဖေႏကလွဉ် လုမ်ꩻလာꩻဖေႏ ဝွေꩻအသွဉ်းနဝ်ꩻသွူ။ 4ဝွေꩻသီးလွဉ်ထေ့ ဗွေႏယေသျုထျꩻတဲင် တွမ်ႏသွိုန်ႏပါသꩻပါ တောင်ꩻပြန်ႏစွဉ်ႏ ဝွေꩻဗွေႏသွူ၊ “ပါꩻခိုယိုနဝ်ꩻ ထွိုက်တန်ႏမွေးစွဉ်ႏ နီဗွေႏထာꩻစွဲကိုသွူ။ 5ဝွေꩻနဝ်ꩻ ရက်နီလိုꩻမျိုꩻတဲင် နီတာႏနဝ်ꩻ ဝွေꩻနမ်း တယ်ႏဖေႏလဲဉ်း တရာꩻစရွပ်တဖြုံႏ” နုဲင်းနဝ်ꩻသွူ။
6နဝ်ꩻမꩻ ဗွေႏယေသျု ကျွꩻလွေꩻငီꩻစွဉ်ႏ ဝွေꩻသီးသွူ။ ဝွေꩻဗွေႏ အဝ်ႏတပေါ့ꩻညာꩻတဝ်း စွဉ်ႏလမ်းချိန်ႏနဝ်ꩻ စဲ့ꩻပိုႏအွဉ်ႏစွꩻလွေꩻ အသွꩻဖုံႏ ဖေႏကဒေါ့ꩻနယ် ဝွေꩻဗွေႏ၊ “ဗွေႏ၊ တွမ်ႏမာꩻယပ်ꩻမွိုန်းဒွုမ် နီဗွေႏနမ်းဟုဲင်း။ နီဗွေႏ ကအီႏကျွꩻလွဉ်သော့ꩻ ခွေသွဉ်းလမ်းကိုနဝ်ꩻ ခွေသွဉ်း တခံႏထွိုက်တဝ်းသွူ။ 7ခွေသွဉ်းထင်း ခွေသွဉ်းနမ်း ကအီႏလွဉ်ထေ့ နီဗွေႏထျꩻငါတဲ့ ထွိုက်တန်ႏတဝ်း နေနေသွူ။ ဖေႏနေးငါ အမိန်းငါတဲ့ ခွေသွဉ်း အသွဉ်းယို အီႏဟဝ်ရေꩻဒျာႏသွူ။ 8ခွေသွဉ်းတဲ့ အဝ်ႏထွာ အာႏဏာႏ အထိုꩻသွတ်ꩻသားဖုံႏ စူဆꩻလ အာႏဏာႏပဲင်ႏသား တဖြာꩻတဲင် ခွေသွဉ်း ဆꩻလနဝ်ꩻတဲ့ ခွေသွဉ်း စဲ့ꩻသားဖုံႏ အဝ်ႏသွူ။ ခွေသွဉ်းဖေႏအမိန်း၊ အဖြာꩻယို၊ ‘လွေꩻ’ ဟုဲင်းနုဲင်းနဝ်ꩻနဝ်ꩻ ဝွေꩻလွေꩻဗာႏသွူ။ ခွေသွဉ်းဖေႏအမိန်း အဖြာꩻနဝ်ꩻ၊ ‘လွဉ်ဟုဲင်း’ နုဲင်းနဝ်ꩻတဲ့ ဝွေꩻလွဉ်ဗာႏ၊ နဝ်ꩻမꩻ ခွေသွဉ်းမဉ်ႏမိန်းဖေႏ သွဉ်းအဖြာꩻ၊ ‘မာꩻယိုဟုဲင်း’ တဲင်ဝွေꩻမာꩻဗာႏ” နုဲင်းနဝ်ꩻသွူ။
