གཉིད་པ་ཀོ་རིན་ཐི། 4
4
མེ་པ་དི་ཁཱན་ཁོ་ག་ནང་ཀ་ སག་ཁཱན་རྒྱུ་ནོར།
1ཨོ་ཐེན་ཨ་ཉི་ དཀོན་མཆོག་གི་ སྙིང་རྗེ་ཨ་ཉི་ ཨོ་ཐ་ལའི་ཁ་ ཨ་ཧ་གནང་མ་ཨ་དེན་གེ་ ཨའི་སེམས་མ་ཤི་ལཱན་ཆོན༌ཅ། 2ཨ་ཤི་གུམ་ཉི་ཨ་ཁཱན་བ་དང་ ངི་ནང་ཁུ་སི་སི་ཆོ་ཁཱན་བ་ སྤང་མ༌ཅ། ཉི་ཨ་ཤི་ བཱརའ་ག་མགུ་སྐོར་ ཕི་ལེ་གོད་པུ་མཱན༌ཅ། ཉི་དཀོན་མཆོག་ག་གསུང་ འགྱུར་བུ་མཱན༌ཅ། དཀོན་མཆོག་ག་ སྐུན་མདུན་ག་ ཨ་ཤི་དེན་པ་ཡེག་ཅ་ ཉི་ཨོ་ཉ་ཀོར་གེ་ སོ་ངོ་དྲང་པུ་ཆོ་ཁཱན་ ཐམས་ཅན་གི་སེན༌ཅ།
3ཉི་ཨ་ཧ་འཐེན་ལེག་པུ་ཁེ་པ་ བུག་ཁཱན་ཁ་ཤ་གི་ བུག་པ་ཆོ་ནེ་བུ་ དམྱལ་བ་ག་དི་ལེ་ཁེ་ཁཱན་ སོ་ངོ་བ་ཀ་དེན་གེ་ཤ་ བུག་པ༌ཅ། 4དཀོན་མཆོག་པུརུས་ཀིན་རང་ཆོ་ཁཱན་ ཁིརིས་ག་འཐེན་ལེག་པུ་ག་ གཟི་བརྗིད་ག་འོད་ཟེར་ཁེ་པ་ མ་མཇལ་ཆེན་དག་པ་གི་ དད་པ་མ་ཨ་ཁཱན་བ་ཀ་མིང་ ཨོ་ཐ་འཛམ་གླིང་ག་ ལྷ་གི་བུག་ཉི་ཐ་ཝ༌ཅ།
5ཨ་ཤི་ ཨའི་ཏེན་ག་ཀོར་གེ་ བཤད་པ་མཱན༌ཅ། དག་པ་ཀབ་ཉི་ ཁིརིས་ཡི་ཤུ་ཤོ་ གཙོ་བོ་གི༌ལ། ཉི་ཨའི་ཤོ་ ཡི་ཤུ་ག་ཡོར་ཀེ་ ན་ཧ་གཡོག་པ་བ་གི་ལ་དག་ཉི་ བཤད་པ༌ཅ། 6ཧང་ཡ་དག་ནེ་ལ་ མེར་བུ་ནང་ཀ་ འོད་ཟེར་ཤར་ཆེན་#4:6 ཇུན་པ་ག་དཔེ་ཆ་ 1:3དག་ཉི་ གསུངས་ཁཱན་ དཀོན་མཆོག་གི་ ཨ་ཧ་ནང་ཀ་ རོ་ཀ་འོད་ཟེར་ ཤར་ཉི་གནང༌མ། ཉི་ཨུ་ཉུ་ཤོ་ ཁིརིས་ག་ཞལ་ག་ཤར་ཁཱན་ འོད་ཟེར་ཁེ་པ་ དཀོན་མཆོག་ག་ གཟི་བརྗིད་གི་ལ་དག་ཉི་ ཨ་ཤི་ཧ་གོན་ཆེན་དག་པ་གི་གི༌ལ།
