Fagsigadan 38
38
Uda nu Kasaful te, “Ebi Ginan Ku Fagbulun Mauri way”
1Bandi, Uda insaman wa tiba sisiyan. Ay igbanwan way sit ke fagwes Ira. Kanya sik taw Adulam. 2Ay Uda nu sanya wa gugat, nalag sik taw Kanaan at baguyna. Ay kanya fag baguyna at tama, Sua. Ay Uda indaduwa wa sanya fag baguyna. Ay natsa wa anya. 3Ay bandi, kanya fag mangena igfafiyon wan, ay igfasalug wa at ngenge, sik ama. Ay Uda nafangayan te, Er. 4Ay bandi, Uda mangena gfafiyon yangay, ay gfasalug yangay at ngenge. Sik ama yangay. Ay at tina nafangayan te, Unan. 5Ay bandi, Uda mangena gfafiyon yay fiya. Ay at ngenge sik ama yangay. Ay at tina nafangayan te, Sela. Ay Sela gina kasalug, roro kanya fag talanan nu gbanwan, sis fulan Kesib.
6Ay Uda baguwama at turungana nu gbiya wan, at tama nasarap wa at mangena, at ngayan Tamar. 7Ay roro at turungana ugali, mauri way. Diyus kalimata way dawdaw glag. Nu katanya, Diyus nafate wan Uda turungana.
8Ay nu katanya wan, Uda nalong sat baguwama at faduwa, Unan, te, “Mangenani wa am ifag, laman nu mke unga tuwam, kanya wa ban bilang am kaka at unga. Katanyai wa fiya am fagbulun, teway katanya wan tam ugali.”#38:8 Fakatanyaun Uda at longan, teway ebi e ugali sanya te, galay sik ama inkate, ay ya nke unga, at kinkate at mangena sa yay at ifag. Ay at mangena nu mke unga ban siginan at ifag, kanya bilang wa at kinkate at unga. 9Roro Unan wa kaumsig at kaka nu mke unga siginan anya. Teway Tamar nu mke unga way, sanya way at tama nu gfon at fagmabalanun tiba. Ay roro dewa katanya Unan amatanganan, namangenaan yay Tamar. Anway te, kayu ginan natsas Tamar, nafatsa way at dayu at fangatabu. Ay nu katanya at fagbulun, Tamar wa nke unga. 10Ay roro, Diyus kalimata way dawdaw glag Unan fagbulun, te wa gfon Tamar at unga. Ay Diyus nafate wa Unan.
11Nu katanya, Uda nalong sas Tamar te, “Edya katsi, ulii yap sam mama bale. Banwani yap sanya kaduge o yud e mangama. Igfadaulan yay ta ku unga at fuyu.” Ay roro Uda at amatanganan fiya fiya, wa gafonun sas Tamar at unga fuyu. Gamatangan way te, mankate kata at duwa kaka.
12Ay bandi nu glugo wan, Uda mangena inkate wan. Ay Uda nu nkalyaman wa nu kabalu at mangena, kanya nalo wan, igfaygaluwan at fagwes Ira. Nanlag at ngay fanuguwan nu gfafungkuk at ngay tupa sigyu sis fulan Timna.#38:12 At masuwad, sik taw fagnanfafungkukun tupa sigyu, at sadi, igtunglus tuwa tupa sigyu nu kaaba, kata tam buk nu kaaba. Ay at sadi at fagnanfafungkukun, laman at fangawat at falefe.
13Ay roro mangaro, sik taw nafoyung wa sas Tamar te, “Katsi am nugangama, glo wa sas fulan Timna. Nanlag unu at ngay fanuguwan nu gfafungkuk at ngay tupa sigyu.” 14Ay Tamar nu nadungug, nabul wan at balukas fanburangday. Ay rodi, saman wan at balukas. Ay natabun way at alfuyu sik falefe. Ay Tamar nalo way sa sik sakbawan daul, sas tigyangan fulan Enayim. Kanya fag fulan, sis dalan tagsas fulan Timna. Ay Tamar malunggung way sanya, matabunan at alfuyu, igfanya at nugangama nu gdalan. Fakatanyaun Tamar fagbulun, nasaful wa te, at nugangama dewa ndaul at unga, roro wa gfon anya, laman at mangama.
15-16Ay Uda nadalan wa fiya sanya fag fulan, sad sakbawan sas ke Tamar fagfanyaan. Nalag wa fiya sik mangena sanya nu malunggung. Ay wa natoglag te, kanya at nugang. Uda nu gfasad, anway tagfabili at bilug fag mangena. Ay nu katanya, Uda inkakbang anya. Ay get wa anya.
Ay ka fag mangena gbalus yay te, “Taw ro am fansali?”
17Ay Uda gbalus te, “Igfadasug ban aw stiye ku kambing at sadi.”
