ကမ္ဘာႏစ 21
21
လွူးလွဉ်ဣသဲစ်
1ထာဝရဘုရာꩻ ကအွဉ်ႏသေꩻ ဂတိအတွိုင်ꩻ ဝွေꩻဗွေႏဖေႏ သာရာ မင်္ဂလာႏနဝ်ꩻမꩻ၊ 2#ဟေဗြဲ ၁၁:၁၁။ သာရာနဝ်ꩻ သန္ဓေႏအဝ်ႏလွဉ်တဲင် အဗြာဟံ ထွိုင်ႏဖြားမꩻ ဝွေꩻလွူးလွဉ်ဖေႏ အဗြာဟံ ပိုခိုတဖြာꩻသွူ။ ဗွေႏဘုရာꩻ ကထွော့သေꩻခါꩻ အချိန်ႏအတွိုင်ꩻနဝ်ꩻ လွူးလွဉ်ပိုသွူ။ 3အဗြာဟံနဝ်ꩻ ဖန်ဟဲ့ꩻဖေႏ ဝွေꩻမဉ် ဣသဲစ် 4#ကမ္ဘာႏ ၁၇:၁၂၊ တ ၇:၈။ တဲင်ဣသဲစ် သက်ထွိုင်ႏလꩻ သွစ်ꩻနီꩻနဝ်ꩻ နုဲင်းထာဝရဘုရာꩻ ဗွေႏဘုရာꩻ ကမိန်းအတွိုင်ꩻ အဗြာဟံသွို့ꩻဖေႏ လိုꩻခိုအင်္ဂါႏနာပီ မင်္ဂလာႏသွူ။ 5ထွိုင်ႏလွူးလွဉ် ဣသဲစ်ချိန်ႏနဝ်ꩻ အဗြာဟံ သက်လꩻလဲဉ်း နေင်ႏတရျာꩻသွူ။ 6သာရာဒေါ့ꩻ “ဗွေႏဘုရာꩻနဝ်ꩻ အီလွဉ်ဖေႏလဲဉ်းခွေ ထာꩻမွန်းပျောႏ တွမ်ႏထာꩻငသွူ။ လိုꩻကဟွိုန်ဒါႏ သတင်ꩻယို စွုမ်ႏဖြာꩻနဝ်ꩻ အီႏငငီꩻဗာႏတွမ်ႏခွေ။” 7နဝ်ꩻထွူ ဝွေꩻရိုꩻထဲင်းယင်း၊ “သာရာ အီႏဖေႏနဲဉ်းဗာႏပိုနဝ်ꩻ ပါꩻမုဲင်ꩻအီႏဒေါ့ꩻဖေႏဖို အဗြာဟံဟောင်း၊ ကွဲႏတွော့ꩻ ဝွေꩻထွိုင်ႏဖြားမꩻ ခွေလွူးဖေႏဝွေꩻ ပိုခိုတဖြာꩻ” နုဲင်းနဝ်ꩻသွူ။
8လိုꩻပေႏနဝ်ꩻ တန်လွဉ်တဲင် ထွိုင်ႏဖနဲဉ်းနီꩻနဝ်ꩻ အဗြာဟံမာꩻဖေႏ ပွယ်ꩻတန်တဖြုံႏသွူ။
ဝါးညာꩻထိုꩻဟာဂါရတွမ်ႏဣသျမေလ
9တွိုႏတနီꩻသား အဗြာဟံတွမ်ႏ အီဂျစ်ခမ်းသားမူႏ ဟာဂါရ ကလꩻဒါႏပိုခို ဣသျမေလတွမ်ႏ သာရာပိုခိုဣသဲစ်နဝ်ꩻ အဝ်ႏပဆိုးငီꩻလွဝင်ꩻသွူ။ 10#ဂလာ ၄:၂၉–၃၀။ သာရာထွိုင်ႏထီႏနဝ်ꩻ ဒေါ့ꩻဖေႏအဗြာဟံ၊ “ဝါးထန်ႏထိုꩻခန်း သွဉ်းမူႏတွမ်ႏ ဝွေꩻပိုခိုနဝ်ꩻဟုဲင်း၊ ခွေပိုဣသဲစ် ကအီႏလꩻဒါႏ နာꩻအမွီႏနဝ်ꩻ ဖန်းဖေႏဗာႏတဝ်း ပါꩻမူႏယိုအပိုခို” နုဲင်းနဝ်ꩻသွူ။ 11ကိစ္စယိုနဝ်ꩻ မာꩻယပ်ꩻသꩻမွေးနေးစွဉ်ႏ အဗြာဟံသွူ၊ ဣသျမေလနဝ်ꩻတဲ့ ကွပ်ပွိုးထွာဒျာႏ ဝွေꩻပိုနေနေသွူ။ 12#ရော ၉:၇၊ ဟေဗြဲ ၁၁:၁၈။ ကွဲႏတွော့ꩻ ဗွေႏဘုရာꩻဒေါ့ꩻဖေႏ အဗြာဟံ၊ “လိုꩻပေႏယို တွမ်ႏသွဉ်းမူႏ ဟာဂါရတာႏနဝ်ꩻ နာꩻနန်းခီမွိုန်း ခွေကအွဉ်ႏဖေႏ ဂတိတောႏအတွိုင်ꩻ တွမ်ႏဣသဲစ်နဝ်ꩻ နာꩻအီႏလꩻ ပိုလီꩻခွိုꩻရဲဉ်ႏ နဝ်ꩻမꩻမာꩻသွော့ နုဲင်းသာရာ ကဒေါ့ꩻဖေႏနာꩻနဝ်ꩻဟုဲင်း။” 13သွဉ်းမူႏ ပိုခိုနဝ်ꩻတဲ့ꩻ ထွာဒျာႏ နာꩻပိုခိုနေနေ နဝ်ꩻမꩻ ဝွေꩻသီးဖေႏကထွာ လိုꩻမျိုꩻတန်နဝ်ꩻ ခွေအီႏဖေႏအာ အပိုဖုံႏ” မိန်းဖေႏနုဲင်းနဝ်ꩻသွူ။
14နုဲင်းမွူးရဝ်ꩻနီꩻ မွူးရဝ်ꩻစဝ်း အဗြာဟံ လွမ်ဖေႏဟာဂါရ ထာꩻအံႏယင်ဟန်ႏ တွမ်ႏသော့ꩻဖေႏပါထီ တဖြို့ꩻဗူး တဖြုံႏသွူ။ ဝွေꩻအွဉ်ႏဗဖေႏ အပိုပေႏတဲင် အွဉ်ႏထန်ႏထိုꩻစွဉ်ႏသွူ။ ဟာဂါရ ထန်ႏလွေꩻတဲင် တွိုႏလွေꩻစွဉ်ႏ ဗေသျာဗ ကန္တာရထာꩻခြာကိုသွူ။ 15ထီထွိုင်ႏလို့ထိုꩻနဝ်ꩻ ဝွေꩻအွဉ်ႏကုဲင်လိုꩻပေႏ ထာꩻပုန်ကို၊ 16တဲင်လွေꩻအုံလင်ꩻညာꩻထိုꩻ ကဲက်တရျာꩻရပ်သွူ။ ဝွေꩻရိုꩻချာဝွေꩻနမ်း “ခွေပိုအံႏမသီထိုꩻထီနဝ်ꩻ ခွေတမဉ်ထီႏတဝ်း” နုဲင်းနဝ်ꩻတဲင် ဝွေꩻအုံလင်ꩻနဝ်ꩻကို ငွိုးခြဝ်စွဉ်ႏထာꩻသွူ။
17ဗွေႏဘုရာꩻဟွိုန် လိုꩻပေႏငွိုးထာꩻတဲင် ဗွေႏဘုရာꩻ မို့ꩻလောင်းတမန်ႏ အဝ်ႏခမ်းကီ ဒေါ့ꩻလင်ꩻဖေႏဟာဂါရ “ဟာဂါရ၊ နာꩻသꩻယပ်ꩻ တမုဲင်ꩻခရာႏဟောင်း၊ တွမ်ႏငမ်းမွိုန်း၊ လိုꩻပေႏအဝ်ႏငွိုးထာꩻနဝ်ꩻ ပွိုးဗွေႏဘုရာꩻ ဟွိုန်လဲဉ်း၊၊ 18ထွိုင်ႏသွော့ လွေꩻယွော့သွော့ လိုꩻပေႏတဲင် ချောက်သွော့ ဝွေꩻပိုလီꩻခွိုꩻရဲဉ်ႏဖုံႏနဝ်ꩻ ခွေအီႏမာꩻထွာ လိုꩻမျိုꩻတန် ”နုဲင်းနဝ်ꩻသွူ။ 19နဝ်ꩻထွူ ဗွေႏဘုရာꩻဗွောင်ဖေႏ ဟာဂါရမဲ့တဲင် ဝွေꩻထီႏစွဉ်ႏ ထီအုံႏတဖြုံႏသွူ။ ဝွေꩻမူႏလွေꩻတွောင်ဗွေထီ တဖြို့ꩻဗူးကိုတဲင် ဖေႏအွꩻစွဉ်ႏ အပိုပေႏသွူ။ 20ဗွေႏဘုရာꩻနဝ်ꩻ အဝ်ႏငီꩻတွမ်ႏ လိုꩻပေႏတဲင် ဝွေꩻထွိုင်ႏတန်လွဉ်နဝ်ꩻ အုံပါရန် ကန္တာရထာꩻခြာကိုတွော့ꩻ ထွာလွဉ်စွဉ်ႏ လိုꩻလော်ထာꩻကျင်ႏ တဖြာꩻသွူ။ 21ဝွေꩻတာႏ အမွိုး အွဉ်ႏတောႏလမ်းတွမ်ႏ အီဂျစ်မူႏတဖြာꩻသွူ။
အဗြာဟံတွမ်ႏအဗိမလဲက်သဘော်ꩻတူႏချက်
22 #
ကမ္ဘာႏ ၂၆:၂၆။ အချိန်ႏနဝ်ꩻ ခွန်တန် အဗိမလဲက်တွမ်ႏ ဝွေꩻစဲ့ꩻပိုႏချုပ်တန် ဖိဂေါလနဝ်ꩻ လွေꩻ အဗြာဟံထျꩻတဲင်ဒေါ့ꩻ၊ “နာꩻမာꩻစွဉ်ႏ ထာꩻအမျိုꩻမုဲင်ꩻတဲ့ꩻ ဗွေႏဘုရာꩻ အဝ်ႏငီꩻတွမ်ႏနာꩻသွူ။ 23ကွပ်နဝ်ꩻမꩻ နာꩻနဝ်ꩻ လိန်ႏလဲဉ်တဝ်း ခွေ၊ ခွေပိုဖုံႏ၊ ခွေပိုလီꩻခွိုꩻရဲဉ်ႏဖုံႏကျောင်ꩻ တွိုင်ႏတယ်ႏနေး ဗွေႏဘုရာꩻတဲင် နုဲင်းခွေသစ္စာႏ ကအဝ်ႏနာꩻလောင်းအတွိုင်ꩻ နာꩻတဲ့ꩻ သစ္စာႏအဝ်ႏဗာႏ ခွေအလောင်းတွမ်ႏ နာꩻကအဝ်ႏအုံဒါႏ ခွေခမ်းထီ အလောင်းနဝ်ꩻ အွဉ်ႏဂတိဟုဲင်း” ရိုꩻဖေႏအဗြာဟံ နုဲင်းနဝ်ꩻသွူ။
24အဗြာဟံဒေါ့ꩻ “ခွေအွဉ်ႏဂတိဒျာႏ“ နုဲင်းနဝ်ꩻသွူ။
