१ पाट्रुस 5
5
निवाँहाङ्मि बागाला
1ह काङॆ आन्नाबि चुःक्मिहा मान्डालिबिहा काम् लाङ्काम् टुङ्घङ्पाचि लोकुङ्चि। खिरिस्टऎ आङ्मिम्पा डुखा काङॆॽन खाङ्डुङ् हाङ् डॆङ्पि खोमि निङ्लावाबि सङ्क काङा लिःॽङा। कॆ लोकानि, 2निवाँहाङ्ऎ आन्ना पिॽमिम्पा खोमि याॽमिचि काम्नुःर कुखुबा लिसानॆ। काराऎ हॆॽनि, टर चेन्चासे हाङ् याङ् टक्चामॆ निवाँऎ हॆॽनि टर निवाँहाङ्मि योम्पक् यिक्मॆ निवाँऎ ग योम्पक् यिगानॆ। 3हाङ् आन्नामि ढुप्पाट्ट खुक्माबि चुखुबाचि सक्पि ढुप्पाट्ट लॆसे हॆॽनि, टर खोचिम् ङारिङ्पि एक्क टिङ्मा लॆऎ नुऎ याॽमि लिसानॆ। 4हाङ् चोब्नबाङ् ढ्या कुखुबा टामार आन्नॆ हानाम्स याम्खॆॽनॆ निङ्लावा नुङ्मा मुकुट टक्चाकाम्नि। 5हाङ् गरहाङ्न आन्ना वॆन्चाचि सङ्क आन्नामि टुङ्घङ्पाचिम् ढुप्पाट्टबि पेनानॆ। आन्ना मिःछुपा लॆङ्मानुङ् एक्कसॆ होइक खाङ्पॆ चुआनॆ। मान्ठाभनॆ निवाँनेन् साब्चिराऎ गरहाङ् इकु, “निवाँहाङ्ऎ काङानङाये मिन्खुबाचि सिच्चाकुचि टर मिःछुपा लॆङ्खुबाचि नाम्नावाँ लॆकुचि।”#हिटोपाडेस ३:३४ 6मसॆ निवाँहाङ्मि चॆक्मावा नुङ्मा हुक् खुक्माबि मिःछुपा लॆङानॆ। हाङ् खोसॆ आन्ना खोम् नुऎ लःबि टुङ्घङ्पा मुकानि। 7हाङ् आन्नामि हिङ्खामाबिहा चोब्न खानावाँ खोम् हुक्पि युङाम्नॆ, मान्ठाभनॆ खोसॆॽन आन्ना खाङुकानि।
8टाङ्पा टाङ्पेॽन खाङ्से नुःर पेनानॆ। आन्ना सिच्चाखुबा साइटान आसा चाइ भॆट्टकुङ् हाङ् चाइखॆकुङ् कासे किबार वाइटि। 9हाङ् निवाँयुङ्पि चॆकुवॆ लिसे साइटान वोसाम्नॆ। मान्ठाभनॆ चोब्ठाल होइडा निवाँयुङ् लॆखुबाचिऎ सङ्क डुखा आङ्मॆ सिकुचि लोमॆ खानावाँ लेकाम्निन। 10हाङ् एच्छक्म आन्नॆ डुखा आङुकाम्निहाङ् चोब्न नाम्नावाँमि निवाँहाङ्ऎ खोम् हानाम्स लुक्खॆॽनॆ निङ्लावा हाबिसि खिरिस्टबि आन्ना स सेःरुकानि। हाङ् खोसॆॽन आन्ना फेरि उम्चङ् मुकानि हाङ् गिउमिउ आलॆखुबा चॆकुवॆ याॽमिचि मुकानि। 11हानाम्स खोनुङ्न चॆक्मावा लिर। आमिन।
12काङाम् निवाँऎ चोडुवॆ नुसा सिलासऎ पाइबाकिङ् हाङ् कॆ आन्ना ग साब्चिरा साब्हाङ्मे पाइकानि। हाङ् इघा खानावाँ चाइ कॆ आन्ना निवाँहाङ्मि नाम्नावाँमि चुमॆक्सङ् पिॽमा हाङ् आन्नामि निवाँ चॆकुयॆ मुबिॽमाम् लागि साप्मिॽपा रेम। ग खानावाँबि आन्ना चॆकुवॆ लिसे येबानॆ।
13हाङ् आन्ना रक्न निवाँहाङ्ऎ सॆःक्मिम्पा बेबिलोनबिऎ मान्डालिऎ हाङ् काम् पासा रक्मान याॽमि मारकुसऎ स आन्ना स्यामिहाङडामि। 14आन्नामि लुम्पि नाम्नाम् पिसिपे एक्कसॆ होइक स्यामिपे चुआनॆ हाङ् खिरिस्टबि चुखुबा आन्ना चोब्नबि सान्टि लिर।
ទើបបានជ្រើសរើសហើយ៖
१ पाट्रुस 5: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society