ကမ္ဘာႏစ 42

1ယာကုပ်ထွိုင်ႏသေ အီဂျစ်ခမ်း ဗွူအဝ်ႏနဝ်ꩻ ဝွေꩻဒေါ့ꩻဖေႏ ဝွေꩻပိုခိုဖုံႏ “ပွိုးတမုဲင်ꩻ သီမာꩻတဝ်းတွိုႏ ထာꩻတစွိုးစွိုး နုဲင်းမုဲင်ꩻဟောင်း။ 2#တ ၇:၁၂။ ခွေဟွိုန် အီဂျစ်ခမ်းနဝ်ꩻ ဗွူဟူအဝ်ႏ၊ ဖေႏနီကအံႏမသီ ဗာႏမွိုန်းထာꩻနဝ်ꩻ လွေꩻသူꩻကိုတဲင် ဖြေꩻသွော့ဗွူဟုဲင်း” နုဲင်းနဝ်ꩻသွူ။ 3နဝ်ꩻမꩻ ယောသပ်ဝေးခို တဆီဖြာꩻနဝ်ꩻ အွဉ်ဝင်ꩻလွေꩻဖြေꩻဗွူ အီဂျစ်ခမ်းသွူ။ 4ကွဲႏတွော့ꩻ ယောသပ်ဖူးခိုရင်ꩻ ဗေင်ယာမိန်နဝ်ꩻ ယာကုပ်ငမ်းသꩻ ထွာတစွိုးတမျိုꩻတဲင် တအွဉ်ႏစွꩻလွဉ်ꩻတဝ်းတွမ်ႏ အဝေးခိုစွိုꩻဖုံႏသွူ။

5ခါနန် တခမ်းလွုမ်းတဲ့ꩻ ထာꩻအံႏအွꩻ ခြောလွဉ်နဝ်ꩻမꩻ ယာကုပ်ပိုခိုဖုံႏနဝ်ꩻ လွေꩻလွဉ်ꩻတွမ်ႏ လိုꩻလင်ဖုံႏ အီႏလွေꩻဖြေꩻဒါႏ ဗွူသားဖုံႏသွူ။ 6အီဂျစ်ခမ်း ဒုတိယခွန်တန် ယောသပ်နဝ်ꩻ အဝ်ႏစာဖေႏ လိုꩻတကမ္ဘာႏလွုမ်း ဗွူဖုံႏနဝ်ꩻသွူ။ ပွိုးနဝ်ꩻမꩻ ယောသပ် အဝေးခိုဖုံႏနဝ်ꩻ ဖျော်လွဉ်ခံႏနွမ်ꩻ ယောသပ်ဆꩻငါတဲင် အွပ်ꩻလင်ꩻစွဉ်ႏ ဟံႏလောင်းနဝ်ꩻသွူ။ 7ယောသပ်ထွိုင်ႏထီႏ ဝွေꩻဝေးခိုဖုံႏနဝ်ꩻ ဝွေꩻတောင်ꩻ ဝွေꩻသီးစွဉ်ႏတဲ့ ဝွေꩻမာꩻဒျာႏ နုဲင်းတသေငါꩻတဝ်း ဝွေꩻသီးတွော့ꩻ “သီ အဝ်ႏမုဲင်ꩻကိုလွဉ်ဟောင်း” ဝွေꩻရီဆွော့ꩻ မွေးနေးစွဉ်ႏ ဝွေꩻသီးသွူ။

“နီသွဉ်းသီး အဝ်ႏခါနန်ခမ်း လွဉ်တဲင် လွဉ်ဖြေꩻဒျာႏဗွူ” ဝွေꩻသီးလဝ်းချာ နုဲင်းနဝ်ꩻသွူ။

8ယောသပ်နဝ်ꩻ အဝ်ႏတောင်ꩻဒျာႏ အဝေးဖုံႏစွဉ်ႏတဲ့ အဝေးဖုံႏနဝ်ꩻ တတောင်ꩻတဝ်း ယောသပ်သွူ။ 9#ကမ္ဘာႏ ၃၇:၅–၁၀။ ဝွေꩻယူႏလꩻချာယင်း ထာꩻဗေင်ႏမင်း တွမ်ႏဝွေꩻသီး ခရာႏတဲင်ဒေါ့ꩻ “သီနဝ်ꩻထွာ တသျိုဖုံႏ၊ သီလွဉ် စောႏတနာႏဒျာႏ နီခမ်းထီ အာႏပေႏချက်ဖုံႏ” ယွူးနုဲင်းနဝ်ꩻသွူ။