9ဗွေႏယေသျု ထွိုင်ႏဟွိုန် ငဝ်းနုဲင်းယိုချိန်ႏနဝ်ꩻ ဝွေꩻဗွေႏ အံႏဖြာႏငါႏသွူ။ ဝွေꩻဗွေႏ ခွယ်လဲ့ချာတဲင် ဒေါ့ꩻဖေႏ လိုꩻစွိုꩻဖုံႏ ကအဝ်ႏလွေꩻလွဉ်ꩻဒါႏ ဝွေꩻဗွေႏ၊ “ခွေဒေါ့ꩻဖေႏသီ၊ ဣသရေး လိုꩻမျိုꩻဖုံႏကိုစွဉ်ႏတဲ့ ထာꩻယွုမ်း ဗွိုန်နုဲင်းယိုနဝ်ꩻ မုဲင်ꩻခါတဲ့ ခွေတထီႏဖိုတဝ်း” နုဲင်းနဝ်ꩻသွူ။
10သတင်ꩻဖေႏသားဖုံႏ သဲင်ꩻချာ စဲ့ꩻပိုႏအလမ်းတဲင် ထီႏဗာႏစွဉ်ႏ ဝွေꩻအသွဉ်း ဟဝ်ရေꩻလဲဉ်း နဝ်ꩻသွူ။
ဗွေႏယေသျုမာꩻထွိုင်ႏမွန်ချာဖေႏမဲမုဲင်းမူႏတဖြာꩻပိုခို
11ဆုဲင်ꩻတညတဝ်း ဗွေႏယေသျု ထန်ႏလွေꩻ ဝေင်ꩻတဖြုံႏမဉ်ꩻဒါႏ နာအိနနဝ်ꩻတဲင် ဝွေꩻဗွေႏ တပဲ့တောႏဖုံႏတွမ်ႏ လိုꩻစွိုꩻအာဖုံႏနဝ်ꩻ အဝ်ႏပါလွေꩻငီꩻစွဉ်ႏ ဝွေꩻဗွေႏသွူ။ 12နုဲင်းဝွေꩻဗွေႏ သဲစ်ကဖျော်လွေꩻ ဝေင်ꩻတခါꩻတန်ငွါနဝ်ꩻ မသာႏပသာသား တစွိုꩻ အဝ်ႏထန်ႏလွဉ်နဝ်ꩻသွူ။ လိုꩻသီယိုနဝ်ꩻ ထွာဒျာႏ မဲမုဲင်းမူႏတဖြာꩻ အပိုခိုအဝ်ႏ နဝ်ꩻတဖြာꩻလွုမ်ꩻတဲင် လိုꩻအာတစွိုꩻ အဝ်ႏဝေင်ꩻနဝ်ꩻ ပသာလွဉ်ꩻ တွမ်ႏဝွေꩻမူႏ နဝ်ꩻသွူ။ 13ဗွေႏထွိုင်ႏထီႏ ဝွေꩻမူႏနဝ်ꩻ ဝွေꩻမူႏတာႏ ဝွေꩻဗွေႏသꩻကို အဝ်ႏဗွေစွဉ်ႏ ထာꩻသညင်ꩻတဲင် ဝွေꩻဗွေႏဒေါ့ꩻဖေႏ ဝွေꩻမူႏ၊ “တွမ်ႏငွိုးမွိုန်းဒွုမ်ထာꩻ” နုဲင်းနဝ်ꩻသွူ။ 14နဝ်ꩻထွူ ဝွေꩻဗွေႏ ထောင်ကာႏလွေꩻတဲင် ခွိုင်းစွဉ်ႏ မျင်ꩻဖောင်ႏတွော့ꩻ လိုꩻခို ကအဝ်ႏထမ်ႏလွေꩻ မသာႏနဝ်ꩻ အုံထွိုင်ႏစွဉ်ႏသွူ။ ဗွေႏယေသျုဒေါ့ꩻဖေႏ၊ “ပါꩻခိုပေႏ၊ ခွေဖေႏနာꩻအမိန်း ထွိုင်ႏဟုဲင်း” နုဲင်းနဝ်ꩻသွူ။ 15ပါꩻသီနဝ်ꩻ အုံထွိုင်ႏတဲင် ဒေါ့ꩻစစွဉ်ႏထာꩻတွော့ꩻ ဝွေꩻနဝ်ꩻ ဗွေႏယေသျု အပ်ဖေႏချာစွဉ်ႏ ဝွေꩻအမွိုးနဝ်ꩻသွူ။
