ကမ္ဘာႏစ 19
19
သောဒုံဝေင်ꩻဒုစရုဲက်
1မွူးဟာခိုႏချိန်ႏ မို့ꩻလောင်းတမန်ႏနီပါꩻ ထွိုင်ႏဖျော်လွဉ် သောဒုံဝေင်ꩻနဝ်ꩻ လောတ အဝ်ႏအုံလင်ꩻထာꩻ ဝေင်ꩻတခါꩻတန်ငွါ ထျꩻနဝ်ꩻသွူ။ ဝွေꩻထွိုင်ႏထီႏ မို့ꩻလောင်းတမန်ႏဖုံႏနဝ်ꩻ တလဲင်ႏချင်ꩻ ဝွေꩻထွိုင်ႏတဲင် လွေꩻကျိုႏဆွုမ်ႏစွဉ်ႏသွူ။ ဝွေꩻအွပ်ꩻလင်ꩻ ဝွေꩻသီးဆꩻငါ 2တဲင်ရိုꩻ “ဗွေႏ၊ ခွေသွဉ်းယို မဉ်ဝွတ်ပတ် ခံႏထဉ်ႏဖေႏငါႏ နီဗွေႏသီး၊ မာꩻကေꩻဇူꩻတဲင် ကျွꩻလွဉ် ခွေသွဉ်းလမ်း၊ ဟွာႏနီဗွေႏသီးခင်ႏတဲင် ဗေင်ႏနေက တဟာငါႏ၊ တွိုႏမွူးရဝ်ꩻနဝ်ꩻမꩻ နီဗွေႏသီး ထွိုင်ႏစဝ်းတဲင် လွေꩻသွုပ်ယင်း နီဗွေႏသီးတဖူꩻ” ဖစ်ဟဲ့ꩻ နုဲင်းနဝ်ꩻသွူ။
ကွဲႏတွော့ꩻ ဝွေꩻသီးလဝ်းချာ၊ “ဗေင်ႏတဝ်းဒွုမ်၊ ဟန်ႏနာꩻယို နီအီႏအုံဗော့ꩻ တဖူꩻလောင်း ကောင်းထန်ႏယို” နုဲင်းနဝ်ꩻသွူ။
3လောတ အဝ်ႏဖစ်ဟဲ့ꩻ နွိုင်ႏနွိုင်ႏစွဉ်ႏ ဝွေꩻသီးနဝ်ꩻမꩻ အဆုဲင်ꩻသွတ်ꩻ ထဉ်ႏဝင်ꩻနီနဝ်ꩻ သဲင်ꩻလွဉ်ꩻစွဉ်ႏ ဝွေꩻလမ်းသွူ။ လောတထွဉ်ႏ ဝွေꩻအသွဉ်းဖုံႏ ဖို့ꩻတခိုး၊ အွဉ်ႏဖျင်ရဲင်ꩻဖေႏ ထဉ်ႏတာႏ ထာꩻအံႏဟဝ်သွူ။ လောတသွဉ်း ဖျင်ရဲဉ်ꩻထွူ ထဉ်ႏဖုံႏ သွုံꩻဆောင်ႏ အံႏအွꩻစွဉ်ႏသွူ။
4ထဉ်ႏဖုံႏခလား ကနွို့လွေꩻ ခင်ႏလမ်းဗေင်ႏနဝ်ꩻ သောဒုံဝေင်ꩻသား လိုꩻခိုဖုံႏ ကားကအဝ်ႏ ပေႏပေႏတန်တန် လွဉ်ဝဲင်ꩻစွဉ်ႏ လောတလမ်းသွူ။ 5#တရာꩻ ၁၉:၂၂–၂၄။ ဝွေꩻသီးဟဲ့ꩻ လောတတဲင်ရီ၊ “ပါꩻခိုဖုံႏ ကမာꩻထဉ်ႏဒါႏနာꩻ ဟန်ႏဟာနဝ်ꩻ အဝ်ႏမုဲင်ꩻကိုဟောင်း၊ ဝွေꩻသီးနဝ်ꩻ ဟဲ့ꩻထန်ႏလွဉ်ဖေႏ နီဟုဲင်း” နုဲင်းနဝ်ꩻသွူ။ သောဒုံဝေင်ꩻ လိုꩻခိုဖုံႏနဝ်ꩻ မဉ်ဗေင်ႏလွူꩻငီꩻတွမ်ႏ ထဉ်ႏဖုံႏနဝ်ꩻသွူ။
