လုကာ 5
5
ဗွေႏယေသျုကဟဲ့ꩻဒါႏတပဲ့တောႏဖုံႏအရီးသွတ်ꩻ
(မတဲ ၄:၁၈–၂၂။ မာကု ၁:၁၆–၂၀)
1 #
မ ၁၃:၁၊ ၂၊ မာ ၃:၉၊၁၀၊ ၄:၁။ တနီꩻသား ဗွေႏယေသျု အဝ်ႏအုံထွိုင်ႏ ကဲန်နေသရဲစ် ထီနောင် ဖင်ႏလောင်းကျာꩻ ကအီႏနာႏ ဗွေႏဘုရာꩻ ငဝ်းတောႏနဝ်ꩻ လိုꩻဖုံႏ အဝ်ႏတနဲဉ်တွူႏလွဉ် ဝွေꩻဗွေႏထျꩻနဝ်ꩻသွူ။ 2ဝွေꩻဗွေႏထီႏ ဖြီနီဆွိုင်ꩻ အဝ်ႏထွိုင်ႏ ထီဖင်ႏထျꩻသွူ။ စံႏငါးသားဖုံႏနဝ်ꩻ အဝ်ႏဖြီဖုံႏကို ထန်ႏလွဉ်တဲင် အဝ်ႏပသေ အခြယ်ဖုံႏသွူ။ 3ဗွေႏယေသျု နွို့သော့ꩻ ဖြီတဆွိုင်ꩻကို၊ ဖြီနဝ်ꩻနဝ်ꩻ ထွာသိမုန်ဖြီတဲင် အဝ်ႏဖင်ႏထျꩻနဝ်ꩻ အွဉ်ႏဝွေꩻဝါးဖြုဲင်ꩻငါလွေꩻ တစိꩻနဝ်ꩻသွူ။ ဗွေႏယေသျု အုံလင်ꩻသော့ꩻဖြီကိုတဲင် သွဉ်သင်ဖေႏ လိုꩻစွိုꩻဖုံႏနဝ်ꩻသွူ။
4ဝွေꩻဗွေႏအွဉ်ႏထွူထိုꩻ ထာꩻဒေါ့ꩻချိန်ႏ ဝွေꩻဗွေႏဒေါ့ꩻဖေႏ သိမုန်၊ “ဖြီနဝ်ꩻ ဝါးဖြုဲင်ꩻထန်ႏငါသော့ꩻ ထီယော့ကိုတဲင် နာꩻစွဉ်ႏနာꩻသွꩻဖုံႏ ဖေႏကဆွမ်ꩻလꩻထနဝ်ꩻ ဝန်ႏလင်ꩻသီခြယ်ဟုဲင်း” နုဲင်းနဝ်ꩻသွူ။
5 #
ယော ၂၁:၃။ သိမုန်လဝ်းချာ၊ “ဗွေႏ၊ နီကျိုꩻစာꩻဆွမ်ꩻလဲဉ်းသွူ တဟာသူႏသူႏစွဉ်ႏတဲ့ တလꩻတဝ်း တမုဲင်ꩻမုဲင်ꩻသွူ။ ကွဲႏတွော့ꩻ နီဗွေႏမဉ်ꩻရိုꩻ နုဲင်းနဝ်ꩻတဲ့ ခွေသွဉ်း အီႏဝန်ႏလင်ꩻခြယ်” နုဲင်းနဝ်ꩻသွူ။ 6#ယော ၂၁:၆။ ဝွေꩻသီးဝန်ႏလင်ꩻ အခြယ်တဲင် ဆွမ်ꩻလထပေႏ အဗာႏအာငါႏ နဝ်ꩻမꩻ ခြယ်လဲင်ꩻအီႏသဲ့ ထိုꩻနေးစွဉ်ႏနဝ်ꩻသွူ။ 7နဝ်ꩻမꩻ ဝွေꩻသီးဖေႏအချက် အွဉ်ႏဟွိုန်လွေꩻ အသွꩻဖြီအလင်ဖုံႏ ဖေႏကလွဉ်စွဲကို ဝွေꩻသီးနဝ်ꩻသွူ။ ဝွေꩻသီး ဖျော်လွဉ်တဲင် ဖြီနီဆွိုင်ꩻလွုမ်းနဝ်ꩻ ထပေႏဖုံႏ ဗွေငါႏလွဉ်ꩻနဝ်ꩻမꩻ ဖြီဖုံႏ လဲင်ꩻအီႏဗဉ် ထိုꩻနေးစွဉ်ႏနဝ်ꩻသွူ။ 8ထွာထာနုဲင်းနဝ်ꩻနဝ်ꩻ သိမုန်ပေတရုထွိုင်ႏထီႏ ဝွေꩻအုံထောက်လင်ꩻ ဗွေႏယေသျုဆꩻငါတဲင်ဒေါ့ꩻ၊ “ဗွေႏ၊ လွေꩻညာꩻညာꩻထိုꩻသွော့ ခွေသွဉ်းဟုဲင်း၊ ခွေသွဉ်းနဝ်ꩻထွာ လိုꩻအဝ်ႏဗွေစွဉ်ႏ အပဲစ်သားတဖြာꩻ” နုဲင်းနဝ်ꩻသွူ။
9လိုꩻလင်ဖုံႏ ကအဝ်ႏငီꩻဒါႏ တွမ်ႏဝွေꩻ ထွိုင်ႏထီႏ ဝွေꩻသီးဆွမ်ꩻလꩻထပေႏ အာငါႏနဝ်ꩻ ဝွေꩻသီး ကားကအဝ်ႏ အံႏဖြာႏငါႏနဝ်ꩻသွူ။ 10စံႏငါးသား သိမုန်သွꩻ ကထွာဇေဗေဒဲပိုခို ယာကုပ်တွမ်ႏ ယောဟန်နဝ်ꩻတဲ့ အံႏဖြာႏမွေးစွဉ်ႏဖုံႏနဝ်ꩻသွူ။ ဗွေႏယေသျု ဒေါ့ꩻဖေႏသိမုန်၊ “တွမ်ႏငမ်းသꩻမွိုန်း။ တယ်ႏယိုမာꩻငါꩻ နာꩻအီႏထွာဗာႏ စံႏငါးဆွမ်ꩻလိုꩻဖုံႏ” နုဲင်းနဝ်ꩻသွူ။
11ဝွေꩻသီးဖြီဖုံႏနဝ်ꩻ နွန်ႏထင်ႏဖင်ႏလောင်းတွော့ꩻ အွဉ်ႏကုဲင်လို့စွဉ်ႏတဲင် လွေꩻလွဉ်ꩻစွဉ်ႏ ဗွေႏယေသျုနဝ်ꩻသွူ။
ဗွေႏယေသျုလုမ်ꩻလာꩻဟဝ်ဖေႏပါꩻတဖြာꩻ
(မတဲ ၈:၁–၄။ မာကု ၁:၄၀–၄၅)
12တလဲင်ႏသား ဗွေႏယေသျုအဝ်ႏသော့ꩻ ဝေင်ꩻတဖြုံႏကို နဝ်ꩻကိုနဝ်ꩻ ပါꩻခိုတဖြာꩻ အဝ်ႏခံႏစာꩻဗာႏ အတွတ်ꩻရောႏဂါႏ အဝ်ႏသွူ။ ဝွေꩻထွိုင်ႏထီႏ ဗွေႏယေသျုချိန်ႏ ဝွေꩻအွပ်ꩻလင်ꩻတဲင် တောင်ꩻပြန်ႏဝွေꩻဗွေႏ၊ “ဗွေႏ၊ နီဗွေႏအလိုႏတောႏ မဉ်ႏအဝ်ႏနဝ်ꩻ နီဗွေႏ မာꩻကြောင်းစင် ဖေႏနွောင်ꩻခွေသွဉ်း” နုဲင်းနဝ်ꩻသွူ။
13ဗွေႏယေသျု ယောင်းထန်ႏအစူတဲင် ခွိုင်းစွဉ်ႏဝွေꩻသွူ။ ဝွေꩻဗွေႏလဝ်းချာ၊ “ခွေအလိုႏတောႏအဝ်ႏ၊ ယံကကြောင်းစင်သွော့”၊ နုဲင်းနဝ်ꩻတဲင် တလဲင်ႏချင်ႏ ပါꩻခိုနဝ်ꩻ ရောႏဂါႏဟဝ်ထိုꩻစွဉ်ႏ နဝ်ꩻသွူ။ 14ဗွေႏယေသျုမိန်းဖေႏဝွေꩻ၊ “တွမ်ႏအွဉ်ႏဒေါ့ꩻနယ်မွိုန်း ပါꩻတဖြာꩻဖြာꩻ၊ ကွဲႏတွော့ꩻ လွေꩻစွဉ်ႏစွဉ်ႏသွော့ ယဇ်ပရောဟိတ်ထျꩻတွော့ꩻ အွဉ်ႏဝွေꩻ စဲစ်ဆေꩻထွားသွော့နာꩻ၊ နဝ်ꩻထွူ နာꩻဟဝ်ရေꩻလဲဉ်းကျောင်ꩻ လိုꩻစွုမ်ႏဖြာꩻ ဖေႏနေး ကထောက်ခံႏနဝ်ꩻ နုဲင်းမောသျေ ကမိန်းဖေႏအတွိုင်ꩻ ပူႏဇောႏသွော့ ယဇ်ထာꩻပူႏဇောႏဟုဲင်း” နုဲင်းနဝ်ꩻသွူ။
15ကွဲႏတွော့ꩻ ပွိုင်းဝွို့တွမ်ႏ ဗွေႏယေသျုခရာႏ ငဝ်းသတင်ꩻနဝ်ꩻ ကယိန်းစွစ်ꩻလီထဲင်းတဲင် ဖေႏကဟွိုန် ဝွေꩻဗွေႏတရာꩻတွော့ꩻ ဖေႏကလုမ်ꩻလာꩻ မာꩻဟဝ်ဖေႏ ဝွေꩻသီးရောႏဂါႏဖုံႏနဝ်ꩻ လိုꩻပရိတ်သတ်စွိုꩻဖုံႏ ဖျော်လွဉ်စွဉ်ႏနဝ်ꩻသွူ။ 16ကွဲႏတွော့ꩻ နုဲင်းဝွေꩻဗွေႏ ကအဝ်ႏမာꩻသေႏသေႏဒါႏ အတွိုင်ꩻနဝ်ꩻ လွေꩻညာꩻထိုꩻ ခင်ႏလမ်းယဉ်ကိုတဲင် ဆုတောင်ꩻထင်ႏနဝ်ꩻသွူ။
ဗွေႏယေသျုလုမ်ꩻလာꩻမာꩻဟဝ်ဖေႏလိုꩻမာႏရေႏတဖြာꩻ
(မတဲ ၉:၁–၈။ မာကု ၂:၁–၁၂)
17တနီꩻသား ဗွေႏယေသျု အဝ်ႏသွဉ်သင်ဖေႏချိန်ႏ ဖါရိသဲဖုံႏ ယင်ဟန်ႏတွမ်ႏ ကျမ်ꩻဒါႏဆရာႏဖုံႏ အဝ်ႏကာလိလဲခမ်း စွဉ်ႏယုဒခမ်းကို ဝေင်ꩻစွုမ်ႏဝေင်ꩻ တွမ်ႏဝေင်ꩻယေရုသလမ်ႏနဝ်ꩻ လွဉ်အုံလင်ꩻနဝ်ꩻကိုသွူ။ ကအီႏလုမ်ꩻလာꩻ မာꩻဟဝ်ဖေႏ လိုꩻဆော့ဆာနဝ်ꩻ ထာဝရဘုရာꩻတန်ꩻခိုꩻ အဝ်ႏငီꩻ ဗွေႏယေသျုနဝ်ꩻသွူ။ 18လိုꩻခိုယင်ဟန်ႏ အဝ်ႏထမ်ႏလွဉ် လိုꩻဆာမာႏရေႏတဖြာꩻ အခင်ႏလမ်းဗေင်ႏလောင်းတဲင် ဝွေꩻသီးကျိုꩻစာꩻ အီႏထမ်ႏလွေꩻသော့ꩻ လမ်းကို ဗွေႏယေသျုဆꩻငါနဝ်ꩻသွူ။ 19ကွဲႏတွော့ꩻ လိုꩻဖုံႏနဝ်ꩻ ကွပ်ပွိုး အာငါႏလွဉ်ꩻနဝ်ꩻမꩻ ဝွေꩻသီး အီႏအီနွို့လွေꩻသော့ꩻ တလꩻတဝ်းနဝ်ꩻသွူ။ နဝ်ꩻမꩻ ဝွေꩻသီးအီထင်ႏဝွေꩻ လမ်းသꩻလောင်းတွော့ꩻ ဗွောင်လမ်းသꩻတဲင် လွဉ်းလင်ꩻထံစွဉ်ႏ ခင်ႏလမ်းဗေင်ႏတွေ တနꩻစွဉ်ႏ ဗွေႏယေသျုဆꩻငါ လိုꩻအကဲဉ်ကိုနဝ်ꩻသွူ။ 20ဝွေꩻသီး ထာꩻယွုမ်းတန်ငါႏ ဗွေႏယေသျု ထွိုင်ႏထီႏချိန်ႏ ဝွေꩻဗွေႏ ဒေါ့ꩻဖေႏပါꩻခို၊ “ခွေသွꩻ၊ နာꩻအပဲစ်လွစ်လဲဉ်း” နုဲင်းနဝ်ꩻသွူ။
21ကျမ်ꩻဒါႏဆရာႏဖုံႏတွမ်ႏ ဖါရိသဲဖုံႏ ဒေါ့ꩻတေ့ꩻချာအသꩻကို၊ ‘ပါꩻယို လိုꩻစားမုဲင်ꩻတန်နဲ၊ ဒေါ့ꩻပဲစ်မာႏဗာႏတွိုႏ ဗွေႏဘုရာꩻ နုဲင်းမုဲင်ꩻတန်နဲ၊ ဗွေႏကအွဉ်ႏစွꩻလွစ်နွောင်ꩻဒါႏ အပဲစ်နဝ်ꩻ အဝ်ႏဗွေႏဘုရာꩻ တပါꩻလွုမ်ꩻ” နုဲင်းနဝ်ꩻသွူ။
22ဝွေꩻသီး ထာꩻယူႏစဉ်ꩻစာꩻနဝ်ꩻ ဗွေႏယေသျု အဝ်ႏသေတဲင် ဒေါ့ꩻဖေႏဝွေꩻသီး၊ “ပွိုးတမုဲင်ꩻ သီအဝ်ႏစဉ်ꩻစာꩻဗာႏတွိုႏထာꩻ စားနဝ်ꩻဟောင်း” နုဲင်းနဝ်ꩻသွူ။ 23‘နာꩻအပဲစ်လွစ်လဲဉ်း’ ဒေါ့ꩻနုဲင်းနဝ်ꩻယိုꩻနဲ့၊ မဉ်ႏမွေးတဝ်း၊ ၊‘ထွိုင်ႏတဲင် ထောင်ꩻလွေꩻဟုဲင်း’ ဒေါ့ꩻနုဲင်းနဝ်ꩻနဝ်ꩻ ယိုနဲ့။ 24တွိုႏနဝ်ꩻ လိုꩻပိုခိုနဝ်ꩻ ဟံႏတန်လောင်း အီႏအွဉ်ႏစွꩻလွစ်နွောင်ꩻဖေႏ အပဲစ်ဖုံႏနဝ်ꩻ လꩻလဲဉ်း အာႏဏာႏနဝ်ꩻ ခွေအီႏအွဉ်ႏနယ်ဖေႏ သီသက်သေႏ” နုဲင်းနဝ်ꩻသွူ။ နဝ်ꩻမꩻ ဝွေꩻဗွေႏဒေါ့ꩻဖေႏ လိုꩻဆာမာႏရေႏ၊ “ခွေဒေါ့ꩻဖေႏနာꩻ၊ ထွိုင်ႏတဲင် ထူႏနာꩻခင်ႏလမ်းဗေင်ႏတွော့ꩻ သဲင်ꩻခန်းလမ်းဟုဲင်း” နုဲင်းနဝ်ꩻသွူ။
25တလဲင်ႏချင်ꩻ ပါꩻခိုထွိုင်ႏစွဉ်ႏ ဝွေꩻသီး ကားကအဝ်ႏဆꩻငါတဲင် ထူႏဝွေꩻကအဝ်ႏ ဗေင်ႏလူးဒါႏ အခင်ႏလမ်းဗေင်ႏ တွေနဝ်ꩻတွော့ꩻ အုပ်ꩻဗွေႏဘုရာꩻ ကေꩻဇူꩻတောႏတဲင် သဲင်ꩻစွဉ်ႏလမ်းနဝ်ꩻသွူ။ 26ဝွေꩻသီး ကားကအဝ်ႏ အံႏဖြာႏမွေးနေးစွဉ်ႏတဲင် အဝ်ႏဗွေစွဉ်ႏ ထာꩻရိုႏသေႏ ငမ်းသꩻတွော့ꩻ ဝွေꩻသီးအုပ်ꩻ ဗွေႏဘုရာꩻရိုꩻ၊ “ဟန်ႏနီꩻယို နီထီႏဗာႏလဲဉ်းသွူ ထာꩻအံႏဖြာႏခရာႏဖုံႏ” နုဲင်းနဝ်ꩻသွူ။