16ဝွေꩻသီး ကားကအဝ်ႏနဝ်ꩻ အဝ်ႏဗွေစွဉ်ႏ ထာꩻငမ်းသꩻတဲင် အုပ်ꩻထင်ႏစွဉ်ႏ ဗွေႏဘုရာꩻ ဂွုဏ်ႏတောႏသွူ။ ဝွေꩻသီးဒေါ့ꩻ၊ “ပရောဖဲစ်တန် တပါꩻ ပေါႏလွဉ်သော့ꩻလဲဉ်း နီအကို။ ကအီႏကယ်ႏ ဝွေꩻဗွေႏ လိုꩻဖုံႏနဝ်ꩻ ဗွေႏဘုရာꩻ ကျွꩻလွဉ်လဲဉ်း” နုဲင်းနဝ်ꩻသွူ။
17ဗွေႏယေသျု သတင်ꩻယိုနဝ်ꩻ ကျော်ႏစွစ်ꩻစဲစ်ꩻစွဉ်ႏ တခမ်းလွုမ်းတွမ်ႏ ဟံႏနယ်ႏ အသောင်အရင်ꩻနဝ်ꩻသွူ။
အဝ်ႏဗတ္တိဇံႏဆရာႏယောဟန်ထျꩻသတင်ꩻဖေႏသား
(မတဲ ၁၁:၂–၁၉)
18ပွိုင်းဝွို့တွမ်ႏ ယိုဖုံႏခရာႏ ကားကအဝ်ႏနဝ်ꩻ ယောဟန် တပဲ့ဖုံႏ အွဉ်ႏဒေါ့ꩻနယ်ဝွေꩻ၊ ဝွေꩻသီးအကို ဝွေꩻဟဲ့ꩻ လိုꩻဝင်ꩻနီတွော့ꩻ 19ဝွေꩻသီးနဝ်ꩻ အွဉ်ႏစွꩻလွေꩻထေ့ ဗွေႏဘုရာꩻထျꩻတဲင် အွဉ်ႏရီဝွေꩻဗွေႏ၊ “နီဗွေႏနဝ်ꩻထွာ ဗွေႏအပါꩻ ယောဟန်ကအဝ်ႏဒေါ့ꩻ အီႏကျွꩻလွဉ်ဒါႏ အပါနဝ်ꩻနဲ့ဟောင်း၊ မဉ်ႏတမွေးတဝ်း နီအီႏအဝ်ႏမောင်ꩻဗာႏဒွိုန်းက အလင်တဖြာꩻနဲ့ဟောင်း” နုဲင်းနဝ်ꩻသွူ။
20ဝွေꩻသီး ထွိုင်ႏဖျော်လွဉ် ဗွေႏယေသျုထျꩻနဝ်ꩻ ဝွေꩻသီးဒေါ့ꩻ၊ “ဗတ္တိဇံႏ ဆရာႏယောဟန် အွဥ်ႏစွꩻလွဉ်နီ ဖေႏကရီ နီဗွေႏနဝ်ꩻထွာ ဗွေႏအပါꩻ ဝွေꩻကအဝ်ႏဒေါ့ꩻဒါႏ အီႏကျွꩻလွဉ်နဝ်ꩻနဲ့ဟောင်း၊ မဉ်ႏမွေးတဝ်း နီအီႏအဝ်ႏမောင်ꩻဗာႏက ပုဂ္ဂိုလ်ႏအလင် တပါꩻနဲ့ဟောင်း” နုဲင်းနဝ်ꩻသွူ။
21အချိန်ႏနဝ်ꩻနဝ်ꩻ ဗွေႏယေသျု အဝ်ႏလုမ်ꩻလာꩻ မာꩻဟဝ်ဖေႏ လိုꩻအာဖုံႏ အထာꩻဆာ၊ ရောႏဂါႏဖုံႏတွမ်ႏ လူꩻကုဲင်စောင်ꩻဖုံႏ အာငါႏတဲင် မာꩻဖေႏ လိုꩻမဲ့ခေ့ꩻဖုံႏ ဖေႏကထီႏချာနဝ်ꩻ အာငါႏသွူ။ 22#ဟေသျာ ၃၅:၅၊ ၆၊ ဟေသျာ ၆၁:၁။ ဝွေꩻဗွေႏ လဝ်းချာ ယောဟန် သတင်ꩻဖေႏသားဖုံႏ၊ “နုဲင်းသီကထီႏဗာႏလဲဉ်းတွော့ꩻ ကဟွိုန်ဗာႏလဲဉ်းဖုံႏနဝ်ꩻ သဲင်ꩻချာတဲင် ဒေါ့ꩻနယ်ဖေႏသွော့ ယောဟန်။ လိုꩻမဲ့ခေ့ꩻဖုံႏ ထီႏလွဉ်နွောင်ꩻလဲဉ်း၊ လိုꩻမာႏရေႏဖုံႏ ထောင်လွေꩻနွောင်ꩻလဲဉ်း၊ လိုꩻကခံႏစာꩻဗာႏ အတွတ်ꩻ ရောႏဂါႏသားဖုံႏ မာꩻကြောင်းစင်ဖေႏလဲဉ်းသွူ။ လိုꩻနားအွိုင်ဖုံႏ ဟွိုန်နွောင်ꩻလဲဉ်း၊ လိုꩻသီ ထွိုင်ႏမွန် လွဥ်ချာယင်းတဲင် သတင်ꩻဟဝ် တရာꩻနဝ်ꩻ ဟော်ꩻဖေႏလဲဉ်းသွူ လိုꩻကေန်ꩻခြောဖုံႏသွူ။ 23ပွိုင်းဝွို့တွမ်ႏ ခွေခရာႏ လိုꩻသင်ႏသရ ကကင်ꩻသားနဝ်ꩻ မင်္ဂလာႏအဝ်ႏငါႏ ခွိုင်းကားမုဲင်ꩻ” နုဲင်းနဝ်ꩻသွူ။
24ယောဟန် သတင်ꩻဖေႏသားဖုံႏ ထွိုင်ႏထန်ႏလွေꩻထွူ ယောဟန်ခရာႏနဝ်ꩻ ဗွေႏယေသျု ဒေါ့ꩻနယ်ဖေႏစစွဉ်ႏ လိုꩻဖုံႏ၊ “သီကထန်ႏလွေꩻထေ့ ယောဟန် ကန္တာရထာꩻခြာကိုချိန်ႏနဝ်ꩻ သီအဝ်ႏမောင်ꩻ အီႏထီႏတမုဲင်ꩻဟောင်း။ တလီꩻကမာꩻတသွိုး ထာꩻအီႏ နဝ်ꩻနဲ့ဟောင်း။ 25ဖေႏကထီႏဗာႏ တမုဲင်ꩻတွော့ꩻ သီထန်ႏလွေꩻဟောင်း။ လိုꩻခိုတဖြာꩻ ကွဉ်ကꩻ ခွမ်ꩻလာꩻတရေꩻ နဝ်ꩻနဲ့ဟောင်း။ လိုꩻကကွဉ်ကꩻ နုဲင်းနဝ်ꩻတွော့ꩻ ကအဝ်ႏအုံစံႏစာꩻ စေꩻစိန်ႏထာꩻနဝ်ꩻ မော့ꩻသော့ꩻဒျာႏ ဟော်နန်ꩻကိုဖုံႏသွူ။ 26သီမဉ်ထီႏ တမုဲင်ꩻတွော့ꩻ ထန်ႏလွေꩻဟောင်း။ ပရောဖဲစ်တပါꩻ နဲ့ဟောင်း၊ ဒေါ့ꩻနယ်ဖေႏသွော့ခွေ။ မွေးလဲဉ်းသွူ။ ကွဲႏတွော့ꩻ သီကထီႏဗာႏယိုနဝ်ꩻ တန်မျတ်ကယ်ꩻလဲဉ်းက ပရောဖဲစ်တပါꩻနဝ်ꩻသွူ။ 27#မိတ် ၃:၁။ ပွိုးယောဟန်နဝ်ꩻထွာ ပါꩻအဖြာꩻ လိတ်ကျမ်ꩻကို ကရိုꩻဒါႏ၊ ‘ဗွေႏဘုရာꩻမိန်း၊ နာꩻတာႏတဖူꩻ ဖေႏကဗွောင်နဝ်ꩻ ခွေအီႏအွဉ်ႏစွꩻငါရီးဖေႏနာꩻ ခွေသတင်ꩻဖေႏသား၊’ နုဲင်းနဝ်ꩻသွူ။ 28ဗွေႏယေသျု ဒေါ့ꩻသွုပ်ထဲင်း၊ “ခွေဒေါ့ꩻဖေႏသီ၊ ယောဟန်နဝ်ꩻထွာ တန်မျတ်ကယ်ꩻလဲဉ်း လိုꩻသက် ကအဝ်ႏမွန်လဲဉ်းသားဖုံႏ ကားကအဝ်ႏသွူ။ ကွဲႏတွော့ꩻ ဗွေႏဘုရာꩻ ခမ်းထီကို အပေႏသွတ်ꩻ တဖြာꩻနဝ်ꩻ တန်ကယ်ꩻလဲဉ်းက ယောဟန်” နုဲင်းနဝ်ꩻသွူ။
29 #
မ ၂၁:၃၂၊ လု ၃:၁၂။ လိုꩻဖုံႏ ကားကအဝ်ႏနဝ်ꩻ ဟွိုန်စွဉ်ႏ ဝွေꩻဗွေႏငဝ်းသွူ။ ဝွေꩻသီးတွမ်ႏ ကဉ်းအာအာ အခွဉ်ႏကောက်သားဖုံႏနဝ်ꩻ ထွာလိုꩻအဖြာꩻ ကလွောက်ꩻနာႏ ဗွေႏဘုရာꩻ ထာꩻစွို့ꩻစွဉ်ႏ တရာꩻတွမ်ႏ အလိုႏတောႏတဲင် ခံႏလဲဉ်း ဗတ္တိဇံႏ ထီမင်္ဂလာႏ ယောဟန်ထျꩻဖုံႏသွူ။ 30ကွဲႏတွော့ꩻ ဖါရိသဲဖုံႏတွမ်ႏ ကျမ်ꩻဒါႏဆရာႏဖုံႏနဝ်ꩻ ပွိုးဝွေꩻသီးနမ်း ပယ်ႏထိုꩻ ဗွေႏဘုရာꩻ အကျံႏတောႏ အတွက်တဲင် တခံႏထူႏတဝ်း ဗတ္တိဇံႏ ထီမင်္ဂလာႏ ယောဟန်ထျꩻဖုံႏသွူ။
31ဗွေႏယေသျု ဒေါ့ꩻသွုပ်၊ “ဟန်ႏနီꩻယို လိုꩻဖုံႏနဝ်ꩻ ခွေအီႏတဲက်တွိုင်ꩻ ဖေႏနွောင်ꩻ စွဉ်ႏတမုဲင်ꩻဟောင်း။ ဝွေꩻသီးနဝ်ꩻ ဗွိုန်တမုဲင်ꩻဟောင်း။ 32ဝွေꩻသီးနဝ်ꩻ ဗွိုန်ဒျာႏ လိုꩻပေႏဖုံႏ အုံလင်ꩻသော့ꩻထာꩻ ဆေꩻတန်ꩻခါႏကိုနဝ်ꩻသွူ။ တစွိုꩻနဝ်ꩻ ခြောဝ်အလင်တစွိုꩻ၊ ‘သီတာႏ နီအဝ်ႏဒုံႏအူဖေႏ ပွယ်ꩻမင်္ဂလာႏ သချင်ꩻစွဉ်ႏတဲ့ သီအီႏတကျူႏတဝ်းထာꩻ။ နီအဝ်ႏရွစ်ဖေႏ မသာႏသချင်ꩻဖုံႏစွဉ်ႏတဲ့ သီတငွိုးတဝ်း။ 33ဗတ္တိဇံႏဆရာႏ ယောဟန်ကျွꩻလွဉ်၊ ဝွေꩻသျောင်ႏကံ ထာꩻအံႏ၊ အွꩻတဝ်း ဝုဲင်တွော့ꩻ သီရိုꩻ၊ ‘ဝွေꩻနဝ်ꩻ လူꩻကုဲင်တဗာႏ အဝ်ႏစောင်ꩻသော့ꩻ ဝွေꩻအကို၊’ နုဲင်းနဝ်ꩻသွူ။ 34လိုꩻပိုခို ကျွꩻလွဉ်တဲင် ဝွေꩻထွိုင်ႏအံႏအွꩻနဝ်ꩻ သီဒေါ့ꩻ၊ ‘ထွားပါꩻယိုမွိုင်၊ ဝွေꩻနဝ်ꩻထွာဒျာႏ လိုꩻထာꩻအံႏတန်တွော့ꩻ အွꩻဝုဲင်၊ လဲင်ꩻအံႏအွꩻငီꩻ နေးစွဉ်ႏအသွꩻ အခွဉ်ႏကောက်သားဖုံႏတွမ်ႏ လိုꩻဝင်ꩻကပယ်ႏ ထန်ႏသားအလင်ဖုံႏ’ နုဲင်းနဝ်ꩻသွူ။ 35ကွဲႏတွော့ꩻ ဗွေႏဘုရာꩻ ဉာဏ်ႏပညာႏနဝ်ꩻ ထွာအဝ်ႏအွဉ်ႏနယ်ဖေႏ လိုꩻကလက္ခံႏဒါႏ ဉာဏ်ႏပညာႏသားဖုံႏ ကားကအဝ်ႏနဝ်ꩻ အီႏထွာအမဲဉ်ႏ” နုဲင်းနဝ်ꩻသွူ။
ဗွေႏယေသျုအဝ်ႏဖါရိသဲသိမုန်လမ်း
36ဖေႏကအံႏဒဲဉ်ဟာ တွမ်ႏဝွေꩻနဝ်ꩻ ဖါရိသဲတဖြာꩻ ဖစ်ဟဲ့ꩻ ဗွေႏယေသျုတဲင် ဗွေႏယေသျု လွေꩻဝွေꩻ လမ်းတွော့ꩻ အီႏအံႏထာꩻအံႏနဝ်ꩻ အုံလင်ꩻသွူ။ 37#မ ၂၆:၇၊ မာ ၁၄:၃၊ ယော ၁၂:၃။ ဝေင်ꩻနဝ်ꩻအကို ပါꩻမူႏတဖြာꩻနဝ်ꩻ အဘဝ အုံအဝ်ႏဗွေစွဉ်ႏ အပဲစ်ဖုံႏသွူ။ ဗွေႏယေသျု အဝ်ႏအံႏထာꩻအံႏ ဖါရိသဲလမ်းကိုနဝ်ꩻ ဝွေꩻမူႏဟွိုန်၊ နဝ်ꩻမꩻ ဝွေꩻမူႏအီလွဉ် နမ်းမန်ꩻဟွမ် ကအဝ်ႏဗွေသော့ꩻဒါႏ လုံးဗွာကောင်ႏကို တဖြုံႏတဲင်၊ 38အုံထွိုင်ႏ ဗွေႏယေသျုဆꩻချာ ဝွေꩻဗွေႏ ခင်ႏထျꩻတွော့ꩻ ငွိုးထာꩻတဲင် ဝွေꩻမူႏမဲ့ထီဖုံႏနဝ်ꩻ စဝ်ႏစွဉ်ႏ ဝွေꩻဗွေႏခင်ႏနဝ်ꩻသွူ။ နဝ်ꩻထွူ ဝွေꩻမူႏနဝ်ꩻ စွဉ်ႏဝွေꩻကလူꩻ ဒွိုတ်ꩻသဲင်ထိုꩻဖေႏ ဝွေꩻဗွေႏခင်ႏတဲင် နို့ꩻစွဉ်ႏ ခင်ႏဖုံႏတွော့ꩻ နမ်းမန်ꩻဟွမ်နဝ်ꩻ ထောက်ꩻလူးဖေႏစွဉ်ႏ ခင်ႏဖုံႏသွူ။ 39ဖါရိသဲထွိုင်ႏထီႏ နုဲင်းယို ဝွေꩻဒေါ့ꩻချာ အသꩻကို၊ ပါꩻခိုယို မဉ်ႏထွာမွေး ပရောဖဲစ်တပါꩻ ပါꩻမူႏကခွေါင်းဒါႏ ဝွေꩻခင်ႏနဝ်ꩻ ထွာပါꩻမူႏနုဲင်းမုဲင်ꩻ ဝွေꩻအီႏသေဗာႏ။ ဝွေꩻမူႏ ဘဝသက်မွန် အုံအဝ်ႏဗွေစွဉ်ႏ အပဲစ်စားမုဲင်ꩻနဝ်ꩻ ဝွေꩻအီႏသေဗာႏ” နုဲင်းနဝ်ꩻသွူ။
40ဗွေႏယေသျု ဒေါ့ꩻထန်ႏဖေႏဝွေꩻ၊ “ခွေအဝ်ႏလိုႏဒေါ့ꩻနယ်နာꩻ တစွိုး” နုဲင်းနဝ်ꩻသွူ။
ဝွေꩻဒေါ့ꩻ၊ “မွေးသွူ။ ဆရာႏ၊ ဒေါ့ꩻနယ်ဖေႏ ခွေသွဉ်းဟုဲင်း” နုဲင်းနဝ်ꩻသွူ။
41ဗွေႏယေသျုဒေါ့ꩻစဖေႏ၊ “နဝ်ꩻကိုနဝ်ꩻ ပါꩻဝင်ꩻနီ အဝ်ႏမော့ꩻနီးရွဉ်အေႏ ကောဖေႏသား ထျꩻသွူ၊ တဖြာꩻနဝ်ꩻမော့ꩻနီး ရွဉ်ယာႏဒင်္ဂါꩻ ငတ်ꩻရျာꩻတဲင် အလင်တဖြာꩻနဝ်ꩻ မော့ꩻနီး ဒင်္ဂါꩻအဗီႏ ငတ်ꩻဆီသွူ။ 42ဝွေꩻသီးနဝ်ꩻ တဖြော်ချာ နွောင်ꩻတဝ်းဝွေꩻ။ နဝ်ꩻမꩻ ဝွေꩻအွဉ်ႏပြေႏထိုꩻဖေႏ ဝင်ꩻနီလွုမ်းနီးသွူ။ တွိုႏနဝ်ꩻ အဖြာꩻမုဲင်ꩻ အီႏရက်လွို ဝွေꩻနဝ်ꩻဟောင်း” နုဲင်းနဝ်ꩻသွူ။
43သိမုန်လဝ်းဖြေႏချာ၊ “ခွေသွဉ်းထင်း အဖြာꩻနီးတန် ကပြေႏထိုꩻသား” နုဲင်းနဝ်ꩻသွူ။
