१ पाट्रुस 3
3
खिम्टाङ्मा नुङ् खिम्टाङ्पाचि
1गरहाङ्न खिम्टाङ्माचि टाङ्पाम खिम्टाङपामि ढुप्पाट्टबि पेनानॆ। गरहाङ् खोचिऎ निवाँहाङ्मि खानावाँबि निवाँयुङ् लॆटुचिनि हाङ्स आन्ना खिम्टाङ्मामि नुऎ चालाना खाङ्कुचि हाङ् आन्नॆ माङ्स मालोबान निवाँयुङ् लॆकुचि, 2मान्ठाभनॆ खोचिऎ आन्नामि सॆङ्सॆङॆ हिङ्खामा हाङ् नुऎ चालाना खाङ्टकुचि। 3आन्ना काम्नुऎ खाङ्मुमाम् लागि टाङाक चाक्मॆ, फिःॽयामि चाक्मारा वॆःॽमॆ हाङ् काम्नुहा चे चाङ्मॆ योम्पक्बि निवाँ आटिसानॆ। 4टर आन्नामि काम्नुऎ चाइ निवाँ हङ्सिऎ लिर, आक्क हानाम्स लुक्खॆॽनॆ मिःछुपा लॆङ्खुबा हाङ् सान्टिमि लावा नुङ्मा काम्नुऎ लि, हाङ् ग चाइ निवाँहाङ्मि ङारिङ्पि एट्टान योम्पक् पिक्खुबा खानावाँ यो। 5मान्ठाभनॆ गरहाङ्न निवाँहाङ्बि निवाँ टिखुवा याॽलिहा सॆङ्सॆङॆ मेॽनुङ्माचिऎ सङ्क खोचि टाङ्पा काम्नुःर चागुचि हाङ् खोचिम् खिम्टाङ्पामि ढुप्पाट्ट हङ्सि पेनामि। 6सारा सङ्क आक्करऎन लॆटा। खोसॆ खोम् खिम्टाङ्पाऎ लोमिम्पा खेम्मानुङ् काङाम् टुङ्घङ्पा लोसु। आन्नॆ स आन्नामि खिम्टाङ्पाऎ माङ् लॆकिहा कामानुङ् माङ्किसिरे माङ् नुऎ लॆ, म योम्पक् यिगानि हाङ्ग आन्ना सारामि साम्सामाचि लिकानि।
7खिम्टाङ्पाचि आन्नॆ स टाङ्पाम खिम्टाङ्माचि आन्नाबाङ् नॆक्कॆ निवाँहा लिःक्मि लोमॆ वाव्से खोचिनुङ् पेन्मार नुःर लॆटाम्चिनॆ। मान्ठाभनॆ खोचिऎ सङ्क आन्नॆ रक्न निवाँहाङ्ऎ पिऎ हिङ्खामा टक्चाकुचि। मसॆ आन्नामि पारठानाबि आहाप्सिआनिर कामानुङ् खोचिनुङ् नुःर पाइटानॆ।
नुऎ योम्पक् यिक्मार आङ्मा सिऎ डुखा
8कॆ माङ् लोमिम्पा भनॆ, आन्ना चोब्न एक्कन निवाँ नुङ्मा लिसानॆ। एक्कसॆ होइक नाम्नाम् पिसिपे चुआनॆ हाङ् बुबुनानुसाचिर नाम्नाम् पिसिपे चुआनॆ। निवाँ नॆक्सिआनॆ हाङ् मिःछुपा लिमानुङ् पेनानॆ। 9काइर लॆखुबाचि काइरन आलॆटाम्नॆ हाङ् चाप्हिमा पिक्खुबाचि चाप्हिमा आपिट्टाम्चिनॆ, बोरु आसिका पिट्टाम्चिनॆ। मान्ठाभनॆ गमि लागिॽन आन्ना सेःमिम्पा। हाङ् आन्नॆ आसिका टक्चाकाम्नि। 10मान्ठाभनॆ निवाँनेन् साब्चिराऎ गर इकु,
“आसॆ नुऎ हिङ्खामा हाङ् काम्नुऎ डिना खाङ्मा मिनुकु,
खोसॆ उम् लेन् काइर यामुमाबाङ् हाङ् ढाँटु बङ्चामाबाङ् मॆॽयङ् युक्सुर।