Ka fag mangena glong te, “E, nu gdi, foni yap angku tiba am fagnuwan, laman ro gafanud aw te, fadasug wa ban o fiya sik kambing. Ay nu nafadasug wa ban o am longan fag kambing, igfafoli kyay sa emu kanya fag ngay fagnuwan.”
18-19Ay Uda glong yay te, “Ay taw kanya am fakaumsigun ku fon emu?”
Ay ka fag mangena gbalus te, “Foni angku nin am dalag at ke fagtoglagan te o wan at tagbilug. Ay foni yangay angku at fansiyuk, ay anggan am suwan. Kanya fagayu foni yap angku.” Ay nu katanya wan, Uda nafon wa fiya ka fag mangena at fagetun fag ngay fagnuwan. Ay natsa wa anya. Ay nu ntabu wan, ka fag mangena nauli wa sat tama bale. Ay nu sanya wan, Tamar nabul wan at falefe fantabun at alfuyu. Ay nasulun yangay at balukas fanburangday. Ay roro siginan ginanya, Tamar igfafiyon wan.
20Ay bandi ataw, Uda nasugu at fagwes Ira. Nalong te, “Sama, tarabangi yap angku. Nantaban yap o tuy fag kambing riyangan sas fulan Enayim. Ay foni sa ebi fag mangena tagfabili at bilug sis ke sakbawan fulan. Ay nu nafon wo, buli yangay ku nafamato ku ngay fagnuwan sanya, ku famatvngvd ku longan ebi.” Ay at usama nafaning wa fiya. Nataban wa fiya kanya fag kambing riyangan. Ay nansarap ka fag mangena, sis ke sakbawan fulan Enayim. Ay roro Ira we nalag. 21Ay nu dway e nalag, ginto yay sanya fag ngay mangama, at ngay taw dan, te “Go wam e nalag kanya fag mangena, at malunggung iste sad sakbawan ebi daw sik menit, laman, tagfabili at bilug?” At ngay mangama sanya gbalus te, “Yaya, ebi ginan, wa long e mangena katanya ste.”
22Ay nu katanya, Ira infoli wa sas Uda. Glong te, “Yaya sama, kwe nalag. Dewa aw nainto sanya fag ngay mangama, wa unu e mangena katanya sanya.” 23Ay Uda gbalus at usama te, “E, dewa. Way o e nalag, dewa yud wan ta nafon. Alwanan nanantaban wo ku fasad fansali. Ay teway nu nantaban yay ro ta fiya, anway ngap ro ta gafalingunan tam iba sanya. Ay nu katanya, sanya yakman ku fagnuwan.”
24Ay bandi, nu nlangfe wa tuluk magdanun, tiba nafoyung sas Uda te, “Am nugang kamayun way ngaro, madyay dewa sik burangday, katsi gfafiyon wan.” Ay Uda nu nadungug, glong te, “Sek, nu katanya way, ani wa buli siginan at tama bale. Ay yagoi wa ka fag ina anggan umkate.” 25Ay at iba igfaning wa fiya. Nabul wa siginan at tama bale. Gtaban wan. Nanyago wan. Ay roro Tamar nafon yay sa sik taw Uda at ngay fagnuwan ebi at nafamato sa anya. Ay Tamar glong sanya fag taw te, “Foni tuy fag ngay fagnuwan sa ku nugangama. Ay longi te, nus nga sinu tuy at ke fagnuwan, kanya wan ku ngenge tama. Labon igtoglag tuwo te go sinu tagbilug.”
26Ay Uda nu nalag kanya fag ngay fagnuwan, natoglag wa fiya. Ay glong te, “E, katsi nasaful kwa mangaro te, aw way at mason ke asalanan. Teway ngani, nafabayan kway Tamar nu gyud e mangama.” Ay nu katanya, Uda wa nafate Tamar. Ay wa namangenaan, bandi baliwa.
27Ay bandi nu glugo wa sirut, Tamar igfasalug wa at ngenge. Ay roro at ngenge duwak ama tuwa. 28Ay Tamar kaduge igfasalug, insure wan at sadi at ngenge take. Ay tagtarabang Tamar nu gfasalug nu nalag ka fag take, nabul sik fansiyuk at maraska ay nafabakloan at take at kinsure. Glong te, “Tuy taguna takasalug.” 29Ay roro nu nafagbulun wa katanya, kanya fag ngenge take infalyu yangay. Ay taguna at kinsalug, at fadugsay way. Ay tagtarabang Tamar nu nalag katanya, glong sanya fag ngenge te, “Maylatan, sama! Naguna way o sigad am fadugsay!” Ay nu katanya, kanya fag ngenge ngayan, Peris.#38:29 Sis Fangebriyu, galay glong te, Peris, at masuwad, igguna way sigad. 30Ay at fadugsay, at ke fansiyuk maraska sit take, kanya insalug yangay. Serak at ngayan.
ទើបបានជ្រើសរើសហើយ៖
Fagsigadan 38: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines