လုကာ 8
8
လိုꩻမူႏဖုံႏကလွေꩻလွဉ်ꩻဒါႏဗွေႏယေသျု
1ဆုဲင်ꩻထွိုင်ႏညပသာႏနဝ်ꩻ ဗွေႏယေသျု ထန်ႏတဖူꩻ ထောင်ဖျတ်ကာႏလွေꩻ ဝေင်ꩻဖုံႏတွမ်ႏ ဒုံဖုံႏ ဟော်ꩻဖေႏ ပွိုင်းဝွို့တွမ်ႏ ဗွေႏဘုရာꩻ ခမ်းထီခရာႏ သတင်ꩻဟဝ်နဝ်ꩻသွူ။ တပဲ့တောႏ တဆီနီပါꩻနဝ်ꩻ လွေꩻငီꩻတွမ်ႏ ဝွေꩻဗွေႏ၊ 2#မ ၂၇:၅၅၊ ၅၆၊ မာ ၁၅:၄၀၊ ၄၁၊ လု ၂၃:၄၉။ နဝ်ꩻမꩻ လိုꩻဖုံႏယင်ဟန်ႏ လူꩻကုဲင်စောင်ꩻတွော့ꩻ ကဟဝ်ရေꩻလဲဉ်းဒါႏတွမ်ႏ ရောႏဂါႏ ကဟဝ်လဲဉ်းသား မာရိ (ကဟဲ့ꩻဒါႏ မာဂဒလမာရိ)၊ ပါꩻမူႏ လူꩻကုဲင်နွတ်ꩻဗာႏ ကထန်ႏထိုꩻလဲဉ်းဒါႏနဝ်ꩻသွူ။ 3ကအဝ်ႏထွာဒါႏ ဟေရုဒ် ဟော်နန်ꩻကို အာႏဏာႏပဲင်ႏသား ခုဇ အမာꩻကမဉ်ꩻဒါႏ ယောဟန္နစွဉ်ႏ ရှုရှန္နတွမ်ႏ လိုꩻမူႏအလင်ဖုံႏနဝ်ꩻ သွုံꩻချာဒျာႏ ဝွေꩻသီး ထာꩻအံႏစရိပ်တဲင် အဝ်ႏစွဲကို ဗွေႏယေသျုတွမ်ႏ ဝွေꩻဗွေႏ တပဲ့တောႏဖုံႏနဝ်ꩻသွူ။
ထာꩻခြွီရုဲင်သားဥပမာႏ
(မတဲ ၁၃:၁–၉။ မာကု ၄:၁–၉)
4လိုꩻဖုံႏနဝ်ꩻ အဝ်ႏဝေင်ꩻတဝေင်ꩻထွူ တဝေင်ꩻ အဝ်ႏလွဉ်မပ်မပ် ဗွေႏယေသျုထျꩻတဲင် လိုꩻစွိုꩻ ထွိုင်ႏစုဗူႏအာ လို့ဝင်ꩻချိန်ႏ ဗွေႏယေသျု ဒေါ့ꩻဖေႏ ဝွေꩻသီးစွဉ်ႏငဝ်းဥပမာႏနုဲင်းယိုသွူ။
5“တလဲင်ႏသား ပါꩻခိုတဖြာꩻ ထန်ႏလွေꩻ အီႏရုဲင်ထာꩻခြွီနဝ်ꩻသွူ။ နုဲင်းဝွေꩻ ကအဝ်ႏဖြေ့ꩻသော့ꩻ ထာခြွီ ခြံကိုချိန်ႏ၊ အခြွီယင်ဟန်ႏနဝ်ꩻ ထဲ့သော့ꩻ တဖူꩻလောင်း လိုꩻကအဝ်ႏယမ်းလူးဒါႏတဲင် ဝါးဖုံႏ တွမ်အံႏထိုꩻဒျာႏသွူ။ 6အခြွီယင်ဟန်ႏနဝ်ꩻ ထဲ့သော့ꩻ ဟံႏလုံးလောင်းတဲင် အမွူးထွိုင်ႏဒေါ့ꩻချိန်ႏ ပွိုးတွော့ꩻ ဟံႏယာႏနဝ်ꩻ ထီထတ် တအဲဉ်ထဝ်းအတွက် အမွူးဖုံႏနဝ်ꩻ နွူႏသဲင်ထိုꩻဒျာႏသွူ။ 7အခြွီယင်ဟန်ႏနဝ်ꩻ ထဲ့သော့ꩻ ထာꩻဆူႏပုန်ခါႏတဲင် အမွူးဖုံႏ ဒေါ့ꩻတန်လွဉ်ငီꩻဗာႏစွဉ်ႏ ထာꩻဆူႏမွူးဖုံႏနဝ်ꩻမꩻ ထာꩻဆူႏမွူးဖုံႏ ယိပ်ꩻထိုꩻဒျာႏသွူ။ 8အခြွီဖုံႏယင်ဟန်ႏနဝ်ꩻ ထဲ့သော့ꩻ ဟံႏဟဝ်ကိုသွူ။ အမွူးဖုံႏ တန်လွဉ်တဲင် အရာႏရာႏလွဉ် အပွန်းတရျာꩻစီႏ” နုဲင်းနဝ်ꩻသွူ။