11“आक्कसॆ काइर योक्पक यिक्मा याइटुर हाङ् काम्नुऎ योम्पक् यिगुर। हाङ् आक्क सान्टिबि पेन्ल हाङ् आक्कन लाम् टिङुर। 12मान्ठाभनॆ निवाँहाङ्ऎ खोम् ङारिङ्पि निवाँनेन लिखुबाचिन खाङुकुचि, हाङ् खोचिम् खानावाँ खेम्पिकुचिमि। टर काइसॆ योम्पक् यिक्खुबाचि चाइ सिच्चोकुचि हाङ् उम्चि खानावाँ खेमुनि।”#खोम्मिम्पासाम् ३४:१२-१६
13आन्नॆ काम्नुऎ योम्पक यिग्मा मिनाम्नि हाङ्ग आन्नाम आसॆ माङ् नासॆलॆहिकुचिहा? 14टर आन्नॆ निवाँनेन योम्पक यिक्मार सङ्क डुखा आङ्मा सिट्टानि हाङ्स आन्ना आसिका टक्चामिम्पा याॽमिचि रेम। आक्खाचिऎ वोमार आकिसिआनॆ हाङ् आलॆक्ख मिनानॆ। 15टर आन्नॆ निवाँबाङ्न खिरिस्ट चाइ पारभु कामानुङ् खोमि किसिमाबि पेनानॆ। याॽमिचिऎ आन्नामि आसमि बारेबि सिमामि हाङ्ग हानाम्स खानावाँ इबिॽमाम् लागि परकानॆ। टर म योम्पक् चाइ मिःछुपा लॆङमानुङ् खोचि ढ्या मुसे यिगानॆ। 16टर आन्नामि निवॆँ माङ् चाइ काम्नुऎ नुङ् काइसॆ खानावाँ फाक्हिमा लॆ। मसॆ आन्ना सिच्चाखुबाचि हाङ् खिरिस्टबि चुऎ आन्नामि काम्नुऎ चालाना इचाखुबाचि ङेसिखॆॽमिर। 17आन्नॆ ग खानावाँ वाबाम्नॆ, निवाँहाङ्ऎ गरॽन मिनुॽहाङग, काइर पाइसे डुखा आङ्माबाङ्स नुऎ योम्पक् मुसे डुखा आङ्मान नुऎ लि। 18मान्ठाभनॆ कानिम् हिङ्वामि लागि खिरिस्ट एक्खेपा चोब्न लःमि लागि सिखारा। खोसॆ माङ्स हिङ्वा योम्पक् मायिगु टर हिङ्वा याॽमिचि निवाँहाङ्बि टॆःॽमाम् लागि सिखॆपिटटि। खो डुखा आङ्से सालुङपि सिखारा हाङ् लावाबि हिङ्पका। 19हाङ् खो आक्क लावाबिॽन खाराहाङ् सॆक्चिम्पि चुःक्मिहा लावा खानावाँ खेम्मिटुचिमि। 20आक्खा लावाचि चाइ नुहामि योवाखङ् मुमिम्पा लःबि उम्चि हिङ्वाबाङ् ऎम्पःक्मिहारू कामानुङ् निवाँहाङ्ऎ लाम् खाङ्मिम्पाचि रेम। टर आक्खाचिऎ निवाँहाङ्ऎ लोमिम्पा मान्खेमुचि हाङ् योवाखङ् हङ्सि मिःॽम बाङ्चि याॽमिचिटे हिङ्चामिम्पा लॆटामि। 21गसॆ योवामि बाप्टिस्मामि खानावाँ खाङ्मुकु। गसॆ आन्ना हिङ्चामिकानि। ग योम्पक् चाइ सालुङमि माइल सगिन्ट हॆॽनॆ टर ग नुऎ निवाँऎ निवाँहाङ् नुङ् युङ्मिम्पा एक्क चुप्लाङ् रेम। गसॆ आन्ना येसु खिरिस्ट सिखॆम्पाबाङ् हिङ्पडॆ योम्पक्बाङ् हिङ्चामिकानि। 22हाङ् खिरिस्ट चाइ पारूबि खॆडा हाङ् निवाँहाङ्मि चुप्ठिङ्पि पेन्डा। हाङ् निवाँखाटॆखुबाचि नुङ् पारूबिहा ढुप्पाट्ट हाङ् चॆक्मावा खोम् हुक्पि चु।
ទើបបានជ្រើសរើសហើយ៖
१ पाट्रुस 3: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society