1 Bakorindo 7
7
Eáno era luulu se'hwera
1Rero, kukulikana ne'myasi era mwànyǎnjikiraa, bacha ku nábabura: Kukomire emulume àtahweraa. 2Si bushi ne'kuchilánga kwa lusingi, kwémire chira mulume aáte mukai na chira mukasi kwémire aáte eba wai. 3Emulume ěmire kunde áirira mukai bya ěmire kumuirira nga eba wai. Ne'mukasi nai, ěmire kunde áirira eba wai bya ěmire kumuirira nga mukai. 4Emukasi atéte buashi kwa mubiri wai, bushi àli mubiri we'ba. Ne'mulume nai atéte buashi kwa mubiri wai, bushi àli mubiri wa mukai. 5Bushi no'ku, muténdaa mwálairirana. Mùngaláirirana ku bihangi bieke oshâo, bya mweméresanyise'ko bushi ne'kuchana kwa memo. Ne'ra nyuma se'kwéma, mwánahuba kubuanana. Bítabere bacha, mutábone emisi ye'kuchilanga, aola Wamusimu* ánabona enjira ye'kubaereka. 6Ei myasi nàbabwirire, atá muomba*, si kukomire akaba mùngaira bacha. 7Kubinali, nyìngasimire ebandu boshi bábe bashimba nga nyono. Si chira mundu éte elwai lwêmbo lwa Ongo ámwêresise. Mundu muuma àngaata luno lwêmbo, ne'unji ánata lolula.
8Rero, ebashimba ne'bahumbakasi, nábura'bo kwa kungakomire baéndekere kwékala beine nga nyono. 9Si akaba bàtangaala kunde bângika emibiri yabo, kukomire bahwére na kuhweribwa. Bushi ekuhwera ne'kuhweribwa ku kukulu wa kunde bálibuka busese ne'mianyisa ye'kuira elusingi.
10Kwa ba bera bàhwerire, nesi kuhweribwa, náberesa ono muomba*. Atá nyono nyínaberesa'o, si Enawetu yeine: emukasi atémire kulikana ne'ba wai. 11Si akaba emukasi àngalikana ne'ba, àtachihweribwaa, nesi ǒmvikanaa nai. Emulume nai bitěmire kuulusa mukai.
12Ebanji bandu, ene myasi nábura'bo iri yanyi nyeine, si ìtatengire era mwa Enawetu: akaba emulume ola ulí mwemeresi éte mukasi ola utá mwemeresi, no'yu mukasi anêmerere kwékala nai, oyu mulume àtarekanaa nai. 13Ne'mukasi ola ulí mwemeresi, nai akaba éte mulume ola utá mwemeresi, no'yu mulume anêmerere kwékala nai, oyu mukasi àtarekanaa nai. 14Bushi emulume ola utá mwemeresi, énde ába mwa buuma na Ongo kurengera ebuuma bwai na mukai. Ne'mukasi ola utá mwemeresi nai, énde ába mwa buuma na Ongo kurengera ebuuma bwai ne'ba wai. Akaba bìtangabere bacha, ebana babo bàngatolibwe nga bandu ba bàli bure na Ongo. Si kanangana abu bana, banáli bandu ba Ongo.
15Si akaba emulume nesi emukasi ola utá mwemeresi àngahonda kulikana ne'mwemeresi ola bàhweranyire nai, análikanaa nai. Mwa myasi era iri nge'i, emulume nesi emukasi ola ulí mwemeresi era àli mwa buhuru, bushi Ongo ábâmaere chasiya mwíkale mwa bôlo. 16Woyo u mukasi mwemeresi, chi chìngakulosa akaba ùngaala kununula ebalo? Nao, u mulume mwemeresi, chi chìngakulosa kwa ùnganaala kununula mukasi wao?
Emibere era ikulikene no'kwa Ongo átwamalaa
17Mango Ongo ábâmaalaa, mwábaa mùli mwa mibere era Enawetu áberesaa. Rero, kureka ebi nera nàtetaa, chira mundu ěmire kuendekera kuba mwe'i mibere. Oyola i'muomba* nénjire nákangirisa mwa nyuhu sa Ongo soshi. 18Akaba mundu abáa àmonyisibwe mira mango Ongo ámwamalaa, anáshibaa bacha. Na akaba mundu abáa àtasa kumonyisibwa mango Ongo àmwâmalaa, àtahondaa kumonyisibwa. 19Ekumonyisibwa, nesi ekutamonyisibwa, kutete mufa asibya. Si cha chéte mufa, kùli kuira cha Ongo àtechire. 20Chira mundu ěmire kwishiba ngo'kwa ábaa análi mango Ongo ámwamaalaa. 21Akaba wábaa ùli kaungu* mango Ongo ákwamalaa, echera chìtakulibusaa. Si akaba ùngabona emuisha we'kutenga mwa bucha, ùtaesaa'o. 22Bushi emundu ola wabáa ùli kaungu* mango Enawetu ámwâmaalaa, era àli mwa buhuru mwa ndanda sa Enawetu. No'la wabáa ùli mwa buhuru mango Enawetu ámwamaalaa, era àli kaungu* ka Kirisito*. 23Ongo ábaulire ku chichiro chinene busese. Bushi no'ku, mùtachêmereraa kuba tuungu* twa bandu. 24Rero banyaketu, chira mundu anáendekeraa kuba mwa buuma bwai na Ongo, na kushiba ngo'kwa abáa análi mango Ongo amwámaalaa.
