Fagsigadan 37
37
1Ay Isaw dewa naalin sas talun Sir, at ariyan Akub igfatunglus tuwa nu gbanwan si ebi ataw at tama fagbanwanan, sis talun Kanaan.
Diyus nu Gfasaful sas Use te Kanya ban sik Tagmagurang
2Katatuy nu kafamansulit sa baliwas Akub at sugfun: Akub at baguwama at sadi Use. Ay ebi gina yay Use at banwa 17, kanya gufud at ngay kaka. Kanya fagayu gaygaluwan igtanud at tama at balan. Kanya Use fagufudun at ngay fadugsay, at ngay tina ay si anya at tina saman way, teway sit ngay fadugsay at tina, anway Bila ay Silpa. Kanya at tama mangena at duwa.#37:2 Akub mangena, nu fagayu wan, ufat. At ngayan Liya, Rakel, Bila ay Silpa. Sis Use at tina, Rakel. Tapi sas Fagsigadan 29 ay Fagsigadan 30. Ay sis Use at tina, Akub yay gugat mangena at sadi. Ay Use nu gufud wa gugat at ngay kaka, gfoyung tuwa sat tama at ngay kaka fagbulun at mauri.
3Ay ebi ataw gina Use kasalug, at tama Akub mafufuwama wan. Nu katanya, at tama kesug dawdaw Use. Glabi yay nu kesug tiba at baguwama. Ay Akub nasugu sik taw te, “Awati sik masine fag balukas ngaba.” Ay nu nkawat wan, Akub nabul wan ay nafon sas Use. 4Ay Use ngay kaka nu nalag, gsulitanan te, “Kanya wa ngani fiya tam tama nesugan. Ay wa bangan kesug antam.” Ay siginan ginanya, at ngay kaka kalimata way Use. Ay anggan nu gelongan sigon sa anya malimata way.
5-6Ay bandi daw, inkugat yay at ngay kaka nu kalimata, teway Use nataginfanan ay nafoyung sat ngay kaka te, “Nataginfanan aw. Katatuy ku taginfanan. 7Sadaw unu si tam sad gamasun. Ay igfutus yama tam sik ngay baybay, si angku ku nafutus inturuk. Ay si ayu ay nafutus ayuwayu nasafungan ku nafutus, ay nus tuwa inkarung ya sa ku nafutus baliwa. Kata nangus nafababaun sa ku nafutus.” 8Ay at ngay kaka gfalingun glong te, “Go sangay o ban em fun at nanmagurang emi? Sek yaya long.” Ay Use nafamansulit wayay at taginfanan, at ngay kaka nu kalimata inkugat yadi.
9Ay bandi daw, Use nataginfanan yay fiya ay nafansulit yangay sat ngay kaka te, “Aro nataginfanan kyay fiya. Sadaw unu nalag aw tam menit ay tam magdanun ay labi sadik galeme. Ay kanya fagayu, menit magdanun ay galeme, inkarung unu sa angku baliwa.” 10Ay nafoyung yangay at taginfanan sa at tama. Ay at tama nabaya te, “Yaya, sama, wa katanya. Wa matuyan kanya am taginfanan. Go sangay ban aw ay am mina ay anggan am ngay fadugsay gfababaun ami umkarung sa emu?” 11Ay roro dewa katanya, ka fag taginfanan infamato wa sit tama amatanganan. Ay at ngay kaka kalimata way gugat Use.
Use at ngay Kaka nu Gfauri at Ariyan
12Ay bandi, Use at ngay kaka nalo wan sas sik lungud at ngayan Sikim. Ay igtanud at tama ngay tupa ay kambing sanya. 13-14Ay ginanya Use sa yay at ke tama, sa sik lungud at ngayan Kebrun, sa sik buknga muyud. Ay Akub nalong Use te, “Katsi am ngay kaka sa was Sikim gtanud tam ngay balan. Loi wan ay nanlagi te, go mabayan tuwa am ngay kaka ay tam ngay balan. Ay nu nalag wo, afolii yangay istiye ay foyungi angku.” Ay Use nabalus te, “Kin.”
Ay Use nalo wan ay indasug sas Sikim. Ay roro wa natungul at ngay kaka. 15Ay glo way sigad sanya sangaba talun igsarap at ngay kaka. Ay nu glo wa gugat, sik mangama nalag anya. Ay ginto te, “Taw kanya sama am fagsarapun?” 16Ay Use gbalus te, “E yaya, gsarap kway ku ngay kaka tagfasabsab em ngay balan. Dada manga? Go batang o glag?” 17Ay ka fag mangama gbalus te, “Kin, nalag kwa fiya ngaro. Ay teway nalo wan. Nu gdungug aw at sulitanan suma wa ro unus Dutan.” Ay nu katanya, Use nalo wan naguyan at ngay kaka. Ay natungul wa fiya at ngay kaka sas Dutan.