10ဝွေꩻသီးလဝ်းချာ “မွေးတဝ်းဗွေႏ၊ နီကလွဉ်ဗာႏနဝ်ꩻ လွဉ်ဒျာႏ နုဲင်းနီဗွေႏသီးသွဉ်း အနေႏတဲင် လွဉ်ဖြေꩻဒျာႏ ထာꩻအံႏစရိပ်သွူ၊ 11နီယိုနဝ်ꩻ ဖါတဖြာꩻချင်ႏ တဖူးဝေးရင်ꩻဖုံႏဒျာႏ၊ နီနဝ်ꩻ တသျိုမွေးတဝ်း၊ နီနဝ်ꩻ လိုꩻစွို့ꩻစွဉ်ႏဖုံႏဒျာႏ” နုဲင်းနဝ်ꩻသွူ။

12ယောသပ် ဒေါ့ꩻချာဝွေꩻသီး “သီနဝ်ꩻ လိုꩻစွို့ꩻစွဉ်ႏ တမွေးတဝ်း လွဉ်ထုမ်ႏဒျာႏ နီခမ်းထီ အာႏပေႏချက်ဖုံႏ” ယွူးနုဲင်းနဝ်ꩻသွူ။

13ဝွေꩻသီးဒေါ့ꩻ “ဗွေႏနီယိုနဝ်ꩻ လိုꩻကအုံဒါႏ ခါနန်ခမ်း ပါꩻတဖြာꩻလွုမ်ꩻ အပိုခိုဖုံႏဒျာႏ၊ နီဖူးဝေးနဝ်ꩻ အဝ်ႏတဆီနီဖြာꩻသွူ၊ တဖြာꩻနဝ်ꩻ သီထိုꩻလဲဉ်းတဲင် အပေႏသွတ်ꩻ တဖြာꩻနဝ်ꩻ ယိုခါ အဝ်ႏကုဲင်ငီꩻဒျာႏ တွမ်ႏနီဖါ” နုဲင်းနဝ်ꩻသွူ။

14ယောသပ်ရိုꩻချာ “ခွေကဒေါ့ꩻအတွိုင်ꩻ သီနဝ်ꩻထွာ တသျိုဖုံႏဒျာႏ။ 15သီကဒေါ့ꩻဒါႏ အတွိုင်ꩻ မဲဉ်ႏနဲ့ တမဲဉ်ႏတဝ်းနဝ်ꩻ ခွေအီႏစမ်ꩻထွားက နုဲင်းယို၊ စွဉ်ႏခွန်တန်ဖါရော သက်အဝ်ႏမွန် ဒွိုန်းကအတွိုင်ꩻ တွမ်ႏဝွေꩻအမိန်းတဲင် သီဖူးအပေႏသွတ်ꩻ ပေါႏသီတဟဲ့ꩻလွဉ်တဝ်း ယိုကိုနဝ်ꩻ သီအဝ်ႏခမ်းယို တထန်ႏသဲင်ꩻဗာႏတဝ်း။ 16သီအကို တဖြာꩻဖြာꩻနဝ်ꩻ သဲင်ꩻဟဲ့ꩻလွဉ်ချာဗာႏ သီဖူးသွူ။ အဝ်ႏကုဲင်သီနဝ်ꩻ အွဉ်ႏခံသော့ꩻဗာႏ ထောင်ႏကို ဗꩻတွိုႏစွဥ်ႏ သီကဒေါ့ꩻဒါႏ ငဝ်းမဲဉ်ႏနဲ့ တမဲဉ်ႏတဝ်းနဲ့ ဖေႏကသေနဝ်ꩻ အီႏစမ်ꩻထွားဗာႏ နုဲင်းနဝ်ꩻသွူ။ သီမဉ်ႏ တဟဲ့ꩻလွဉ်နွောင်ꩻတဝ်း သီဖူးနဝ်ꩻ နုဲင်းအီဂျစ်ခွန်တန် သက်ကအဝ်ႏမွန် ဒွိုန်းကအတွိုင်ꩻ သီနဝ်ꩻထွာမွေး တသျိုဖုံႏဒျာႏရင်ꩻ” နုဲင်းနဝ်ꩻသွူ။ 17တဲင်အွဉ်ႏသော့ꩻစွဉ်ႏ ဝွေꩻသီးထောင်ႏကို သွံနီꩻသွူ။

