လုကာ 6
6
ရီပွိုင်းဝွို့တွမ်ႏဥပုသ်မွူးနီꩻခရာႏ
(မတဲ ၁၂:၁–၈။ မာကု ၂:၂၃–၂၈)
1 #
ဟော်ꩻ ၂၃:၂၅။ ဥပုသ်မွူးနီꩻ တနီꩻကိုနဝ်ꩻ ဗွေႏယေသျု အဝ်ႏထောင်ဖျတ် ကာႏလွေꩻသော့ꩻ ဗွူကလာꩻခြံဖုံႏ ယင်ဟန်ႏကိုနဝ်ꩻသွူ။ ဝွေꩻဗွေႏ တပဲ့တောႏဖုံႏနဝ်ꩻ ဖြွꩻဗွူကလာꩻခြီႏတွော့ꩻ ဝွေꩻသီး ပနျာႏသော့ꩻ အစူဖုံႏကိုတဲင် အံႏစွဉ်ႏ ဗွူကလာꩻခူꩻဖုံႏသွူ။ 2ဖါရိသဲဖုံႏ ယင်ဟန်ႏရီ၊ နီပညတ်ကျမ်ꩻကိုနဝ်ꩻရိုꩻ ဥပုသ်မွူးနီꩻကို သီတမာꩻဗာႏတဝ်း ထာꩻမာꩻနဝ်ꩻ ပွိုးတမုဲင်ꩻ သီမာꩻတွိုႏဟောင်း” နုဲင်းနဝ်ꩻသွူ။
3 # ၁သျာ ၂၁:၁–၆။ ဗွေႏယေသျု လဝ်းချာ ဝွေꩻသီး၊ “နုဲင်းဒါဝိဒ်တွမ်ႏ ဝွေꩻလိုꩻဖုံႏ ကဟို့ꩻခိုးထာꩻအံႏချိန်ႏ ဝွေꩻမာꩻ နုဲင်းမုဲင်ꩻနဝ်ꩻ သီတဖတ် ဗာႏဖိုတဝ်းဟောင်း။ 4#ဝိ ၂၄:၉။ ဝွေꩻနွို့လွေꩻသော့ꩻ ဗွေႏဘုရာꩻ လမ်းတောႏကို ထူႏတခိုး ကပူႏဇောႏဒါႏ ဗွေႏဘုရာꩻနဝ်ꩻတဲင် အံႏစွဉ်ႏတခိုးတွော့ꩻ တခိုးနဝ်ꩻ ဖေႏပါက ဝွေꩻလိုꩻဖုံႏသွူ။ ကွဲႏတွော့ꩻ ပေါႏလွိုသွူ ယဇ်ပရောဟိတ် တပါꩻနဝ်ꩻ ပါꩻမုဲင်ꩻတဖြာꩻ ပေါႏအံႏတခိုးနဝ်ꩻ ပွိုးဆန်ထိုꩻနီ ပညတ်ကျမ်ꩻအတွက်” နုဲင်းနဝ်ꩻသွူ။
5တဲင်ဗွေႏယေသျု အွဉ်ႏသွတ်ꩻအီ၊ “လိုꩻပိုခိုနဝ်ꩻ ထွာဒျာႏ ဥပုသ်မွူးနီꩻ အဗွေႏ” နုဲင်းနဝ်ꩻသွူ။
ပါꩻခိုတဖြာꩻစူတပင်သီမာႏရေႏ
(မတဲ ၁၂:၉–၁၄။ မာကု ၃:၁–၆)
