ကမ္ဘာႏစ 41

1ဆုဲင်ꩻထွိုင်ႏည နီနေင်ႏနဝ်ꩻ အီဂျစ်ခွန်တန် ဗေင်ႏမင်းထာꩻသွူ။ ထာꩻဗေင်ႏမင်းကိုနဝ်ꩻ ဝွေꩻအဝ်ႏအုံထွိုင်ႏထာꩻ ‘‘နုဲင်း’’ ခြောင်တန်ဖင်ႏထျꩻသွူ။ 2ဖိုးမွူးပြွောင်ႏ တရေꩻ နွတ်ꩻဗာႏနဝ်ꩻ အဝ်ႏထီခြောင်တန်ကို ပေါႏထန်ႏလွဉ်တဲင် အံႏစစွဉ်ႏ ထာꩻအီႏသွူ။ 3နဝ်ꩻထွူ ဖိုးမွူးယွောင် တကုဲင် အဝ်ႏဒျာႏ အဆွတ်ꩻတွမ်ႏ အပီလွုမ်ꩻ နွတ်ꩻဗာႏနဝ်ꩻ အဝ်ႏထီခြောင်တန်ကို ထန်ႏလွဉ် လွေꩻအုံထွိုင်ႏဗော့ꩻစွဉ်ႏ ဖိုးမွူးဖုံႏ ကဖျော်လွဉ်ရီးလဲဉ်းဒါႏ ခြောင်တန်ဖင်ႏထျꩻနဝ်ꩻသွူ။ 4တဲင်ဖိုးမွူး ယွောင်ဖုံႏနဝ်ꩻ အံႏထိုꩻစွဉ်ႏ ဖိုးမွူးပြွောင်ႏဖုံႏထွူ ခွန်တန် မဲ့သေထိုꩻစွဉ်ႏသွူ။ 5ဝွေꩻဗေင်ႏအွီႏ ဖျင်ယင်းတလဲင်ႏတဲင် ဗေင်ႏမင်း ဖျင်ယင်းထာꩻသွူ။ ထာꩻဗေင်ႏမင်းကို ဗွူမွူး တမွူးလွုမ်ꩻနဝ်ꩻ အခြီႏထန်ႏလွဉ် နွတ်ꩻခြီႏ၊ အခူꩻ အဝ်ႏဗွေသော့ꩻ ဗွူရာႏကိုတဲင် မဉ်တသီးဟဝ်ငါႏသွူ။ 6နဝ်ꩻထွူ ကွပ်ကန္တာရ တလီꩻလျား မာꩻနွူႏသဲင်စွဉ်ႏတဲင် ဗွူခူꩻတဝေ့ꩻ ဗွူသိုႏညံး နွတ်ꩻခြီႏတဲ့ ဒေါ့ꩻထန်ႏလွဉ်သွူ။ 7ဗွူခြီႏ သိုႏဖုံႏနဝ်ꩻ မျောႏထိုꩻစွဉ်ႏ ဗွူခြီႏဆꩻဖုံႏသွူ။ ခွန်တန် မဲ့သေတဲင် ထွာဒျာႏ ထာꩻဗေင်ႏမင်း ကျောင်ꩻ ဝွေꩻသေချာသွူ။ 8#ဒံ ၂:၂။ မွူးရဝ်ꩻခိုႏ ခွန်တန်နဝ်ꩻ သꩻခိုးလျားနဝ်ꩻမꩻ မိန်းလွဉ်လိုꩻစွဉ်ႏ ပေႏတင်ႏဆရာႏစွဉ်ႏ ဥာဏ်ႏတန်သားဖုံႏ အီဂျစ်ခမ်းကိုသွူ။ ခွန်တန် အထာꩻဗေင်ႏမင်းနဝ်ꩻ ခြုဲင်းနယ်ဖေႏဝွေꩻသီး ကွဲႏတွော့ꩻ ပါꩻမုဲင်ꩻတဲ့ တဗွောင်နယ် ဖေႏနွောင်ꩻတဝ်းဝွေꩻ အဓိပ္ပါယ်ႏသွူ။

9တွိုႏနဝ်ꩻ ဝုဲင်ဝွန်ႏတန် လဝ်းထေ့ဖေႏ ခွန်တန် “ဟန်ႏနီꩻယို ခွေသွဉ်းအမာႏ အဝ်ႏတစွိုးနဝ်ꩻ ဝွန်ႏခံႏဒျာႏ၊ ခွေသွဉ်း အွဉ်ႏဖေင်ꩻဒေါ့ꩻထာꩻ အဝ်ႏတစွိုးသွူ။ 10နီခွန်တန် သကလျားဒါႏ အအံႏအအွꩻ ဝွန်ႏတန်တွမ်ႏ ခွေသွဉ်းတွော့ꩻ နီဗွေႏ ကအွဉ်ႏခံသော့ꩻဒါႏ နီထောင်ႏကို ခွန်စဲ့ꩻပိုႏတန် အလမ်းသွူ၊ 11တဟာသား နီဗေင်ႏမင်းထာꩻ ပငါပရာꩻတဲင် ထာꩻဗေင်ႏမင်း အဓိပ္ပါယ်ႏနဝ်ꩻ ဗွိုန်လို့တဝ်းဝင်ꩻသွူ။ 12ထောင်ႏကိုနဝ်ꩻ ပိုႏတန်အသွဉ်း ဟေဗြဲလိုꩻမျိုꩻနဝ်ꩻ အဝ်ႏထဲ့ငီꩻနီ ထောင်ႏသွူ။ နီထာꩻဗေင်ႏမင်းနဝ်ꩻ နီဒေါ့ꩻနယ်ဝွေꩻတဲင် ဝွေꩻဗွေါင်နယ်ဖေႏ နီထာꩻဗေင်ႏမင်း အဓိပ္ပါယ်ႏဖုံႏသွူ။ 13နုဲင်းဝွေꩻကဗွောင်နယ်ဖေႏနီအတွိုင်ꩻ နီဗွေႏနဝ်ꩻ ခန်ꩻချာယင်း ခွေသွဉ်းထာꩻမာꩻတဲင် အအံႏအအွꩻ ဝွန်ႏတန်နဝ်ꩻ နီခွန်တန် စီႏရင်ႏထိုꩻ” နုဲင်းနဝ်ꩻသွူ။

14ဖေႏကဟဲ့ꩻထန်ႏလွဉ် ယောသပ်ဝွေꩻဆꩻငါနဝ်ꩻ ခွန်တန်ဖေႏစွဉ်ႏ အမိန်းတဲင် အဝ်ႏထောင်ႏကိုနဝ်ꩻ ထေထန်ႏလွဉ်စွဉ်ႏဝွေꩻ တလဲင်ႏချင်ႏသွူ။ ယောသပ် ကြော့ꩻဖြောင်းဆွဉ်ႏ လုဲင်းဆဲင်ꩻခွမ်ꩻလာꩻ မွဉ်းဖျင်ထွူ နမ်းတဲင် နွို့လွဉ်စွဉ်ႏ ခွန်တန်ဆꩻငါသွူ။ 15ခွန်တန်မိန်းဖေႏဝွေꩻ “ခွေနဝ်ꩻ ဗေင်ႏမင်းထာꩻတဲင် ပါꩻမုဲင်ꩻတဲ့ တဗွောင်နယ် ဖေႏနွောင်ꩻတဝ်း အဓိပ္ပါယ်ႏ၊ နာꩻဗွေါင်နယ် ဖေႏနွောင်ꩻ ထာꩻဗေင်ႏမင်း အဓိပ္ပါယ်ႏနဝ်ꩻ ခွေဟွိုန်ဗာႏ” နုဲင်းနဝ်ꩻသွူ။

16ယောသပ်လဝ်းချာ “ဗွေႏခွန်တန် ခွေသွဉ်းနဝ်ꩻ အစွန်ꩻထာꩻဒါႏ တအဲဉ်ထဝ်း၊ ကွဲႏတွော့ꩻ အဟဝ်သွတ်ꩻ ဗွေႏဘုရာꩻနဝ်ꩻ မဲ့ꩻဗွေါင်နယ်ဖေႏဒျာႏ နီခွန်တန်” နုဲင်းနဝ်ꩻသွူ။

17ခွန်တန်ရိုꩻ “ခွေထာꩻဗေင်ႏမင်းကိုနဝ်ꩻ ခွေအဝ်ႏအုံထွိုင်ႏထာꩻ ‘‘နုဲင်း’’ ထီခြောင်တန် ဖင်ႏလောင်းတွင်ꩻ၊ 18ဖိုးမွူးပြွောင်ႏတရေꩻ နွတ်ꩻဗာႏနဝ်ꩻ အဝ်ႏထီခြောင်တန်ကို ထန်ႏလွဉ်တဲင် အံႏစစွဉ်ႏထာꩻအီႏနဝ်ꩻသွူ။ 19နဝ်ꩻထွူ ဖိုးမွူးယွောင်တကုဲင် အဝ်ႏအဆွတ်ꩻတွမ်ႏအပီ နွတ်ꩻဗာႏနဝ်ꩻ ထန်ႏလွဉ်သွူ။ ဖိုးမွူးတကုဲင် စားနဝ်ꩻနဝ်ꩻ အီဂျစ်ခမ်းကိုယို ခွေတထီႏဖိုတဝ်း။ 20ဖိုးမွူးယွောင်ဖုံႏနဝ်ꩻ အံႏလို့ထိုꩻစွဉ်ႏ ဖိုးမွူးပြွောင်ႏဖုံႏသွူ။ 21ကွဲႏတွော့ꩻ ထွားဖိုးမွူးယွောင်ဖုံႏ နဝ်ꩻနဝ်ꩻ အဝ်ႏယွောင်ဒျာႏ လီꩻလီꩻနဝ်ꩻမꩻ အံႏမျောႏထိုꩻကျောင်ꩻနဝ်ꩻ ပါꩻမုဲင်ꩻတဲ့ တသေတဝ်းသွူ။ တွိုႏနဝ်ꩻ ခွေမဲ့သေစွဉ်ႏသွူ။ 22ခွေဗေင်ႏမင်းပါယင်းက၊ ခွေထီႏ ဗွူတမွူးနဝ်ꩻ အခြီႏအဝ်ႏနွတ်ꩻခြီႏ၊ အခူꩻဆꩻ မဉ်တရေꩻဟဝ်ငါႏသွူ။ 23တွိုႏနဝ်ꩻ ဗွူခူꩻပေႏတဲင် ကွပ်ကန္တာရ တလီꩻလျား မာꩻနွူႏသဲင်ထိုꩻတွော့ꩻ အခူꩻတဝေ့ꩻ ဗွူသိုႏနွတ်ꩻခြီႏတဲ့ ဒေါ့ꩻလွဉ်သွူ၊ 24ဗွူခြီႏသိုႏဖုံႏနဝ်ꩻ မျောႏထိုꩻစွဉ်ႏ ဗွူခြီႏဆꩻဖုံႏသွူ။ ထာꩻဗေင်ႏမင်းယိုနဝ်ꩻ ခွေဒေါ့ꩻနယ် ပေႏတင်ႏဆရာႏဖုံႏ စွဉ်ႏတဲ့ တဗွေါင်ဖေႏနွောင်ꩻတဝ်း ခွေအဓိပ္ပါယ်ႏ တဖြာꩻဖြာꩻ” နုဲင်းနဝ်ꩻသွူ။

25ယောသပ်ဒေါ့ꩻဖေႏ ခွန်တန် “ခွန်တန် ကဗေင်ႏမင်းဒါႏယို နီစွိုးနဝ်ꩻ အဓိပ္ပါယ်ႏ ဗွိုန်လို့ဒျာႏဝင်ꩻသွူ၊ ဗွေႏဘုရာꩻ ကအီႏမာꩻဒါႏ ထာꩻမာꩻနဝ်ꩻ အွဉ်ႏနယ်ဖေႏဒျာႏ ခွန်တန်။ 26ဖိုးမွူးပြွောင်ႏ နွတ်ꩻဗာႏနဝ်ꩻ ထွာနွတ်ꩻနေင်ႏသွူ။ ဗွူခြီႏဆꩻ နွတ်ꩻခြီႏနဝ်ꩻတဲ့ ထွာနွတ်ꩻနေင်ႏ နေနေသွူ။ ထာꩻဗေင်ႏမင်း နဝ်ꩻဖုံႏနဝ်ꩻ အဓိပ္ပါယ်ႏ ဗွိုန်လို့ဒျာႏဝင်ꩻသွူ။ 27ဖိုးမွူးယွောင်နွတ်ꩻဗာႏ ကထန်ႏလွဉ်ဆုဲင်ꩻတွော့ꩻ ကွပ်ကန္တာရ တလီꩻလျား မာꩻနွူႏသဲင်တဲင် အခူꩻတဝေ့ꩻဒါႏ ဗွူနွတ်ꩻခြီႏနဝ်ꩻ မဉ်ရိုꩻ အအံႏအအွꩻကပ် အီႏခြော နွတ်ꩻနေင်ႏနဝ်ꩻသွူ။ 28ခွေသွဉ်း ကဒေါ့ꩻနယ်လဲဉ်းဒါႏ နီခွန်တန် နုဲင်းနဝ်ꩻဟွဉ်ႏအတွိုင်ꩻ ဗွေႏဘုရာꩻ ကအီႏမာꩻဒါႏ ထာꩻမာꩻနဝ်ꩻ အွဉ်ႏနယ်ဖေႏဒျာႏ ခွန်တန်သွူ။ 29အီဂျစ် တခမ်းလွုမ်းနဝ်ꩻ ထာꩻအံႏအွꩻ အီႏပြန်ꩻပြော်ꩻ နွတ်ꩻနေင်ႏနဝ်ꩻသွူ။ 30နဝ်ꩻမဉ်ႏထွူ ထာꩻအံႏအွꩻ အီႏခြော နွတ်ꩻနေင်ႏနဝ်ꩻ အီႏတွိုႏလွဉ်တဲင် အအံႏအအွခြောကပ် ဟုဲင်းငါႏနဝ်ꩻမꩻ လိုꩻဖုံႏ လဲင်ꩻအွဉ်ႏဖေင်ꩻ ထိုꩻနေးစွဉ်ႏ အအံႏအအွꩻ ကပြန်ꩻပြော်ꩻဒါႏ နွတ်ꩻနေင်ႏနဝ်ꩻသွူ။ ကွပ်ပွိုး ထာꩻအံႏမအံႏအဝ် နဝ်ꩻမꩻ တခမ်းလွုမ်းနဝ်ꩻ အီႏကုဲင်ထိုꩻလို့နဝ်ꩻသွူ။ 31ထာꩻအံႏထာꩻအွꩻ ခြောကပ်နဝ်ꩻ ဟဝ်ငမ်းခရာႏ ဟုဲင်းငါႏလွဉ်ꩻတဲင် လိုꩻဖုံႏနဝ်ꩻ လဲင်ꩻအွဉ်ႏဖေင်ꩻထိုꩻနေးစွဉ်ႏ ထာꩻအံႏထာꩻအွ ပြန်ꩻပြော်ꩻချိန်ႏသွူ။ 32ခွန်တန် လဲင်ꩻဗေင်ႏမင်းစွဉ်ႏ နီလဲင်ႏနဝ်ꩻမꩻ အဓိပ္ပါယ်ႏနဝ်ꩻ ဗွေႏဘုရာꩻ ကအီႏမာꩻထွာနဝ်ꩻ အွဉ်ႏနယ်သေႏချာႏလဲဉ်းတဲင် တညတဝ်း အီႏထွာလွဉ်မွေးသွူ။

33ယိုခါ နီခွန်တန် အဝ်ႏလိုႏလွိုက် လိုꩻဉာဏ်ႏပညာႏအဝ်ႏတွော့ꩻ ထာꩻသေဉာဏ်ႏယော့ အဝ်ႏသား တဖြာꩻတဲင် အွဉ်ႏဝွေꩻ ထိန်ꩻထွားသွော့ခမ်းထီ။ 34နီခွန်တန် ကပြန်ꩻပြော်ꩻဒါႏ နွတ်ꩻနေင်ႏယံတွင်ꩻ ကထန်ႏလွဉ်ဒါႏ အရာႏအကဝ်ႏဖုံႏ ငတ်ꩻပွန်းတပွန်း ဖေႏကသိမ်ꩻထူႏ တခမ်းလွုမ်းနဝ်ꩻ ခန်ꩻသွော့ အာႏဏာႏပဲင်ႏသား အလင်ဖုံႏ။ 35ကအီႏလွဉ်ဒါႏ နေင်ႏပြန်ꩻပြော်ꩻ ယံတွင်ꩻနဝ်ꩻ ဖေႏသွော့ ဝွေꩻသီး အာႏဏာႏတဲင် အွဉ်ႏစုသိမ်ꩻသေꩻခါꩻ အအံႏအအွꩻ ဗွူဟူ အဝေင်ꩻကိုဖုံႏတွော့ꩻ အွဉ်ႏအုံပွေါး ထိန်ꩻဟဝ်ခါꩻသွော့။ 36အီဂျစ်ခမ်းကို ထာꩻအံႏအွꩻခြောဒါႏ နွတ်ꩻနေင်ႏအတာႏ သိမ်ꩻခါꩻစရိပ် အနယ်ꩻနုဲင်းနဝ်ꩻမꩻ အီဂျစ်ခမ်းသားဖုံႏ အီႏလွစ်ဗာႏ ထာꩻအံႏမ” ရိုꩻဖေႏ ဖါရောခွန်တန် နုဲင်းနဝ်ꩻသွူ။

37အီဂျစ်ခွန်တန် တွမ်ႏဝွေꩻအမူꩻမတ် အာႏဏာႏသားဖုံႏ ကားကအဝ်ႏ ယောသပ် ကဒင်ႏနယ်ဖေႏကျံႏဒါႏ အချက်ဖုံႏနဝ်ꩻ သꩻဖော်ꩻတူႏစွဉ်ႏသွူ။ 38တဲင်ခွန်တန်ဒေါ့ꩻဖေႏ အမူꩻမတ်ဖုံႏ “လိုꩻယံလဲဉ်းက ယောသပ်နဝ်ꩻ နီထုမ်ႏတမော့ꩻနွောင်ꩻတဝ်း၊ ဝွေꩻနဝ်ꩻ ဗွေႏဘုရာꩻဝိညာဉ်ႏ အဝ်ႏငီꩻ ဝွေꩻအကို” နုဲင်းနဝ်ꩻသွူ။ 39ခွန်တန် မိန်းဖေႏ ယောသပ် “ကိစ္စယို ကားကအဝ်ႏနဝ်ꩻ ဗွေႏဘုရာꩻ ဗွေါင်နယ်ဖေႏလို့နာꩻနဝ်ꩻမꩻ လိုꩻလင်နဝ်ꩻ ဉာဏ်ႏပညာႏစွဉ်ႏ ထာꩻသေဉာဏ်ႏယော့ တန်လဲဉ်းကနာꩻနဝ်ꩻ တအဲဉ်ထဝ်း။ 40#တ ၇:၁၀။ ခွေအီႏအွဉ်ႏနာꩻ ထိန်ꩻထွား ခွေခမ်းထီတဲင် ခွေခမ်းသားဖုံႏ ကားကအဝ်ႏနဝ်ꩻတဲ့ အီႏနာႏဗာႏ နာꩻအမိန်းသွူ။ ခွေနဝ်ꩻ တန်လဲဉ်းကနာꩻ ဟောနန်ꩻ ခွန်တန်အရာႏလွုမ်ꩻ၊ နာꩻနဝ်ꩻ ဩဇာႏအာႏဏာႏအဝ်ႏ ဒုတိယ အရန်းသွူ။ 41ယိုခါ အီႏအုပ်ဗာႏ အီဂျစ်ခမ်း တခမ်းလွုမ်းနဝ်ꩻ ခွေခန်ꩻနာꩻ ခွန်ခံႏ” နုဲင်းနဝ်ꩻသွူ။ 42#ဒံ ၅:၂၉။ အီဂျစ်ခွန်တန် ဗွေါင်ႏ ခွန်တံဆိပ်ကပါဒါႏ စူသွို့ꩻ အစူလောင်းတဲင် အွဉ်ႏစွဖေႏစွဉ်ႏ ယောသပ် စူလောင်းသွူ။ ဝွေꩻအွဉ်ႏကꩻဖေႏယောသပ် ဆဲင်ꩻတန် ယွုံးဆွာꩻ အဟဝ်စားတဲင် အွဉ်ႏဟွဲဖေႏပါ ငွဉ်ꩻဟွဲခံꩻနဝ်ꩻသွူ။ 43ခွန်တန်အွဉ်ႏထုမ်း ဒုတိယ ခွန်သေလောတဲင် ဝွေꩻစဲ့ꩻပွေါးရံႏသားဖုံႏ အွဉ်ႏလွေꩻရီးဆꩻငါတွော့ꩻ “ပုဲင်းဖေႏတဖူꩻဟုဲင်း၊ ပုဲင်းဖေႏတဖူꩻဟုဲင်း” ခြောဝ်နုဲင်းနဝ်ꩻသွူ။ နဝ်ꩻမꩻ ယောသပ်နဝ်ꩻ ခန်ꩻစွဉ်ႏ အီဂျစ် တခမ်းလွုမ်း ခွန်ခံႏအရာႏသွူ။ 44ခွန်တန် ရိုꩻဖေႏယောသပ်၊ “ခွေနဝ်ꩻထွာ အီဂျစ်ခမ်းခွန်တန်တဲင် ပေါႏတလꩻတဝ်း နာꩻအခွင်ꩻ အီဂျစ်တခမ်းလွုမ်း ပါꩻမုဲင်ꩻတဲ့အွော့ꩻစူ၊ ခင်ႏ၊ မာꩻတမုဲင်ꩻမုဲင်ꩻ လꩻတဝ်း” နုဲင်းနဝ်ꩻသွူ။ 45-46ခွန်တန်ဖေႏ ယောသပ် အီဂျစ်ဘွဲ့မဉ်ꩻ သဖဏပါနိယတဲင် အွဉ်ႏတောႏလမ်း မင်္ဂလာႏဖေႏစွဉ်ႏ အမာ ဟီလီယိုပိုလစ် ဝေင်ꩻသား ပေါတိဖေရ ယဇ်ပရောဟိတ် အပိုမူႏ အာသီနတ်သွူ။

