Matthew 22
22
Ayeforhyia ase ho bɛ
(Luke 14.15-24)
1Na Jesus buae kasaa kyerɛɛ hɔn mbɛbu mu bio dɛ, 2Ɔsor ahenman no tse dɛ ɔhen bi a ohyiaa ayefor maa ne babanyin, 3na ɔsomaa no nkowaa dɛ wɔnkɛfrɛ hɔn a wohyiaa hɔn ayefor ase no: na wɔammpɛ dɛ wɔba. 4Bio ɔsomaa nkowaa afofor dɛ wɔnkɛka nkyerɛ hɔn a woehyia hɔn no dɛ, Hwɛ, mesiesie m’edziban, meku m’anantwi nye m’anyɛmbowa, na woewie adze nyinara yɛ: hom mbra ayefor ase. 5Na wɔammfa annyɛ hwee, na wɔkɔr hɔn beebi: obi kɔr no kwa mu, obi so kɔr n’eguadzi ho: 6na nkaa no kyeer nkowaa no hyɛɛ hɔn fɛr, na wokum hɔn. 7Na ɔhen no bo fuwii, na ɔsomaa no dɔm ma wɔkɛsɛɛ ewudzifo no, na wɔhyeew hɔn kurow. 8Nna ɔsee no nkowaa no dɛ, Woewie ayefor pon no siesie dze, naaso hɔn a wokehyiaa hɔn no ammfata hɔn. 9Dɛm ntsi hom nkɔ atsempɔn nkwanta do na dodowara a hom bohu hɔn no, hom mfrɛ hɔn mbra ayefor ase. 10Na nkowaa no fiir edzi kɔr atsempɔn do, na wɔkɔboaboaa dodowara a wohun hɔn no ano, papa nye bɔn nyina, ma edzidzifo hyɛɛ ayefor no ase ma.
11 Na ɔhen no baa mu bɔhwɛɛ hɔn a wɔtse edzidzii no, ohun nyimpa bi wɔ hɔ a ɔnnhyɛ ayeforhyia atar; 12na obisaa no dɛ, Awɛ, eyɛɛ dɛn baa mu ha, na ennhyɛ ayeforhyia atar yi? Na ɔtɔɔ mmum. 13#Mat 8.12; 25.30; Luk 13.28 Nna ɔhen no see asomfo no dɛ, Hom nkyekyer ne nsa nye n’anan na hom mfa no nkɔ nkɔtow no nkyen ekyirekyir sum no mu: hɔ na osu nye asetwɛr wɔ. 14Osiandɛ wɔafrɛ pii, naaso kakraabi na woeyi hɔn.
Towtua ho Asɛmbisa
(Mark 12.13-17; Luke 20.20-26)
15Nna Farisiifo no kɔree kɛfaa apam, mbrɛ wobesi esua no efir wɔ kasa mu. 16Na wɔsomaa hɔn esuafo ɔnye Herod akadofo wɔ no hɔ, na wɔsee dɛ, Kyerɛkyerɛfo, yenyim dɛ eyɛ nokwafo, na ekyerɛkyerɛ Nyankopɔn kwan no wɔ nokwar mu, na innsuro nyimpa biara; eso ennhwɛ nyimpa enyim. 17Dɛm ntsi ka kyerɛ hɛn: Edwen dɛn? Ɔfa mbra mu dɛ yɛma Kaesar ntoboa anaa oho? 18Na Jesus hun hɔn emumuyɛ no, ɔsee dɛ, Ndabrabafo, ɔyɛ dɛn na hom rosɔ me hwɛ yi? 19Hom mfa towsika no mbɛkyerɛ me. Na wɔdze sika denare brɛɛ no. 20Na ɔsee hɔn dɛ, Woana no mfonyi nye n’akyerɛwee nye yi? 21Wɔsee dɛ, Kaesar dze a. Nna ɔsee hɔn dɛ, Ntsi hom ndan dza ɔyɛ Kaesar dze mma Kaesar, na dza ɔyɛ Nyankopɔn dze mma Nyankopɔn. 22Na wɔtsee no, ɔyɛɛ hɔn nwanwa, na wogyaa no hɔ kɔree.