ဗွေႏယေသျု အွဉ်ႏသွတ်ꩻ၊ “သီနားဖုံႏ မဉ်ႏအဝ်ႏနဝ်ꩻ ဟွိုန်သွော့” နုဲင်းနဝ်ꩻသွူ။
ပွုံႏဥပမာႏအင်းရွယ်ႏချက်
(မတဲ ၁၃:၁၀–၁၇။ မာကု ၄:၁၀–၁၂)
9ငဝ်းဥပမာႏယို အဓိပ္ပါယ်ႏတမုဲင်ꩻနဝ်ꩻ ဗွေႏယေသျု တပဲ့တောႏဖုံႏရီ ဝွေꩻဗွေႏ၊ 10#ဟေသျာ ၆:၉ (LXX)။နဝ်ꩻမꩻ ဝွေꩻဗွေႏလဝ်းဖြေႏချာ၊ “ဗွေႏဘုရာꩻခမ်းထီ အယော့ဆုံး ထာꩻသေပညာႏနဝ်ꩻ ဖေႏလဲဉ်းသီ၊ ကွဲႏတွော့ꩻ ကအဝ်ႏကုဲင်ဒါႏ လိုꩻလင်ဖုံႏနဝ်ꩻ ငဝ်းဥပမာႏဖုံႏ အဓိပ္ပါယ်ႏ နုဲင်းမုဲင်ꩻနဝ်ꩻ ဝွေꩻသီး ထွားစွဉ်ႏတဲ့ တထီႏတဝ်းတဲင် နာႏလဲဉ်းစွဉ်ႏတဲ့ တသေနာႏတဝ်းသွူ။
ဗွေႏယေသျုသျင်ꩻနယ်ဖေႏရုဲင်ထာꩻခြွီဥပမာႏ
(မတဲ ၁၃:၁၈–၂၃။ မာကု ၄:၁၃–၂၀)
11ငဝ်းဥပမာႏ အဓိပ္ပါယ်ႏနဝ်ꩻ နုဲင်းယိုသွူ။ ထာꩻခြွီနဝ်ꩻထွာဒျာႏ ဗွေႏဘုရာꩻငဝ်းသွူ။ 12အခြွီဖုံႏ ကထဲ့လင်ꩻဒါႏ တဖူꩻလောင်းနဝ်ꩻ မဉ်ရိုꩻဒျာႏ လိုꩻကဟွိုန်ဗာႏဒါႏ တရာꩻသားဖုံႏ၊ ဝွေꩻသီးသꩻကို ကသိမ်ꩻခါꩻဒါႏ ထာꩻယွုမ်းတွမ်ႏ ထာꩻကယ်ႏတင်ႏနဝ်ꩻ မာရ်ႏနတ်လွဉ်တဲင် တွမ်ထူႏညာꩻထိုꩻဒျာႏ ငဝ်းသတင်ꩻဖုံႏနဝ်ꩻသွူ။ 13ထာꩻခြွီဖုံႏ ကထဲ့လူးဒါႏ ဟံႏလုံးလောင်းနဝ်ꩻ လိုꩻကဟွိုန်တရာꩻငဝ်းတဲင် စွဉ်ႏသꩻဟဝ်သꩻရေꩻ လက္ခံႏရပ်ဆွုမ်ႏဒျာႏသွူ။ ကွဲႏတွော့ꩻ တရာꩻနဝ်ꩻ တစွဲꩻလမ်ꩻ ယော့သော့ꩻတဝ်း ဝွေꩻသီး အကိုနဝ်ꩻသွူ။ ဝွေꩻသီး ယွုမ်းဒျာႏ တဆင်ႏလွုမ်ꩻ ကွဲႏတွော့ꩻ ထွိုင်ႏမော့ꩻ ထာꩻစမ်ꩻထွား ဖျော်လွဉ်ချိန်ႏ ဝွေꩻသီး ထဲ့ညာꩻထိုꩻဒျာႏနဝ်ꩻသွူ။ 14အခြွီဖုံႏ ကထဲ့လင်ꩻသော့ꩻဒါႏ ထာꩻဆူႏပုန်ခါႏနဝ်ꩻ လိုꩻကဟွိုန်ဒါႏ တရာꩻငဝ်းသားဖုံႏ ပွိုးတွော့ꩻ ထာꩻစူႏရိန်ႏ နန်းခီတွမ်ႏ ထာꩻခြွေချမ်ꩻသာႏဖုံႏတွမ်ႏ မဉ်စံႏစာꩻ ထာꩻစေꩻစိန်ႏ အဝ်ႏဗဉ်ႏသော့ꩻထိုꩻ ဝွေꩻသီး ဘဝကိုတဲင် ယိပ်ꩻထိုꩻဒျာႏ ဝွေꩻသီးနဝ်ꩻမꩻ ဝွေꩻသီးအရာႏနဝ်ꩻ မုဲင်ꩻခါတဲ့ တဖြားတဝ်းဖုံႏနဝ်ꩻသွူ။ 15အခြွီဖုံႏ ကထဲ့သော့ꩻဒါႏ ဟံႏဟဝ်ကိုနဝ်ꩻ လိုꩻကဟွိုန် သတင်ꩻတရာꩻငဝ်းတွော့ꩻ လက္ခံႏဟဝ်တဲင် လွောက်ꩻနာႏ သꩻကိုနဝ်ꩻမꩻ ဝွေꩻသီးခံႏနွောင်ꩻ ဗꩻတွိုႏစွဉ်ႏ ဝွေꩻသီး အရာႏဖုံႏ ရာႏလွဉ်နဝ်ꩻသွူ။
မေႏတေန်ꩻကအဝ်ႏခြောင်းတဖြုံႏဆꩻလ
(မာကု ၄:၂၁–၂၅)
16 #
မ ၅:၁၅၊ လု ၁၁:၃၃။ “ပါꩻမုဲင်ꩻတရိုꩻတဝ်း တဲစ်ꩻလဲ့ꩻမေႏတေန်ꩻ တဖြုံႏတွော့ꩻ တအွဉ်ႏခြို့ꩻတဝ်း တွမ်ႏခြောင်း မဉ်ႏမွေးတဝ်း တအွဉ်ႏတဝ်း ခင်ႏလမ်းဗေင်ႏ ဆꩻလနဝ်ꩻသွူ။ ကွပ်စွဉ်ႏအွဉ်ႏနဝ်ꩻ အွဉ်ႏဒျာႏ မေႏတေန်ꩻထွန်ႏလောင်း လိုꩻဖုံႏ ကနွို့လွဉ်သော့ꩻနဝ်ꩻ ဖေႏနေးဝွေꩻသီး ကထီႏဗာႏထာꩻလေနဝ်ꩻသွူ။
17 #
မ ၁၀:၂၆၊ လု ၁၂:၂။ “ထာꩻကအဝ်ႏဗဉ်ႏဗꩻဒါႏဖုံႏ ကားကအဝ်ႏနဝ်ꩻ အီႏထင်ႏသျာꩻတဲင် နုဲင်းထာꩻကအဝ်ႏဒို့ꩻခါꩻဒါႏ ကားကအဝ်ႏနဝ်ꩻ အီႏထီႏတွော့ꩻ အီႏထင်ႏသျာꩻနဝ်ꩻသွူ။ 18#မ ၂၅:၂၉၊ လု ၁၉:၂၆။ သီနာႏနုဲင်းမုဲင်ꩻ ထွူနဝ်ꩻ အွဉ်ႏသတိရောင်သွော့။ ပွိုးတွော့ꩻ လိုꩻကအဝ်ႏလဲဉ်းသား ယင်ဟန်ႏနဝ်ꩻ အီႏဖေႏလွိုထဲင်း ကွဲႏတွော့ꩻ လိုꩻတအဲဉ်ထဝ်း သားဖုံႏထျꩻနဝ်ꩻ ဝွေꩻသီးထင်း ဝွေꩻသီးအဝ်ႏလဲဉ်း တစိꩻငါစွဉ်ႏတဲ့ အီႏထူႏလွေꩻညာꩻထိုꩻဒျာႏ” နုဲင်းနဝ်ꩻသွူ။
ဗွေႏယေသျုမွိုးတွမ်ႏအဖူးခိုဖုံႏ
(မတဲ ၁၂:၄၆–၅၀။ မာကု ၃:၃၁–၃၅)
19ဗွေႏယေသျု မွိုးတွမ်ႏ ဝွေꩻဗွေႏအဖူးခိုဖုံႏနဝ်ꩻ လွဉ်ထေ့ ဝွေꩻဗွေႏထျꩻ ကွဲႏတွော့ꩻ ကွပ်ပွိုးလိုꩻဖုံႏ တချငါႏလွဉ်ꩻနဝ်ꩻမꩻ တမော့ꩻနွောင်ꩻတဝ်း ဝွေꩻဗွေႏသွူ။ 20လိုꩻယင်ဟန်ႏနဝ်ꩻ ဒေါ့ꩻဖေႏဗွေႏယေသျု၊ “နီဗွေႏအမွိုးတွမ်ႏ ဖူးခိုဖုံႏ အဝ်ႏအုံထွိုင်ႏ ကောင်းထန်ႏ မဉ်ထီႏနီဗွေႏ” နုဲင်းနဝ်ꩻသွူ။
21ဗွေႏယေသျု ဒေါ့ꩻဖေႏ ဝွေꩻသီး ကားကအဝ်ႏ၊ “လိုꩻကနာႏ ဗွေႏဘုရာꩻငဝ်းတွော့ꩻ ကလွောက်ꩻလွဉ်ꩻသားနဝ်ꩻ ထွာခွေမွိုးတွမ်ႏ ခွေဖူးခိုဖုံႏ” နုဲင်းနဝ်ꩻသွူ။
