ကမ္ဘာႏစ 20
20
အဗြာဟံတွမ်ႏအဗိမလဲက်
1အဗြာဟံနဝ်ꩻ အဝ်ႏမံရေအရပ် ခြုဲင်းလွေꩻ ခါနန်ခမ်း အခဝ်နဝ်တဲင် အုံသော့ꩻ ခါဒဲက်အာဝေင်ꩻ တွမ်ႏသျုရဝေင်ꩻခါႏသွူ။ ဆုဲင်ꩻဝွေꩻကအုံသော့ꩻဒါႏ ဂေရာ ဝေင်ꩻကိုတွင်ꩻ၊ 2#ကမ္ဘာႏ ၁၂:၁၃၊ ၂၆:၇။ ဝွေꩻမာသာရာနဝ်ꩻ ဝွေꩻရိုꩻထွာဒျာႏ ဝွေꩻဖူးမူႏ နုဲင်းနဝ်ꩻသွူ။ နဝ်ꩻမꩻ ဂေရာခွန်တန် အဗိမလဲက်နဝ်ꩻ သိမ်ꩻထူႏထိုꩻ သာရာသွူ။ 3မွူးကွို့ꩻနာꩻချိန်ႏ ဝွေꩻထာꩻဗေင်ႏမင်းကို ဗွေႏဘုရာꩻ ပေါႏလွဉ်တဲင်ဒေါ့ꩻ၊ “ကွပ်ပွိုး နာꩻသိမ်ꩻထူႏ ပါꩻမူႏယိုနဝ်ꩻမꩻ နာꩻအီႏသီဗာႏ၊ ပါꩻမူႏနဝ်ꩻနဝ်ꩻ အဝါꩻအဝ်ႏလဲဉ်း” မိန်းနုဲင်းနဝ်ꩻသွူ။
4ကွဲႏတွော့ꩻ ခွန်တန် အဗိမလဲက်နဝ်ꩻ တလွေꩻ ဗော့ꩻဗာႏတဝ်းဒွိုန်း ဝွေꩻမူႏထျꩻတဲင် ဝွေꩻဒေါ့ꩻ၊ “ထာဝရဘုရာꩻ၊ ခွေသွဉ်းအပဲစ် အဲဉ်ထဝ်းနဝ်ꩻ နီဗွေႏ အီႏယားကုဲင်ထိုꩻ ခွေသွဉ်းတွမ်ႏ ခွေသွဉ်းလိုꩻမျိုꩻနဲ့ဟောင်း၊ 5အဗြာဟံနမ်း ဒေါ့ꩻချာ ပါꩻမူႏနဝ်ꩻ ထွာဒျာႏဝွေꩻဖူးမူႏတဲင် ပါꩻမူႏနမ်းနဝ်ꩻတဲ့ꩻ ဒေါ့ꩻဒျာႏ နုဲင်းနဝ်ꩻနေနေသွူ။ ခွေသွဉ်းကမာꩻလဲဉ်းယိုနဝ်ꩻ ရေႏမာꩻဒျာႏ တွမ်ႏသွိုန်ႏစွဉ်ႏသꩻစွဉ်ႏတဲင် ခွေသွဉ်း တမာꩻမာႏဗာႏတဝ်း” နုဲင်းနဝ်ꩻသွူ။
6ဗွေႏဘုရာꩻ မိန်းဖေႏချာယင်းဝွေꩻ ထာꩻဗေင်ႏမင်းကို၊ “မွေးသွူ၊ နာꩻကမာႏလဲဉ်းယိုနဝ်ꩻ မာꩻဒျာႏတွမ်ႏ သွိုန်ႏစွဉ်ႏသꩻစွဉ်ႏနဝ်ꩻ ခွေအဝ်ႏသေ၊ နဝ်ꩻမꩻ နာꩻဖေႏကပဲစ်မာႏဗာႏမွိုန်း ခွေတဲင် ဖေႏနာꩻကခွိုင်းဗာႏမွိုန်း ပါꩻမူႏနဝ်ꩻ ခွေရဲဖေႏလဲဉ်းနာꩻသွူ၊ 7ယိုခါ ပါꩻမူႏနဝ်ꩻ နာꩻအပ်ဖေႏချာယင်း အဝါꩻစူကိုဟုဲင်း၊ ဝွေꩻနဝ်ꩻထွာ ပရောဖဲစ်တပါꩻတဲင် ဖေႏနေး နာꩻကသီဗာႏမွိုန်းနဝ်ꩻ ဝွေꩻအီႏဆုတောင်ꩻဖေႏ နာꩻတာႏသွူ။ ကွဲႏတွော့ꩻ နုဲင်းခွေကဖေႏသတိꩻလဲဉ်းနာꩻ နာꩻမဉ်ႏတဖေႏချာတဝ်း ပါꩻမူႏနဝ်ꩻနဝ်ꩻ နာꩻတွမ်ႏ နာꩻလိုꩻဖုံႏ ကားကအဝ်ႏ အီႏသီဗာႏ” မိန်းနုဲင်းနဝ်ꩻသွူ။ 8နုဲင်းမွူးရဝ်ꩻနီꩻ မွူးရဝ်ꩻစဝ်းစဝ်း အဗိမလဲက်ခွန်တန် ဟဲ့ꩻလွဉ် ဝွေꩻလိုꩻတန်ဖုံႏတဲင် ဒေါ့ꩻနယ်ဝွေꩻသီး ကထွာလဲဉ်း အကျောင်ꩻခရာႏ ကားကအဝ်ႏတဲင် ဝွေꩻသီး ငမ်းသꩻလွစွဉ်ႏသွူ။ 9နဝ်ꩻထွူ ခွန်တန် အဗိမလဲက်ဟဲ့ꩻလွဉ် အဗြာဟံတဲင်ရီ၊ “နာꩻမာꩻနီ နုဲင်းမုဲင်ꩻဟောင်း၊ ခွေပဲစ်မာႏဗာႏနာꩻ တမုဲင်ꩻတွော့ꩻ နာꩻအီလွဉ်ဗာႏတွိုႏ ဘေꩻအန္တရာယ်ႏ ခွေတွမ်ႏ ခွေခမ်းထီ အလောင်း နုဲင်းမုဲင်ꩻဟောင်း၊ ပါꩻမုဲင်ꩻတဲ့ တမာꩻထွိုက်တဝ်း ထာꩻမာꩻနဝ်ꩻ နာꩻမာꩻလဲဉ်း ခွေလောင်း။ 10ကွပ်ပွိုးတမုဲင်ꩻ နာꩻမာꩻဗာႏတွိုႏ နုဲင်းယိုဟောင်း” နုဲင်းနဝ်ꩻသွူ။
11အဗြာဟံလဝ်းချာ “လိုꩻယိုကိုရပ်နဝ်ꩻ ပါꩻမုဲင်ꩻတဲ့ တရိုႏသေႏတဝ်း ဗွေႏဘုရာꩻတဲင် ဝွေꩻသီး အီႏမာꩻသီခွေ၊ အီႏထူႏထိုꩻခွေမာ၊ ထင်းနုဲင်းနဝ်ꩻတွော့ꩻ ခွေမာꩻဗာႏနုဲင်းနဝ်ꩻသွူ။ 12ဝွေꩻနဝ်ꩻတဲ့ ထွာမွေးခွေဖူးမူႏ၊ ဝွေꩻမူႏနဝ်ꩻထွာ နီဖါပိုမူႏ ကွဲတွော့ꩻ နီမွိုးရင်ꩻပိုမူႏ မွေးတဝ်းနဝ်ꩻမꩻ ခွေတောႏလမ်းလဲဉ်း ဝွေꩻမူႏသွူ။ 13ကွပ်နဝ်ꩻမꩻ ခွေကအဝ်ႏနီဖါလမ်း ဗွေႏဘုရာꩻ ကထွဉ်ႏခွေထန်ႏလွေꩻ ဝင်ꩻခမ်းချိန်ႏနဝ်ꩻ ခွေဒေါ့ꩻနယ်ဗာႏသာရာ၊ “နာꩻအွဉ်ႏနယ်ဗာႏ သစ္စာႏ ခွေအလောင်းတဲင် ထီႏပါꩻမုဲင်ꩻတရိုꩻတဝ်း ခွေနဝ်ꩻ ရိုꩻသွော့ နာꩻဝေးခို ထွန်ႏသေꩻခါꩻဝွေꩻမူႏ” နုဲင်းနဝ်ꩻသွူ။
14နဝ်ꩻထွူ စရာယို ခွန်တန် အဗိမလဲက် အပ်ချာဖေႏယင်း အဗြာဟံသွူ။ ဝွေꩻဖေႏပါက အဗြာဟံ သွိုꩻဖုံႏ၊ ဖိုးဖုံႏ၊ တွမ်ႏသွဉ်းသဲႏဖုံႏသွူ။ 15ဝွေꩻမိန်းဖေႏ အဗြာဟံ၊ “ခွေခမ်းတခမ်းလွုမ်း နာꩻကျွိုက်သꩻ အရပ်မုဲင်ꩻတဲ့ꩻ နာꩻအုံဟုဲင်း။” 16နဝ်ꩻထွူ ဝွေꩻဒေါ့ꩻဖေႏသာရာ၊ “နာꩻအပဲစ်အဲဉ်ထဝ်းကျောင်ꩻ နာꩻသွꩻဖုံႏ ကားကအဝ်ႏ ဖေႏကသေ သက်သေႏအနေႏ ရွဉ်ယာႏတရေင်နဝ်ꩻ ခွေဖေႏလဲဉ်း နာꩻဝေးခို အဗြာဟံထျꩻသွူ။ နာꩻတမာꩻတဝ်း အပဲစ် တမုဲင်ꩻမုဲင်ꩻကျောင်ꩻနဝ်ꩻ လိုꩻစွုမ်ႏဖြာꩻတဲ့ အီႏသေဗာႏသွူ။
17ကွပ်ပွိုး သိမ်ꩻထူႏထိုꩻလဲဉ်း အဗြာဟံမာ သာရာ နဝ်ꩻအတွက် 18ခွန်အဗိမလဲက် ဟော်နန်ꩻကို လိုꩻမူႏဖုံႏ ကားကအဝ်ႏ ဖေႏကလꩻမွိုန်းပိုနဝ်ꩻ ထာဝရဘုရာꩻ စီႏရင်ႏနဝ်ꩻသွူ။ ကွပ်နဝ်ꩻမꩻ အဗြာဟံ ဆုတောင်ꩻဖေႏ ခွန်တန် အဗိမလဲက်တာႏတဲင် ဗွေႏဘုရာꩻ မာဟဝ် ခြွိုင်ႏသန်ꩻလွဉ် ဖေႏယင်း ဝွေꩻအမာဖုံႏတွမ်ႏ အသွဉ်းမူႏဖုံႏနဝ်ꩻမꩻ အုံဟဝ် ခြွိုင်ႏသန်ꩻလွဉ်တဲင် ဝွေꩻသီး လꩻနွောင်ꩻချာယင်း ပိုသွူ။
ទើបបានជ្រើសរើសហើយ៖
ကမ္ဘာႏစ 20: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.