1 Bakorindo 5
5
Emyanya ibi mwa kachi-kachi ke'bemeresi
1Rero, emwasi àhandabanyire mira mwa bandu boshi kwa mwa kachi-kachi kenyu mùli bandu ba bénjire báira elusingi. Ne'lusingi lwa lùli ngo'lu, anabe ne'bandu ba bàteshi Ongo bàtangaira'lo. Bushi kùli muuma mu mwabo ola wàtolire muke'she. 2Kanji muchiri bandu ba kuchitonga busese? Mwabo, kulira ku mwabáa mwěmire kulira, na kukolokanya oyu mundu mwa kachi-kachi kenyu! 3Chiro angaba mbu nyìri bure nenyu kwa njira ye'mubiri, si emuchima wanyi análi ala'uma nenyu. Rero oyu mundu waírire bacha, nyono namúchinjibusise mira, ngo'kwa nyìnganamuchinjibusise akaba nyìngabere eyera. 4Mango mungábuanana kwe'sina lya Enawetu Yesu, nanyi nyingába nyìri ala'uma nenyu kwa njira ye'muchima. Ne'buashi bwa Enawetu Yesu nabo, bungába bunáli aola. 5Rero mango mungábuanana, oyu mundu mumúbikaa mwa mino sa Wamusimu*. Muíraa bacha, chasiya emubiri wai we'mabi ahándulibwe, si emuchima wai anúnulibwe elusuku lwa Enawetu Yesu akábaha.
6Mutéte cha mùngachitongera! Mùteshi kwe'chachu* yeeke, yénde yáimbya echitosa choshi? 7Bushi no'ku, ei chachu* yo'kwa mira, mukulaa'i mwa kachi-kachi kenyu, chasiya múbe bandu ba bàkomisibwe*. Múkaira bacha, mungába nga chitosa chiyayaya cha chìtabikirwe mu chachu*. Rero, ku mwera mukomisibwe* bacha, bushi Kirisito* ânyirwe mira kuba mitulo* era ikéribwe bushi netu, nga mwana wa mbuli ola wénde wákeribwa kwa lusuku lukulu lwe'Pasaka*. 8Bushi no'ku, mwákulya elinye lye'Pasaka* tuténdaa twákoresa mikate era ìbikirwe mwe'chachu*, kukuteta mbu tuténdaa twâta myanya ibi nesi chibi chisibya. Si túndaa twákoresa emikati era ìtabikirwe mu chachu*, kukuteta mbu túndaa twálya eli linye na muchima ola ùkomisibwe* no'mwa kanangana.
9Mwa maruba ma nabátumiraa, nàbǎnjikiraa kwa muténdaa mwákomerana ne'basingisi. 10Ekubabura bacha, kuta kuteta kanangana mbu muténdaa mwákomerana ne'bandu boshi bo'muno butala: ebasingisi, ne'basiya-siya, ne'bihumusi, na ba bénde bêra ebasimu. Bushi abu bandu boshi ekuchikula kubo, bìngabemire mbu muténgaa muno butala. 11Si nàbaanjikirire kwa muténdaa mwákomerana na chira mundu woshi ola wáchitonga mbu àli munyaketu mwemeresi, no'ku àli musingisi, nesi musiya-siya, nesi mundu wa kwêra basimu, nesi mundu ola wénde wákamba ebanji, nesi mutamisi, nesi chihumusi. Emundu ola ulí ngo'yu, ne'kulya muténdaa mwánalya nai.
12-13Ebandu ba batá bemeresi, ekuchinjibusa'bo kutanyerekere, si Ongo yeine i'ukáchinjibusa'bo. Si mwabo, mwěmire kunde mwáchinjibusa ebandu bo'mwa chikembe chenyu che'bemeresi. eMaanjiko Mabuya-buya matúla màtechire mbu: «Emundu mubi, mùmukolokanyaa mwa kachi-kachi kenyu.»#5:12-13 Somaa Bukengere 17:7; 19:19.
ទើបបានជ្រើសរើសហើយ៖
1 Bakorindo 5: tbt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2017 Wycliffe Bible Translators, Inc.