6လောတအဝ်ႏလမ်းကို ထန်ႏလွဉ် ကောင်းထန်ႏတဲင် အွဉ်ႏထွိုင်ꩻသေꩻ တခါꩻသွူ။ 7ဝွေꩻဒေါ့ꩻဖေႏ ဝွေꩻသီး၊ “သွꩻ၊ ခွေသွဉ်း တောင်ꩻပြန်ႏဒျာႏသီ၊ ဒုစရဲက်ထာꩻကုဲင် အစားယိုနဝ်ꩻ သီ တွမ်ႏမာꩻမွိုန်း။ 8ထွားယို၊ ခွေပိုမူႏ မူႏနမ်ꩻစဲစ် အဝ်ႏဝင်ꩻနီ။ ခွေဟဲ့ꩻထန်ႏဖေႏသီ၊ သီမဉ်မာꩻ ဝွေꩻသီး နုဲင်းမုဲင်ꩻတဲ့ꩻ မာꩻဟုဲင်း၊ ကွဲႏတွော့ꩻ ပါꩻခိုဖုံႏယိုနဝ်ꩻ သီမာꩻမွိုန်း တမုဲင်ꩻမုဲင်ꩻ၊ ကွပ်ပွိုး ဝွေꩻသီးနဝ်ꩻထွာ ခွေထဉ်ႏနဝ်ꩻမꩻ ခွေအီႏရဲပွေါးထွားဗာႏ ဝွေꩻသီးနဝ်ꩻ ဝွတ္တရာꩻအဝ်ႏ” နုဲင်းနဝ်ꩻသွူ။
9ကွဲႏတွော့ꩻ ဝွေꩻသီးရိုꩻ၊ “ပုဲင်းထန်ႏထိုꩻလုဲင်း တွမ်ႏရဲမွိုန်း နီတဖူꩻ၊ နာꩻတဲ့ꩻ လိုꩻတသဉ်ဒျာႏနဝ်ꩻ အဝ်ႏသွဉ်ဗာႏကနီ နုဲင်းမုဲင်ꩻဟောင်း၊ ပုဲင်းထိုꩻဟုဲင်း မဉ်ႏပုဲင်းတဝ်းနဝ်ꩻ အီႏခံႏဗာႏ ဟုဲင်းလွိုလဲဉ်းက ဝွေꩻသီး” နုဲင်းနဝ်ꩻထွူ ဝွေꩻသီးနွန်ႏချာ လောတတဲင် နွို့တွူႏငါ ကျံႏတွဲႏကုဲင်ထိုꩻ တခါꩻသွူ။ 10ကွဲႏတွော့ꩻ ပါꩻဝင်ꩻနီ ကအဝ်ႏကောင်းကိုနဝ်ꩻ ဗွောင်တခါꩻ ယောင်းထန်ႏစူ ထွို့ꩻနွို့သော့ꩻချာစွဉ်ႏ လောတ လမ်းကိုတဲင် အွဉ်ႏထွိုင်ꩻစွဉ်ႏ တခါꩻသွူ။ 11#၂ရာႏ ၆:၁၈။ နဝ်ꩻထွူ ပါꩻဝင်ꩻနီနဝ်ꩻ မာꩻခေ့ꩻထိုꩻစွဉ်ႏ လိုꩻကအဝ်ႏ ကောင်းထန်ႏသားဖုံႏ ကားကအဝ်ႏနဝ်ꩻ အမဲ့ဖုံႏသွူ။ နဝ်ꩻမꩻ ဝွေꩻသီး ထုမ်ႏတခါꩻငွါ တမော့ꩻတဝ်းဒွုမ်သွူ။
လောတအဝ်ႏသောဒုံဝေင်ꩻထန်ႏလွေꩻထိုꩻ
12ထဉ်ႏဝင်ꩻနီ ရိုꩻဖေႏလောတ၊ “ဝေင်ꩻကိုယို နာꩻပိုမူႏ ပိုခို တွမ်ႏနာꩻမဖုံႏ နာꩻဖူးဝေးအလင်ဖုံႏ မဉ်ႏအဝ်ႏသော့ꩻနဝ်ꩻ အွဉ်ႏထန်ႏထိုꩻခန်း။ 13ကွပ်ပွိုး နီအီႏယားကုဲင်ထိုꩻ ခင်ႏလမ်းယိုသွူ၊ ငဝ်းဟဝ်ငမ်းသꩻ ပဲစ်ဒင်ႏ စွဲꩻတရာꩻဒါႏ လိုꩻစားယို ဟွိုန်တွိုႏထင်ႏလဲဉ်း ထာဝရဘုရာꩻ နားတဲင် ဖေႏကယားကုဲင်ထိုꩻ ဝေင်ꩻသောဒုံယိုနဝ်ꩻ အွဉ်ႏစွꩻလွဉ်ဒျာႏနီ” နုဲင်းနဝ်ꩻသွူ။
14နဝ်ꩻထွူ လောတလွေꩻထေ့စွဉ်ႏ ဝွေꩻအပိုမူႏဖုံႏ ကအီႏတောႏလမ်းဒါႏ ပါꩻခိုဖုံႏ ထျꩻတဲင်ဒေါ့ꩻ၊ “အဝ်ႏယိုကို ထန်ႏထိုꩻခန်း မွိုင်မွိုင်ဟုဲင်း၊ ထာဝရဘုရာꩻ အီႏယားကုဲင်ထိုꩻသွူ ခင်ႏလမ်းယို ”နုဲင်းနဝ်ꩻသွူ။ ကွဲႏတွော့ꩻ ဝွေꩻသီးထင်းဒျာႏ လောတ လွဥ်ဒေါ့ꩻစွပ်ꩻဒျာႏထာꩻသွူ။
15မွူးရဝ်ꩻစဝ်း ထာꩻအီႏလေနဝ်ꩻ မို့ꩻလောင်းတမန်ႏဖုံႏ ထွဉ်ႏလောတ ဖေႏကနဲစ်ထန်ႏ မွိုင်မွိုင်သွူ။ ဝွေꩻသီးဒေါ့ꩻ၊ “မဉ်ႏယားကုဲင်ထိုꩻ ဝေင်ꩻချိန်ႏ နာꩻမာꩻတွမ်ႏ နာꩻပိုမူႏဝင်ꩻနီ အသက် ဖေႏကသွုမ်ꩻဗာႏမွိုန်းနဝ်ꩻ ဟဲ့ꩻထန်ႏထိုꩻ မွိုင်မွိုင်သွော့” နုဲင်းနဝ်ꩻသွူ။ 16#၂ပေ ၂:၇။ ကွဲတဲင်တွော့ꩻ လောတနဝ်ꩻ ယွိုက်ꩻယုဲင်ငါႏသွူ။ ထာဝရဘုရာꩻ သညင်ꩻဝွေꩻနဝ်ꩻမꩻ မို့ꩻလောင်းတမန်ႏဖုံႏ စွီႏဝွေꩻ၊ ဝွေꩻမာ၊ ဝွေꩻပိုမူႏဖုံႏ အစူတဲင် အွဉ်ထန်ႏစွဉ်ႏဝွေꩻသီး ဝေင်ꩻနဝ်ꩻသွူ။ 17နဝ်ꩻထွူ မို့ꩻလောင်းတမန်ႏ တပါꩻမိန်း၊ “သီသက် ဖေႏကအဝ်ႏမွန်နဝ်ꩻ ဖင်းဟုဲင်း၊ တွမ်ႏထွားချာမွိုန်းထာꩻ၊ တွမ်ႏအုံပဆားမွိုန်း ထာꩻခြောင်ႏထာꩻအုံႏကို၊ သီ ဖေႏကသီဗာႏမွိုန်းနဝ်ꩻ ဖင်းထင်ႏသွော့ ကောင်လောင်းဖုံႏ” နုဲင်းနဝ်ꩻသွူ။
18ကွဲႏတွော့ꩻ လောတလဝ်းချာ၊ “မာꩻမွိုန်းတဝ်းဗွေႏ၊ မာꩻကေꩻဇူꩻတဲင် အွဉ်ႏဖင်းလွေꩻမွိုန်း နီသွဉ်းသီး ကောင်လောင်း မွိုင်ဗွေႏ၊ 19နီဗွေႏသီး အွဉ်ႏရေꩻမွေးနေးစွဉ်ႏ ခွေသွဉ်းတဲင် ကယ်ႏလဲဉ်း ခွေသွဉ်းအသက်။ ကွဲႏတွော့ꩻ ကောင်ဖုံႏသူꩻလောင်းနဝ်ꩻ ညာꩻငါႏလွဉ်ꩻတဲင် ခလားကတွိုႏနဝ်ꩻကို ဘေꩻတံႏအီႏထွꩻထိုꩻခွေတဲင် ခွေသွဉ်း အီႏသီထိုꩻဒါႏသွူ။ 20နီဗွေႏအဝ်ႏထီႏလွေꩻ ဝေင်ꩻပေႏသူꩻ တမွေးတဝ်းဟောင်း၊ ဝေင်ꩻနဝ်ꩻနဝ်ꩻ အဝ်ႏဗော့ꩻနဝ်ꩻမꩻ အွဉ်ႏဖင်းလွေꩻသွော့ ခွေသွဉ်း နဝ်ꩻကို၊ နီဗွေႏအဝ်ႏသေ ခင်ႏလမ်း နဝ်ꩻကိုနဝ်ꩻထွာ ဝေင်ꩻပေႏစွဉ်ႏတဲ့ ခွေသွဉ်းတာႏ အီႏလုမ်းဗဉ်ႏ” နုဲင်းနဝ်ꩻသွူ။
21မို့ꩻလောင်းတမန်ႏလဝ်းချာ၊ “မွေးသွူ၊ ခွေသဘော်ꩻတူႏဒျာႏ၊ ဝေင်ꩻနဝ်ꩻနဝ်ꩻ ခွေတယားကုဲင်တဝ်း၊ 22မာꩻမွိုင်မွိုင် ဖင်းဟုဲင်း၊ ပေါႏနာꩻတဖျော်တဝ်း နဝ်ꩻကိုနဝ်ꩻ ခွေတမာꩻတဝ်း တမုဲင်ꩻမုဲင်ꩻ” နုဲင်းနဝ်ꩻသွူ။
ကွပ်ပွိုး လောတဟဲ့ꩻ ဝေင်ꩻပေႏနဝ်ꩻမꩻ ဝေင်ꩻနဝ်ꩻနဝ်ꩻ မဉ်ꩻတွင်ႏထိုꩻစွဉ်ႏ ဇောရသွူ။
ယားကုဲင်သောဒုံတွမ်ႏဂေါမောရဝေင်ꩻ