6ဥပုသ်မွူးနီꩻ အလင်တနီꩻနဝ်ꩻ ဗွေႏယေသျု နွို့လွေꩻသော့ꩻ တရာꩻစရွပ် တဖြုံႏကိုတဲင် သွဉ်သင်ဖေႏစွဉ်ႏသွူ။ နဝ်ꩻကိုနဝ်ꩻ လိုꩻခိုစူပင်ထွေ သီမာႏရေႏ အဝ်ႏတဖြာꩻသွူ။ 7ဖေႏကစွဲꩻတရာꩻလꩻ ဗွေႏယေသျု မာꩻမာႏထာꩻနဝ်ꩻ ကျမ်ꩻဒါႏဆရာႏဖုံႏ ယင်ဟန်ႏတွမ်ႏ ဖါရိသဲဖုံႏ ယင်ဟန်ႏ အဝ်ႏမဉ်လꩻ အကျောင်ꩻခရာႏတစွိုး၊ နဝ်ꩻမꩻ ဝွေꩻဗွေႏ အီႏလုမ်ꩻလာꩻ မာꩻဟဝ်ဖေႏနေ ဥပုသ်မွူးနီꩻကို ဖေႏကထီႏနဝ်ꩻ ဝွေꩻသီးအဝ်ႏ ပွေါးထွားသွူ။ 8ကွဲႏတွော့ꩻ ဗွေႏယေသျု အဝ်ႏသေ ဝွေꩻသီး ထာꩻယူႏစဉ်ꩻစာꩻဖုံႏနဝ်ꩻမꩻ ဒေါ့ꩻဖေႏပါꩻခို၊ “အုံထွိုင်ႏတဲင် လွဉ်ငါယိုကိုဟုဲင်း” နုဲင်းနဝ်ꩻသွူ။ ပါꩻခိုနဝ်ꩻ ထွိုင်ႏတဲင် အုံထွိုင်ႏစွဉ်ႏ နဝ်ꩻကိုသွူ။ 9တွိုႏနဝ်ꩻ ဗွေႏယေသျု ဒေါ့ꩻဖေႏဝွေꩻသီး၊ “ခွေရီသီ၊၊ ကအီႏမာꩻထာꩻမာꩻ ဥပုသ်မွူးနီꩻကိုနဝ်ꩻ နီꩻပညတ်ကျမ်ꩻ ဖေႏနေနီ အခွင်ꩻဟောင်း၊ အီႏစွဲကိုဗာႏနဲ့၊ မဉ်ႏမွေးတဝ်း မာꩻဆာဗာႏနဲ့ဟောင်း။ အီႏကယ်ႏဗာႏ ပါꩻတဖြာꩻအသက်နဲ့၊ မဉ်ႏမွေးတဝ်း၊ အီႏယားကုဲင် ထိုꩻဗာႏနဲ့ဟောင်း” နုဲင်းနဝ်ꩻသွူ။ 10ဝွေꩻဗွေႏထွားခူ ဝွေꩻသီး ကားကအဝ်ႏထွူ၊ ဝွေꩻဗွေႏဒေါ့ꩻဖေႏ ပါꩻခို၊ “ယောင်းစွဉ်ႏငါ နာꩻစူဟုဲင်း” နုဲင်းနဝ်ꩻသွူ။ ဝွေꩻမာꩻစွဉ်ႏတဲင် ဝွေꩻစူဟဝ်ရေꩻ လွဉ်ဖျင်ယင်းသွူ။
11ဝွေꩻသီး အဝ်ႏဗွေစွဉ်ႏ ထာꩻသꩻလျားတဲင် ဝွေꩻသီးအီႏမာꩻဗာႏ ဗွေႏယေသျု နုဲင်းမုဲင်ꩻနဝ်ꩻ ဝွေꩻသီးစတဲင် တွိုင်ႏပင်ႏအုံကွံ လို့စွဉ်ႏဝင်ꩻနဝ်ꩻသွူ။
ဗွေႏယေသျုလွိုက်တမန်ႏတောႏတဆီနီပါꩻ
(မတဲ ၁၀:၁–၄။ မာကု ၃:၁၃–၁၉)
