१ पाट्रुस 4
4
खिरिस्टर लिमानुङ् हिङ्चामॆ खानावाँ
1खिरिस्टऎ मान्टहाङ् डुखा आङु, मरहाङ्न आन्नॆ सङ्क डुखा आङ्मा परकानॆ मान्ठाभनॆ आसॆ सालुङ्बि डुखा आङ्कु, आक्कसॆ हिङ्वा योम्पक् याइॽमिम्पा लि। 2गरॽहाङ् हऎबाङ् खोसॆ सालुङ्पि हिङ्चारढारि याॽमिमि काइसॆ निवाँर हॆॽनि, टर निवाँहाङ्मि निवाँरऎ हिङ्खामा हिङ्चाआनॆ। 3हाङ् निवाँहाङ् आलेक्खुबाचिऎ लॆटिन्ट याॽलिहा आन्नॆ डिरिक् लः ब्यभिचारा, काइसॆ निवाँ आसाग आसानुङ् इम्चाटिॽमॆ निवाँ, डुङ्टिखुबा, निवाँबि माङ् टाःक्र मन लॆखुबा, सॆङ्खॆटिक्खुबा हाङ् काइसाहा मुर्टि चुङ्मानुङ् पाइयुक्सानि। 4टर ह आन्ना आक्र लॆटानिनि हाङ् आक्रक्मा हिङ्खामाबि सङ्क माआनि हाङ् निवाँहाङ् आलेक्खुबाचि आक्खॆडुचि। मसॆ खोचिऎ आन्ना इचाकानि। 5टर हिङ्चामिम्पानुङ सिखॆम्पाचि न्याय लॆखुबा निवाँहाङ्मि ङारिङ्पि खोचिऎ येब्मा लॆ। 6मसॆ सिखॆखुबाचिऎ ग बाखाटेम्पिहा होइढा याॽमिचिऎ रक्न न्यायॆ लिसा हाङ्स खोचिम् लावाबि निवाँहाङ् रक्न हिङ्चाहिमिर कामानुङ् सिखॆम्पाचि सङ्क नुऎ खानावाँ खेम्मिॽमिम्पाचि रेम।
7चोब्न खानावाँ लुक्खॆॽमॆ लः सॆॽलॽन टामॆ पाइ। मसॆ आन्नॆ टाङ्पा टाङ्पॆॽन खाङ्हिखुबा, सॆङ्सॆङॆ लिसे पारठाना लॆटानॆ। 8चोब्नबाङ् ढ्या खानावाँ माङ्भनॆ आन्नॆ एक्कसॆ होइक नुःर सोम्टुक्पे चुआनॆ मान्ठाभनॆ सोम्टुॽपे चुमॆ खानावाँऎ ऎॽवाहा हिङ्वा सङ्क डॆक्खॆकु। 9हाङ् माङॆन्रेम एक्कसॆ होइक चेन्चासे खिम्पि नुःर लॆपॆ चुआनॆ। 10हाङ् निवाँहाङ्मि नाम्नावाँबाङ् आन्ना चोप्पासॆ एक्क एक्क डिरिक् खालाह बारडाना टक्चाडाम्नि। आक्खा खानावाँ एक्कसॆ होइकमि नुःर लॆःॽमाम् लागि याङाम्नॆ। 11आसानुङ् यामुमॆ बारडाना चु, खो चाइ निवाँहाङ्न खोबाङ् यामुमिम्पार यामुर। हाङ् आसानुङ् चाइ होइडाचि नुःर लॆःॽमॆ बारडाना चु, खोसॆ आक्क योम्पक् निवाँहाङ्मि चॆक्मावाबाङ् मुसुर। मसॆ चोब्न योम्पक्बि येसु खिरिस्टबाङ् निवाँहाङ्मि निङ्लावा नुङ् खोम् निङ्ठेट्टि खॆॽर। आमेन।
डुखाबि सङ्क चेन्चामॆ
12कॆ नाम्नाम् पिसिमिम्पा लाङ्काम्चि, आन्ना ढ्या डुखाबि सिट्टि खॆॽमानुङ आन्ना ठाःक्माबि सिकानिर, गरहा खोप्चिनाँवाँ ग आटामा लॆऎ कामानुङ् आआक्टि खारानॆ। 13बोरु कानि सङ्क खिरिस्टबि डुखा आङ्टकि कामानुङ् चेन्चाआनॆ मसॆ खो खोमि ढ्या निङलावानुङ् खाङ्मुटाक्र आन्ना चेन्चासे हाङ्हाङ् मिनुकानि। 14हाङ् आन्नॆ खिरिस्टमि निवाँयुङ् लॆःॽमिम्पासॆ आन्ना याॽमिचिऎ सिच्चाआमि हाङ्ग टाङ्पा आसिका टक्चामिम्पा याॽमिचि कामानुङ् मिनानॆ मान्ठाभनॆ निङ्लावा नुङ्मा निवाँहाङ्मि लावा आन्ना सक्पि लि। 15हाङ् आन्नॆ डुखा आङ्मार याॽमि सेक्खुबा, खुसुबाङ्, काइसॆ योक्पक् यिक्खुबा हाङ् होइढा याॽमिचिम् योम्पक्पि हुक डॆन्से डुखा आआङानॆ। 16टर आन्ना खिरिस्टियान लिमिम्पासॆ डुखा आङ्मा सिट्टानि हाङ्ग आङेसिआनॆ। आक्क निङ्पि डुखा आङ्मा सिॽमिम्पाबि निवाँहाङ् ओहाक् पिट्टाम्नॆ।
17मान्ठाभनॆ निवाँहाङ्मि याॽमिचिबाङ् परक्से न्याय लॆःॽमॆ लः टाखॆडा। हाङ् खोमि याॽमिचिम् टा न्याय लि हाङ्ग खोम् खानावाँन एखेम्खुबाचिम् लुक्खॆॽमॆ लः चाइ ऎॽवा किसिमा लुऎ लिऎ खानावाँ वाब्मा लॆ। 18हाङ् निवाँनेन साब्चिराऎ इकु, “निवाँनेन याॽमिचि टा हिङ्चामिॽमाम् लागि होप्ठॆॽवा बिरिरि लि हाङ्ग निवाँहाङ्न आलेखुबा हिङ्वा याॽमिचि झाना माङ् लिःक्मिहा लोमॆ वाब्मा लॆ।”#हिटोपाडेस ११:३१ 19मसॆ निवाँहाङ्मि निवाँ रक्न डुखा आङ्खुबाचिऎ काम्नुऎ योम्पक् याइमा फॆन्नि। खो मुखुबा निवाँहाङ्बि निवाँयुङ् लॆःॽमा लॆ, मान्ठाभनॆ खोसॆ आन्नानुङ् युङ्मिम्पा चुप्लाङ् हानाम्स मुकुन।
ទើបបានជ្រើសរើសហើយ៖
१ पाट्रुस 4: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society