25ခွန်တန် အဗိမလဲက်လိုꩻဖုံႏ ကသိမ်ꩻထူႏနွိုင်ႏထိုꩻဒါႏ ထီအုံႏစုပ်ꩻခရာႏနဝ်ꩻ အဗြာဟံတွိုင်ႏစွဉ်ႏ ခွန်တန် အဗိမလဲက်သွူ။ 26ခွန်တန် အဗိမလဲက်ဒေါ့ꩻ၊ “ပါꩻမုဲင်ꩻမာꩻထာꩻ နုဲင်းယိုနဝ်ꩻ ခွေတသေတဝ်း၊ ပွိုင်းဝွို့တွမ်ႏ ယိုခရာႏနဝ်ꩻ နာꩻတလꩻဒေါ့ꩻနယ် ဗာႏတဝ်းဒွိုန်းခွေတဲင် ယိုခါမꩻ ခွေစဟွိုန်” နုဲင်းနဝ်ꩻသွူ။ 27နဝ်ꩻထွူ အဗြာဟံဖေႏ ခွန်တန် အဗိမလဲက် သွိုꩻတွမ်ႏ ဖိုးတဲင် ဝွေꩻသီးဝင်ꩻနီ မာꩻစွဉ်ႏသဘော်ꩻတူႏချက်သွူ။ 28အဝ်ႏဝွေꩻသွိုꩻဖုံႏအကိုနဝ်ꩻ အဗြာဟံ ဖထန်ႏခေါ်စွဉ်ႏ သွိုꩻနွတ်ꩻဗာႏသွူ။ 29တဲင်ခွန်တန် အဗိမလဲက်ရီဝွေꩻ၊ “ကွပ်ပွိုးတမုဲင်ꩻ နာꩻမာꩻဗာႏတွိုႏ နုဲင်းယိုဟောင်း” နုဲင်းနဝ်ꩻသွူ။
30အဗြာဟံလဝ်းချာ “ခွေကမာꩻဗာႏနုဲင်းယိုနဝ်ꩻ၊ ခွေနဝ်ꩻထွာဒျာႏ ပါꩻအဖြာꩻ ကဟူႏဒါႏ ထီအုံႏယိုကျောင်ꩻ နာꩻမတ်ဒျာႏနုဲင်းနဝ်ꩻ အနေႏတဲင် လက်ခံႏသွော့ သွိုꩻပေႏနွတ်ꩻဗာႏယို” နုဲင်းနဝ်ꩻသွူ။ 31နဝ်ꩻကိုနဝ်ꩻ ဝွေꩻသီးဝင်ꩻနီ အွဉ်ႏဂတိစွဉ်ႏဝင်ꩻ နဝ်ꩻမꩻ ခင်ႏလမ်းနဝ်ꩻနဝ်ꩻဟဲ့ꩻ ဗေသျာဗသွူ။
32ဝွေꩻသီး အွဉ်ႏသဘော်ꩻတူႏချက် ဗေသျာဗ အရပ်ထွူ ခွန်တန် အဗိမလဲက်တွမ်ႏ ဖိဂေါလနဝ်ꩻ သဲင်ꩻချာယင်း ဖိလိတ္တိခမ်းသွူ။ 33နဝ်ꩻထွူ အဗြာဟံဆို့ꩻ မောင်းကြဲင်ႏမွူးတမွူး ဗေသျာဗ အရပ်ကိုတဲင် ဝွေꩻတွိုင်ႏတယ်ႏ ကိုꩻကွယ်ႏဝုဲင်ႏစွဉ်ႏ ဗွေႏဘုရာꩻ ကထွာ ထာဝရဘုရာꩻ ဗွေႏဘုရာꩻ နဝ်ꩻသွူ။ 34နဝ်ꩻထွူ အဗြာဟံအုံသော့ꩻ ဖိလိတ္တိခမ်းကိုနဝ်ꩻ ညတန်သွူ။
ទើបបានជ្រើសរើសហើយ៖
ကမ္ဘာႏစ 21: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.