18ထွိုင်ႏတွိုႏသွံနီꩻနဝ်ꩻ ယောသပ် ဒေါ့ꩻဖေႏဝွေꩻသီး “ခွေနဝ်ꩻထွာလိုꩻ ငမ်းသꩻဗွေႏဘုရာꩻတဲင် ဖေႏသီကလꩻ အသက်ချမ်ꩻသာႏနဝ်ꩻ အနယ်ꩻအဝ်ႏတစားလွုမ်ꩻ၊ မာꩻသွော့နုဲင်းယို။ 19သီရိုꩻသာꩻ စွို့ꩻစွဉ်ႏကျောင်ꩻ အွဉ်ႏနယ်သက်သေႏ အနေႏတဲင် သီအကိုတဖြာꩻနဝ်ꩻ အုံကုဲင်သော့ꩻဗာႏ ထောင်ႏကိုယိုတဲင် အဝ်ႏကုဲင် အလင်ဖုံႏနဝ်ꩻ အီသဲင်ꩻဖေႏသွော့ ကအံႏမလဲဉ်းထာꩻအံႏ သီတမွိုးဖါပိုစွိုꩻဖုံႏတာႏ ဗွူဟုဲင်း။ 20နဝ်ꩻထွူ သီဖူး အပေႏသွတ်ꩻနဝ်ꩻ ဟဲ့ꩻလွဉ်ဗာႏခွေထျꩻ၊ မာꩻနုဲင်းယိုမꩻ သီဒေါ့ꩻထာꩻ မဲဉ်ႏမွေးကျောင်ꩻ ထွာသက်သေႏတဲင် ခွေနဝ်ꩻ အီႏတမာꩻသီတဝ်း သီ” နုဲင်းနဝ်ꩻသွူ။

ဝွေꩻသီးတဲ့ သဘော်ꩻတူႏ နုဲင်းယိုသွူ။ 21နဝ်ꩻမꩻ တဖြာꩻတွမ်ႏတဖြာꩻ ဒေါ့ꩻဖေႏလို့ဝင်ꩻ “မွေးဟနော၊ နီကမာꩻဒုက္ခဒါႏ နီဖူးနဝ်ꩻ ယိုခါ နီခံႏဗာႏချာလဲဉ်း ခင်ႏလမ်းလီးသွူ၊ ဝွေꩻတောင်ꩻပြန်ႏနီနဝ်ꩻ နီအဝ်ႏထီႏတဲ့ နီတသꩻညင်ꩻတဝ်း ဝွေꩻနဝ်ꩻမꩻ ယိုခါ နီမော့ꩻဗာႏ ထာꩻဒုက္ခ နုဲင်းယိုသနယ်” နုဲင်းနဝ်ꩻသွူ။

22 # ကမ္ဘာႏ ၃၇:၂၁–၂၂။ ရုဗေင်ဒေါ့ꩻ “တွမ်ႏမာꩻဆာမွိုန်း ပါꩻပေႏဟုဲင်း၊ ခွေအဝ်ႏဖေႏသတိငါႏသီ နုဲင်းနဝ်ꩻစွဉ်ႏတဲ့ သီတနာႏတဝ်းတဲင် ဝွေꩻကသီထိုꩻနဝ်ꩻ ယိုခါ နီခံႏဗာႏချာလဲဉ်း” နုဲင်းနဝ်ꩻသွူ။ 23နုဲင်းဝွေꩻသီးအချင်ꩻချင်ꩻ ကအဝ်ႏဒေါ့ꩻရီ ချာငါလို့ဒါႏဝင်ꩻနဝ်ꩻ ယောသပ်နဝ်ꩻ အဝ်ႏသေနာႏသွူ။ ကွဲႏတွော့ꩻ ကဒေါ့ꩻရီ ယောသပ်နဝ်ꩻ ယောသပ် အဝ်ႏသေနာႏကျောင်ꩻ ဝွေꩻသီး တသေတဝ်း၊ ဝွေꩻသီးနဝ်ꩻ ကွပ်ပွိုး အဝ်ႏဒေါ့ꩻရီဗာႏဒျာႏတွမ်ႏ ကောပြန်ႏနယ် ဖေႏသားနဝ်ꩻသွူ။ 24ယောသပ် အဝ်ႏဝွေꩻသီးထျꩻ ထန်ႏလွေꩻတဲင် အငွိုးစွဉ်ႏထာꩻနဝ်ꩻသွူ။ ယောသပ်ထိန်ꩻချာသꩻ ထွိုင်ႏလꩻ ဝွေꩻလွဉ်ချာ ဝွေꩻသီးထျꩻတွော့ꩻ၊ ဟဲ့ꩻထန်ႏ သိမောင်တဲင် ထွဉ်ႏစွိုင်စွဉ်ႏ ဝွေꩻသီးဆꩻငါသွူ။

