ကမ္ဘာႏစ 40
40
ယောသပ်ဖေါႏနယ်ထာꩻဗေင်ႏမင်း
1ဆုဲင်ꩻထွိုင်ႏညနဝ်ꩻ ဝုဲင်ဝွန်ႏတန်တွမ်ႏ အအံႏအအွꩻ ဝွန်ႏတန်ဖုံႏနဝ်ꩻ ပဲစ်မာႏ အီဂျစ်ခွန်တန်သွူ။ 2ခွန်တန် သꩻလျားစွဉ်ႏ ဝွန်ႏတန်ဝင်ꩻနီတဲင် 3အွဉ်ႏခံသော့ꩻစွဉ်ႏ ထောင်ႏကို ယောသပ် ကအဝ်ႏခံသော့ꩻဒါႏ ခင်ႏလမ်း ခွန်တန်အတပ်မူꩻ လမ်းကိုနဝ်ꩻသွူ။ 4ဝွေꩻသီး အဝ်ႏခံသော့ꩻငီꩻဝင်ꩻ ထောင်ႏကိုနဝ်ꩻ ညတန်တဲင်တပ်မူꩻနဝ်ꩻ ဖေႏအပ်စွဉ်ႏ ယောသပ် ထိန်ꩻထွားထောင်ႏသားဖုံႏသွူ။
5တွိုႏတဟာ ဝုဲင် ဝွန်ႏတန်တွမ်ႏ အအံႏအအွꩻ ဝွန်ႏတန်ဖုံႏနဝ်ꩻ ဗေင်ႏမင်းလွထာꩻ ပငါပရာꩻသွူ။ ဝွေꩻသီး ထာꩻဗေင်ႏမင်းဖုံႏ အဓိပ္ပါယ်ႏနဝ်ꩻ တဗွိုန်လို့တဝ်းဝင်ꩻသွူ။ 6နုဲင်းမွူးရဝ်ꩻ ယောသပ် ထွိုင်ႏဖျော်လွဉ် ဝွေꩻသီးထျꩻ ထွိုင်ထီႏဝွေꩻသီးလွိုးသွိုန်းနဝ်ꩻ 7ဝွေꩻရီဝွေꩻသီး “ဟန်ႏနီꩻယို ပွိုးတမုဲင်ꩻ ထွားသီမဲ့ငါဖုံႏမွော့ꩻ တရေꩻတဝ်း နုဲင်းမုဲင်ꩻဟောင်း” နုဲင်းနဝ်ꩻသွူ။
8ဝွေꩻသီးလဝ်းချာ “နီ ဗေင်ႏမင်းလွထာꩻ ပငါပရာꩻတဲင်၊ ကွဲႏတွော့ꩻ ထာꩻဗေင်ႏမင်းနဝ်ꩻ အဓိပ္ပါယ်ႏ ကောဗွောင်နယ်ဖေႏ နွောင်ꩻသားယိုကိုနဝ်ꩻ တဖြာꩻငါတအဲဉ်ထဝ်း” နုဲင်းနဝ်ꩻသွူ။
ယောသပ်ဒေါ့ꩻဖေႏ “အစွန်ꩻကအီႏဗွေါင်နယ်နွောင်ꩻ ထာꩻဗေင်ႏမင်း အဓိပ္ပါယ်ႏနဝ်ꩻ အဝ်ႏဒျာႏ ဗွေႏဘုရာꩻလွုမ်ꩻ၊ ဒေါ့ꩻနယ်ခွေ သီထာꩻဗေင်ႏမင်းဟုဲင်း” နုဲင်းနဝ်ꩻသွူ။
9နဝ်ꩻမꩻ ဝုဲင် ဝွန်ႏတန်ဒေါ့ꩻ “ခွေထာꩻဗေင်ႏမင်းကိုနဝ်ꩻ ခွေထီႏ တဗဲစ်မွူး အဝ်ႏခွေဆꩻငါသွူ၊ 10အပင် အဝ်ႏသွံပင်တဲင်၊ အပင်လောင်းနဝ်ꩻ အလာႏဖုံႏ ထန်ႏလွဉ်တွော့ꩻ အကဝ်ႏဖုံႏတဲ့ ကဝ်ႏလွဉ် အရာႏဖုံႏတဲ့ ရာႏလွဉ်တဲင် အရာႏမဉ်လွဉ်စွဥ်ႏ တလဲင်ႏချင်ႏသွူ။
11ခွေနဝ်ꩻ ခွုမ်ဗာႏ ခွန်တန် တကောက်ꩻဖလားတဲင်၊ ထူႏတဗဲစ်ရာႏ စေ့ꩻသော့ꩻအထီ ဖလားကိုထွူ ခွေကပ်ဖေႏ ခွန်တန်စူကို” နုဲင်းနဝ်ꩻသွူ။