12အချိန်ႏနဝ်ꩻ ဗွေႏယေသျု အီႏဆုတောင်ꩻ ဘုရာꩻ ထင်ႏလွေꩻ ကောင်ပူႏပေႏ တဖြုံႏလောင်းတဲင် ထူႏအချိန်ႏ တနာꩻသူႏသူႏ ဆုတောင်ꩻထေ့ ဗွေႏဘုရာꩻထျꩻနဝ်ꩻသွူ။ 13မွူးထွိုင်ႏလေနဝ်ꩻ၊ ဝွေꩻဗွေႏဟဲ့ꩻလွဉ် ဝွေꩻဗွေႏ တပဲ့တောႏဖုံႏ ဝွေꩻဗွေႏထျꩻတဲင် ဝွေꩻသီးကို ကလွိုက်ဒါႏ တဆီနီဖြာꩻနဝ်ꩻ ဝွေꩻဗွေႏ ဖန်ဖေႏအမဉ်ꩻ တမန်ႏတောႏဖုံႏနဝ်ꩻသွူ။ 14သိမုန် (ဝွေꩻဗွေႏဖန်ဖေႏ အမဉ်ꩻ ပေတရု)တွမ်ႏ ဝွေꩻဖူးခိုအန္ဒြေ၊ ယာကုပ်တွမ်ႏ ယောဟန်၊ ဖိလိပ္ပုတွမ်ႏ ဗာတောလမဲ၊ 15မတဲတွမ်ႏ တောမ၊ အလဖဲပိုခို ယာကုပ်တွမ်ႏ သိမုန် (ကဟဲ့ꩻဒါႏ ပါရက်စွိုးခွိုꩻ)၊ 16ယာကုပ်ပိုခို ယုဒတွမ်ႏ ယုဒသျာကရုတ် ကထွာလွဉ်ဒါႏ ပါꩻသစ္စာႏဖေါက်နဝ်ꩻသွူ။
ဗွေႏယေသျုသွဉ်သင်ဖေႏစွဉ်ႏလုမ်ꩻလာꩻမာꩻဟဝ်ဖေႏ
(မတဲ ၄:၂၃–၂၅)
17ဗွေႏယေသျုစွဉ်ႏ ဝွေꩻဗွေႏ တမန်ႏတောႏဖုံႏ အဝ်ႏကောင်ပူႏပေႏလောင်း ထွိုင်ႏလင်ꩻလွဉ်ချိန်ႏ ဝွေꩻဗွေႏ စွဉ်ႏဝွေꩻဗွေႏ တပဲ့တောႏဖုံႏ အာဖြာꩻနဝ်ꩻ အဝ်ႏအုံထွိုင်ႏထာꩻ ထာꩻပြင်ႏကိုသွူ။ လိုꩻကအဝ်ႏ ယုဒတခမ်းလွုမ်းစွဉ်ႏ ဝေင်ꩻယေရုသလမ်ႏ၊ ဝေင်ꩻဖုံႏ ကအဝ်ႏဒါႏ ပင်ႏလယ်ႏဖင်ႏလောင်း လိုꩻဝေင်ꩻတုရုစွဉ်ႏ ဝေင်ꩻသိဒုန်နဝ်ꩻ လွဉ်အဝ်ႏနဝ်ꩻကို အာငါႏနဝ်ꩻသွူ။ 18ဝွေꩻသီးကလွဉ်နဝ်ꩻ ဖေႏကဟွိုန် ဝွေꩻဗွေႏ တရာꩻတွမ်ႏ ဖေႏကလုမ်ꩻလာꩻ မာꩻဟဝ်ဖေႏ ဝွေꩻသီး ရောႏဂါႏဖုံႏနဝ်ꩻသွူ။ လူꩻကစောင်ꩻဒါႏ လိုꩻဖုံႏနဝ်ꩻတဲ့ လွဉ်တဲင် ရောႏဂါႏ ဟဝ်ရေꩻစွဉ်ႏနဝ်ꩻသွူ။ 19ပွိုးတန်ꩻခိုꩻအဝ်ႏ ဝွေꩻဗွေႏထျꩻ ဖေႏကထန်ႏထိုꩻတွော့ꩻ ဝွေꩻသီး ကားကအဝ်ႏ ရောႏဂါႏ ဖေႏကဟဝ်ရေꩻ တာႏနဝ်ꩻ လိုꩻဖုံႏ ကားကအဝ်ႏ ကျိုꩻစာꩻခွေါင်းစွဉ်ႏ ဝွေꩻဗွေႏနဝ်ꩻသွူ။
မင်္ဂလာႏစွဉ်ႏအမင်္ဂလာႏ
(မတဲ ၅:၁–၁၂)
20ဗွေႏယေသျုထွား ဝွေꩻဗွေႏ တပဲ့တောႏဖုံႏတဲင်ဒေါ့ꩻ၊
“သီထွာ လိုꩻဆင်ꩻရယ်ꩻသားဖုံႏနဝ်ꩻ မင်္ဂလာႏအဝ်ႏ။
ဗွေႏဘုရာꩻ ခမ်းထီနဝ်ꩻ ထွာသီခမ်းထီသွူ။
21“ယိုခါ သီကအဝ်ႏဟို့ꩻခိုးဒါႏ ထာꩻအံႏသားနဝ်ꩻ မင်္ဂလာႏအဝ်ႏ။
သီအီႏလွိုင်ႏကွိုန်ꩻဗာႏသွူ။
“ယိုခါ သီကအဝ်ႏငွိုးဗာႏဒါႏ သားဖုံႏနဝ်ꩻ မင်္ဂလာႏအဝ်ႏ။
သီအီႏငရောင်ဗာႏသွူ။
22 # ၁ပေ ၄:၁၄။ “ကွပ်ပွိုး လိုꩻပိုခိုအတွက် လိုꩻကခံႏဗာႏဒါႏ ဝင်ꩻလွꩻထီႏသီ၊ ပယ်ႏထိုꩻသီ၊ ကဲ့ꩻရဲ့ꩻသီတွော့ꩻ ဒေါ့ꩻကုဲင်ဒါႏသီ၊ ကားကအဝ်ႏနဝ်ꩻ မင်္ဂလာႏအဝ်ႏ။ 23#၂ရာႏချုပ် ၃၆:၁၆၊ တ ၇:၅၂။ ကထွာလွဉ် နုဲင်းနဝ်ꩻချိန်ႏနဝ်ꩻ သꩻဟဝ်သꩻရေꩻတဲင် စွဉ်ႏထာꩻပျောႏသွင်ႏ ကျူႏလွသွော့ထာꩻ၊ ပွိုးတွော့ꩻ ခမ်းထီမို့ꩻလောင်းကို သီတာႏ ကအွဉ်ႏသေꩻခါꩻဒါႏ ဆုနဝ်ꩻ တန်မျတ်ငါႏ အတွက်သွူ။ ပွိုးဝွေꩻသီး မွိုးဖြား ဖါဖြားသီးဖုံႏနဝ်ꩻတဲ့ မာꩻလဲဉ်း ပရောဖဲစ်ဖုံႏ ဗွိုန်နုဲင်းနဝ်ꩻသွူ။
24“ကွဲႏတွော့ꩻ သီတာႏ ယိုခါ ကအဝ်ႏခြွေချမ်ꩻသာႏနဝ်ꩻ ဟဝ်ငမ်းသꩻ အမင်္ဂလာꩻအဝ်ႏငါႏ တခွိုင်းကားမုဲင်း၊
သီဘဝနဝ်ꩻ သီအုံသက်သား ဗာႏလဲဉ်းနဝ်ꩻသွူ။
25“သီတာႏ ယိုခါ ကအဝ်ႏလွိုင်ႏကွိုန်ꩻ ဗာႏငါႏနဝ်ꩻ ဟဝ်ငမ်းသꩻ အမင်္ဂလာႏအဝ်ႏငါႏ ခွိုင်းကားမုဲင်ꩻ၊
သီအီႏဟို့ꩻခိုးဗာႏနဝ်ꩻသွူ။
“ယိုခါ သီကအဝ်ႏငဗာႏသားနဝ်ꩻ ဟဝ်ငမ်းသꩻ အမင်္ဂလာႏအဝ်ႏငါႏ ခွိုင်းကားမုဲင်ꩻ၊
သီအီႏ သောင်ခြင်ꩻတဲင် ငွိုးကော့ꩻဗာႏထာꩻသွူ။
