1 Bakorindo 6
6
Embangano mwa kachi-kachi ke'bemeresi
1Mango mundu muuma mu mwabo éte lubangano na munyakabo mwemeresi, àngaereresa kumusitaka era muhondo se'baishi be'manja ba bàteshi Ongo? Émire kumusitaka era muhondo sa bemeresi balikabo. 2Mùteshi kwe'bandu ba Ongo, bu bakáchinjibusa ebandu be'butala? Na akaba mwabo mu mukáchinjibusa ebandu be'butala, mùtangaala kunde mwámala emyasi ye'buha-buha era ìri mwa kachi-kachi kenyu? 3Mùteshi kwa tubano tu tukáchinjibusa ne'bamalaika*? Mwa bacha, tùngaala kunde twámala emyasi era yèrekere kano kalamo ketu! 4Rero mango mwěte mbangano sa sìri nge'si, chi chìngatuma mwénde mwêka'si era muhondo se'baishi be'manja ba bàkenyibwe mwa kachi-kachi ke'bemeresi? 5Nàtechire bacha, kwa kubechisa ehonyi. Mwakachi-kachi kenyu mùtanali chiro na mundu asibya ola wète bwenge, ola ungénde wámalira banyakabo bemeresi embangano? 6Si mwabo, emwemeresi kunaya kusitaka mwemeresi mulikabo era muhondo se'baishi be'manja ba bàtemerere Kirisito*!
7Kubinali! Oku kusitakana kwenyu, kwalosise mira kwa mwaímirwe kanangana! Kungakomire múnde mwásesa emichima mango bábakorera emabi. Kanji kungakomire múnde mwêmerera kunyaibwa bya mwěte! 8Si mwabo, mu mwénjire mwákorera ebanji emabi, na kubanyaa ebikulo byabo. Na'bu mwénjire mwákorera bacha, banáli banyakenyu bemeresi! 9Mùteshi kwa ebakosi be'mabi batákabone kwa mwandu we'bwami bwa Ongo? Muténdaa mwáchengeera, bushi ebasingisi, na ba bénde bêra ebasimu, ne'bihungu, nesi emulume ola wénde wáira elusingi na mulume mulikabo, ne'mukasi ola wénde wáira elusingi na mukasi mulikabo, 10ne'besi, ne'basiya-siya, ne'batamisi, na ba bénde bákamba ebanji, ne'bihumusi, abu boshi batákabone kwa mwandu we'bwami bwa Ongo. 11Na bauma mu mwabo nabo, ku bábaa banátula bacha. Si Ongo ábakomise na kubalondola múbe bandu bai. Kanji énde ábatola nga bandu ba bàtungenene era muhondo sai kurengera esina lya Enawetu Yesu Kirisito, na kurengera eMuchima wa Ongo wetu.
Emubiri wenyu lu luhu lwe'Muchima Mubuya-buya
12Bandu bauma mu mwabo bénde báteta mbu: «Nyéte loso lwa kuira chira kandu.» Kubinali! Si atá chira kandu ku kabêtere mufa! Kanji chiro mbu nyéte loso lwa kuira chira kandu, ndàngemerera kuba kaungu* ka chiro na kandu kasibya. 13Kanji mwénde mwáteta mbu: «Ebiryo byabumbwaa bushi ne'bula, ne'bula nabo bwabumbwaa bushi ne'biryo.» Kubinali! Muményaa kwa ebiryo ne'bula, Ongo akáhandula'bi.
Si emubiri atábumbwaa bushi ne'kuira elusingi, si ábumbwaa bushi na Enawetu, kanji anátula wai. 14Ongo iwômwolaa Enawetu Yesu, netu akánatòmwola kurengera ebuashi bwai.
15Mùteshi kwe'mibiri yenyu bìri bitera bye'mubiri wa Kirisito*? Rero, echitera che'mubiri wa Kirisito* chi nyiíraa kuba chitera che'chihungukasi? Bisha byenyu! 16Mùteshi kwe'mundu ola wáira elusingi ne'chihungukasi, énde ába mundu muuma nachi? Bushi bitúla byǎnjikirwe mwa Maanjiko Mabuya-buya mbu: «Abu babiri bánere bába mundu muuma.»#6:16 Somaa Ndangiriso 2:24. 17Si ola ulí mwa buuma na Enawetu, énde ába mundu muuma nai kwa njira ye'muchima.
18Mundaa mwáhaa elusingi! Bushi emanji mabi moshi, ma mundu énde áira, màtauma kwa mubiri wai. Si ola wáira ebuhungu, énde ába aírire mabi era luulu se'mubiri wai yeine. 19Mùteshi kwe'mubiri wenyu, lu luhu lwe'Muchima Mubuya-buya, ola utúla mwa ndanda senyu, ola Ongo áberesise? Rero, emubiri wenyu àtachiri wenyu mubeine. 20Ongo ábaulire mira ku chichiro chinene busese. Rero, mundaa mwákoresa emubiri wenyu kwe'tunda lya Ongo.
ទើបបានជ្រើសរើសហើយ៖
1 Bakorindo 6: tbt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2017 Wycliffe Bible Translators, Inc.