25ယောသပ်မိန်း ဖေႏကသော့ꩻဖေႏ ဝွေꩻဝေးခိုဖုံႏ ဗွူတခီပုန်ႏကိုတဲင် ဝွေꩻသီး ကဖေႏဒါႏ ဗွူငိုꩻနဝ်ꩻတဲ့ꩻ ထွဉ်ႏသော့ꩻချာယင်း အတခီပုန်ႏကို ပငါပရာꩻထွူ ထွဉ်ႏသော့ꩻဖေႏပါ ထာꩻအံႏအွꩻစရိပ် တဖူꩻလောင်းတာႏတွော့ꩻ အလိုꩻဖုံႏတဲ့ မာꩻဖေႏစွဉ်ႏသွူ။ 26အဝေးခိုဖုံႏ ကဖြေꩻဒါႏဗွူနဝ်ꩻ ဒင်ႏသေလာꩻလောင်း ထွူတဲင် ထန်ႏသဲင်ꩻစွဉ်ႏဖုံႏသွူ။ 27နုဲင်းမွူးဟာ ထွိုင်ႏဖျော် ချꩻပင်ခင်ႏလမ်း ဝွေꩻသီးကို တဖြာꩻ အီႏဗွူႏ အသေလာꩻဆာႏတဲင် ထွိုင်ႏစေ အဗွူပုန်ႏနဝ်ꩻ ထီႏချာဝွေꩻရွဉ် အဗွူပုန်ႏငွါကိုသွူ။ 28ဝွေꩻဟဲ့ꩻ ဝွေꩻဖူးဖုံႏတဲင် “ခွေရွဉ်နဝ်ꩻ အသော့ꩻချာ ဖေႏယင်းဒျာႏခွေ၊ ယိုတန်ထွားမွိုင် အဝ်ႏသော့ꩻ ခွေဗွူပုန်ႏကိုယို” အွဉ်ႏနယ် အဖူးဝေးဖုံႏသွူ။ ဝွေꩻသီး သꩻဝꩻ ငမ်းလွစွဉ်ႏတဲင် တဖြာꩻတွမ်ႏတဖြာꩻ ဒေါ့ꩻဖေႏလို့ဝင်ꩻ “ဗွေႏဘုရာꩻနဝ်ꩻ မာနီ နုဲင်းမုဲင်ꩻတန်ဟောင်း” နုဲင်းနဝ်ꩻသွူ။

29ဝွေꩻသီး ထွိုင်ႏတွိုႏ ခါနန်ခမ်း အဖါယာကုပ်ထျꩻနဝ်ꩻ ထာꩻကထွာလဲဉ်း အကျောင်ꩻခရာႏနဝ်ꩻ ဝွေꩻသီး ခြုဲင်းနယ်လို့စွဉ်ႏ အဖါသွူ။ 30ဝွေꩻသီးရိုꩻ “အီဂျစ်ဒုတိယခွန်နဝ်ꩻ ဒေါ့ꩻရီဆွော့ꩻ မွေးနေးစွဉ်ႏနီ၊ ယွူးနီနဝ်ꩻထွာ တသျို အီႏဆန်ချာ ဝွေꩻသီးခမ်း နုဲင်းနဝ်ꩻသွူ။ 31နီလဝ်းချာ နီနဝ်ꩻ တသျိုမွေးတဝ်း နီနဝ်ꩻ လိုꩻစွို့ꩻစွဉ်ႏ။ 32နီဖူးဝေး ကားကအဝ်ႏနဝ်ꩻ ထွာဖါတဖြာꩻချင်ႏပို တဆီနီဖြာꩻဒျာႏ၊ တဖြာꩻနဝ်ꩻ သီထိုꩻလဲဉ်းတဲင် အပေႏသွတ်ꩻ တဖြာꩻနဝ်ꩻတဲ့ အဝ်ႏကုဲင်ငီꩻဒျာႏ တွမ်ႏနီဖါ ခါနန်ခမ်း” နုဲင်းနဝ်ꩻသွူ။ 33ပါꩻခိုနဝ်ꩻရိုꩻ “သီစွို့ꩻစွဉ်ႏကျောင်ꩻ ဖေႏနေးခွေကသေ သီအကို တဖြာꩻနဝ်ꩻ အုံကုဲင်ငီꩻဗာႏခွေ အလင်ဖုံႏနဝ်ꩻ ကအံႏမလဲဉ်းဒါႏ ထာꩻအံႏ သီတမွိုးဖါပိုစွိုꩻဖုံႏတာႏ ထူႏဗွူတဲင် ထန်ႏသဲင်ꩻဟုဲင်း။ 34သီဖူး အပေႏသွတ်ꩻနဝ်ꩻ ဟဲ့ꩻလွဉ်ခွေထျꩻ၊ တွိုႏနဝ်ꩻသီနဝ်ꩻ တသျိုတမွေးတဝ်း ထွာလိုꩻစွို့ꩻစွဥ်ႏကျောင်ꩻ ခွေအီႏသေတဲင် တွိုႏနဝ်ꩻမꩻ သီဖူးနဝ်ꩻ ခွေအီႏပသာ ဖေႏချာယင်းသီထျꩻ၊ သီအီႏအုံအဝ်ႏ ဖြေꩻစာ ကမ်းသꩻသော့ꩻနွောင်ꩻဗာႏ ခမ်းယို” နုဲင်းနဝ်ꩻသွူ။