ဗွေႏယေသျုမာꩻယဉ်ဖေႏတလီꩻဝစ်ꩻသန်
(မတဲ ၈:၂၃–၂၇။ မာကု ၄:၃၅–၄၁)
22တနီꩻသား ဗွေႏယေသျု နွို့သော့ꩻ ဖြီတဆွိုင်ꩻကိုတွမ်ႏ ဝွေꩻဗွေႏ တပဲ့တောႏဖုံႏတဲင် ဒေါ့ꩻဖေႏဝွေꩻသီး၊ “နီဖျတ်ကာႏလွေꩻတွမ် ထီနောင်ဖင်ႏ ခတဖဲ့ꩻသူꩻ” နုဲင်းနဝ်ꩻသွူ။ နဝ်ꩻမꩻ ဝွေꩻသီး ထန်ႏလွေꩻစစွဉ်ႏသွူ။ 23နုဲင်းဝွေꩻသီး ကအဝ်ႏဝါးဖြုဲင်ꩻလွေꩻ ချိန်ႏနဝ်ꩻ ဗွေႏယေသျု အဝ်ႏဗေင်ႏအွီႏ ဒျာႏထာꩻနဝ်ꩻသွူ။ တလီꩻဝစ်ꩻ မာꩻသန်စွော့ꩻစွဉ်ႏ ထီနောင်လောင်းတဲင် ထီဗွေသော့ꩻစစွဉ်ႏ ဖြီကိုသွူ။ နဝ်ꩻမꩻ ဝွေꩻသီး ကားကအဝ်ႏနဝ်ꩻ မော့ꩻစွဉ်ႏ အန္တရာယ်ႏသန်နဝ်ꩻသွူ။ 24တပဲ့တောႏဖုံႏ လွေꩻထေ့ ဗွေႏယေသျုထျꩻတဲင် တမာထွိုင်ႏ ဝွေꩻဗွေႏတွော့ꩻရိုꩻ၊ “ဗွေႏ၊ ဗွေႏ၊ နီအီႏဗော့ꩻသီထိုꩻသွူ” နုဲင်းနဝ်ꩻသွူ။
ဗွေႏယေသျု ထွိုင်ႏတဲင် ဖေႏတလီꩻတွမ်ႏ ထီလဲင်ꩻ အမိန်းထွူ၊ တလီꩻတွမ်ႏ ထီလဲင်ꩻ ယဉ်လင်ꩻထိုꩻစွဉ်ႏတဲင် နဝ်ꩻကိုနဝ်ꩻ သာႏယာႏစွဉ်ႏနဝ်ꩻသွူ။ 25နဝ်ꩻထွူ ဝွေꩻဗွေႏဒေါ့ꩻဖေႏ တပဲ့တောႏဖုံႏ၊ “သီထာꩻယွုမ်း အဝ်ႏမုဲင်ꩻကိုဟောင်း” နုဲင်းနဝ်ꩻသွူ။
ဝွေꩻသီး အံႏဖြာႏငါႏ ငမ်းသꩻငါႏတဲင် တဖြာꩻတွမ်ႏတဖြာꩻ ဒေါ့ꩻဖေႏလို့ဝင်ꩻ၊ “ပါꩻယိုနဝ်ꩻ လိုꩻနုဲင်းမုဲင်ꩻဟောင်း။ ဝွေꩻမိန်းဖေႏ တလီꩻတွမ်ႏ ထီလဲင်ꩻတဲင် တလီꩻစွဉ်ႏထီလဲင်ꩻ မွော့ꩻနာႏစွဉ်ႏ ဝွေꩻဗွေႏငဝ်းနုဲင်းမုဲင်ꩻ” နုဲင်းနဝ်ꩻသွူ။
ဗွေႏယေသျုဝါးထန်ႏဖေႏလူꩻကုဲင်ကစောင်ꩻဒါႏပါꩻတဖြာꩻ
(မတဲ ၈:၂၈–၃၄။ မာကု ၅:၁–၂၀)
26ဗွေႏယေသျုတွမ်ႏ ဝွေꩻဗွေႏ တပဲ့တောႏဖုံႏ ဝါးဖြုဲင်ꩻလွေꩻထိုꩻဖြီ ဂါရသနယ်ႏ၊ ဂါဒရနယ်ႏနဝ်ꩻ အဝ်ႏကာလိလဲ ထီနောင်ခတဖဲ့ꩻသွူ။ 27နုဲင်းဗွေႏယေသျု ကအဝ်ႏထောင်လွေꩻထာꩻ ထီဖင်ႏလောင်းနဝ်ꩻ ဝွေꩻဗွေႏမော့ꩻခွဲစွဉ်ႏ လူꩻကုဲင်စောင်ꩻဒါႏ ပါꩻတဖြာꩻနဝ်ꩻသွူ။ ပါꩻခိုယိုနဝ်ꩻ ခွမ်ꩻလာꩻဗွို့ꩻတဝ်း အနမ်းလောင်း