26“လိုꩻဖုံႏကားကအဝ်ႏ ကဒေါ့ꩻမျောက် ဟဝ်ဖေႏသီချိန်ႏနဝ်ꩻ ဟဝ်ငမ်းသꩻ အမင်္ဂလာႏအဝ်ႏငါႏ ခွိုင်းကားမုဲင်ꩻ၊ ပွိုးဝွေꩻသီးမွိုးဖြား ဖါဖြားသီးဖုံႏ နဝ်ꩻတဲ့ ပရောဖဲစ်လဲဉ်ဖုံႏ မာꩻဗွိုန်လဲဉ်း နုဲင်းနဝ်ꩻသွူ။
ရက်သွော့ရန်ႏသူႏဖုံႏ
(မတဲ ၅:၃၈–၄၈။ ၇:၁၂က)
27“ကွဲႏတွော့ꩻ လိုꩻကဟွိုန်နာႏဒါႏ ခွေတရာꩻသားနဝ်ꩻ ခွေဒေါ့ꩻဖေႏသီ။ ရက်သွော့ သီရန်ႏသူႏဖုံႏ၊ လိုꩻကလွꩻထီႏဒါႏ သီနဝ်ꩻ မာꩻဖေႏသွော့ ထာꩻဟဝ်။ 28လိုꩻကစိန်ႏတရေႏဒါႏ သီနဝ်ꩻ ဖေႏသွော့မင်္ဂလာႏ၊ လိုꩻကစောက်ꩻကာႏဒါႏ သီနဝ်ꩻ ဆုတောင်ꩻဖေႏသွော့။ 29ပါꩻတဖြာꩻ မဉ်ႏတဗꩻ သီဗုဲင်ႏတဖဲ့ꩻနဝ်ꩻ အွဉ်ႏဝွေꩻတဗꩻပါက အလင်တဖဲ့ꩻဟုဲင်း။ ပါꩻတဖြာꩻဖြာꩻ မဉ်ႏထူႏထိုꩻ သီဆဲင်ꩻတန် တဖွူꩻနဝ်ꩻ ဖေႏပါကဝွေꩻ ဆဲင်ꩻဆုပ်ꩻနဝ်ꩻဟုဲင်း။ 30ပါꩻကကွီဒါႏ သီထာꩻခြိုꩻ တစွိုးစွိုးနဝ်ꩻ ဖေႏသွော့ စွုမ်ႏဖြာꩻတဲင် ပါꩻတဖြာꩻဖြာꩻ ကထူႏထိုꩻဒါႏ သီထာꩻခြိုꩻနဝ်ꩻ တွမ်ႏကွီချာမွိုန်း။ 31#မ ၇:၁၂။ သီတာႏ နုဲင်းသီကမဉ်အွဉ်ႏ ဝွေꩻသီး မာꩻဖေႏအတွိုင်ꩻနဝ်ꩻ မာꩻဖေႏသွော့ လိုꩻလင်ဟုဲင်း။
32“သီမဉ်ႏရက်ဒျာႏ လိုꩻကရက်ဒါႏ သီလွုမ်ꩻနဝ်ꩻ သီအီႏလꩻနွောင်ꩻ မင်္ဂလာႏ နုဲင်းမုဲင်ꩻဟောင်း။ လိုꩻအပဲစ်သားဖုံႏ ငါမဉ်ႏတဲ့ ရက်ဒါႏ လိုꩻကရက် ဝွေꩻသီးနဝ်ꩻသွူ။ 33သီမဉ်ႏမာꩻဟဝ်ဖေႏဒျာႏ လိုꩻကဟဝ် သီလောင်းသားလွုမ်ꩻနဝ်ꩻ သီအီႏလꩻနွောင်ꩻ မင်္ဂလာႏ နုဲင်းမုဲင်ꩻဟောင်း။ အပဲစ်သားဖုံႏ ငါမဉ်ႏတဲ့ မာꩻဒျာႏ နုဲင်းနဝ်ꩻနေနေသွူ။ 34သီမဉ်ႏဖေႏလဒျာႏ လိုꩻသီကအဝ်ႏမောင်ꩻ အီႏလꩻချာသားဖုံႏထျꩻ လွုမ်ꩻနဝ်ꩻ သီအီႏလꩻနွောင်ꩻ မင်္ဂလာႏ နုဲင်းမုဲင်ꩻဟောင်း။ အပဲစ်သားဖုံႏ ငါမဉ်ႏတဲ့ ကအီႏလꩻချာ ဗွေဗွေနဝ်ꩻ ဖေႏလဒါႏ အပဲစ်သားဖုံႏထျꩻသွူ။ 35တွမ်ႏမာꩻမွိုန်း နုဲင်းနဝ်ꩻဟုဲင်း။ ရက်သွော့ သီရန်ႏဖုံႏတဲင် မာꩻဟဝ်ဖေႏသွော့ ဝွေꩻသီးဟုဲင်း။ ဖေႏလတွော့ꩻ တွမ်ႏအဝ်ႏမောင်ꩻမွိုန်းတဝ်း အီႏလꩻချာဟုဲင်း။ တွိုႏနဝ်ꩻ သီအီႏလꩻ ဆုအကျိုꩻ တန်ငါႏတဲင် သီအီႏထွာ အထိုသွတ်ꩻ ဗွေႏဘုရာꩻ ပိုဖုံႏနဝ်ꩻသွူ။ လိုꩻတသေတဝ်း ကေꩻဇူꩻတွမ်ႏ လိုꩻမွိုက်ကုဲင်ဖုံႏ အလောင်းနဝ်ꩻ ပွိုးဝွေꩻဗွေႏ ဟဝ်မျတ်ဖေႏလဲဉ်း အတွက်သွူ။ 36ဗွိုန်နုဲင်းသီဖါ ကအွဉ်ႏဒါႏ ကရုဏာႏ ထာꩻသꩻညင်ꩻနဝ်ꩻ အွဉ်ႏသွော့ ကရုဏာႏ ထာꩻသꩻညင်ꩻဟုဲင်း။
ကစီႏရင်ႏဒါႏလိုꩻလင်ဖုံႏ
(မတဲ ၇:၁–၅)
37“စီႏရင်ႏမွိုန်းတဝ်း လိုꩻလင်ဖုံႏ၊ နဝ်ꩻမꩻ ဗွေႏဘုရာꩻတဲ့ အီႏတစီႏရင်ႏတဝ်း သီသွူ။ ပဲစ်ဒင်ႏ မွိုန်းတဝ်းလိုꩻလင်၊ နဝ်ꩻမꩻ ဗွေႏဘုရာꩻတဲ့ အီႏတပဲစ်ဒင်ႏတဝ်း သီသွူ။ အွဉ်ႏစွꩻဖေႏသွော့ လိုꩻလင်ဖုံႏအပဲစ်၊ နဝ်ꩻမꩻ ဗွေႏဘုရာꩻတဲ့ အီႏအွဉ်ႏစွꩻလွစ်ဖေႏ သီအပဲစ်နဝ်ꩻသွူ။ 38တွမ်ႏသွိုန်ႏသꩻပါပါ ဖေႏသွော့လိုꩻလင်ဖုံႏ၊ နဝ်ꩻမꩻ ဗွေႏဘုရာꩻတဲ့ အီႏဖေႏသီသွူ။ စွဉ်ႏစေႏတနာႏ သꩻစင်ဗွာတဗာႏ စွဲကိုသွော့၊ သီအီႏလက္ခံႏလꩻ ဗွေဗွေတဲင် ဗွေႏဘုရာꩻ အီႏထောက်ꩻသော့ꩻ ဗွေဗွေဖေႏဒျာႏ သီစူကိုဖုံႏ ကားကအဝ်ႏနဝ်ꩻသွူ။ နုဲင်းသီကတွိုင်ဖေႏဝင်ꩻ အတွိုင်ꩻနဝ်ꩻ ဗွေႏဘုရာꩻတဲ့ အီႏဖေႏသီ နဝ်ꩻအတွိုင်ꩻလွုမ်ꩻသွူ။
39 #
