Matthew 21
21
Jesus Kɔ Jerusalɛm dɛ Konyimdzifo
(Mark 11.1-11; Luke 19.28-40; John 12.12-19)
1Na wɔbɛɛn Jerusalɛm, na wodur Bɛtfage, wɔ Ngo Bepɔw no ho no, Jesus somaa esuafo beenu 2see hɔn dɛ, Hom nkɔ ekuroba a ɔda hom enyim no mu, na ntsɛmara hom bohu asoasopɔnkɔ a wɔamontan no, nye ne ba: hom nsan hɔn na hom mfa mbrɛ me. 3Na sɛ obiara se hom biribi a, hom nse dɛ, Ewuradze wɔ hɔn ho hia, na ntsɛmara ɔbɛma wɔdze aba. 4Na wɔyɛɛ yinom ma dza nkɔnhyɛnyi no kae no aaba mu dɛ,
5 #
Zek 9.9
Hom nse Zion babaa,
Hwɛ, wo hen reba wo nkyɛn:
Ɔdwe, na ɔtse asoasopɔnkɔ do,
nye asoasopɔnkɔ a ɔsoa adze ne ba do.
6Na esuafo no kɔree kɛyɛɛ dɛ mbrɛ Jesus hyɛɛ hɔn no, 7na wɔdze asoasopɔnkɔ no nye ne ba no bae, na wɔdze hɔn ntar guu hɔn do, na ɔtsenaa do. 8Na nyimpadodow pii dze hɔn ntar sesɛɛw kwan no mu, na binom twitwaa ndubaa sesɛɛw kwan no mu. 9#Dwom 118.25, 26 Na nyimpadodow a wodzi enyim no, na hɔn a wodzi ekyir no tseaa mu see dɛ,
Hosanna, David ba no!
Nhyira nye nyia ɔnam Ewuradze dzin mu reba no!
Hosanna wɔ sorsor!
10Na odur Jerusalɛm no, kurow no nyina bɔɔ twitwi bisabisaa dɛ, Iyi woana a? 11Na nyimpadodow no see dɛ, Oyi nye Jesus, nkɔnhyɛnyi a ofi Nazarɛt a ɔwɔ Galilii no.
Jesus Tu Eguadzifo Fi Asɔrfi no mu
(Mark 11.15-19; Luke 19.45-48; John 2.13-22)
12Na Jesus kɔr Nyankopɔn asɔrfi no mu, na ɔkɛpaam hɔn a wɔtɔn nye hɔn a wɔtɔ wɔ asɔrfi no mu, na obutuuw sikasesafo hɔn apon nye hɔn a wɔtɔn mbubur no hɔn ngua; 13#Isa 56.7; Jer 7.11 na ɔsee hɔn dɛ, Wɔakyerɛw dɛ,
Wɔbɛfrɛ me fi asɔryɛbea:
na hom dze, hom reyɛ no edwotwafo tu.
14Na enyifurafo nye mpakye baa no hɔ wɔ asɔrfi no mu, na ɔsaa hɔn yarba. 15Na asɔfompanyin nye akyerɛwfo no hun anwanwadze a ɔyɛe no, ɔnye mbofraba a wɔretseatsea mu wɔ asɔrfi no mu dɛ, Hosanna, David ba no, wonyaa ebufuw pii, 16#Dwom 8.2 na wɔsee no dɛ, Etse dza yinom reka yi? Na Jesus see hɔn dɛ, Nyew: ana hom nnkenkaan pɛn dɛ,
Nkɔkowaba nye numfoanomba anomu,
na ɔwo esiesie ayɛyi ama woho anaa?
17Na ogyaa hɔn hɔ, na ofii kurow no mu kɔr Bɛtani kɛtsenaa hɔ.
Jesus Dom Adɔmbadua
(Mark 11.12-14, 20-24)
18Na anapa no a ɔresan aba kurow no mu no, ɔkɔm dzee no. 19Na ohun adɔmbadua wɔ kwan no do no, ɔbaa ho naaso oennhu biribiara wɔ do dɛ ahaban nko; na ɔsee no dɛ, Mma aba nnsow wo do dabiarada. Na amonmu hɔ ara adɔmbadua no kyenkyenee. 20Na esuafo no hunii no, ɔyɛɛ hɔn nwanwa, na wɔsee dɛ, Ɔyɛ dɛn na amonmu ha yi ara adɔmbadua yi akyenkyen yi? 21#Mat 17.20; 1 Kor 13.2 Na Jesus buae see hɔn dɛ, Nokwar mese hom dɛ, Sɛ hom wɔ gyedzi, na hom nnyɛ ekyingye a, nkyɛ nnyɛ adɔmbadua dze yi nko na hom bɛyɛ, na mpo sɛ hom se koko yi dɛ, Tutu na kɔhwe po mu, a, nkyɛ ɔbɛyɛ. 22Na biribiara a hom bebisa no mpaabɔ mu, na hom gye dzi no, hom nsa bɛka.