12ယောသပ်ဒေါ့ꩻ “နာꩻထာꩻဗေင်ႏမင်း အဓိပ္ပါယ်ႏနဝ်ꩻ နုဲင်းယို၊ အပင်သွံပင်နဝ်ꩻ မဉ်ရိုꩻသွံနီသွူ။ 13သွံနီꩻအတွင်ꩻ ခွန်တန် အီႏအွဉ်ႏစွꩻလွစ် ဖေႏနာꩻတဲင် အီႏဖေႏချာယင်း နာꩻထာꩻမာꩻ နုဲင်းနာꩻကမာꩻဗာႏလဲဉ်း ဝုဲင်ဝွန်ႏတန် ရီးခါနဝ်ꩻ ယိုခါ နာꩻအီႏကပ် ဖေႏဗာႏယင်း ဝုဲင်တကောက်ꩻ ဖလားသွူ။ 14ကွဲတွော့ꩻ နာꩻမဉ်ႏလꩻလွဉ် ထာꩻချမ်ꩻသာႏခွင်ꩻနဝ်ꩻ ယူႏလꩻဗဲင်းခွေ၊ ဖေႏနေးခွန်တန် ကသꩻညင်ꩻခွေနဝ်ꩻ လျောက်လဝ်းထင်ႏဖေႏဗဲင်း ခွေတာႏ၊ ဖေႏနေးခွေ ကလွစ်ထန်ႏဗာႏ ထောင်ႏယို။ 15ကလဲဉ်းခိုႏချာ ခွေနဝ်ꩻ အဝ်ႏဟေဗြဲခမ်းကို ခံႏဗာႏ ဝင်ꩻစာအံႏထိုꩻတဲင် ခွေကအဝ်ႏသော့ꩻ အီဂျစ်ခမ်းကိုယိုတဲ့ ကအီႏထဲ့ထွိုက်သော့ꩻ ထောင်ႏနဝ်ꩻ အပဲစ်တစွိုးတမျိုꩻ ခွေတမာꩻဗာႏဖိုတဝ်း” နုဲင်းနဝ်ꩻသွူ။
16အအံႏအအွꩻ ဝွန်ႏတန် ထွိုင်ႏထီႏသေဗာႏ ဝုဲင်ဝွန်ႏတန် ထာꩻဗေင်ႏမင်း အဓိပ္ပါယ်ႏ ကျဟဝ်ငါႏနဝ်ꩻ၊ ဝွေꩻဒေါ့ꩻဖေႏ ယောသပ် “ခွေတဲ့ ဗေင်ႏမင်းနုဲင်းနုဲင်းထာꩻ တစွိုးသွူ။ ထာဗေင်ႏမင်းကို ခွေကတူႏလောင်းနဝ်ꩻ ခွေအဝ်ႏထေင်းဆင်းလွဉ် တခိုး သွံခြောင်းသွူ။ 17ဆꩻကီသွတ်ꩻ ခြောင်းကိုနဝ်ꩻ ခွန်တန်တာႏ ထာꩻအံႏဟဝ်မျိုꩻစွုမ်ႏ အဝ်ႏသော့ꩻတဲင် ဝါးဖုံႏနဝ်ꩻ လင်ꩻအံႏထိုꩻလို့စွဉ်ႏ ထာꩻအံႏဖုံႏ” နုဲင်းနဝ်ꩻသွူ။
18ယောသပ် ဖြေႏချာ “ထာꩻဗေင်ႏမင်း အဓိပ္ပါယ်ႏနဝ်ꩻ နုဲင်းယို၊ ခြောင်းသွံဖြုံႏနဝ်ꩻ ထွာသွံနီꩻသွူ။ 19သွံနီꩻအတွင်ꩻ ခွန်တန် အီႏအွဉ်ႏစွꩻထန်ႏနာꩻတဲင် အီႏဓွေါ့ꩻထိုꩻ နာꩻကတူႏကွေး၊ နာꩻနမ်းနဝ်ꩻ အီႏအွဉ်ႏဟွဲ ထာꩻထွန်ႏလောင်းတဲင် ဝါးဖုံႏ အီႏလင်ꩻလွဉ် အံႏထိုꩻနာꩻယာႏ” နုဲင်းနဝ်ꩻသွူ။
20ထွိုင်ႏလꩻသွံနီꩻနဝ်ꩻ တနꩻစွဥ်ႏ ခွန်တန် လွူးမွူးနီꩻနဝ်ꩻမꩻ ခွန်တန်နဝ်ꩻ လွူးစက ဝွေꩻလိုꩻတန် အာဏာႏအဝ်ႏသားဖုံႏ တွမ်ႏအအံႏအအွꩻသွူ။ ခွန်တန် အွဉ်ႏစွꩻလွစ်ထန်ႏဖေႏ ဝုဲင် ဝွန်ႏတန်တွမ်ႏ အအံႏအအွꩻ ဝွန်ႏတန်တဲင် ထွဉ်ႏဟဲ့ꩻလွဉ် ဝွေꩻလိုꩻတန် အာႏဏာႏ အဝ်ႏသားဖုံႏ ဆꩻငါသွူ။ 21ခွန်တန်နဝ်ꩻ ဖေႏချာယင်း ဝုဲင် ဝွန်ႏတန် ထာꩻမာꩻလီꩻတဲင် ဝွေꩻကပ်ဖေႏဗာႏယင်း ဝုဲင်သွူ။ 22ကွဲတွော့ꩻ အအံႏအအွꩻ ဝွန်ႏတန်နဝ်ꩻ စီႏရင်ႏ အွဉ်ႏမာꩻသီထိုꩻစွဉ်ႏသွူ။ နဝ်ꩻမꩻ နုဲင်းယောသပ် ကဟော်ꩻအတွိုင်ꩻနဝ်ꩻ ထွာလွဉ်စွဉ်ႏသွူ။ 23ကွဲႏတွော့ꩻ ဝုဲင် ဝွန်ႏတန်နဝ်ꩻ တယူႏလꩻတဝ်း အွဉ်ႏဖေင်ꩻထိုꩻဒျာႏ ယောသပ်သွူ။
ទើបបានជ្រើសរើសហើយ៖
ကမ္ဘာႏစ 40: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.