35နဝ်ꩻထွူ ဝွေꩻသီး ထွိုင်ႏထောက်ꩻထန်ႏ အဗွူပုန်ႏနဝ်ꩻ စွုမ်ႏဖြာꩻဖြာꩻ မော့ꩻချာ ယင်းစွဉ်ႏ ဝွေꩻသီး ရွဉ်စောက်ꩻဖုံႏတဲင် ထွိုင်ႏထီႏ ရွဉ်စောက်ꩻဖုံႏနဝ်ꩻ ဝွေꩻသီးတွမ်ႏ အဖါယာကုပ် ငမ်းသꩻရောင်လွစွဉ်ႏဖုံႏသွူ။ 36အဖါဒေါ့ꩻဖေႏဝွေꩻသီး “သီနဝ်ꩻ မဉ်မာꩻသွုမ်ꩻထိုꩻလို့ ခွေပိုဖုံႏဟောင်း။ ယောသပ်တဲ့ꩻ အဲဉ်ထဝ်းဒွုမ်၊ သိမောင်တဲ့ အဲဉ်ထဝ်းဒွုမ် ယိုခါ သီမဉ်ဟဲ့ꩻလွေꩻ ဖျင်ယင်းက ဗေင်ယာမိန်၊ ခွေမွော့ꩻလဲင်ꩻမော့ꩻငါႏ ထာꩻဒုက္ခ နုဲင်းယို” နုဲင်းနဝ်ꩻသွူ။

37ရုဗေင်ဒေါ့ꩻဖေႏ အဖါ “ဗေင်ယာမိန်ယို ခွေမဉ်ႏ တဟဲ့ꩻသဲင်ꩻချာ နွောင်ꩻတဝ်း နီဖါထျꩻနဝ်ꩻ နီဖါမာꩻသီစွဉ်ႏ ခွေပိုခို ဝင်ꩻနီယိုဟုဲင်း။ ဝွေꩻတာႏနဝ်ꩻ ခွေထူႏဒျာႏတာႏဝွန်ႏ၊ ဝွေꩻနဝ်ꩻ ခွေအီႏဟဲ့ꩻသဲင်ꩻယင်းဒျာႏ” နုဲင်းနဝ်ꩻသွူ။

38ကွဲႏတွော့ꩻ ယာကုပ်ဒေါ့ꩻ “ခွေပိုခိုနဝ်ꩻ တအွဉ်ႏလွေꩻလွဉ်ꩻ နွောင်ꩻတဝ်းဒွုမ်သီ၊ ဝွေꩻဝေးနဝ်ꩻ သီလဲဉ်းတဲင် အဝ်ႏကုဲင်ဒျာႏ ဝွေꩻတဖြာꩻလွုမ်ꩻ၊ တဖူꩻလောင်း မဲ့ꩻဝွေꩻထွာဒါႏ တစွိုးစွိုး၊ ခွေနဝ်ꩻဖြားလဲဉ်း ပွိုးသီမာꩻသꩻပေႏခွေ နုဲင်းနဝ်ꩻတဲင် မဲ့ꩻခွေသီထိုꩻဗာႏ” နုဲင်းနဝ်ꩻသွူ။

ខគម្ពីរពេញនិយមពី
ကမ္ဘာႏစ 42

ព្រះគម្ពីរ:

Pa’o

ជំនាន់បកប្រែ: Pao Bible Common Language - PBCL