Jesus no Tum ho Asɛmbisa
(Mark 11.27-33; Luke 20.1-8)
23Na ɔbaa asɔrfi mu, na ɔrekyerɛkyerɛ no, asɔfompanyin nye ɔman mpanyimfo no baa ne nkyɛn bebisaa no dɛ, Ebɛn tum na enam do yɛ ndzɛmba yi, na woana maa wo tum yi? 24Na Jesus buae see hɔn dɛ, Mo so mibebisa hom asɛm kor a sɛ hom kyerɛ me ano a, mo so mebɛkyerɛ hom tum kor a medze meyɛ yinom. 25John enuma no, ofi hen? Ofi sor anaa ofi nyimpa? Na wosusui wɔ hɔn mu dɛ, Sɛ yɛka dɛ, Ofi sor, a, ɔbɛse hɛn dɛ, Ɔyɛ dɛn na hom anngye enndzi? 26Na sɛ yɛka dɛ, Ofi nyimpa, a, yesuro nyimpadodow no: osiandɛ hɔn nyina bu John nkɔnhyɛnyi. 27Na wobuaa Jesus see dɛ, Yennyim. Na no so see hɔn dɛ, Mo so merennka tum kor a medze yɛ yinom mennkyerɛ hom.
Mbabanyin Beenu no ho Abɛbu
28 Hom dwen iyi ho dɛn? Nyimpa bi wɔ mba beenu; na ɔbaa nyia odzi kan no hɔ bɛsee no dɛ, Ɔba, ndɛ kɔ kɛyɛ mo wenyin ture mu edwuma. 29Na obuae see dɛ, Moronnkɔ, na n’ekyir no onuu noho na ɔkɔree. 30Na ɔbaa nyia otsia ebien no hɔ bɛsee no dɛmara. Na obuae see dɛ, Mo wura, mobɔkɔ, naaso ɔannkɔ. 31Hɔn beenu yi mu woana na ɔyɛɛ n’egya ne pɛ? Wɔsee dɛ, Nyia odzi kan no a. Jesus see hɔn dɛ, Meka no nokwar mu dɛ, towgyefo nye ndwaman ridzi hom enyim akɔ Nyankopɔn ahenman no mu. 32#Luk 3.12; 7.29, 30 Na John nam tsenenee kwan mu baa hom nkyɛn, na hom anngye no enndzi: na towgyefo nye ndwaman gyee no dzii: na hom dze, hom hunii no hom ammfe homho ekyir dɛ hom bɛgye no edzi.
Wenyin Ture mu Ahwɛfo ho Abɛbu
(Mark 12.1-12; Luke 20.9-19)
33 #
Isa 5.1, 2 Hom ntsie bɛ fofor so: asaasewura bi wɔ hɔ a ɔyɛɛ wenyin ture, na ɔgyee ho ban hyiae, na otuu wenyintwer, na ɔtoow abantsentsen wɔ mu, na ɔdze fɛɛm ekuafo bi, na ɔdɔɔ mu kɔr beebi. 34Na eduaba no ne ber durii no, ɔsomaa no nkowaa wɔ ekuafo no nkyɛn dɛ wɔnkɛgye n’eduaba no. 35Na ekuafo no kyeer no nkowaa no, na wɔhwee bi, na wokum bi, na wosiiw bi abo. 36Bio, ɔsomaa nkowaa fofor a wɔdɔɔ so kyɛn nkan dze no; na wɔyɛɛ hɔn dɛmara. 37Na n’ekyir no, ɔsomaa ne babanyin wɔ hɔn hɔ, na ɔsee dɛ, Wɔbɛfɛr me ba. 38Naaso ekuafo no hun babanyin no, wɔsesee wɔ hɔn mu dɛ, Nyia a odzi adze no nye yi: hom mbra ma yenku no, na yɛmfa n’egyapadze no. 39Na wɔkyeer no, na wɔtoow no fii wenyin ture mu hɔ kyenee, na wokum no. 40Dɛm ntsi aber a wenyin ture no wura bɛba, ebɛnadze na ɔbɛyɛ ekuafo no? 41Wɔsee no dɛ, Ɔbɛsɛɛ nyimpa bɔn no pasaa, na ɔdze no wenyin ture no afɛm ekuafo fofor a wɔdze eduaba no bɛma no wɔ n’aber mu.
42 #
Dwom 118.22, 23 Jesus see hɔn dɛ, Ana hom nnkenkaan kyerɛwsɛm no mu pɛn dɛ,
Ɔbo a adantofo powee no,
Ɔnoara na ɔabɛyɛ kutuwdo bo;
Iyi Ewuradze na ɔayɛ,
Na ɔyɛ nwanwa wɔ hɛn enyiwa do?
43 Dɛm ntsi mese hom dɛ, Nyankopɔn ahenman no, wɔbɛgye efi hom nsamu dze akɛma ɔman a wɔdze mu eduaba bɛba. 44Na obiara a ɔbɔhwe ɔbo yi do no obobubu, na obiara a ɔbo no bɔhwe no do no, ɔbɔdwow no dɛ isiam. 45Na asɔfompanyin nye Farisiifo no tsee ne mbɛ no, wohun dɛ ɔkaa hɔn ho asɛm. 46Na wɔhwehwɛɛ dɛ wɔkyer no no, wosuroo nyimpadodow no, osiandɛ nna wobu no nkɔnhyɛnyi.
ទើបបានជ្រើសរើសហើយ៖
Matthew 21: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.