ယောသပ်ကမာꩻစဒါႏ အီဂျစ်ခွန်တန် ထာꩻမာꩻချိန်ႏနဝ်ꩻ ဝွေꩻသက်လꩻ သွံဆီသွူ။ ဝွေꩻအဝ်ႏခွန်တန်ထျꩻ ထန်ႏလယ်ႏထွား အီဂျစ် တခမ်းလွုမ်းသွူ။ 47ထာꩻအံႏအွꩻ ပြန်ꩻပြော်ꩻ နွတ်ꩻနေင်ႏယံတွင်ꩻ ခမ်းကိုနဝ်ꩻ အရာႏအကဝ်ႏဖုံႏ ထန်ႏဟဝ်မွေးစွဉ်ႏသွူ။ 48နွတ်ꩻနေင်ႏယံတွင်ꩻ ကထန်ႏလွဉ်ဒါႏ ဗွူဟူဖုံႏနဝ်ꩻ ယောသပ်စုရွမ် သိမ်ꩻသေꩻခါꩻ ဝေင်ꩻကိုဖုံႏသွူ။ ဗော့ꩻရာꩻလုဲင်းခြံကို ကထန်ႏလွဉ်ဒါႏ ထာꩻအံႏ ကားကအဝ်ႏနဝ်ꩻ စုရွမ်သိမ်ꩻသေꩻခါꩻ ဝွေꩻသီးအဝေင်ꩻ ပငါပရာꩻဖုံႏသွူ။ 49ဝွေꩻကစုသိမ်ꩻခါꩻဒါႏ ဗွူဟူနဝ်ꩻ လꩻအာငါႏလွဉ်ꩻ နုဲင်းစွဉ်ႏ သုဲင်ꩻပင်ႏလယ်ႏနဝ်ꩻမꩻ ယောသပ် တတွိုင်ခိတဝ်းဒွုမ်တဲင် အွဉ်ႏဗော့ꩻ နုဲင်းနဝ်ꩻသွူ။