ဗွေႏယေသျုဟဲ့ꩻလေဝိ
(မတဲ ၉:၉–၁၃။ မာကု ၂:၁၃–၁၇)
27ယိုထွူ ဗွေႏယေသျု ထန်ႏလွေꩻတဲင် ထီႏဗာႏ အခွဉ်ႏကောက်သား တဖြာꩻ မဉ်ꩻလေဝိ၊ အဝ်ႏအုံလင်ꩻထာꩻ ဝွေꩻရွုမ်ꩻကိုနဝ်ꩻသွူ။ ဗွေႏယေသျု ဒေါ့ꩻဖေႏဝွေꩻ၊ လွေꩻလွဉ်ꩻသွော့ခွေ” နုဲင်းနဝ်ꩻသွူ။ 28လေဝိထွိုင်ႏတဲင် အွဉ်ႏကုဲင်လို့စွဉ်ႏ ထာꩻကားကအဝ်ႏတွော့ꩻ လွေꩻလွဉ်ꩻစွဉ်ႏ ဝွေꩻဗွေႏနဝ်ꩻသွူ။
29နဝ်ꩻထွူ ဗွေႏယေသျုတာႏနဝ်ꩻ လေဝိမာꩻဖေႏ ပွယ်ꩻတန်တဖြုံႏ ဝွေꩻအလမ်းကိုတဲင် ထဉ်ႏဖုံႏကိုနဝ်ꩻ အခွဉ်ႏကောက်သားဖုံႏစွဉ်ႏ လိုꩻလင်ဖုံႏ ပါသော့ꩻအာငါႏနဝ်ꩻသွူ။ 30#လု ၁၅:၁၊ ၂။ ဖါရိသဲယင်ဟန်ႏတွမ်ႏ ဝွေꩻသီး စွုမ်ꩻစွိုꩻကို ကအဝ်ႏပါသော့ꩻဒါႏ ကျမ်ꩻဒါႏဆရာႏဖုံႏ ယင်ဟန်ႏနဝ်ꩻ အဝ်ႏပဲစ်တင်ႏ ဗွေႏယေသျု တပဲ့တောႏဖုံႏနဝ်ꩻသွူ။ “ပွိုးတမုဲင်ꩻ သီအဝ်ႏအံႏအွꩻငီꩻဗာႏတွိုႏ အခွဉ်ႏကောက်သားဖုံႏ တွမ်ႏလိုꩻ ဝင်ꩻကပယ်ႏဒါႏသားဖုံႏ နုဲင်းမုဲင်ꩻဟောင်း” ဝွေꩻသီးရီနုဲင်းနဝ်ꩻသွူ။
31ဗွေႏယေသျု လဝ်းချာဝွေꩻသီး၊ “လိုꩻအုံဟဝ် ခြွိုင်ႏသန်ꩻသားဖုံႏနဝ်ꩻ တအဝ်ႏလိုႏတဝ်း ဆရာႏဝွန်ႏ၊ ကွဲႏတွော့ꩻ လိုႏဒျာႏ လိုꩻဆော့ဆာသားလွုမ်ꩻသွူ။ 32အီႏဟဲ့ꩻ လိုꩻဂွုဏ်ႏသရေႏ အဝ်ႏသားဖုံႏ ဖေႏကလꩻ ထာꩻကော့ꩻမာႏနဝ်ꩻ ခွေကျွꩻလွဉ် တမွေးတဝ်း၊ ကွဲႏတွော့ꩻ ကျွလွဉ်ဒျာႏ လိုꩻဝင်ꩻကပယ်ႏထိုꩻ ဒါႏသားဖုံႏတာႏ” နုဲင်းနဝ်ꩻသွူ။
ရီပွိုင်းဝွို့တွမ်ႏသျောင်ႏကံထာꩻအံႏခရာႏ