ညငါႏလဲဉ်းတဲင် တအုံတဝ်းလမ်း၊ ကွဲႏတွော့ꩻ ဝွေꩻအုံသော့ꩻဒျာႏ သဲင်ႏခဲင်ꩻထမ်းအိုကိုသွူ။ 28ဝွေꩻထွိုင်ႏ ထီႏ ဗွေႏယေသျုချိန်ႏနဝ်ꩻ ဝွေꩻခြောဝ်သန်အငဝ်း အွပ်ꩻလင်ꩻဝွေꩻဗွေႏ ခင်ႏထျꩻတဲင်၊ “အထိုသွတ်ꩻ ဗွေႏဘုရာꩻပိုခို ဗွေႏယေသျု၊ နီဗွေႏမဉ်မာꩻ ခွေသွဉ်း တမုဲင်ꩻဟောင်း” နုဲင်းနဝ်ꩻသွူ။ ခွေသွဉ်း တောင်ꩻပြန်ႏဒျာႏနီဗွေႏ၊ တွမ်ႏဖေႏတံႏမွိုန်းတဝ်း ခွေသွဉ်းဟုဲင်း” နုဲင်းနဝ်ꩻသွူ။ 29ဝွေꩻကဒေါ့ꩻဗာႏ နုဲင်းယိုနဝ်ꩻ ပွိုးတွော့ꩻ ဗွေႏယေသျု မိန်းဖေႏလဲဉ်းသွူ လူꩻကုဲင် ဖေႏကထန်ႏထိုꩻ ဝွေꩻအကိုနဝ်ꩻသွူ။ လူꩻကုဲင်နဝ်ꩻ တဆင်ႏဆင်ႏစောင်ꩻဝွေꩻတဲင် လဲင်ꩻအွဉ်ႏခံ သော့ꩻနေးစွဉ်ႏဝွေꩻ ထောင်ႏကို၊ ဝွေꩻစူဖုံႏတွမ်ႏ ခင်ႏဖုံႏနဝ်ꩻ စွိုင်စွဉ်ႏ ပသီႏချင်ꩻဖုံႏစွဉ်ႏတဲ့ ဝွေꩻဗျင်ႏထို့ငင်ႏဖြတ်ꩻထိုꩻတွော့ꩻ လူꩻကုဲင် အွဉ်ထန်ႏလွေꩻထိုꩻဝွေꩻ တခြာကိုသွူ။
30ဗွေႏယေသျုရီဝွေꩻ၊ “နာꩻမဉ်ꩻတမုဲင်ꩻဟောင်း” နုဲင်းနဝ်ꩻသွူ။
ဝွေꩻလဝ်းချာ၊ “ခွေမဉ်ꩻ ‘‘လေဂေါင်” နုဲင်းနဝ်ꩻသွူ။ ပွိုးတွော့ꩻ လူꩻကုဲင်ဖုံႏ ကစောင်ꩻလဲဉ်းဝွေꩻနဝ်ꩻ အဗာႏအာငါႏ အတွက်သွူ။ 31ဖေႏကအွဉ်ႏစွꩻသော့ꩻမွိုန်း ဝွေꩻသီး သုံအောင်ယော့ကိုနဝ်ꩻ လူꩻကုဲင်ဖုံႏ တောင်ꩻပြန်ႏ ဗွေႏယေသျုနဝ်ꩻသွူ။
32နဝ်ꩻကိုနဝ်ꩻ ထော့ꩻတဖုံႏ အဝ်ႏအံႏအဆာႏ ကောင်ဖုဲင်းလောင်းသွူ။ နဝ်ꩻမꩻ လူꩻကုဲင်ဖုံႏ တောင်ꩻပြန်ႏ ဗွေႏယေသျု၊ ဖေႏကအွဉ်ႏစွꩻလွေꩻ ဝွေꩻသီး ထော့ꩻဖုံႏကိုတဲင် ဝွေꩻဗွေႏ အွဉ်ႏစွꩻလွေꩻစွဉ်ႏ ဝွေꩻသီးနဝ်ꩻသွူ။ 33ဝွေꩻသီး အဝ်ႏပါꩻခိုအကို ထန်ႏတဲင် နွို့သော့ꩻစွဉ်ႏ ထော့ꩻဖုံႏကိုနဝ်ꩻသွူ၊၊ ထော့ꩻတဖုံႏလွုမ်းနဝ်ꩻ ဖင်းတနဲဉ်သော့ꩻဝင်ꩻ ကောင်ဖုဲင်းလဲင်းလောင်းတဲင် ထဲ့လင်ꩻသော့ꩻစွဉ်ႏ ထီနောင်ကို၊ ဗဉ်သီထိုꩻစွဉ်ႏ ထီဖုံႏနဝ်ꩻသွူ။