မ ၁၅:၁၄။ နဝ်ꩻထွူ ဗွေႏယေသျု ဒေါ့ꩻဖေႏဝွေꩻသီး ငဝ်းဥပမာႏနုဲင်းယို၊ “လိုꩻမဲ့ခေ့ꩻတဖြာꩻနဝ်ꩻ တအွဉ်လွေꩻနွောင်ꩻတဝ်း လိုꩻမဲ့ခေ့ꩻ အလင်တဖြာꩻ။ ဝွေꩻမဉ်ႏအွဉ်နဝ်ꩻ ဝင်ꩻနီလွုမ်း အီႏထဲ့သော့ꩻ ထာꩻအောင်ယော့ကိုသွူ။ 40#မ ၁၀:၂၄၊ ၂၅၊ ယော ၁၃:၁၆၊ ၁၅:၂၀။ တပဲ့ဖုံႏနဝ်ꩻ တဒါႏအာလွို ကယ်ꩻတဝ်း ဝွေꩻသီး အဆရာႏသွူ။ ကွဲႏတွော့ꩻ တပဲ့ဖုံႏ ကားကအဝ်ႏ ဝွေꩻသီးထွိုင်ႏ သွဉ်စွုံႏလင်ႏထွူလို့ ဝွေꩻသီး သွဉ်တန်ꩻချိန်ႏနဝ်ꩻ ဝွေꩻသီး အီႏဗွိုန်နုဲင်း ဝွေꩻသီး အဆရာႏနဝ်ꩻသွူ။
41“သေင်ႏကွို့ꩻ အဝ်ႏသော့ꩻ သီမဲ့ကိုနဝ်ꩻ သီတအွဉ်ႏသတိတဝ်းတဲင် ပွိုးတမုဲင်ꩻ သီအဝ်ႏထုမ်ႏထွားဗာႏတွိုႏ ထာꩻဈꩻသီဖူးဝေးမဲ့ကို နုဲင်းမုဲင်ꩻဟောင်း။ 42သေင်ႏကွို့ꩻ အဝ်ႏခံသော့ꩻသီမဲ့ကို လဲင်ꩻတထီႏနွောင်ꩻ နေးတဝ်းထာꩻနဝ်ꩻ ပွိုးတမုဲင်ꩻ သီအီႏရိုꩻဖေႏတွိုႏ သီဖူးဝေး၊ ‘အဝ်ႏမုဲင်ꩻကို ဖူးဝေး၊ ခွေထေ ထန်ႏဖေႏ ထာꩻဈꩻသီမဲ့ကို’ နုဲင်းမုဲင်ꩻဟောင်း။ သီထွာသူႏတောႏလဲဉ် အရီးသွတ်ꩻ ထူႏထန်ႏသွော့ သေင်ႏကွို့ꩻ သီမဲ့ကိုဟုဲင်း။ တွိုႏနဝ်ꩻမꩻ ကအီႏထေထန်ႏနွောင်ꩻ ထာꩻဈꩻပေႏ သီဖူးဝေးမဲ့ကိုနဝ်ꩻ သီအီႏထီႏစဲင်းထာꩻ နဝ်ꩻသွူ။
အမွူးစွဉ်ႏအရာႏ
(မတဲ ၇:၁–၂၀။ ၁၂:၃၃–၃၅)
43“သေင်ႏမွူးဟဝ် တမွူးနဝ်ꩻ တရာႏတဝ်း အရာႏညံး၊ သေင်ႏမွူးညံး တမွူးနဝ်ꩻ တရာႏတဝ်း အရာႏဟဝ်နဝ်ꩻသွူ။ 44#မ ၁၂:၃၃။ စွဉ်ႏကရာႏဒါႏ အရာႏနဝ်ꩻ သေအီ သေင်ႏမွူး စွုမ်ႏမွူးနဝ်ꩻသွူ။ ထာꩻဆူႏမွူးဖုံႏလောင်းနဝ်ꩻ သီတဒဲ့ꩻဗာႏတဝ်း ဖက်ꩻဒွိုႏဆꩻရာႏ မဉ်ႏမွေးတဝ်း၊ ထာꩻဆူႏပင်ဖုံႏလောင်းနဝ်ꩻ သီတဒဲ့ꩻဗာႏဖိုတဝ်း တဗဲစ်ရာႏဖုံႏနဝ်ꩻသွူ။ 