Wusoɛr ho Asɛmbisa
(Mark 12.18-27; Luke 20.27-40)
23 #
Ndwu 23.8
Da no ara na Sadusiifo a wɔka dɛ wunyan nnyi hɔ no bae bebisaa no dɛ, 24#Deut 25.5 Kyerɛkyerɛfo, Moses see dɛ, Sɛ obi wu, na sɛ onnyi mba a, no nua nwar ne yer, na ɔnwo mba mma no nua. 25Na enuanom beesuon tsenaa hɛn nkyɛn ha; na nyia odzii kan no waree, na owui, na onnyi mba no ɔdaan ne yer gyaa no nua; 26nyia otsia ebien no nye ebiasa no yɛɛ dɛm ara, bodur nyia otsia esuon no do. 27Na ne nyina ekyir no, ɔbaa no so wui. 28Dɛm ntsi wunyan no mu, beesuon no mu woana na ɔbɛyɛ ne yer? Osiandɛ hɔn nyina waar no. 29Na Jesus buaa hɔn dɛ, Hom fom, osiandɛ hom nnyim kyerɛwsɛm no nye Nyankopɔn no tum so. 30Na wunyan no mu, wɔnnwar eso wɔmma awar, na wɔtse dɛ Nyankopɔn abɔfoe wɔ sor. 31Na ewufo hɔn nyan ho dze, ana hom nnkenkaan dza Nyankopɔn kae no dɛ, 32Emi nye Abraham Nyankopɔn, Isaak Nyankopɔn, Jakob Nyankopɔn no? Ɔnnyɛ ewufo Nyankopɔn na atseasefo Nyankopɔn a. 33Na nyimpadodow no tsee no, ne nkyerɛkyerɛ no yɛɛ hɔn ahobow.
Mbra no Nyina mu dza Ɔso
(Mark 12.28-34; Luke 10.25-28)
34Na Farisiifo no tsee dɛ oemua Sadusiifo no ano no, wodzii ehyia. 35#Luk 10.25-28 Na hɔn mu baako a ɔyɛ mbrakyerɛfo sɔɔ no hwɛe bisaa no dɛ, 36Kyerɛkyerɛfo, Mbra no mu asɛnkɛse nye dza ɔwɔ hen? 37#Deut 6.5 Na ɔsee no dɛ, Dɔ Ewuradze wo Nyankopɔn wɔ w’akoma nyina mu, nye wo kra nyina mu, nye w’adwen nyina mu. 38Iyi nye mbra no mu asɛm a odzi kan, na ɔso. 39#Lev 19.18 Na dza otsia ebien no a ɔtse dɛ ɔno no nye dɛ, Dɔ wo nyɛnko dɛ wankasa woho. 40Mbransɛm ebien yi do na mbra nye nkɔnhyɛfo no nyina gyinae.
Messia no ho Asɛm
(Mark 12.35-37; Luke 20.41-44)
41Na Farisiifo no boaa ano no, Jesus bisaa hɔn dɛ, 42Hom dwen Kraest no ho dɛn? Woana ba nye no? Wɔsee no dɛ, David a. 43Ɔsee hɔn dɛ, Dɛm a ɔyɛ dɛn na David nam Sunsum mu frɛ no Ewuradze, ber a ɔkaa dɛ,
44 #
Dwom 110.1
Ewuradze see m’Ewuradze #22.44 EWURADZE SEE M’EWURADZE: Ewuradze a odzi kan no yɛ Nyankopɔn na dza ɔtɔ do ebien no yɛ Jesus. dɛ,
Tsena m’abanyimfa
Kodu dɛ medze w’atamfo bogu w’ananadze?
45 Na sɛ David frɛ no Ewuradze a, ɔyɛ dɛn na ɔyɛ ne ba? 46Na obiara enntum amma no mbuae biara, na ofitsi da no obiara ennsi no bo dɛ obebisa no asɛm bio.
ទើបបានជ្រើសរើសហើយ៖
Matthew 22: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.