50ထာꩻအံႏထာꩻအွꩻ ခြောနေင်ႏ ခလားကတွိုႏနဝ်ꩻ ယောသပ်တွမ်ႏ အမာအာသီနတ် လꩻလွဉ် ပိုခိုဝင်ꩻနီသွူ။ 51ယောသပ်ရိုꩻ “ဖေႏခွေကအွဉ်ႏဖေင်ꩻထိုꩻ ခွေကခံႏဗာႏ ထာꩻဒုက္ခတွမ်ႏ ခွေဖါတမွိုးဖါပိုစွိုꩻဖုံႏ ကားကအဝ်ႏနဝ်ꩻ ဗွေႏဘုရာꩻမာꩻဖေႏလဲဉ်း” နုဲင်းနဝ်ꩻတဲင် ဝွေꩻပိုခိုတန်မဉ်ꩻနဝ်ꩻ ဖန်ဖေႏစွဉ်ႏ မနာသျေသွူ။ 52ထွိုင်ႏလꩻပို ဒုတိယတဖြာꩻနဝ်ꩻ ဝွေꩻရိုꩻဖျင် “ခွေကအဝ်ႏခံႏဗာႏဒါႏ ထာꩻဒုက္ခဆင်ꩻရဲꩻ ခမ်းကိုနဝ်ꩻ ဗွေႏဘုရာꩻ ဖေႏလဲဉ်းသွူ ခွေပိုဖုံႏ” နုဲင်းနဝ်ꩻတဲင် ဝွေꩻဖန်ဖေႏ အပိုမဉ်ꩻ ဧဖါရိမ် နုဲင်းနဝ်ꩻသွူ။

53အီဂျစ်ခမ်းကို ထာꩻအံႏအွꩻ ပြန်ꩻပြော်ꩻတဲင် ထာꩻမွန်းပျောႏ နွတ်ꩻနေင်ႏနဝ်ꩻ လဲဉ်းထိုꩻလဲဉ်းနဝ်ꩻသွူ။ 54#တ ၇:၁၁။ တွိုႏနဝ်ꩻ ယောသပ်ကဒေါ့ꩻဒါႏ ထာꩻအံႏအွꩻခြော နွတ်ꩻနေင်ႏနဝ်ꩻ ထွာလွဉ်စွဉ်ႏသွူ။ ခမ်းအလင် စွုမ်ႏခမ်းခမ်းနဝ်ꩻတဲ့ ထာꩻအံႏအွꩻ ခြောလွဉ်လို့သွူ။ ကွဲႏတွော့ꩻ အီဂျစ်တခမ်းလွုမ်းလုမ်း ထာꩻအံႏအွꩻ အဝ်ႏဒျာႏဒွိုန်းကသွူ။ 55#ယော ၂:၅။ အီဂျစ်ခမ်းသားဖုံႏ ထွိုင်ႏအံႏမလွဉ်ထာꩻ ချိန်ႏနဝ်ꩻ ဖေႏကထေဖေႏ ဝွေꩻသီး ထာꩻအံႏစရိပ်နဝ်ꩻ ခြောဝ်ထင်ႏခွန်တန်သွူ။ နဝ်ꩻမꩻ ခွန်တန် မိန်းဖေႏဝွေꩻသီး “သီလွေꩻ ယောသပ်ထျꩻတဲင် နုဲင်းဝွေꩻကဒေါ့ꩻ အတွိုင်ꩻနဝ်ꩻမာꩻဟုဲင်း” နုဲင်းနဝ်ꩻသွူ။ 56အီဂျစ်ခမ်းကို စွုမ်ႏထွောင်း ထာꩻအံႏအွꩻ ယိန်းခြောဟုဲင်းလွဉ် နဝ်ꩻမꩻ ယောသပ်ဗွောင် ကစုရွမ်ခါꩻဒါႏ ဗွူတရွောင်ဖုံႏ ကားကအဝ်ႏတဲင် စာဖေႏ အီဂျစ်ခမ်းသားဖုံႏသွူ။ 57တကမ္ဘာႏလွုမ်း ထာꩻအံႏအွꩻခြောကပ် တွိုႏလွဉ်တဲင် လိုꩻခမ်းလင်ဖုံႏ လွဉ်အီဂျစ်ခမ်းတွော့ꩻ ဖြေꩻဗာႏဗွူဟူ ယောသပ်ထျꩻသွူ။

ខគម្ពីរពេញនិយមពី
ကမ္ဘာႏစ 41

ព្រះគម្ពីរ:

Pa’o

ជំនាន់បកប្រែ: Pao Bible Common Language - PBCL