45#မ ၁၂:၃၄။ လိုꩻဟဝ်ဖုံႏနဝ်ꩻ ထေထန်ႏလွဉ်ဒျာႏ ထာꩻဟဝ်ဖုံႏ ကအဝ်ႏစုသော့ꩻဒါႏ ဝွေꩻသီးသꩻကိုနဝ်ꩻသွူ။ လိုꩻကုဲင်တဖြာꩻနဝ်ꩻ ထေထန်ႏလွဉ်ဒျာႏ ထာꩻကုဲင် ကအဝ်ႏစုသော့ꩻဒါႏ ဝွေꩻအသꩻကို နဝ်ꩻသွူ။ ပွိုးတွော့ꩻ နုဲင်းဝွေꩻသꩻကို ကအဝ်ႏဗွေအတွိုင်ꩻ ဒေါ့ꩻထန်ႏလွဉ် ဖြောင်းကိုနဝ်ꩻသွူ။
တယ်ႏလမ်းနီစွိုး
(မတဲ ၇:၂၄–၂၇)
46နုဲင်းခွေကဒေါ့ꩻနယ် ဖေႏဒါႏသီနဝ်ꩻ တနာႏတဝ်းတဲင် ပွိုးတမုဲင်ꩻ သီဟဲ့ꩻဗာႏတွိုႏခွေ ‘ဗွေႏ၊ ဗွေႏ၊’ နုဲင်းမုဲင်ꩻဟောင်း။ 47ပါꩻမုဲင်ꩻတဖြာꩻ လွဉ်ခွေထျꩻတွော့ꩻ နာႏခွေငဝ်းဖုံႏတဲင် ကလွောက်ꩻနာႏဒါႏ သားဖုံႏနဝ်ꩻ ဝွေꩻဗွိုန်တမုဲင်ꩻနဝ်ꩻ ခွေအီႏအွဉ်ႏနယ်သီ။ 48ဝွေꩻနဝ်ꩻ ဗွိုန်နုဲင်း လိုꩻတဖြာꩻ အကတယ်ႏမာꩻဒါႏ ဝွေꩻအလမ်း၊ ခူႏယော့တဲင် တယ်ႏဒင်ႏလူး အလမ်းခင်ႏဖါ လုံးတူႏလောင်းနဝ်ꩻသွူ။ ထီခြောင်တန် ထီထွိုင်ႏလွန်းလွဉ်တဲင် ထီတွဲႏဗာႏထိုꩻလမ်းစွဉ်ႏတဲ့ လမ်းနဝ်ꩻ တတသွိုးနွောင်ꩻတဝ်း၊ ပွိုးတွော့ꩻ လမ်းနဝ်ꩻ တယ်ႏခွေါင်ဟဝ်သေꩻခါꩻလဲဉ်း အတွက်သွူ။ 49ကွဲႏတွော့ꩻ ပါꩻအဖြာꩻ ဟွိုန်ခွေငဝ်းဖုံႏတဲင် တလွောက်ꩻနာႏတဝ်း ငဝ်းနဝ်ꩻဖုံႏနဝ်ꩻ ဗွိုန်နုဲင်း ပါꩻတဖြာꩻ တယ်ႏဝွေꩻအလမ်း အရွီးခင်ႏဖါ တပါတဝ်းနဝ်ꩻသွူ။ ထီထွိုင်ႏလွန်း ထွိုင်ႏတွဲႏထိုꩻလမ်းနဝ်ꩻ လမ်းပြင်ꩻလင်ꩻထိုꩻစွဉ်ႏ တလဲင်ꩻချင်ꩻတဲင် လမ်းပြင်ꩻနဝ်ꩻနဝ်ꩻ ဟဝ်ငမ်းသꩻငါႏ ခွိုင်းကားမုဲင်ꩻ” နုဲင်းနဝ်ꩻသွူ။
ទើបបានជ្រើសរើសហើយ៖
လုကာ 6: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