(မတဲ ၉:၁၄–၁၇။ မာကု ၂:၁၈–၂၂)
33လိုꩻယင်ဟန်ႏ ဒေါ့ꩻဖေႏဗွေႏယေသျု၊ “ယောဟန်တပဲ့ဖုံႏနဝ်ꩻ ခွိုꩻခွိုꩻသျောင်ႏကံ ထာꩻအံႏတဲင် အဝ်ႏဆုတောင်ꩻဘုရာꩻ၊ ဖါရိသဲ တပဲ့တောႏဖုံႏနဝ်ꩻတဲ့ အဝ်ႏမာꩻဗွိုန် နုဲင်းနဝ်ꩻနေနေ၊ ကွဲႏတွော့ꩻ နာꩻတပဲ့တောႏဖုံႏနဝ်ꩻ အံႏအွꩻဒျာႏဖုံႏနုဲင်းမုဲင်ꩻ” နုဲင်းနဝ်ꩻသွူ။
34ဗွေႏယေသျုလဝ်းချာ၊ “ထဉ်ႏဖုံႏ ကအဝ်ႏငီꩻဒွိုန်းက တွမ်ႏခွန်မောင်ႏ ကမာꩻပွယ်ꩻ မင်္ဂလာႏကျာꩻနဝ်ꩻ သီထင်း သီအီႏသျောင်ႏကံနွောင်ꩻ ထာꩻအံႏအွꩻနဲ့ဟောင်း။ တသျောင်ႏကံနွောင်ꩻတဝ်း။ 35ကွဲႏတွော့ꩻ တောႏလမ်း မင်္ဂလာႏသား ခွန်မောင်ႏယို အဝ်ႏဝွေꩻသီးထျꩻ အီႏခံႏဗာႏ ဟဲ့ꩻလွေꩻညာꩻထိုꩻ အနီꩻ အီႏဖျော်လွဉ်တဲင် တွိုႏနဝ်ꩻ ဝွေꩻသီး အီႏသျောင်ႏကံနွောင်ꩻ” နုဲင်းနဝ်ꩻသွူ။
36ဗွေႏယေသျု ဒေါ့ꩻနယ်ပါက ဝွေꩻသီး ငဝ်းဥပမာႏ နုဲင်းယိုသွူ။ “ဆဲင်ꩻယလောင်းနဝ်ꩻ ထူႏပိတ်ခဝ် တသာတွော့ꩻ ပါမုဲင်ꩻတဖြာꩻတဲ့ တပြဝ်ႏလူးတဝ်းသွူ။ သီမဉ်ႏပြဝ်ႏအီ ဆဲင်ꩻယာႏခဝ် တသာနဝ်ꩻ အီႏသဲ့ထိုꩻသွူ။ 37ဝုဲင်တသာနဝ်ꩻ သီတဆျာꩻသော့ꩻတဝ်း ဝုဲင်တဖြို့ꩻဗူးလီꩻကို၊ ပွိုးတွော့ꩻ ဝုဲင်တသာနဝ်ꩻ အီႏအဲင်ႏထိုꩻ တဖြို့ꩻဗူးလီꩻတဲင်၊ ဝုဲင်အီႏရီႏထန်ႏထိုꩻတွော့ꩻ တဖြို့ꩻဗူးဖုံႏ အီႏကုဲင်သွုမ်ꩻထိုꩻသွူ။ 38ဝုဲင်တသာနဝ်ꩻ အီႏဆျာꩻသော့ꩻ ဗာႏဒျာႏ တဖြို့ꩻဗူးတသာကို၊ 39သီအွꩻ ဝုဲင်လီꩻထွူနဝ်ꩻ တမဉ်အွꩻတဝ်း ဝုဲင်တသာသွူ။ အီႏရိုꩻ၊ ‘ဝုဲင်လီꩻနဝ်ꩻ ယံကယ်ꩻ’” နုဲင်းနဝ်ꩻသွူ။
ទើបបានជ្រើសរើសហើយ៖
လုကာ 5: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