Eano era luulu se'bashimba ne'bahumbakasi
25Rero bushi ne'myasi era yèrekere ba bàtasa kuhwera nesi kuhweribwa, ndéte muomba* ola wátenga era mwa Enawetu ola nyingéresa'bo. Si eyanyi mianyisa ínêresa'bo, bushi nyìri mundu ola wěmire kwêmererwa kukulikana ne'bonjo bwa Enawetu. 26Rero bushi ne'malibuko me'sine suku, nyiséne kwa kukomire chira mundu ashibe ngo'kwa análi. 27Akaba wéte mukasi, ùtahondaa kulikana nai. Na akaba ùtasa kuhwera, ùtahondaa mukasi. 28Si akaba ùngahwera, ùtairire chibi. Na akaba emunyere nai àngahweribwa, àtairire chibi. Si ebandu ba bàhweranyire bangálola ku malibuko manene mwa kalamo kabo. Rero amu malibuko, náhonda mwǎmbuke'mo.
29-30Banyaketu, che chine chi náhonda kubabura: ebihangi bya byashiba bìri bieke. Rero kutengera lwarero, ebandu ba bète ebakasi bakóreraa Ongo nga ba batéte'bo, na ba bálira babáa nga ba batálira, na ba bàli mwa lumoo babáa nga'ba batáli mu lumoo, na ba báula ebindu, babáa nga ba batéte kandu. 31Na ba bákoresa ebikulo byo'muno butala, babáa nga ba batákoresa'bi. Bushi buno butala bwáhonda kuwa.
32Nyingasimire muténdaa mwáata mianyisa ya kubalibusa. Emundu ola ùtahwerire, énde áchana mwa myasi ya Enawetu, énde áhonda amúsimise. 33Si ola ùhwerire, yeke énde álibukira emyasi ye'butala, bushi énde áhonda asímise mukai. 34Aola, énde ába ngo'la wàchiabire'mo kabiri. Ne'mukasi ola ùtahweribwe nesi emunyere, énde áchana loshi mwa myasi ya Enawetu, chasiya ábe mubuya-buya kwa njira ye'mubiri ne'ye'muchima. Si emukasi ola ùhwerirwe, yeke énde áchana mwa myasi yo'muno butala, bushi énde áhonda asímise eba wai.
35Nàbabwirire ei myasi kwa mutoloke wenyu, si ndáhonda kubangika. Náhonda múnde mwáata mibere era ìtungenene, kanji múnde mwákorera Enawetu yeine busira byângiko.
36Akaba emutabana àngaba ákukumanyira murakasi busese, kanji aséne kwa áhonda kumuirira mwasi ola ùtakomire, no'ku áhonda amúhwere, banáhweranaa. Wamutabana ákahwera murakasi wai, angába àtakolire chibi.#7:36-38 Ene milongo 36-38, bandu bauma batúla bàbindwire'i mbu Paulo ákangirisa era luulu se'musere we'mulume ne'hwera lya mwali. 37Si akaba emutabana mwa muchima wai yeine àngateta busira kumuchichika mbu atáchihonda kuhwera murakasi, kanji anêmerere kuchishibira mushimba, aola àngaba aírire kubuya. 38Rero, emutabana ola wàhwerire murakasi eri aírire kubuya. Si emutabana ola wánana kuhwera murakasi, eri aíirire kubuya busese.
39Emukasi ola ùhwerirwe énde ába àminyirwe kwe'ba mango oyu eba àchiri'o. Si akaba àngafa, oyu mukasi àli mwa buhuru bwe'kuhweribwa ne'mulume ola asímire. Si oyu mulume wámuhwera, ěmire ábe mwemeresi. 40Si kwa mianyisa yanyi, akaba oyu muhumba-kasi àngěkala ngo'kwa análi, àngaahanyirwa busese. Nanyi, náanyisa kwa nákoresibwa ne'Muchima wa Ongo.
ទើបបានជ្រើសរើសហើយ៖
1 Bakorindo 7: tbt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2017 Wycliffe Bible Translators, Inc.