7དག་པ་ཀབ་ཉི་ གཟི་བརྗིད་ག་ སྟོབས་དབང་ཁེ་པ་ ཨའི་ཏེན་ག་མང་གི་ཝ་ དཀོན་མཆོག་གེ་གི་ཝ་ལ་དག་ཉི་ ཐམས་ཅན་གི་ སེན་ཆེན་དག་པ་གི་ ཨོ་ཐ་རྒྱུ་ནོར་ཁེ་པ་ མེ་པ་དི་ཁཱན་ ཨ་ཧ་ལུས་པུ་ནང་ཀ་ སག་པ༌ཅ།
8ཨོ་གེ་ཨ་ནེ་བུ་ ཨ་ཧ་བ་ཐུང་མ༌ཅ། དག་པ་ཀབ་ཉི་ ཟོ་ཕེ་ཏ་མར་བ༌ཅ། ཨ་ཧ་བ་ ཧང་རང་ ཨ་ལེ་མ་སེ་ཝ་རི་ཝ༌ཅ། དག་པ་ཀབ་ཉི་ ཨོ་ཉེ་རང་གི་ནེ་བུ་ ཨ་ཤི་ཐུབ་མ་ཐ་ཝ༌ཅ། 9ཨ་ཧ་བ་ གནམ་མེད་ས་མེད་ ཀ་ལུ་ཏཱད་པ༌ཅ། དག་པ་ཀབ་ཉི་ ཨའི་ཧ་ལ་རང་ ཐུབ་མ་ཐ་ཝ༌ཅ། ཨ་ཧ་བ་ཐང་ཉི་གེམ༌ལ། ཨོ་ཉེ་རང་གི་ནེ་བུ་ ཨའི་མ་ཤི་ཝ༌ཅ། 10སོ་ངོ་བ་ཀི་ ཨ་ཧ་ལུས་པུ་ག་ནང་ཀ་ ཡི་ཤུ་ག་ཚེ་ མཇལ་བེ་རེ་ཆེན་དག་པ་གི་ ཧ་ལ་ཨ་ནེ་བུ་ ཨ་ཤི་ཨ་ཧ་ལུས་པུ་ག་ནང་ཀ་ ཡི་ཤུ་ག་ ཤི་སྲོག་བང་ཉི་བུན༌ཅ།
11ཨ་ཧ་ཨོ་ཐ་མེ་པ་དི་ཁཱན་ ལུས་པུ་ག་ནང་ཀ་ སོ་ངོ་བ་ཀི་ རོ་ཀ་ཚེ་ མཇལ་ཆེན་དག་པ་གི་ ཨའི་གསོན་པོ་ཨ་ཉི་ཆོ་ཁཱན་བ་ ཧ་ལ་ཨ་ནེ་བུ་ ཡི་ཤུ་ག་ཡོར་ཀེ་ ཤི་ལེ་གུ་ག་ཏུག༌ཅ། 12ཨོ་ཐེན་ཨ་ཉི་ ཨའི་ཤི་ལེ་གུ་ ཏུག་ཉི་རང་ཆོན༌ཅ། དག་པ་ཀབ་ཉི་ ཨའི་ཤི་ལེ་གུ་ ཏུག་པ་ཨ་དེན་གེ་ ན་ཤི་ཚེ་མ་འགྱུར་བརྟན་པ་ཉོང་པ༌ཅ།
13ཨོ་ཐེན་འབྲི་བ་ཅ་ ཇི་གི་དད་པ་ཨན༌ཅ། ཨོ་ཉི་ཨ་དེན་གེ་ ཇི་གི་ཡེག་པ་གི་ལ་#4:13 མགུར་མ་ག་དཔེ་ཆ་ 116:10དག༌ཉི། ཨོ་ཉ་དད་པ་ག་ རྣམ་ཤེས་ག་ཐུང་ཀེ་ཨ་ཉི་ ཨ་ཤི་བུ་ དད་པ་ཨ་ཉི་ ཡེག་ཅ་གི༌ལ། 14ཧང་ཡ་དག་ནེ་ལ་ ཨ་ཤི་སེན་ཅ་ ཡི་ཤུ་གཤགས་པ་གེ་ བཞེངས་ཉི་གནང་ཁཱན་ དཀོན་མཆོག་གི་ ཨའི་བུ་ ཡི་ཤུ་ཀབ་ཉི་ ལོག་ཉི་ཝུན་གནང་ཐཱན་ རོ་ཀ་སྐུན་མདུན་ག་ ཨའི་བུ་ ན་ཧ་བ་ཀབ་ཉི་ཏབ་ཐུར་ ཕ་ཉི་གནང་མེ་གི་ལ་དག༌ཉི། 15ཨོ་ཐ་བ་ ཐམས་ཅན་རང་ ན་ཧ་ཕཱན་ཏོག་པེ་དེན་གེ་གི༌ལ། ཧང་ཡ་དག་ནེ་ལ་ སོ་ངོ་མང་པུ་མང་པུ་གི་ དཀོན་མཆོག་ག་ ཐུགས་རྗེ་ཉོང་ཅ་ཨ་ཉི་ དཀོན་མཆོག་ག་ གཟི་བརྗིད་ག་དེན་གེ་ བཀའ་དྲིན་བསམ་ཁཱན་བུ་ མང་པུ་རིན་ཆེན་དག་པ་གི་གི༌ལ།
16ཨོ་ཉི་ཨ་དེན་གེ་ ཨ་ཤི་ཧ་ལ་རང་ ཐུབ་ཐ་ལུ་མཱན༌ཅ། ཨ་ཧ་ལུས་པུ་ ཤིན་ཐཱན་རང་གི་ནེ་བུ་ ཨ་ཧ་རྣམ་ཤེས་ཁེ་པ་ ནོང་དྲང་རང་ སིང་མ་རི་ལེ་གང༌ཅ། 17ཧང་ཡ་དག་ནེ་ལ་ ཨ་ཤི་ཨོ་མ་ དཀའ་ཝ་ཅཱད་ཁཱན་ཁེ་པ་ ཟེ་མུ་ཤ་གི༌ལ། ཉི་དཀའ་ཝ་ཅཱད་པུ་ཅཱད་ས་རང་མ་ཆོ༌ལ། དག་པ་ཀབ་ཉི་ དཀའ་ཝ་ཅཱད་ཅ་ཨ་ཉི་ ཧང་གི་རང་ དོ་ལེ་མར་ཁཱན་ གཟི་བརྗིད་ཆི་ལུ་ག་དེན་གེ་ ཨ་ཧ་བ་ཅམ་ཅ་གི༌ལ། ཉི་ཨོ་ཉ་གཟི་བརྗིད་ཤོ་ ཧ་ལ་རང་ ཆུ་མེ་དག་ཉི་མཱན༌ཅ། 18ཨོ་ཉི་ཨ་དེན་གེ་ ཨ་ཤི་ཐོང་མེ་རེ་ཁཱན་བ་ཀ་ གོད་པེ་མང་གི་ཝ་ ཐོང་མེ་མར་ཁཱན་བ་ཀ་དེན་གེ་ གོད་ཅ་གི༌ལ། ཧང་ཡ་དག་ནེ་ལ་ ཐོང་མེ་རེ་ཁཱན་བ་ཤོ་ རེབ་ཀིན་ཐུར་ག་དེན་གེ་ཤ་གི༌ལ། དག་པ་ཀབ་ཉི་ ཐོང་མེ་མར་ཁཱན་བ་ཤོ་ མ་འགྱུར་བརྟན་པ་ག་དེན་གེ་གི༌ལ༎
ទើបបានជ្រើសរើសហើយ៖
གཉིད་པ་ཀོ་རིན་ཐི། 4: TNTB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Tshangla New Testament
© 2023, The Bible Society of India
all rights reserved