23မွူးထွိုင်ႏထန်ႏချိန်ႏနဝ်ꩻ လောတဖျော်လွေꩻစွဉ်ႏ ဇောရဝေင်ꩻသွူ။ 24#မ ၁၀:၁၅၊ ၁၁:၂၃–၂၄၊ လု ၁၀:၁၂၊ ၁၇:၂၉၊ ၂ပေ ၂:၆၊ တရာꩻ ၇။ ထာဝရဘုရာꩻနဝ်ꩻ စွဉ်ႏမေႏ ကအဝ်ႏခိုးဒါႏ ကန်ꩻနဝ်ꩻ တလဲင်ႏချင်ႏ အွဉ်ႏလော့လင်ꩻလူး သောဒုံဝေင်ꩻတွမ်ႏ လိုꩻကအဝ်ႏသော့ꩻဒါႏ ဂေါမောရ ဝေင်ꩻလောင်းသွူ။ 25ယားကုဲင်ထိုꩻလို့ ဝေင်ꩻနဝ်ꩻဖုံႏ တခြောင်ႏလွုမ်း တွမ်ႏထာꩻမွူး ကားကအဝ်ႏဖုံႏသွူ။ 26#လု ၁၇:၃၂။ ကွဲႏတွော့ꩻ လောတမာနဝ်ꩻ ထွားချာထာꩻနဝ်ꩻမꩻ ထွာထိုꩻစွဉ်ႏ တသာႏထွန်ႏနဝ်ꩻသွူ။
27နုဲင်းမွူးရဝ်ꩻနီ မွူးရဝ်ꩻစဝ်းစဝ်း အဗြာဟံနဝ်ꩻ နဲစ်လွေꩻဝွေꩻ ကအုံထွိုင်ႏငီꩻဗာႏဖိုဒါႏ ထာဝရဘုရာꩻ အခင်ႏလမ်းနဝ်ꩻသွူ။ 28ဝွေꩻထွားလင်ꩻ သောဒုံဝေင်ꩻ ဂေါမောရဝေင်ꩻတွမ်ႏ ထာꩻခြောင်ႏ တခြောင်ႏလွုမ်းနဝ်ꩻ ထီႏဗာႏ ဗွိုန်နုဲင်းမေႏဖါႏတန်ကို မေႏလူးအဝ်ႏထန်ႏလွဉ် အတွိုင်ꩻနဝ်ꩻ ဟံႏတယာႏလွုမ်းနဝ်ꩻတဲ့ အလူး အဝ်ႏထင်ႏကီလွဉ်ထာꩻ နုဲင်းနဝ်ꩻသွူ။ 29ကွဲႏတွော့ꩻ ဗွေႏဘုရာꩻ ယားကုဲင် လောတကအုံဒါႏ ထာꩻခြောင်ႏကိုဝေင်ꩻဖုံႏချိန်ႏ ဝွေꩻဗွေႏယူႏလꩻ အဗြာဟံနဝ်ꩻမꩻ ကအီႏယားကုဲင်ဒါႏ ဘေꩻတံႏနဝ်ꩻ အွဉ်ႏလွစ်ဖေႏစွဉ်ႏ လောတသွူသွူ။
မောအပ်လိုꩻမျိုꩻတွမ်ႏအံမွန်နိလိုꩻမျိုꩻဖုံႏအဇာႏတိ
30ကွပ်ပွိုး လောတနဝ်ꩻ အုံဇောရဝေင်ꩻ တဗွိုန်ႏတဝ်းနဝ်ꩻမꩻ တွမ်ႏဝွေꩻပိုမူႏ ဝင်ꩻနီနဝ်ꩻ ခြုဲင်းထင်ႏ ကောင်လောင်းတဲင် အုံသော့ꩻ ထမ်းအိုကိုသွူ။ 31ပိုမူႏတန်နဝ်ꩻ ဒေါ့ꩻဖေႏဝွေꩻဖူးမူႏ၊ “နီဖါနဝ်ꩻ ဖြားလဲဉ်းတဲင် နီပိုဖေႏကအဝ်ႏနဝ်ꩻ လိုꩻခို ကအီႏတောႏလမ်း နီနဝ်ꩻ ဟံႏယိုအလောင်း တဖြာꩻငါတဲ့ အဲဉ်ထဝ်းသွူ။ 