34ကထွာထာꩻနုဲင်းနဝ်ꩻ ပါꩻခို ကအဝ်ႏတီဒါႏ ထော့ꩻသားဖုံႏ ထွိုင်ႏထီႏတဲင်၊ သတင်ꩻနဝ်ꩻ ဝွေꩻသီးဖင်းဒေါ့ꩻနယ် စွစ်ꩻစဲစ်ꩻစွဉ်ႏ ဝေင်ꩻကိုတွမ်ႏ ဒုံကို၊ ခြံတုံးဖုံႏကိုသွူ။ 35ဖေႏကထီႏ ထာꩻကထွာလွဉ်ဒါႏဖုံႏနဝ်ꩻ လိုꩻဖုံႏ ထန်ႏလွေꩻတဲင် ဝွေꩻသီး ထွိုင်ႏဖျော်လွဉ် ဗွေႏယေသျုထျꩻချိန်ႏ၊ ဝွေꩻသီးထီႏစွဉ်ႏ ပါꩻခို လူꩻကုဲင် ကထန်ႏထိုꩻလဲဉ်းဒါႏနဝ်ꩻ အဝ်ႏအုံလင်ꩻထာꩻ ဗွေႏယေသျု ခင်ႏထျꩻတဲင် ကွဉ်ကꩻလဲဉ်း ခွမ်ꩻလာꩻတွော့ꩻ ဝွေꩻသꩻမဲဉ်ႏထိုꩻလဲဉ်း နဝ်ꩻမꩻ ဝွေꩻသီး ကားကအဝ်ႏ ငမ်းသꩻစွဉ်ႏနဝ်ꩻသွူ။ 36ပါꩻယို ဟဝ်လွဉ်လဲဉ်း နုဲင်းမုဲင်ꩻခရာႏနဝ်ꩻ လိုꩻကထီႏဗာႏလဲဉ်း သားဖုံႏ အွဉ်ႏဒေါ့ꩻနယ်ဖေႏ လိုꩻဖုံႏသွူ။ 37တွိုႏနဝ်ꩻ လိုꩻကအဝ်ႏ ဟံႏနယ်ႏနဝ်ꩻကိုသားဖုံႏနဝ်ꩻ ပွိုးဝွေꩻသီး ငမ်းသꩻတနွော့ꩻငါႏ နဝ်ꩻမꩻ ဝွေꩻဗွေႏ ဖေႏကလွေꩻညာꩻထိုꩻနဝ်ꩻ တောင်ꩻပြန်ႏ ဗွေႏယေသျုနဝ်ꩻသွူ။ နဝ်ꩻမꩻ ဗွေႏယေသျု နွို့သော့ꩻဖြီကိုတဲင် ထန်ႏလွေꩻထိုꩻစွဉ်ႏသွူ။ 38ပါꩻခိုလူꩻကုဲင် ကထန်ႏထိုꩻနဝ်ꩻ တောင်ꩻပြန်ႏ ဗွေႏယေသျု၊ “ဖေႏခွေသွဉ်း လွေꩻငီꩻစွဉ်ႏ နီဗွေႏမွိုင်” နုဲင်းနဝ်ꩻသွူ။
ကွဲႏတွော့ꩻ ဗွေႏယေသျု အွဉ်ႏစွꩻလွေꩻညာꩻထိုꩻ ဝွေꩻတဲင်ရိုꩻ၊ 39“နုဲင်းဗွေႏဘုရာꩻ ကမာꩻဖေႏလဲဉ်းနာꩻတာႏ ခွိုင်းကားမုဲင်ꩻနဝ်ꩻ သဲင်ꩻချာလမ်းတဲင် ဒေါ့ꩻနယ်ဖေႏသွော့” နုဲင်းနဝ်ꩻသွူ။
ဗွေႏယေသျု မာꩻဖေႏလဲဉ်းသွူ ဝွေꩻတာႏ ခွိုင်းကားမုဲင်ꩻကျောင်ꩻ ပါꩻခိုနဝ်ꩻ ဖျတ်ကာႏလွေꩻဝေင်ꩻတွော့ꩻ အွဉ်ႏဒေါ့ꩻနယ် စွစ်ꩻစဲစ်ꩻစွဉ်ႏနဝ်ꩻသွူ။
ယာဣရုပိုမူႏစွဉ်ႏပါꩻမူႏတဖြာꩻကခွိုင်းဒါႏဗွေႏယေသျုဆဲင်ꩻယွုံးတန်
(မတဲ ၉:၁၈–၂၆။ မာကု ၅:၂၁–၄၃)
