གཉིད་པ་ཀོ་རིན་ཐི། 3
3
1ཧང་ཨ་ཤི་ ཨོམ་ཆང་རང་ ཨའི་ཏེན་ག་བསྟོད་པ་ཕི་ན་སྨོ། སོ་ངོ་ཚེ་བང་གི་ ཕ་ཝ་པུརུས་ཀིན་ཨ་ཉི་ ཨ་ཤི་བུ་ ཨ་ཧ་རྒྱབ་ཐག་ཡི་གུ་བ་ ན་ཧ་བཱརང་ཀ་ཏཱན་ ཕ་ལེ་ཁེ་ལེ་སྨོ། ཨུ་ཉུ་མ་ནེ་ལ་ ཨ་ཧ་དེན་གེ་ རྒྱབ་ཐག་ཡི་གུ་ ན་ཤི་འབྲི་ཉི་ག་ལེ་ཡ། 2ན་ཧ་བ་ཤོ་ ཨ་ཧ་རྒྱབ་ཐག་ཡི་གུ་གི༌ལ། ཉི་སོ་ངོ་ཐམས་ཅན་གི་སེ་ཉི་ ལྷག་ཅེན་དག་པ་གི་ ཨ་ཧ་སེམས་ཀ་ འབྲི་ཉི་ཐ་ཝ༌ཅ། 3ཉི་ན་ཧ་བ་ཤོ་ ཨ་ཤི་ཅམ་ཁཱན་ ཁིརིས་ག་ཡི་གུ་གི༌ལ། ཉི་ཨོ་ཉ་ཡི་གུ་ཤོ་ སྨྱུ་གུ་དང་ སྣག་རྩི་གི་ཨ་ཉི་ འབྲི་བ་མང་གི་ཝ་ གསོན་པོ་ཨ་ཉི་བཞུགས་ཁཱན་ དཀོན་མཆོག་ག་ ཐུགས་ཉིད་གི་འབྲི་བ༌ཅ། ཉི་ལུང་བག་ཏང་ག་མང་གི་ཝ་ སོ་ངོ་ག་སེམས་ནང་ཀ་ འབྲི་བ༌ཅ།
4ཨོ་ཐ་བ་ ཐམས་ཅན་ག་ ཁིརིས་ག་ཐུང་ཀེ་ཨ་ཉི་ ཨ་ཤི་དཀོན་མཆོག་ག་ཐུང་ཀ་ ཨོམ་ཏུར་ལོ་དི་ཝ༌ཅ། 5ཉི་ཧང་རང་གི་ནེ་བུ་ ཨའི་ཨའི་ཏེན་ག་ ལྕོགས་གྲུབ་ཆོ་ཝ་ཨ་དེན་གེ་ ཨན་ཅ་གི་ལ་དག་ཉི་ ཨ་ཤི་ཡེག་ཅ་མང་གི། དག་པ་ཀབ་ཉི་ ཨ་ཧ་ལྕོགས་གྲུབ་ཤོ་ དཀོན་མཆོག་གི་གནང་མ་གི༌ལ། 6ཉི་རོ་ཀི་ ཨ་ཧ་ལྕོགས་གྲུབ་གནང་ཉི་ ཨོ་ཐ་འགན་རྒྱ་སིང་མ་ག་ ཕྱག་ཞུ་ཁཱན་ཅོད་ཉི་གནང༌མ། ཉི་ཨོ་ཐ་འགན་རྒྱ་སིང་མ་ཤོ་ ཡི་གུ་གི་འབྲི་ཁཱན་ བཀའ་ཁྲིམས་མང་གི་ཝ་ ཐུགས་ཉིད་གི་འབྲི་ཁཱན་གི༌ལ། བཀའ་ཁྲིམས་མཱན་མ་གི་ ཤི་ལེ་རིག༌ཅ། དག་པ་ཀབ་ཉི་ ཐུགས་ཉིད་གི་ ཚེ་གནང༌ཅ༎
འགན་རྒྱ་སིང་མ་ག་གཟི་བརྗིད།
7ལུང་བག་ཏང་ག་འབྲི་ཁཱན་ བཀའ་ཁྲིམས་མཱན་མ་གི་ ཤི་ལེ་རིག་ཆོ༌ཝ། ཨོ་ཉེ་རང་གི་ནེ་བུ་ ཨོ་ཉ་བཀའ་ཁྲིམས་གནང་མ་ཀབ་ཉི་ གཟི་བརྗིད་ཅན་ཆོ་ཝ་ཨ་དེན་གེ་ འོད་ཆར་ཉི་ ཨིས་རེལ་ག་སོ་ངོ་བ་ཀི་ མོ་ས་ག་ཞལ་ག་ཏཱན་ གོད་པེ་མར་ཤི། མ་པ་ ཨོ་ཉ་འོད་ཆར་ཁཱན་ཁེ་པ་ མ་ཝ་རི་ལེ་གང་ཆོ༌ཝ། 8ཧང་ ཚེ་གནང་ཁཱན་ དམ་པའི་ཐུགས་ཉིད་ཏ་ ཨོ་ཉ་གེ་ལག་ཉི་ གཟི་བརྗིད་ཅན་མང་ཕ་སྨོ། 9ཁྲིམས་ཀེ་ཁཱན་ འགན་རྒྱ་མཱན་མ་ཁེ་པ་ ཨོམ་ཏུར་ གཟི་བརྗིད་ཅན་ཆོ་ཝ་གི་ནེ་ཏ་ དྲང་པུ་ཅོད་ཉི་གནང་ཁཱན་ འགན་རྒྱ་སིང་མ་ཏ་ ཨོ་ཉ་གེ་ལག་ཉི་ ཧབ་ཏུར་ གཟི་བརྗིད་ཅན་ཨོ་ཕེ་ཡ། 10ཧང་ཡ་དག་ནེ་ལ་ གོ་མ་ག་གཟི་བརྗིད་ཀབ་རེ་བ་ཀབ་ཉི་ ཨོ་མ་ག་གཟི་བརྗིད་ཤོ་ གནམ་མེད་ས་མེད་ མང་པུ་ཆོ་ཝ་ཨ་དེན་གེ་ གོ་མ་ག་གཟི་བརྗིད་ཏ་ གཟི་བརྗིད་མ་ཝ་རིན་ཇོང༌ཅ། 11མ་ཝ་རི་ཁཱན་ གོ་མ་ག་ འགན་རྒྱ་མཱན་མ་ཁེ་པ་ ཨོམ་ཏུར་ གཟི་བརྗིད་ཅན་ཆོ་ཝ༌ལ། ཉི་ཨོམ་ ཧ་ལ་རང་ མ་ཝ་མ་རི་ཁཱན་ འགན་རྒྱ་སིང་མ་ཏ་ ཧབ་ཏུར་ གཟི་བརྗིད་ཅན་ཨོ་ཕེ་ཡ།
12ཨུ་ཉུ་ད་བུ་ ཨ་ཧ་རེ་ཆ་ཆོ་ཝ་ཨ་དེན་གེ་ ཨའི་གནམ་མེད་ས་མེད་ ཡོང་ཐེད་པུ་རི་ཝ༌ཅ། 13ཨའི་ཤོ་ མོ་ས་ད་བུ་མང་གི། རོ་ཀ་ཞལ་གེ་ འོད་ཆར་ཁཱན་ཁེ་པ་ ཡེ་ཉི་དི་ཝ་ག་ ཨིས་རེལ་ག་སོ་ངོ་བ་ཀི་ མ་ཐོང་ཆེན་དག་པ་གི་ རོ་ཀ་ཞལ་བུག་པ་ཆོ༌ཝ། 14དག་པ་ཀབ་ཉི་ རོག་ཏེ་བ་ཀ་སེམས་ ཀག་ཏར་རི་ཝ་ཆོ༌ཝ། ཉི་ཨོ་མ་བུ་ འགན་རྒྱ་མཱན་མ་གེ་ ལྷག་པ་ཀབ་ཉི་ རོག་ཏེ་བ་ཀི་དེན་པ་ ཧ་མ་གོན་ཆེན་དག་པ་གི་ ཨོ་ཉ་ཟུག་བུག་ཁཱན་ཁ་ཤ་གི་ རོག་ཏེ་བ་ཀ་སེམས་བུག༌ཅ། ཉི་ཨོ་ཉ་ཟུག་བུག་ཁཱན་ ཁ་ཤ་ཁེ་པ་ ཁིརིས་ག་ཐུང་ཀེ་ཨ་ཉི་ཤ་ ཆོག་པེ་རེ༌བེ། 15གི་ལ་ ཨོ་མ་སག་པུ་བུ་ མོ་ས་ག་གནང་ཁཱན་གེ་ ལྷག་པེ་དྲང་རང་ རོག་ཏེ་བ་ཀ་སེམས་ ཨོ་ཉ་ཟུག་བུག་ཁཱན་ ཁ་ཤ་གི་བུག་པ་ཨུན༌ཅ།
16དག་པ་ཀབ་ཉི་ ཨི་བི་གི་ གཙོ་བོ་ག་ཏཱན་གིར་པ་ཐུར་ ཨོ་ཉ་ཟུག་བུག་ཁཱན་ ཁ་ཤ་ཁེ་པ་བུན་ཇོང༌ཅ། 17ཉི་ཨོམ་ གཙོ་བོ་ཤོ་ ཐུགས་ཉིད་གི༌ལ། ཉི་གཙོ་བོ་ག་ཐུགས་ཉིད་ ཨོ་ག་བཞུགས་པ་ཐུར་ ཨོ་ཉ་ག་ རང་དབང་རང་ཚད་ཨུན༌ཅ། 18ཉི་ཨ་ཧ་ཟུག་ཤོ་ གཙོ་བོ་ག་གཟི་བརྗིད་གེན་ཁཱན་ མེ་ལོང་ད་བུ་རིན་ཆེན་དག་པ་གི་ ཨའི་ཐམས་ཅན་ག་ཟུག་གེ་ ཨོ་ཉ་ཁ་ཤ་ཁེ་པ་ ཆོག་པ༌ཅ། ཉི་གཙོ་བོ་ག་ཐུགས་ཉིད་གི་ ཨ་ཧ་ནང་ཀ་ ཕྱག་ལཱ་མཛད་ཅ་ཨ་ཉི་ ཨ་ཧ་བ་མང་པུ་མང་པུ་ རོག་ད་བུ་རིན༌ཅ། ཉི་རོ་ཀ་གཟི་བརྗིད་བུ་ མང་པུ་གེན་མེ་རེ༌ཅ༎
ទើបបានជ្រើសរើសហើយ៖
གཉིད་པ་ཀོ་རིན་ཐི། 3: TNTB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Tshangla New Testament
© 2023, The Bible Society of India
all rights reserved