32လွဉ်ဟုဲင်း နီတွိုက်ꩻမွန်ꩻတွမ် နီဖါ ဝုဲင်၊ မာꩻဖေႏဝွေꩻစွိုးခွိုꩻ ကသွတ်ꩻဝုဲင်ꩻ ဗာႏမွိုန်းနဝ်ꩻ နီဗေင်ႏငီꩻတွမ် တွမ်ႏဝွေꩻ” နုဲင်းနဝ်ꩻသွူ။ 33အဟာနဝ်ꩻ ဝွေꩻသီး ဖေႏအွꩻမွန်ꩻအဖါ ဝုဲင်တဲင် အပိုမူႏတန်နဝ်ꩻ ဗေင်ႏငီꩻတွမ်ႏ ဝွေꩻဖါသွူ။ ကွဲႏတွော့ꩻ အဖါနဝ်ꩻ မွန်ꩻငါႏလွဉ်ꩻနဝ်ꩻမꩻ ဝွေꩻမာꩻတမုဲင်ꩻတဲ့ꩻ တသေချာတဝ်းသွူ။
34နုဲင်းမွူးရဝ်ꩻနီꩻ ပိုမူႏတန်နဝ်ꩻ ဒေါ့ꩻဖေႏ အဖူးမူႏ “မဟာနဝ်ꩻ ခွေဗေင်ႏငီꩻလဲဉ်း တွမ်ႏနီဖါသွူ။ ဟန်ႏဟာ တွိုက်ꩻမွန်ꩻဖျင် ဝွေꩻတလဲင်ႏတဲင် နာꩻဗေင်ႏငီꩻလုဲင်ႏသွော့ တွမ်ႏဝွေꩻ၊ နဝ်ꩻမꩻ နီတဖြာꩻစီႏနဝ်ꩻ တွမ်ႏနီဖါတဲင် လꩻယင်းပို” နုဲင်းနဝ်ꩻသွူ။ 35ကွပ်နဝ်ꩻမꩻ အဟာနဝ်ꩻ ဝွေꩻသီးတွိုက်ꩻမွန်ꩻဖျင်ယင်း အဖါတဲင် ပိုမူႏအဖြာꩻပေႏနဝ်ꩻ ဗေင်ႏငီꩻ တွမ်ႏဝွေꩻသွူ။ အဖါနဝ်ꩻ မွန်ꩻငါႏလွဉ်ꩻနဝ်ꩻမꩻ ဝွေꩻမာꩻတမုဲင်ꩻတဲ့ꩻ ဝွေꩻတသေချာတဝ်းသွူ။ 36တွမ်ႏအနယ်ꩻ နုဲင်းယို လောတ ပိုမူႏဝင်ꩻနီနဝ်ꩻ တွမ်ႏဝွေꩻသီးအဖါရင်ꩻနဝ်ꩻ လꩻလွဉ်စွဉ်ႏ သန္ဓေႏသွူ။ 37ပိုမူႏတန်နဝ်ꩻ လွူးလွဉ် ပိုခိုတဖြာꩻတဲင် ဖန်ဖေႏအမဉ်ꩻ မောအပ်သွူ။ ဟန်ႏနီယို ဝွေꩻနဝ်ꩻထွာ မောအပ်လိုꩻမျိုꩻဖုံႏနဝ်ꩻ အဖါသွူ။ 38ပိုမူႏပေႏနဝ်ꩻတဲ့ꩻ လွူးလွဉ် ပိုခိုတဖြာꩻတဲင် ဖန်ဖေႏ အမဉ်ꩻ ဗဉ်နမ်မိသွူ။ ဟန်ႏနီယို ဝွေꩻနဝ်ꩻထွာ အံမွန်နိလိုꩻမျိုꩻဖုံႏ အဖါသွူ။
ទើបបានជ្រើសរើសហើយ៖
ကမ္ဘာႏစ 19: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.