40ဗွေႏယေသျု ထွိုင်ႏသဲင်ꩻလွဉ်ချာ ထီနောင်ခတဖဲ့ꩻချိန်ႏ လိုꩻဖုံႏနဝ်ꩻ ပွိုးတွော့ꩻ ဝွေꩻသီး ကားကအဝ်ႏ အဝ်ႏမောင်ꩻ ဝွေꩻဗွေႏနဝ်ꩻမꩻ ရပ်ကျိုႏဆွုမ်ႏ ဝွေꩻဗွေႏသွူ။ 41တွိုႏနဝ်ꩻ ပါꩻခိုတဖြာꩻ မဉ်ꩻယာဣရုနဝ်ꩻ ဖျော်လွဉ်သွူ။ ဝွေꩻနဝ်ꩻအဝ်ႏထွာ တရာꩻစရွပ်လိုꩻတန် တဖြာꩻ နဝ်ꩻသွူ။ ဝွေꩻအွပ်ꩻလင်ꩻ ဗွေႏယေသျုခင်ႏထျꩻတဲင် ဖေႏကကျွꩻလွေꩻ ဝွေꩻလမ်းနဝ်ꩻ တောင်ꩻပြန်ႏဝွေꩻဗွေႏသွူ။ 42ပွိုးတွော့ꩻ ဝွေꩻပိုမူႏအဝ်ႏ တဖြာꩻလွုမ်ꩻ၊ သက်လꩻ တဆီနီနေင်ႏနဝ်ꩻ အီႏဗော့ꩻသီထိုꩻနဝ်ꩻသွူ။
နုဲင်းဝွေꩻဗွေႏ ကအဝ်ႏသဲင်ꩻငီꩻဝွေꩻချိန်ႏ လိုꩻအာဖုံႏနဝ်ꩻ အဝ်ႏခူစွဉ်ႏ ဝွေꩻဗွေႏ စွုမ်ႏဖဲ့ꩻစွုမ်ႏနားနဝ်ꩻသွူ။ 43ဝွေꩻသီးကို ပါꩻမူႏတဖြာꩻ အဝ်ႏခံႏစာꩻဗာႏ သွီႏထောက်ꩻရောႏဂါႏ လꩻလဲဉ်းတဆီနီနေင်ႏနဝ်ꩻ အဝ်ႏပါသွူ။ ဝွေꩻမူႏရွဉ် ကားကအဝ်ႏနဝ်ꩻ ဝွေꩻမူႏလုမ်ꩻလာꩻ အီလဲဉ်းသွူ တသီႏဆရာႏဝွန်ႏဖုံႏထျꩻ၊ ကွဲႏတွော့ꩻ ပါꩻမုဲင်ꩻတဖြာꩻတဲ့ တလုမ်ꩻလာꩻဟဝ် နွောင်ꩻဖေႏတဝ်း ဝွေꩻမူႏနဝ်ꩻသွူ။ 44ဝွေꩻမူႏ လွဉ်သော့ꩻ လိုꩻဖုံႏကို ဗွေႏယေသျု ဆꩻချာတဲင် ခွိုင်းဝွေꩻဗွေႏ ဆဲင်ꩻယွုံးတန်မော့တွော့ꩻ ဝွေꩻမူႏ သွီႏထောက်ꩻရောႏဂါႏ ယွုတ်ꩻထိုꩻစွဉ်ႏ တလဲင်ႏချင်ꩻသွူ။ 45ဗွေႏယေသျုရီ၊ “ပါꩻမုဲင်ꩻခွိုင်းခွေဟောင်း” နုဲင်းနဝ်ꩻသွူ။
လိုꩻစွုမ်ႏဖြာꩻနဝ်ꩻရိုꩻ နီတခွိုင်းဗာႏတဝ်း နုဲင်းနဝ်ꩻတဲင် ပေတရုဒေါ့ꩻ၊ “ဗွေႏဆရာႏ ၊ လိုꩻဖုံႏကားကအဝ်ႏနဝ်ꩻ အဝ်ႏခူစွဉ်ႏ နီဗွေႏတဲင် အဝ်ႏတနဲဉ်တွူႏ နီဗွေႏ” နုဲင်းနဝ်ꩻသွူ။
46ကွဲႏတွော့ꩻ ဗွေႏယေသျုဒေါ့ꩻ၊ “ပါꩻတဖြာꩻဖြာꩻ ခွိုင်းလဲဉ်းသွူခွေ၊ ပွိုးတန်ꩻခိုꩻ အဝ်ႏခွေထျꩻ ထန်ႏထိုꩻနဝ်ꩻ ခွေအဝ်ႏသေ” နုဲင်းနဝ်ꩻသွူ။ 47ဝွေꩻမူႏကမာꩻနဝ်ꩻ သေထိုꩻလဲဉ်းကျောင်ꩻ ပါꩻမူႏထွိုင်ႏထီႏ ဝွေꩻမူႏလွဉ်စွဉ်ႏ ထာꩻငမ်းသꩻတဲင် အွပ်ꩻလင်ꩻစွဉ်ႏ ဗွေႏယေသျု ခင်ႏထျꩻသွူ။ နဝ်ꩻကို လိုꩻစွုမ်ႏဖြာꩻဆꩻငါနဝ်ꩻ ပွိုးတမုဲင်ꩻ ဝွေꩻမူႏခွိုင်းဗာႏ ဝွေꩻဗွေႏတွော့ꩻ ဝွေꩻမူႏထာꩻဆာ ဟဝ်ရေꩻထိုꩻလဲဉ်း တလဲင်ႏချင်ꩻကျောင်ꩻနဝ်ꩻ ဝွေꩻမူႏ ဒေါ့ꩻနယ်ဖေႏ ဝွေꩻဗွေႏသွူ။ 48ဗွေႏယေသျု ဒေါ့ꩻဖေႏဝွေꩻမူႏ၊ “ခွေပိုမူႏ၊ နာꩻထာꩻယွုမ်းနဝ်ꩻ မာꩻဟဝ်ရေꩻထိုꩻလဲဉ်း နာꩻထာꩻဆာသွူ။ လွေꩻငိမ်ꩻချမ်ꩻ ခွꩻသꩻသွော့” နုဲင်းနဝ်ꩻသွူ။
49ဗွေႏယေသျု ကအဝ်ႏဒေါ့ꩻ နုဲင်းယိုကျာꩻ သတင်ꩻဖေႏသားတဖြာꩻ ကအဝ်ႏဒါႏ အာႏဏာႏပဲင်ႏသားလမ်း ဖျော်လွဉ်တဲင် ဝွေꩻဒေါ့ꩻဖေႏ ယာဣရု၊ “နာꩻပိုမူႏ သီထိုꩻလဲဉ်း၊ တွမ်ႏမာꩻယပ်ꩻထဲင်းမွိုန်းဒွုမ် ဆရာႏဟုဲင်း” နုဲင်းနဝ်ꩻသွူ။
50ကွဲႏတွော့ꩻ ဗွေႏယေသျု ထွိုင်ႏဟွိုန်နဝ်ꩻ ဒေါ့ꩻဖေႏယာဣရု၊ တွမ်ႏငမ်းသꩻမွိုန်း။ အဝ်ႏလိုႏဒျာႏ ထာꩻယွုမ်း တစွိုးလွုမ်ꩻ၊ ဝွေꩻမူႏ အီႏဟဝ်ရေꩻဗာႏဒျာႏ” နုဲင်းနဝ်ꩻသွူ။
51ဝွေꩻဗွေႏ ထွိုင်ႏဖျော်လွဉ် လမ်းနဝ်ꩻ ပေါႏလွိုသွူ ပေတရု၊ ယောဟန်၊ ယာကုပ်၊ ပါꩻမူႏပေႏ အဖါတွမ်ႏ အမွိုးနဝ်ꩻ ဝွေꩻဗွေႏ တဖေႏနွို့သော့ꩻတဝ်း ပါꩻတဖြာꩻဖြာꩻနဝ်ꩻသွူ။ 52ကွပ်ပွိုးလိုꩻပေႏ သီထိုꩻနဝ်ꩻမꩻ လိုꩻစွုမ်ႏဖြာꩻ ကအဝ်ႏနဝ်ꩻကိုနဝ်ꩻ အဝ်ႏငွိုးသောင်ခြင်ꩻထာꩻဖုံႏသွူ။ ဗွေႏယေသျုဒေါ့ꩻ၊ “တွမ်ႏငွိုးမွိုန်းထာꩻဟုဲင်း။ လိုꩻပေႏ တသီတဝ်း။ ဝွေꩻမူႏ ဗေင်ႏအွီႏဒျာႏထာꩻ” နုဲင်းနဝ်ꩻသွူ။
53ကွပ်ပွိုးဝွေꩻမူႏ သီထိုꩻလဲဉ်းကျောင်ꩻ ဝွေꩻသီး အဝ်ႏသေနဝ်ꩻမꩻ ဝွေꩻသီး ကားကအဝ်ႏ ကဲ့ꩻရဲ့ꩻသဲ့ꩻသွမ်ꩻစွဉ်ႏ ဝွေꩻဗွေႏသွူ။ 54ကွဲႏတွော့ꩻ ဗွေႏယေသျု တွမ်ႏအစူ ထူႏပါꩻမူႏပေႏစူတဲင် ဟဲ့ꩻ၊ “လိုꩻပေႏ၊ ထွိုင်ႏဟုဲင်း” နုဲင်းနဝ်ꩻသွူ။ 55ပါꩻမူႏပေႏနဝ်ꩻ သက်မွန်လွဉ်ချာတဲင် ဝွေꩻမူႏထွိုင်ႏစွဉ်ႏ တလဲင်ႏချင်ꩻတွော့ꩻ ဖေႏနေးကဖေႏ ဝွေꩻမူႏထာꩻအံႏ တစွိုးစွိုးနဝ်ꩻ ဗွေႏယေသျု မိန်းဖေႏဝွေꩻသီးသွူ။ 56ဝွေꩻမူႏ မွိုးဖါနဝ်ꩻ အံႏဖြာႏငါႏသွူ၊ ကွဲႏတွော့ꩻ ကအဝ်ႏထွာထာꩻ နုဲင်းနဝ်ꩻနဝ်ꩻ ဖေႏကဒေါ့ꩻနယ်မွိုန်း ပါꩻတဖြာꩻဖြာꩻနဝ်ꩻ ဗွေႏယေသျု မိန်းဖေႏ ဝွေꩻသီးသွူ။
ទើបបានជ្រើសរើសហើយ៖
လုကာ 8: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