ဗွေႏယေသျုဒေါ့ꩻ၊ “နာꩻဒေါ့ꩻနဝ်ꩻမွေး” နုဲင်းနဝ်ꩻသွူ။ 44တွိုႏနဝ်ꩻ ဝွေꩻဗွေႏ ခွယ်လဲ့ချာထေ့ ပါꩻမူႏနဝ်ꩻတဲင် ဒေါ့ꩻဖေႏသိမုန်၊ “နာꩻထီႏနေ ပါꩻမူႏယိုဟောင်း။ ခွေကလွဉ်သော့ꩻ နာꩻလမ်းကိုနဝ်ꩻ နာꩻတဖေႏတဝ်းခွေ ဟွာႏအီခင်ႏတာႏ ထီနဝ်ꩻသွူ။ ကွဲႏတွော့ꩻ ပါꩻမူႏနဝ်ꩻ တွမ်ႏဝွေꩻမူႏမဲ့ထီ ပသေဖေႏခွေခင်ႏတဲင် တွမ်ႏဝွေꩻမူႏ ကလူꩻနဝ်ꩻ ဒွုတ်သဲင်ဖေႏ ခင်ႏဖုံႏသွူ။ 45နာꩻတနို့ꩻ ကျိုႏဆွုမ်ႏတဝ်းခွေ ကွဲႏတွော့ꩻ တယ်ႏခွေကလွဉ်ခါကာႏ ဝွေꩻမူႏ နို့ꩻခွေခင်ႏနဝ်ꩻ တဆွိုးတဝ်းသွူ။ 46ခွေသူႏ ကတူႏတာႏ နာꩻတဖေႏတဝ်း ခွေသံလွေင်နမ်းမန် ကွဲႏတွော့ꩻ ဝွေꩻမူႏနဝ်ꩻ တွမ်ႏနမ်းမန်ꩻဟွမ် ဆူလူးဖေႏလဲဉ်း ခွေခင်ႏဖုံႏသွူ။ 47ခွေဒေါ့ꩻဖေႏနာꩻ ဝွေꩻမူႏ အပဲစ်တန်ငါႏ စွဥ်ႏတဲ့ လွစ်ထိုꩻလဲဉ်းကျောင်ꩻ ဝွေꩻမူႏ အွဉ်ႏနယ် ကတန်ငါႏ မေတ္တာႏ သက်သေႏနဝ်ꩻသွူ။ ကွဲႏတွော့ꩻ ပါꩻမုဲင်ꩻအပဲစ် လွစ်ဆေ့ꩻတဲ့ အွဉ်ႏနယ်ဆေ့ꩻ မေတ္တာႏ” နုဲင်းနဝ်ꩻသွူ။
48တွိုႏနဝ်ꩻ ဗွေႏယေသျု မိန်းဖေႏပါꩻမူႏ၊ “နာꩻအပဲစ်လွစ်လဲဉ်း” နုဲင်းနဝ်ꩻသွူ။
49လိုꩻလင်ဖုံႏ ကအဝ်ႏအုံလင်ꩻ ထာꩻအံႏခွုံႏထျꩻနဝ်ꩻ ဝွေꩻသီး ဒေါ့ꩻဖေႏလို့ဝင်ꩻ၊ “ပါꩻယို ပါꩻနုဲင်းမုဲင်ꩻနဲ၊ လဲင်ꩻအွဉ်ႏစွꩻလွစ် နွောင်ꩻစွဉ်ႏအပဲစ် နုဲင်းမုဲင်ꩻဟောင်း” နုဲင်းနဝ်ꩻသွူ။
50ကွဲႏတွော့ꩻ ဗွေႏယေသျု မိန်းဖေႏပါꩻမူႏ၊ “နာꩻထာꩻယွုမ်းနဝ်ꩻ ကယ်ႏလဲဉ်းနာꩻ။ လွေꩻငိမ်ꩻချမ်ꩻ ခွꩻသွော့” နုဲင်းနဝ်ꩻသွူ။
ទើបបានជ្រើសរើសហើយ៖
လုကာ 7: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