18Ay Use gina si yays fakasurayan, at ngay kaka nalag wa gugat. Ay roro at ngay kaka gananfateun way anya. 19Ay gsulitanan ayuwayu te, “Kanya wa ngani. Tagfantaginfanan kadasug wan. 20Katsi long ro, gfate watam ay gfatong watam at bilug sa sik alian ngabasad. Ay nu e gsarap wa ban anya, manlonganan watam te, ‘Sik mangimut tagfangagat nafate wan.’ Teway nu nafate tuwa tam anya, wa long ban umgurungan at ngay nataginfanan.”
21-22Ay roro Rubin nu nadungug at ngay fadugsay fasadan, nalong te, “E, lagi! Lag tam gfate. Ay lag tam gfasait at bilug. An yakman tam nanfatong anya iste fag alian at ngabasad istes talun at yud e taw.” Teway sis Rubin at fasadan antuwa nanfalangfe Use laman ban umfoli tuwa sat tama.
23Ay Use nu ndasug wan, at ngay kaka nabul wan ka fag balukas at masine at tama nafon anya. 24Ay nafatong wa anya sasad alian at ngabasad at yud e mamam.
25Ay kaduge Use si sad alian, at ngay kaka igfangon sit tungud. Ay kaduge gfangon, e nabantay sik ngay taw kadasug. Roro mangaro, kanya siginans Ismael fag fulan taw. Ay kanya fag ngay taw e ngay kamelyu e ubanan ngay gamut ay famabebanglu. Ay kanya glo siginans Gilyad laman nanfabili at ngay fangubaun sas talun Iptu. 26Ay Uda nalong at ngay fadugsay te, “Dewa ngap tam fate tam ariyan ay sumuksuk ya tam, wa ngap e fanambagun sa antam. 27Ay famamut ya, kanya tam ariyan tuwa. Aw nu gamatangan aw, lag tam nanfate anya. Anway tam nanfabili sanya fag ngay taw takadasug laman umke nalufuyan tuwa tam.” Ay nu katanya, at ngay fadugsay nafadiyuganan Uda at longan.
28Ay kanya fag ngay taw taguba at ngay famabili#37:28 Sis Fangebriyu, ste fag tapan nu tumap tam, wa tam lumag te, kanya fag ngay taw taguba at ngay famabili. Sanya nu tumap tam, glong way te, Midyan fag fulan taw. Dewa katanya, kanya yay gugat aro Use at ngay kaka nabantay fag ngay taw. Tapi sis talata 25. nut si was sisiyan alungudan, Use at ngay kaka nabul wa anya siginan sad alian ay nafabili sanya fag ngay taw. Ngayu tuwa at fansali. 20k pilak tuwa. Ay kanya fag ngay taw nalo wan nataban wa Use nangadasug sas talun Iptu.
29Ay roro ginanya Rubin wa sanya. Ay rodi, kafoli wa sas ke alian. Ay manlag di, wet sanya Use. Ay katvngvdan nu gabiyatan sat amatanganan, nagirat wa at balukas mandi.#37:29 Ebi, sanya fag talun at ngay taw at ugali galay mason nu gabiyatan sat amatanganan, iggirat at balukas. Ay dewa nagirat, igbalukasan way gugat kanya fag balukas. Ate tiba ginan nabalukasan sik balukas mataras. At masuwad, takatanya fag ngay fagbulun, igfalag tibak taw te kanya e fakabaluun. 30Ay inkakbang sat ngay fadugsay ay nalong te, “Kwe nalag tam ariyan sasad alian. Tain ro aw katsi?”
31Ay rodi, sisiyan nafate sik kambing, ay nafatagukun Use balukas. 32Ay nafauba ka fag balukas sa sik taw taglo sat tama. Ay nafalonganan te, “Am ngay baguwama unu nalag way sigad tuy fag balukas. Lingamani unu te sinu manga tuy at ke balukas. Kanya wa unu siring ebi am nafon Use.” 33Ay Akub nu nalag, natoglag wa daw. Ay nalong te, “Kin, ku baguwama wa ngaro fiya Use at ke balukas tuy. Tagfangagat fag mangimut nafate wa mangaro ku Use. Naurit wa ro gugat gugat ku Use bilug.” 34Ay Akub nu natoglag, katvngvdan nu kabalu nagirat wa daw at balukas mandi ay nabalukasan sik balukas mataras. Ay gamatangan way gugat at baguwama naatean. 35Ay fagayu sisiyan igfataluwan dawdaw at tama. Ay dewa katanya at tama wa mangataluwan. Ay glong te, “Sisiyan am, lag fataluwan angku! Aw ngap mandi kaduge ban aw gleleg, kabalu kway gugat ku baguwama at naatean.” Ay at tama guyway way gugat.
36Ay ginanya, kanya fag ngay taw tagsiginans Ismael fag fulan taw, at nataban Use, indasug sas talun Iptu. Ay nafabili Use sas sik taw at ngayan Putifar. Putifar at fagbulun, kanya gfangguna sa sangay tagbalabag at fun daul.
ទើបបានជ្រើសរើសហើយ៖
Fagsigadan 37: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines